ಕೋವಿಡ್ ಪ್ರಕರಣ ಹೆಚ್ಚಳ: ಪ್ರಯಾಣ ಕಾರಿಡಾರ್ ಪಟ್ಟಿಯಿಂದ ಯುಎಇ ತೆಗೆದುಹಾಕಿದ ಬ್ರಿಟನ್

ಮಂಗಳವಾರ ಬೆಳಗ್ಗಿನ ಜಾವ 4 ಗಂಟೆಗೆ ಯುಎಇಯಿಂದ ಇಂಗ್ಲೆಂಡ್, ವೇಲ್ಸ್, ಸ್ಕಾಟ್ ಲೆಂಡ್ ಮತ್ತು ಉತ್ತರ ಐರ್​ಲೆಂಡ್​ಗೆ ಬಂದಿಳಿದ ಪ್ರಯಾಣಿಕರು 10 ದಿನಗಳ ಕಾಲ ಸ್ವಯಂ ಐಸೋಲೇಟ್ ಆಗಬೇಕು ಎಂದು ಸಾರಿಗೆ ಸಂಪರ್ಕ ಇಲಾಖೆ ನಿರ್ದೇಶಿಸಿದೆ.

  • TV9 Web Team
  • Published On - 16:25 PM, 12 Jan 2021
ಪ್ರಾತಿನಿಧಿಕ ಚಿತ್ರ

ಲಂಡನ್: ಕೋವಿಡ್-19 ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಸಂಯುಕ್ತ ಅರಬ್ ರಾಷ್ಟ್ರವನ್ನು (ಯುಎಇ) ತಮ್ಮ ಪ್ರಯಾಣ ಕಾರಿಡಾರ್ ಪಟ್ಟಿಯಿಂದ (ಎರಡು ದೇಶಗಳ ನಡುವಿನ ವಿಮಾನಯಾನ) ತಗೆದು ಹಾಕಿರುವುದಾಗಿ ಬ್ರಿಟನ್ ಸಾರಿಗೆ ಸಂಪರ್ಕ ಇಲಾಖೆ ಹೇಳಿದೆ.

ಮಂಗಳವಾರ ಮುಂಜಾನೆ 4 ಗಂಟೆಗೆ ಯುಎಇಯಿಂದ ಇಂಗ್ಲೆಂಡ್, ವೇಲ್ಸ್, ಸ್ಕಾಟ್​ಲೆಂಡ್ ಮತ್ತು ಉತ್ತರ ಐರ್​ಲೆಂಡ್​ಗೆ ಬಂದಿಳಿದ ಪ್ರಯಾಣಿಕರು 10 ದಿನಗಳ ಕಾಲ ಸ್ವಯಂ ಐಸೋಲೇಟ್ ಆಗಬೇಕು ಎಂದು ಸಾರಿಗೆ ಸಂಪರ್ಕ ಇಲಾಖೆ ನಿರ್ದೇಶಿಸಿದೆ. ಕಳೆದ ಒಂದು ವಾರದಲ್ಲಿ ಯುಎಇಯಲ್ಲಿ ಶೇ. 52ರಷ್ಟು ಕೋವಿಡ್ ಪ್ರಕರಣಗಳ ಸಂಖ್ಯೆ ಜಾಸ್ತಿಯಾಗಿದೆ.

ಬ್ರಿಟನ್ ನ ಪ್ರಯಾಣ ಕಾರಿಡಾರ್ ಪಟ್ಟಿಯಿಂದ ತಕ್ಷಣವೇ ಯುಎಇಯನ್ನು ತೆಗೆದುಹಾಕಬೇಕು ಎಂದು ಬ್ರಿಟಿಷ್ ಸಾರಿಗೆ ಸಚಿವ ಗ್ರಾಂಟ್ ಶಪ್ಸ್ ಟ್ವೀಟ್ ಮಾಡಿದ್ದಾರೆ .

ಈಗಿರುವ ನಿಯಮಗಳ ಪ್ರಕಾರ ಯುಎಇ ಸೇರಿದಂತೆ ಇತರ ದೇಶಗಳಿಂದ ಬರುವ ಪ್ರಯಾಣಿಕರು ಇಂಗ್ಲೆಂಡ್ ಅಥವಾ ಸ್ಕಾಟ್ಲೆಂಡ್ ಗೆ ಪ್ರಯಾಣ ಬೆಳೆಸುವುದಕ್ಕಿಂತ ಮೂರು ದಿನ ಮುನ್ನ ಕೋವಿಡ್ ಪರೀಕ್ಷೆಗೊಳಗಾಗಿ ರೋಗ ಇಲ್ಲ ಎಂಬ ಪರೀಕ್ಷಾ ವರದಿ ಸಲ್ಲಿಸಬೇಕು.

ಒಂದೆಡೆ ಕೋವಿಡ್​ನಿಂದ ಸಾವಿನ ಸಂಖ್ಯೆ ಹೆಚ್ಚುತ್ತಿದ್ದರೆ ಇನ್ನೊಂದೆಡೆ ಆಸ್ಪತ್ರೆಗಳಲ್ಲಿ ಆಕ್ಸಿಜನ್ ಕೊರತೆ ಕಾಡುತ್ತಿತ್ತು. ಈ ಹೊತ್ತಲ್ಲಿ ಬ್ರಿಟನ್ ಕೋವಿಡ್ ಲಸಿಕೆ ಪ್ರಕ್ರಿಯೆ ಆರಂಭಿಸಿದ್ದು, ಇದು ಸಮಯದ ವಿರುದ್ಧದ ಓಟ ಎಂದು ಪ್ರಧಾನಿ ಬೋರಿಸ್ ಜಾನ್ಸನ್ ಹೇಳಿದ್ದರು.

ಯುಎಇನಲ್ಲಿ ಕೋವಿಡ್ ಪ್ರಕರಣ ಏರಿಕೆಯಾಗುತ್ತಿದ್ದು, ಕಳೆದ ವಾರ ಅಬುದಾಬಿಯಲ್ಲಿ ರಷ್ಯಾ ಅಭಿವೃದ್ಧಿಪಡಿಸಿದ ಸ್ಪುಟ್ನಿಕ್ V ಕೋವಿಡ್ ಲಸಿಕೆಯ ಮೂರನೇ ಹಂತದ ಕ್ಲಿನಿಕಲ್ ಟ್ರಯಲ್ ನಡೆದಿದೆ.

ವೇಗ ಪಡೆದುಕೊಂಡ ರೂಪಾಂತರ ಕೊರೊನಾ: ಬ್ರಿಟನ್​ನಲ್ಲಿ ಮತ್ತೆ ಲಾಕ್‌ಡೌನ್ ಘೋಷಿಸಿದ ಪ್ರಧಾನಿ ಬೋರಿಸ್ ಜಾನ್ಸನ್‌