Fake message: ಪ್ಯಾನ್ ಅಪ್ಡೇಟ್ ಮಾಡಲು ಎಸ್ಬಿಐ ಹೆಸರಲ್ಲಿ ನಕಲಿ ಮೆಸೇಜ್; ಕ್ಲಿಕ್ ಮಾಡಿ ಮೋಸ ಹೋಗದಿರಿ ಹುಷಾರ್…
PAN upgrade scam alert: ಕ್ಯೂಆರ್ ಕೋಡ್ ಇರುವ ಹೊಸ ಪ್ಯಾನ್ ಕಾರ್ಡ್ ಅನ್ನು ಆದಾಯ ತೆರಿಗೆ ಇಲಾಖೆ ವಿತರಿಸಲಿದೆ. ಹಳೆಯ ಪ್ಯಾನ್ ಕಾರ್ಡ್ ಬದಲು ಹೊಸ ಕಾರ್ಡ್ ಪಡೆಯಬೇಕು ಎನ್ನುವ ಸುದ್ದಿ ಇದೆ. ಇದರ ಬೆನ್ನಲ್ಲೇ ವಂಚಕರು ನಕಲಿ ಮೆಸೇಜ್ಗಳ ಮೂಲಕ ಅಮಾಯಕರನ್ನು ಯಾಮಾರಿಸುವ ಕೆಲಸ ಮಾಡುತ್ತಿದ್ದಾರೆ. ಹೊಸ ಪ್ಯಾನ್ ಕಾರ್ಡ್ ಅಪ್ಡೇಟ್ ಮಾಡಬೇಕೆಂದು ಎಪಿಕೆ ಫೈಲ್ ಡೌನ್ಲೋಡ್ ಮಾಡುವ ಲಿಂಕ್ ಅನ್ನು ಕಳುಹಿಸಲಾಗುತ್ತಿದೆ. ಗ್ರಾಹಕರು ಎಚ್ಚರದಿಂದರಬೇಕು.
ಬೆಂಗಳೂರು, ನವೆಂಬರ್ 27: ಈಗ ಅಪ್ಗ್ರೇಡೆಡ್ ಪಾನ್ ಕಾರ್ಡ್ ಅನ್ನು ಆದಾಯ ತೆರಿಗೆ ಇಲಾಖೆ ನೀಡಲಿದೆ. ಹಳೆಯ ಪ್ಯಾನ್ ಕಾರ್ಡ್ ಹೊಂದಿರುವವರು ಹೊಸ ಕಾರ್ಡ್ ಪಡೆಯಬೇಕಾಗುತ್ತದೆ. ಈ ಸುದ್ದಿಯನ್ನು ವಂಚಕರು ದುರಪಯೋಗಪಡಿಸಿಕೊಳ್ಳಲು ಮುಂದಾಗಿದ್ದಾರೆ. ನಿಮ್ಮ ಹಳೆಯ ಪ್ಯಾನ್ ಕಾರ್ಡ್ನಿಂದಾಗಿ ಅಕೌಂಟ್ ನಿಷ್ಕ್ರಿಯವಾಗುತ್ತಿದೆ. ಅದನ್ನು ಆ್ಯಕ್ಟಿವೇಟ್ ಮಾಡಲು ಪ್ಯಾನ್ ಕಾರ್ಡ್ ಅನ್ನು ಅಪ್ಡೇಟ್ ಮಾಡಬೇಕು ಎಂದು ಹೇಳಿ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಹೆಸರಿನಲ್ಲಿ ಮೆಸೇಜ್ಗಳು ಬರುತ್ತಿವೆ. ಈ ರೀತಿಯ ಮೆಸೇಜ್ಗಳು ತಮಗೆ ಬಂದಿರುವುದಾಗಿ ಹಲವು ಜನರು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.
ಪ್ಯಾನ್ ಕಾರ್ಡ್ ಅಪ್ಗ್ರೇಡ್ ಮಾಡಲು ಒಂದು ಎಪಿಕೆ ಫೈಲ್ ಅನ್ನು ಡೌನ್ಲೋಡ್ ಮಾಡಬೇಕೆಂದು ಒಂದು ಲಿಂಕ್ ಅನ್ನೂ ಆ ಮೆಸೇಜ್ನಲ್ಲಿ ನೀಡಲಾಗಿದೆ. ಅಕಸ್ಮಾತ್ ಯಾರಾದರೂ ಅಮಾಯಕ ಗ್ರಾಹಕರು ಆ ಎಪಿಕೆ ಫೈಲ್ ಅನ್ನು ಡೌನ್ಲೋಡ್ ಮಾಡಿ ತಮ್ಮ ಮೊಬೈಲ್ಗೆ ಇನ್ಸ್ಟಾಲ್ ಮಾಡಿದಲ್ಲಿ ಅವರ ಡಾಟಾವೆಲ್ಲವೂ ವಂಚಕರ ಪಾಲಾಗಬಹುದು. ಎಸ್ಬಿಐ ಆಗಲೀ ಯಾವುದೇ ಬ್ಯಾಂಕ್ ಆಗಲೀ ಎಪಿಕೆ ಫೈಲ್ ಅನ್ನು ಡೌನ್ಲೋಡ್ ಮಾಡಲು ಕೇಳುವುದಿಲ್ಲ.
ಇದನ್ನೂ ಓದಿ: ಅಮೆರಿಕದ ಚಾರ್ಜ್ಶೀಟ್ನಲ್ಲಿ ಗೌತಮ್ ಅದಾನಿ ವಿರುದ್ಧ ಲಂಚದ ಆರೋಪವಿಲ್ಲ: ಅದಾನಿ ಗ್ರೀನ್ ಸ್ಪಷ್ಟನೆ
ಎಸ್ಬಿಐ ಹೆಸರಿನಲ್ಲಿ ಬಂದ ಮೆಸೇಜ್ ಹೀಗಿದೆ…
‘ಪ್ರಿಯ ಗ್ರಾಹಕರೆ, ಹಳೆಯ ಪ್ಯಾನ್ ಕಾರ್ಡ್ ಇರುವುದರಿಂದ ನಿಮ್ಮ ಎಸ್ಬಿಐ ಯೋನೋ ಅಕೌಂಟ್ ಅನ್ನು ಇವತ್ತು ತಡೆಹಿಡಿಯಲಾಗುತ್ತದೆ. ನಿಮ್ಮ ಪ್ಯಾನ್ ಕಾರ್ಡ್ ದಾಖಲೆಗಳನ್ನು ಎಸ್ಬಿಐ ಯೋನೋ ಆ್ಯಪ್ನಲ್ಲಿ ಅಪ್ಲೋಡ್ ಮಾಡಿರಲಾಗುತ್ತದೆ. ಈಗ ಡಬ್ಲ್ಯುಬಿಐ ಎಪಿಕೆ ಅನ್ನು ಇನ್ಸ್ಟಾಲ್ ಮಾಡಿ, ನಿಮ್ಮ ಆ ಪ್ಯಾನ್ ದಾಖಲೆಗಳು ಸರಿಯಾಗಿವೆಯಾ ಎಂದು ಪರಿಶೀಲಿಸಿ’ ಎಂದು ಈ ಮೆಸೇಜ್ನಲ್ಲಿ ಬರೆಯಲಾಗಿದೆ.
ಹಾಗೆಯೇ, ‘ಯೋನೋ ಎಸ್ಬಿಐ ಸೆಲ್ಫ್ ಪ್ಯಾನ್ ಅಪ್ಡೇಟ್’ ಎನ್ನುವ ಹೆಸರಿನಲ್ಲಿ ಎಪಿಕೆ ಫೈಲ್ನ ಅಟ್ಯಾಚ್ಮೆಂಟ್ ಅನ್ನೂ ಮತ್ತೊಂದು ಮೆಸೇಜ್ನಲ್ಲಿ ಲಗತ್ತಿಸಲಾಗಿದೆ. ಇದು ವಂಚಕರ ಜಾಲ.
ಇದನ್ನೂ ಓದಿ: ಪ್ಯಾನ್ 2.0 ಘೋಷಿಸಿದ ಸರ್ಕಾರ; ಹಳೆಯ ಪ್ಯಾನ್ ಕಾರ್ಡ್ ಅಸಿಂಧುಗೊಳ್ಳುತ್ತಾ? ಕ್ಯೂಆರ್ ಕೋಡ್ ಇರುವ ಪ್ಯಾನ್ ಪಡೆಯುವುದು ಹೇಗೆ?
ಆನ್ಲೈನ್ ಪ್ಲಾಟ್ಫಾರ್ಮ್ಗಳಲ್ಲಿ ನಿಮ್ಮನ್ನು ವಂಚಿಸಲು ಸಾಕಷ್ಟು ದಾರಿಗಳನ್ನು ದುರುಳರು ಹುಡುಕುವುದುಂಟು. ಈಗ ಬಹಳ ಸಾಮಾನ್ಯವಾಗಿ ಬಳಸಲಾಗುವ ಮಾರ್ಗ ಎಂದರೆ ಅದು ವಂಚಕ ಲಿಂಕ್ಗಳದ್ದು. ಮೊಬೈಲ್ಗೆ ಮೆಸೆಂಜರ್ನಲ್ಲಿ ಟೆಕ್ಸ್ಟ್ ಮೆಸೇಜ್ ಮೂಲಕವೋ ಅಥವಾ ವಾಟ್ಸಾಪ್, ಟೆಲಿಗ್ರಾಮ್ಗಳಲ್ಲಿ ಟೆಕ್ಸ್ಟ್ ಮೆಸೇಜ್ ಮೂಲಕವೋ ಲಿಂಕ್ ಕಳುಹಿಸಲಾಗುತ್ತದೆ. ಮೂಲ ಯುಆರ್ಎಲ್ ಅನ್ನು ಮರೆಮಾಚಿದ ಈ ಲಿಂಕ್ ಅನ್ನು ಕ್ಲಿಕ್ ಮಾಡಿದರೆ ವೈರಸ್ ಇರುವ ಫೈಲ್ ನಿಮ್ಮ ಮೊಬೈಲ್ ಅಥವಾ ಸಿಸ್ಟಂಗೆ ಇನ್ಸ್ಟಾಲ್ ಆಗುತ್ತದೆ.
ಇನ್ನು ಎಪಿಕೆ ಫೈಲ್ಗಳೂ ಕೂಡ ವಂಚಕರಿಗೆ ಪ್ರಬಲ ಅಸ್ತ್ರಗಳಾಗಿರುತ್ತವೆ. ಇವುಗಳು ಮೊಬೈಲ್ನ ಸಂಪೂರ್ಣ ನಿಯಂತ್ರಣವನ್ನು ವಂಚಕರಿಗೆ ಕೊಡುತ್ತವೆ. ಒಂದು ವೇಳೆ ನೀವು ಪ್ಯಾನ್ ಕಾರ್ಡ್ ಬಗ್ಗೆ ಮಾಹಿತಿ ತಿಳಿಯಬೇಕಿದ್ದರೆ ಆದಾಯ ತೆರಿಗೆ ಇಲಾಖೆಯ ಅಧಿಕೃತ ವೆಬ್ಸೈಟ್ಗೆ ಹೋಗಬಹುದು. ಅಥವಾ ಇಲಾಖೆಯ ಅಧಿಕೃತ ಸೋಷಿಯಲ್ ಮೀಡಿಯಾ ಹ್ಯಾಂಡಲ್ಗಳಿಗೆ ಹೋಗಿ ಅಪ್ಡೇಟ್ಸ್ ತಿಳಿಯಬಹುದು. ಇದು ಐಟಿ ಸಂಬಂಧಿಸಿದಂತೆ ಮಾತ್ರವಲ್ಲ, ಯಾವುದೇ ಮಾಹಿತಿಯಾದರೂ ಅಧಿಕೃತ ಮೂಲಗಳಿಂದ ಪಡೆಯುವುದು ಸರಿಯಾದ ವಿಧಾನ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ