Auto Tips: ಕಾರು ಓಡಿಸುವಾಗ ಇದ್ದಕ್ಕಿದ್ದಂತೆ ಬ್ರೇಕ್ ಫೇಲ್ ಆದರೆ ತಪ್ಪಿಯೂ ಹೀಗೆ ಮಾಡಬೇಡಿ

ಅನೇಕ ಬಾರಿ ಜನರು ತರಾತುರಿಯಲ್ಲಿ ತಮ್ಮ ಕಾರನ್ನು ಪರಿಶೀಲಿಸದೆ ಸ್ಟಾರ್ಟ್ ಮಾಡಿ ಓಡಿಸುತ್ತಾರೆ. ಆದರೆ, ಹೀಗೆ ಮಾಡುವುದು ಅಪಾಯಕಾರಿಯಾಗಬಹುದು. ಬ್ರೇಕ್‌ಗಳನ್ನು ಒತ್ತಿದಾಗ, ಕಾರಿನ ಬ್ರೇಕಿಂಗ್ ಸಿಸ್ಟಮ್ ಕಾರ್ಯನಿರ್ವಹಿಸುತ್ತಿಲ್ಲ ಎಂದು ತಿಳಿದಾಗ ಅನೇಕ ಅಪಘಾತಗಳು ಆಗಿರುವ ಪ್ರಕರಣಗಳು ನಮ್ಮ ಕಣ್ಣ ಮುಂದಿಇದೆ. ಅಂತಹ ಕಷ್ಟಕರ ಸಂದರ್ಭಗಳನ್ನು ಯಾರು ಬೇಕಾದರೂ ಎದುರಿಸಬಹುದು. ಆದರೆ ಆ ಸಂದರ್ಭ ಭಯಪಡುವ ಅಗತ್ಯವಿಲ್ಲ. ಇಂತಹ ಪರಿಸ್ಥಿತಿಯಲ್ಲಿ ಸ್ವಲ್ಪ ಎಚ್ಚರವಹಿಸಿದರೆ ದೊಡ್ಡ ಅಪಘಾತ ತಪ್ಪಿಸಿ ಪ್ರಾಣ ಉಳಿಸಬಹುದು.

ಭಯಪಡಬೇಡಿ ಮತ್ತು ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳಿ:

ಮೊದಲನೆಯದಾಗಿ, ಭಯಪಡಬೇಡಿ ಮತ್ತು ಪರಿಸ್ಥಿತಿಯನ್ನು ಶಾಂತವಾಗಿ ನಿಭಾಯಿಸಲು ಪ್ರಯತ್ನಿಸಿ. ಪರಿಸ್ಥಿತಿಯನ್ನು ನಿಯಂತ್ರಣದಲ್ಲಿಡಲು, ಎಚ್ಚರಿಕೆಯಿಂದ ಚಾಲನೆ ಮಾಡಿ ಮತ್ತು ಯಾವುದೇ ತ್ವರಿತ ನಿರ್ಧಾರಗಳನ್ನು ತೆಗೆದುಕೊಳ್ಳಬೇಡಿ.

ಹ್ಯಾಂಡ್ಬ್ರೇಕ್ ಬಳಸಿ

ಹ್ಯಾಂಡ್‌ಬ್ರೇಕ್ (ತುರ್ತು ಬ್ರೇಕ್) ಅನ್ನು ನಿಧಾನವಾಗಿ ಬಳಸಿ. ಹಠಾತ್ತನೆ ಎಳೆಯುವ ಬದಲು ನಿಧಾನವಾಗಿ ಮೇಲಕ್ಕೆತ್ತಿ, ಕಾರು ಏಕಾಏಕಿ ನಿಲ್ಲದಂತೆ ನಿಯಂತ್ರಣವನ್ನು ಕಾಯ್ದುಕೊಳ್ಳಲಾಗುತ್ತದೆ. ಹ್ಯಾಂಡ್‌ಬ್ರೇಕ್ ಕಾರಿನ ವೇಗವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ಕಡಿಮೆ ಗೇರ್ಗೆ ಬದಲಿಸಿ

ನೀವು ಮ್ಯಾನ್ಯುವಲ್ ಕಾರನ್ನು ಓಡಿಸುತ್ತಿದ್ದರೆ, ತಕ್ಷಣವೇ ಕಡಿಮೆ ಗೇರ್‌ಗೆ (4 ರಿಂದ 3, 3 ರಿಂದ 2 ಹಾಗೂ 1ನೇ ಗೇರ್) ಬದಲಾಯಿಸಿ. ಇದು ಎಂಜಿನ್ ಬ್ರೇಕಿಂಗ್ ಅನ್ನು ಉಂಟುಮಾಡುತ್ತದೆ. ಇದು ಕಾರಿನ ವೇಗವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ನೀವು ಸ್ವಯಂಚಾಲಿತ ಕಾರನ್ನು ಕಡಿಮೆ ಗೇರ್‌ಗೆ (L ಅಥವಾ D1) ಬದಲಾಯಿಸಬಹುದು.

ಹಾರ್ನ್ ಮತ್ತು ಲೈಟ್ ಬಳಸಿ

ನೀವು ಟ್ರಾಫಿಕ್‌ನಲ್ಲಿದ್ದರೆ, ತಕ್ಷಣವೇ ಹಾರ್ನ್ ಮಾಡಿ ಮತ್ತು ನಿಮ್ಮ ಹೆಡ್‌ಲೈಟ್‌ಗಳನ್ನು ಫ್ಲ್ಯಾಷ್ ಮಾಡಿ. ಇದರಿಂದ ಇತರ ಚಾಲಕರು ನಿಮ್ಮ ತುರ್ತು ಪರಿಸ್ಥಿತಿಯನ್ನು ತಿಳಿದುಕೊಳ್ಳುತ್ತಾರೆ ಮತ್ತು ದಾರಿ ಮಾಡಿಕೊಡುತ್ತಾರೆ. ಇದು ಅಪಘಾತವನ್ನು ತಪ್ಪಿಸಲು ನಿಮಗೆ ಸಮಯ ಮತ್ತು ಸ್ಥಳವನ್ನು ನೀಡುತ್ತದೆ.

ಸುರಕ್ಷಿತ ಜಾಗ

ನಿಮ್ಮ ಅಕ್ಕ ಪಕ್ಕದಲ್ಲಿ ಕಾರನ್ನು ಸುರಕ್ಷಿತವಾಗಿ ನಿಲ್ಲಿಸುವ ಮಾರ್ಗವನ್ನು ನೋಡಿ. ತೆರೆದ ಮೈದಾನಗಳು, ಖಾಲಿ ರಸ್ತೆಗಳು ಅಥವಾ ರಸ್ತೆಬದಿಗಳಂತಹ ಸ್ಥಳಗಳಲ್ಲಿ ವಾಹನವನ್ನು ನಿಧಾನಗೊಳಿಸಲು ಮತ್ತು ನಿಲ್ಲಿಸಲು ಪ್ರಯತ್ನಿಸಿ. ಇದು ಅಪಘಾತದ ಅಪಾಯವನ್ನು ಕಡಿಮೆ ಮಾಡುತ್ತದೆ.

ಪಂಪ್ ಪೆಡಲ್

ಬ್ರೇಕ್‌ಗಳು ಸಂಪೂರ್ಣವಾಗಿ ವಿಫಲವಾದರೆ, ಬ್ರೇಕ್ ಪೆಡಲ್ ಅನ್ನು ಪದೇ ಪದೇ ಪಂಪ್ ಮಾಡಿ. ಕೆಲವೊಮ್ಮೆ ಬ್ರೇಕ್ ಸಿಸ್ಟಮ್‌ನಲ್ಲಿನ ಒತ್ತಡವು ಕಡಿಮೆಯಾಗಬಹುದು ಮತ್ತು ಪೆಡಲ್ ಅನ್ನು ಪಂಪ್ ಮಾಡುವುದರಿಂದ ಬ್ರೇಕ್‌ಗಳು ಪುನಃ ಕಾರ್ಯನಿರ್ವಹಿಸಲು ಪ್ರಾರಂಭಿಸಬಹುದು. ಇನ್ನು ಕಾರು ಯಾವುದೇ ರೀತಿಯಲ್ಲಿ ನಿಲ್ಲದಿದ್ದರೆ ಮತ್ತು ಅಪಘಾತದ ಅಪಾಯವು ಹೆಚ್ಚಾಗುತ್ತಿದ್ದರೆ, ನೀವು ನಿಧಾನ ವೇಗದಲ್ಲಿ ಕಾರನ್ನು ಸುರಕ್ಷಿತ ಸ್ಥಳವನ್ನು ಆರಿಸಿ ಡಿಕ್ಕಿ ಹೊಡೆಸಬಹುದು. ಇದನ್ನು ಕೊನೆಯ ಉಪಾಯವಾಗಿ ಬಳಸಿ.

ಎಂದಿಗೂ ಹೀಗೆ ಮಾಡಬೇಡಿ:

ಚಲಿಸುವಾಗ ಬ್ರೇಕ್ ಫೇಲ್ ಆಯಿತು ಎಂದರೆ ನೀವು ಎಂಜಿನ್ ಅನ್ನು ಎಂದಿಗೂ ನಿಲ್ಲಿಸಬೇಡಿ. ಇದು ಸ್ಟೀರಿಂಗ್ ಮತ್ತು ಪವರ್ ಅಸಿಸ್ಟ್ ವಿಫಲಗೊಳ್ಳಲು ಕಾರಣವಾಗುತ್ತದೆ, ಆಗ ಕಾರನ್ನು ನಿಯಂತ್ರಿಸಲು ಇನ್ನಷ್ಟು ಕಷ್ಟವಾಗುತ್ತದೆ.