ಭಾರತ್ಜೆನ್: ಸಂಪೂರ್ಣ ದೇಶೀಯವಾಗಿ ತಯಾರಾದ ಭಾರತದ ಮೊದಲ ಮಲ್ಟಿಮೋಡಲ್ ಎಲ್ಎಲ್ಎಂ; ಸರ್ವಂ ಎಐಗಿಂತ ಇದು ಹೇಗೆ ಭಿನ್ನ?
Bharat Gen, India's first multimodal LLM: ಭಾರತ ಸರ್ಕಾರದ ಬೆಂಬಲದೊಂದಿಗೆ ತಯಾರಾದ ಭಾರತ್ಜೆನ್ ಎನ್ನುವ ಮಲ್ಟಿಮೋಡಲ್ ಎಲ್ಎಲ್ಎಂ ಬಿಡುಗಡೆಯಾಗಿದೆ. ಇದು ಸಂಪೂರ್ಣವಾಗಿ ದೇಶೀಯವಾಗಿ ರೂಪುಗೊಂಡ ಭಾರತದ ಮೊದಲ ಮಲ್ಟಿಮೋಡಲ್ ಲಾರ್ಜ್ ಲ್ಯಾಂಗ್ವೇಜ್ ಮಾಡಲ್ ಎನಿಸಿದೆ. ಐಐಟಿ ಬಾಂಬೆ ಹಾಗೂ ಇತರ ಶಿಕ್ಷಣ ಸಂಸ್ಥೆಗಳ ಸಂಶೋಧಕರು, ವಿಜ್ಞಾನಿಗಳು ಈ ತಯಾರಿಕೆಯಲ್ಲಿ ವಿವಿಧ ಪಾತ್ರ ವಹಿಸಿದ್ದಾರೆ.
Updated on: Jun 03, 2025 | 11:41 AM
ನವದೆಹಲಿ, ಜೂನ್ 3: ಚ್ಯಾಟ್ಜಿಪಿಟಿ (ChatGPT) ರೀತಿಯಲ್ಲಿ ಭಾರತದ್ದೇ ಸ್ವಂತ ಮಲ್ಟಿಮೋಡಲ್ ಎಲ್ಎಲ್ಎಂವೊಂದು ತಯಾರಾಗಿದೆ. ನಿನ್ನೆ ಸೋಮವಾರ ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ರಾಜ್ಯ ಸಚಿವ ಡಾ. ಜಿತೇಂದ್ರ ಸಿಂಗ್ ಅವರು ‘ಭಾರತ್ ಜೆನ್’ ಅನ್ನು (BharatGen multimodal LLM) ಬಿಡುಗಡೆ ಮಾಡಿದ್ದಾರೆ. ಭಾರತದಲ್ಲಿ ಸ್ವಂತವಾಗಿ ಅಭಿವೃದ್ಧಿಗೊಂಡ ಮೊದಲ ಮಲ್ಟಿಮೋಡಲ್ ಲಾರ್ಜ್ ಲ್ಯಾಂಗ್ವೇಜ್ ಎಐ ಮಾಡಲ್ ಇದು. ಜನರೇಟಿವ್ ಎಐ ಮತ್ತು ಎಲ್ಎಲ್ಎಂ ಸಮಿಟ್ ಮತ್ತು ಹ್ಯಾಕಥಾನ್ ಎನಿಸಿದ ‘ಭಾರತ್ಜೆನ್ ಸಮಿಟ್’ (BharatGen Summit) ಕಾರ್ಯಕ್ರಮದ ವೇಳೆ ಸಚಿವರು ಈ ವಿಶೇಷ ಎಐ ಮಾಡಲ್ ಅನ್ನು ಅನಾವರಣಗೊಳಿಸಿದ್ದಾರೆ.
ಐಐಟಿ ಬಾಂಬೆ ನೆರವಿನಿಂದ ಮತ್ತು ಸರ್ಕಾರದ ಪ್ರಾಯೋಜಕತ್ವದಲ್ಲಿ ಭಾರತ್ ಜೆನ್ ಎಲ್ಎಲ್ಎಂ ಅನ್ನು ರೂಪಿಸಲಾಗಿದೆ. ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ ಹಾಗೂ ಇತರ ಹಲವು ಶಿಕ್ಷಣ ಸಂಸ್ಥೆಗಳ ಸಂಶೋಧಕರು ಮತ್ತು ವಿಜ್ಞಾನಿಗಳು ಈ ಕಾರ್ಯದಲ್ಲಿ ಕೈಜೋಡಿಸಿದ್ದಾರೆ. ಈ ಹಿಂದೆ ಚ್ಯಾಟ್ಜಿಪಿಟಿ ಬಿಡುಗಡೆ ಆದಾಗ ಓಪನ್ಎಐ ಸಿಇಒ ಸ್ಯಾಮ್ ಆಲ್ಟ್ಮ್ಯಾನ್ ಅವರು ಭಾರತಕ್ಕೆ ಇಂಥ ಎಲ್ಎಲ್ಎಂ ಅನ್ನು ಸ್ವಂತವಾಗಿ ತಯಾರಿಸಲು ಆಗೋದಿಲ್ಲ ಎಂದು ನಿಷ್ಠುರವಾಗಿ ಹೇಳಿದ್ದರು. ಒಂದು ವರ್ಷದ ಅಂತರದಲ್ಲಿ ಭಾರತೀಯರು ಸ್ಯಾಮ್ಗೆ ತಕ್ಕ ಉತ್ತರ ಕೊಟ್ಟಿದ್ದಾರೆ.
ಇದನ್ನೂ ಓದಿ: ಭಾರತದ ಎಷ್ಟು ಮನೆಗಳಲ್ಲಿ ಸ್ಮಾರ್ಟ್ಫೋನ್ ಇದೆ? ಇಲ್ಲಿದೆ ಕುತೂಹಲಕಾರಿ ಅಂಕಿ ಅಂಶ
ಸರ್ವಮ್ ಎಐ, ಚ್ಯಾಟ್ಜಿಪಿಟಿಗಿಂತ ಭಾರತ್ ಜೆನ್ ಹೇಗೆ ಭಿನ್ನ?
ಕಳೆದ ತಿಂಗಳು ಸರ್ವಮ್ ಎಐ (Sarvam AI) ಎನ್ನುವ ಮಾಡಲ್ ಅನ್ನು ಬಿಡುಗಡೆ ಮಾಡಲಾಗಿತ್ತು. ಇದು ಸ್ವಂತ ಪ್ಲಾಟ್ಫಾರ್ಮ್ನಲ್ಲಿ ರೂಪುಗೊಂಡ ಮಾಡಲ್ ಅಲ್ಲ. ಯೂರೋಪ್ನಲ್ಲಿ ಅಭಿವೃದ್ಧಿಪಡಿಸಲಾದ ಮಿಸ್ತ್ರಾಲ್ ಸ್ಮಾಲ್ ಎನ್ನುವ ಓಪನ್ ಸೋರ್ಸ್ ಮಾಡಲ್ ಅನ್ನು ಉಪಯೋಗಿಸಿಕೊಂಡು ತಯಾರಿಸಲಾಗಿದೆ.
ಭಾರತ್ಜೆನ್ ಬಹುತೇಕ ಚ್ಯಾಟ್ಜಿಪಿಟಿ ಮಾದರಿಯಲ್ಲಿ ಇರುವ, ಆದರೆ, ಭಾರತದಲ್ಲೇ ಸ್ವಂತವಾಗಿ ತಯಾರಾಗಿರುವ ಮಲ್ಟಿಮೋಡಲ್ ಲಾರ್ಜ್ ಲ್ಯಾಂಗ್ವೇಜ್ ಮಾಡಲ್ ಆಗಿದೆ. ಚ್ಯಾಟ್ಜಿಪಿಟಿ ಇತ್ಯಾದಿಗಿಂತ ಭಾರತ್ ಜೆನ್ ಸ್ವಲ್ಪ ಭಿನ್ನ ಎನಿಸಿಕೊಳ್ಳುವುದು ಇದರ ಭಾರತೀಯ ಭಾಷೆಗಳ ಅಳವಡಿಕೆ. ಕನ್ನಡ ಸೇರಿದಂತೆ ಹಲವು ಭಾರತೀಯ ಭಾಷೆಗಳ ಕಂಟೆಂಟ್ ಅನ್ನು ಯಥೇಚ್ಛವಾಗಿ ಬಳಸಿ ಈ ಮಾಡಲ್ಗೆ ಟ್ರೇನ್ ಮಾಡಲಾಗಿದೆ.
ಭಾರತ್ಜೆನ್ ಭಾರತೀಯ ಭಾಷೆಗಳಲ್ಲಿ ಸಂವಹನ ನಡೆಸಬಲ್ಲುದು. ಭಾರತೀಯ ಭಾಷೆ ಮತ್ತು ಸಂಸ್ಕೃತಿಯ ಅಂಶಗಳನ್ನು ಅಳವಡಿಸಿಕೊಂಡಿರುವ ಇದು ಭಾರತೀಯರಿಗೆ ಅವರದೇ ಭಾಷೆಯಲ್ಲಿ ಎಐ ಸೇವೆ ನೀಡಲು ಹೆಚ್ಚು ಸಮರ್ಪಕ ಎನಿಸಬಹುದು.
ಇದನ್ನೂ ಓದಿ: ಸೂಪರ್ ಫಾಸ್ಟ್ ಆಗಿ ಚಾರ್ಚ್ ಆಗುವ ಸೋಡಿಯಂ ಬ್ಯಾಟರಿ ತಯಾರಿಸಿದ ಬೆಂಗಳೂರಿನ ವಿಜ್ಞಾನಿಗಳು; ಸ್ವಾವಲಂಬನೆಯ ಹಾದಿ ಸುಗಮ
ಭಾರತ್ಜೆನ್ ಉಪಯೋಗ ಹೇಗೆ?
ಮಲ್ಟಿಮೋಡಲ್ ಎಲ್ಎಲ್ಎಂಗಳು ಹಲವು ರೀತಿಯಲ್ಲಿ ಉಪಯುಕ್ತ ಎನಿಸಬಲ್ಲುವು. ಕೃಷಿ, ಶಿಕ್ಷಣ, ಆರೋಗ್ಯ, ವ್ಯವಹಾರ ಇತ್ಯಾದಿ ಕ್ಷೇತ್ರಗಳಲ್ಲಿ ಸಾಕಷ್ಟು ವಿಷಯಗಳನ್ನು ಈ ಎಐ ಮಾಡಲ್ಗಳು ಕರಗತ ಮಾಡಿಕೊಂಡಿದ್ದು, ಜನರ ಬಹುತೇಕ ಅನುಮಾನಗಳಿಗೆ ಪರಿಹಾರ ಒದಗಿಸಲು ಸಮರ್ಥವಾಗಿರುತ್ತವೆ. ಸದ್ಯ ಭಾರತ್ಜೆನ್ ಇನ್ನೂ ಅಭಿವೃದ್ಧಿ ಹಂತದಲ್ಲಿದ್ದು, ಸಾರ್ವಜನಿಕ ಬಳಕೆಗೆ ಲಭ್ಯ ಇಲ್ಲ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
