Semiconductor manufacturing PLI: ಸೆಮಿಕಂಡಕ್ಟರ್ ಉತ್ಪಾದನೆಗೆ ಕೇಂದ್ರದಿಂದ 76 ಸಾವಿರ ಕೋಟಿ ರೂ.

ದೇಶದಲ್ಲಿ ಸೆಮಿ ಕಂಡಕ್ಟರ್​ಗಳ ಉತ್ಪಾದನೆಗೆ ಉತ್ತೇಜನ ನೀಡುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರವು ಹಲವು ನೂರು ಕೋಟಿ ಡಾಲರ್​ಗಳ ಬಂಡವಾಳ ಬೆಂಬಲ ಮತ್ತು ಉತ್ಪಾದನೆಗೆ ಜೋಡಣೆಯಾದ ಪ್ರೋತ್ಸಾಹ ಧನವನ್ನು ಬುಧವಾರ ಘೋಷಣೆ ಮಾಡುವ ಸಾಧ್ಯತೆ ಇದೆ. ಕೇಂದ್ರ ಸಚಿವ ಸಂಪುಟವು ಈ ಬಗ್ಗೆ ಅನುಮತಿಸುವ ನಿರೀಕ್ಷೆ ಇದೆ. ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸಂಪುಟವು 76 ಸಾವಿರ ಕೋಟಿ ರೂಪಾಯಿ ಮೌಲ್ಯದ ಪ್ರೋತ್ಸಾಹ ಧನವನ್ನು ಸೆಮಿ ಕಂಡಕ್ಟರ್ ಉತ್ಪಾದನೆಗಾಗಿ ನೀಡಲು ಎಲ್ಲ ಸಿದ್ಧತೆ ನಡೆಸಿದೆ. ಈ ಪ್ರೋತ್ಸಾಹಧನವನ್ನು ಮೂರು ರೀತಿಯನ್ನು ಪ್ರಕ್ರಿಯೆ ಮಾಡುವ ಸಾಧ್ಯತೆ ಇದೆ. ಈ ಯೋಜನೆಯಲ್ಲಿ, ಸೆಮಿ ಕಂಡಕ್ಟರ್ ವೇಫರ್ ಫ್ಯಾಬ್ರಿಕೇಷನ್ (Fab), ಜೋಡಣೆ, ಪರೀಕ್ಷೆ ಮತ್ತು ಪ್ಯಾಕೇಜಿಂಗ್ ವ್ಯವಸ್ಥೆಗೆ ಬಂಡವಾಳ ವೆಚ್ಚವಾಗಿ ಶೇ 25ರಷ್ಟು ನೀಡುವುದು ಸಹ ಒಳಗೊಂಡಿದೆ ಎಂದು ಮೂಲಗಳು ತಿಳಿಸಿವೆ.

ಇದರಲ್ಲಿ ಸ್ಟಾರ್ಟ್​ಅಪ್​ಗಳಿಗೆ ಸೆಮಿಕಂಡಕ್ಟರ್​ಗಳ ಡಿಸೈನ್ ಅಭಿವೃದ್ಧಿಗಾಗಿ ನೀಡುವ ಪ್ರೋತ್ಸಾಹ ಧನವೂ ಸೇರಿದೆ. ಈ ಕೈಗಾರಿಕೆಯಲ್ಲಿ 1.7 ಲಕ್ಷ ಕೋಟಿ ರೂಪಾಯಿ ಬಂಡವಾಳ ಹೂಡಿಕೆ ಆಗಬಹುದು ಎಂಬ ನಿರೀಕ್ಷೆ ಇದೆ. ಮುಂದಿನ ಆರು ವರ್ಷದಲ್ಲಿ ಭಾರತದಲ್ಲಿ ಸೆಮಿ ಕಂಡಕ್ಟರ್ ಡಿಸೈನ್, ಬಿಡಿ ಭಾಗಗಳ ಉತ್ಪಾದನೆ ಮತ್ತು ಡಿಸ್​ಪ್ಲೇ ಫ್ಯಾಬ್ರಿಕೇಷನ್​ನ 20ರಷ್ಟು ಘಟಕಗಳನ್ನು ಸ್ಥಾಪಿಸಲು ಸರ್ಕಾರ ಯೋಜನೆ ಹಾಕಿಕೊಂಡಿರುವುದಾಗಿ ಮೂಲಗಳು ತಿಳಿಸಿವೆ.

ಒಂದು ಸಲ ಕೇಂದ್ರ ಸಂಪುಟದಿಂದ ಯೋಜನೆಗೆ ಅನುಮತಿ ಸಿಕ್ಕ ಮೇಲೆ ಎಲೆಕ್ಟ್ರಾನಿಕ್ಸ್ ಅಂಡ್ ಇನ್​ಫರ್ಮೇಷನ್ ಟೆಕ್ನಾಲಜಿ ಸಚಿವಾಲಯ (MeitY) ಮಾಹಿತಿ ಮೇಲೆ ಕೆಲಸ ಮಾಡಲಿದೆ. ಈ ರೀತಿ ಮೆಗಾ ಪ್ರೋತ್ಸಾಹ ಧನ ಯೋಜನೆ ಮೂಲಕವಾಗಿ ಮೀಡಿಯಾಟೆಕ್, ಇಂಟೆಲ್, ಕ್ಲಾಲ್​ಕಾಮ್, ಸ್ಯಾಮ್ಸಂಗ್ ಮತ್ತು ಟೆಕ್ಸಾಸ್ ಇನ್​ಸ್ಟ್ರುಮೆಂಟ್ಸ್​​ನಂಥ ಸೆಮಿ ಕಂಡಕ್ಟರ್ ಉತ್ಪಾದಕರನ್ನು ಸೆಳೆಯುವ ಉದ್ದೇಶವನ್ನು ಸರ್ಕಾರ ಹೊಂದಿದೆ. ಜಾಗತಿಕ ಮಟ್ಟದಲ್ಲಿ ಚಿಪ್ ಕೊರತೆ ಕಂಡುಬಂದು, ವಿವಿಧ ವಲಯದ ಕೈಗಾರಿಕೆಗಳ ಉತ್ಪಾದನೆ ಮೇಲೆ ಪರಿಣಾಮ ಬೀರಿರುವ ಸಂದರ್ಭದಲ್ಲಿ ಕೇಂದ್ರ ಸರ್ಕಾರವು ಈ ನಿರ್ಧಾರ ಕೈಗೊಂಡಿದೆ.

ವಿವಿಧ ಎಲೆಕ್ಟ್ರಾನಿಕ್ ಸಾಧನಗಳ ಉತ್ಪಾದನೆಗೆ ಸೆಮಿ ಕಂಡಕ್ಟರ್​ಗಳ ಬಹಳ ಮುಖ್ಯ. ಸ್ಮಾರ್ಟ್​ಫೋನ್​ಗಳು, ಲ್ಯಾಪ್​ಟಾಪ್​ಗಳು, ಕಾರುಗಳು ಮತ್ತಿತರ ಸಲಕರಣೆ ಹಾಗೂ ವಾಹನಗಳಿಗೆ ಅತ್ಯಗತ್ಯ. ಜಾಗತಿಕ ಮಟ್ಟದಲ್ಲಿ ಸೆಮಿಕಂಡಕ್ಟರ್ ಕೊರತೆಯಿಂದಾಗಿ ಕಳೆದ ಒಂದು ವರ್ಷದಿಂದ ಭಾರೀ ತೊಂದರೆಯಾಗಿದೆ. ಈ ಕೊರತೆಯಿಂದ ಸ್ಮಾರ್ಟ್​ಫೋನ್, ಪರ್ಸನಲ್ ಕಂಪ್ಯೂಟರ್ಸ್, ಗೇಮ್ ಕನ್​ಸೋಲ್ಸ್, ವಾಹನೋದ್ಯಮ ಮತ್ತು ವೈದ್ಯಕೀಯ ಸಲಕರಣೆಗಳ ಮೇಲೆ ಪರಿಣಾಮ ಆಗಿದೆ. ಜತೆಗೆ 2021ರಲ್ಲಿ ಜಾಗತಕ ವಾಹನ ಉತ್ಪಾದನೆ ಮೇಲೆ ಪ್ರಭಾವ ಬೀರಿದೆ. ವರದಿಗಳ ಪ್ರಕಾರ, 2022ರ ಎರಡನೇ ತ್ರೈಮಾಸಿಕದ ಮುಂಚೆ ಈ ಸಮಸ್ಯೆ ಬಗೆಹರಿಯುವ ಸಾಧ್ಯತೆ ಇಲ್ಲ. ಆ ಕಾರಣದಿಂದ ದೇಶೀ ವಾಹನೋದ್ಯಮದಲ್ಲಿ ಉತ್ಪಾದನೆ ವಿಳಂಬ ಆಗುವುದು ಸಾಮಾನ್ಯವಾಗಿದೆ.

ಇದನ್ನೂ ಓದಿ: ಕಣ್ಣು ಹಾಯಿಸಿದ ಕಡೆಗೆಲ್ಲ ಕಾಣುವ ಸೆಮಿಕಂಡಕ್ಟರ್ ಎಂಬ ಸರ್ವಾಂತರ್ಯಾಮಿ ಬಗ್ಗೆ ನಿಮಗೆಷ್ಟು ಗೊತ್ತು?

Published On - 1:07 pm, Wed, 15 December 21