Entrepreneurship In Students: ಸರ್ಕಾರಿ ಶಾಲೆ ಮಕ್ಕಳಲ್ಲಿ ಉದ್ಯಮಶೀಲತೆ ಬೆಳೆಸಲು ದೆಹಲಿ ಸರ್ಕಾರ ಸೂಪರ್ ಯೋಜನೆ

ಬ್ಲೂಟೂಥ್ ಸ್ಪೀಕರ್‌ಗಳಿಂದ ಮೊದಲುಗೊಂಡು ಹ್ಯಾಂಡ್​ ಮೇಡ್​ (ಕೈಯಿಂದ ಮಾಡಿದ) ಚಾಕೊಲೇಟ್‌ಗಳು, ಕಸ್ಟಮೈಸ್ ಮಾಡಿದ ಮುದ್ರಿತ ಪರಿಕರಗಳನ್ನು ಉತ್ಪಾದಿಸಿ, ಮಾರಾಟ ಮಾಡುವ ಮೂಲಕ ಈ ಶಾಲಾ ವಿದ್ಯಾರ್ಥಿಗಳು ಗಮನ ಸೆಳೆದರು. ವಿದ್ಯಾರ್ಥಿಗಳಲ್ಲಿ ಉದ್ಯಮಶೀಲತೆ ಬೆಳೆಸಬೇಕು ಎಂಬ ಉದ್ದೇಶಕ್ಕೆ ದೆಹಲಿ ಸರ್ಕಾರವೇ ರೂಪಿಸಿರುವ ಯೋಜನೆ ಇದು. ಪೂರ್ವ ದೆಹಲಿಯ 41 ಸರ್ಕಾರಿ ಶಾಲಾ ವಿದ್ಯಾರ್ಥಿಗಳು ಒಂಬತ್ತು ಉದ್ಯಮಶೀಲತೆ ಉದ್ಯಮಗಳನ್ನು ಆರಂಭಿಸಿದರು ಮತ್ತು ಆರು ವಾರಗಳಲ್ಲಿ ಸಣ್ಣ ಮೊತ್ತದ ಲಾಭವನ್ನು ಸಹ ಗಳಿಸಿದರು. ಮೊದಲೇ ಹೇಳಿದಂತೆ ವಿದ್ಯಾರ್ಥಿಗಳನ್ನು ಪ್ರೋತ್ಸಾಹಿಸಲು ದೆಹಲಿ ಸರ್ಕಾರವೇ ಅವರಿಗೆ ಮೂಲಧನವನ್ನು ನೀಡಿತ್ತು. ಉದ್ಯಮಶೀಲತೆ ಆಲೋಚನೆ ಪಠ್ಯಕ್ರಮದ ಭಾಗ ಆಗಿರುವ ಮೂಲಧನ (Seed Money) ಯೋಜನೆಯನ್ನು ಜನವರಿಯಲ್ಲಿ XIನೇ ತರಗತಿಯ ವಿದ್ಯಾರ್ಥಿಗಳಿಗೆ ಖಿತ್ರಿಪುರದ ಸ್ಕೂಲ್ ಆಫ್ ಎಕ್ಸಲೆನ್ಸ್‌ನಲ್ಲಿ ಪರಿಚಯಿಸಲಾಗಿದ್ದು, ಪ್ರತಿ ಮಗುವಿಗೆ 1,000 ರೂಪಾಯಿ ನೀಡಿ, ಅದನ್ನು ಪ್ರತ್ಯೇಕವಾಗಿ ತಮ್ಮ ಸ್ವಂತ ಉದ್ಯಮಗಳನ್ನು ಪ್ರಾರಂಭಿಸಲು ಅಥವಾ ಗುಂಪು ಉದ್ಯಮಗಳಿಗಾಗಿ ತಮ್ಮ ಮೂಲಧನವನ್ನು ಒಟ್ಟುಗೂಡಿಸಬಹುದಾಗಿತ್ತು.

ವಿವಿಧ ಬಗೆಯ ಲಾಭ ಆರು ವಾರಗಳ ಕೊನೆಗೆ ಅಂತಿಮ ಯೋಜನೆಗಳು ಮತ್ತು ಅವುಗಳ ಲಾಭಗಳು ಹೀಗಿವೆ: ‘ಹೋಮ್ 2 ಕ್ರಿಯೇಷನ್ಸ್’ ಮನೆಯಲ್ಲಿ ತಯಾರಿಸಿದ ಚಾಕೊಲೇಟ್ ಮತ್ತು ತ್ಯಾಜ್ಯದಿಂದ ಕರಕುಶಲ ವಸ್ತುಗಳ ಸೃಷ್ಟಿಸಿದ್ದರಿಂದ ರೂ. 9,580 ಲಾಭ; ‘ಮೊಬಿಸೈಟ್’ ಬಳಕೆಯಾದ ಫೋನ್ ಮತ್ತು ಫೋನ್ ಪರಿಕರಗಳನ್ನು ಮಾರಾಟ ಮಾಡಿ 21,000 ರೂಪಾಯಿ. ‘ಇಂಕ್ ಫ್ಯಾಮಿಲಿ’ ಕಸ್ಟಮೈಸ್ಡ್ ಮಾಡಿದ ಮುದ್ರಿತ ಟಿ-ಶರ್ಟ್ ಮತ್ತು ಪರಿಕರಗಳನ್ನು 3,830 ರೂಪಾಯಿಗಳ ಲಾಭದೊಂದಿಗೆ ಮಾರಾಟ; ‘ಕ್ರಾಫ್ಟ್ ಕಾಟೇಜ್’ ಕೈಯಿಂದ ಮಾಡಿದ ಆಭರಣಗಳನ್ನು ಮಾರಿ 2,000 ರೂಪಾಯಿ, ‘ಟ್ಯಾಪ್ ಅಂಡ್ ಡ್ರಾ’ ಭಾವಚಿತ್ರಗಳು ಮತ್ತು ರೇಖಾಚಿತ್ರಗಳನ್ನು ಮಾರಾಟ ಮಾಡಿ 11,840 ರೂಪಾಯಿ, OTT ಪ್ಲಾಟ್‌ಫಾರ್ಮ್ ಪಾಸ್‌ವರ್ಡ್ ಹಂಚಿಕೆಯ ಸುತ್ತ ‘IONALTS’ ಒಂದು ವ್ಯಾಪಾರವನ್ನು ಸೃಷ್ಟಿಸಿ ರೂ. 6,950 ಲಾಭ ಗಳಿಸಿತು; ‘ಡಿವೈನ್ ಕ್ರಿಯೇಷನ್ಸ್’ ಚಿತ್ರಗಳನ್ನು ಮಾರಾಟ ಮಾಡಿ 22,335 ರೂಪಾಯಿ, ‘ಹೆಬಿ ನ್ಯಾಚುರಲ್ಸ್’ ಕಾಂಪೋಸ್ಟ್ ಮಾರಾಟ ಮಾಡಿ ರೂ. 3,580 ಲಾಭ; ಮತ್ತು ‘ಸ್ಪೀಕರ್‌ಸ್ಟರ್‌ಗಳು’ ಬ್ಲೂಟೂಥ್​ ಸ್ಪೀಕರ್‌ಗಳನ್ನು ತಯಾರಿಸಿ, ಮಾರಾಟ ಮಾಡಿ 5,650 ರೂಪಾಯಿ ಲಾಭ ಗಳಿಸಿದವು.

ಈ ಯೋಜನೆಯನ್ನು ಪರಿಚಯಿಸಿದಾಗ ಆಪ್ತ ಸ್ನೇಹಿತರಾದ ಶೀಜಾ ಅಲಿ ಮತ್ತು ಸಾಕ್ಷಿ ಝಾ ಅವರು ಪಠ್ಯಕ್ರಮದ ಪ್ರಾಥಮಿಕ ಅಂಶವನ್ನು ತಮ್ಮ ಆರಂಭದ ಹಂತವಾಗಿ, ‘ಉದ್ಯೋಗದಾತರಾಗಲು ಪ್ರಯತ್ನಿಸಿ, ಉದ್ಯೋಗ ಹುಡುಕುವುದಕ್ಕಲ್ಲ’ ಎಂದು ಬಳಸಲು ನಿರ್ಧರಿಸಿದರು. ಗೃಹಿಣಿಯರ ಮೂಲಕ ಕರಕುಶಲ ವಸ್ತುಗಳು ಮತ್ತು ಮನೆಯಲ್ಲಿ ಚಾಕೊಲೇಟ್‌ಗಳನ್ನು ಮಾಡುವ ಸಾಹಸಕ್ಕೆ ಇಳಿದರು. ತ್ರಿಲೋಕಪುರಿಯಲ್ಲಿ ಇರುವ ಮನೆಯ ಸುತ್ತಮುತ್ತಲಿನ ಹಲವಾರು ಸ್ಥಳೀಯ ಬೇಕರಿಗಳಿಗೆ ಅವರು ಹೇಗೆ ಚಾಕೊಲೇಟ್‌ಗಳನ್ನು ತಯಾರಿಸಿದರು ಎಂಬುದನ್ನು ವೀಕ್ಷಿಸಲು ಭೇಟಿ ನೀಡಿದ್ದಾಗಿ ಸಾಕ್ಷಿ ಹೇಳಿದರು.

ಗೃಹಿಣಿಯರಿಗೆ ಮನೆಯಲ್ಲೇ ಉದ್ಯೋಗ “ಮಾರುಕಟ್ಟೆಯಲ್ಲಿ ಯುವ ಜನರು ಮತ್ತು ಹುಡುಗರು ಉದ್ಯೋಗಗಳನ್ನು ಪಡೆಯಬಹುದು. ಆದರೆ ಅವರ ಕುಟುಂಬಗಳನ್ನು ಪೋಷಿಸಲು ಬಯಸುವ, ಆದರೆ ಹೆಚ್ಚಿನ ಜವಾಬ್ದಾರಿಗಳನ್ನು ಹೊಂದಿರುವ ಮತ್ತು ಇಡೀ ದಿನ ಕಚೇರಿಯಲ್ಲಿ ಕಳೆಯಲು ಸಾಧ್ಯವಾಗದ ಗೃಹಿಣಿಯರು ಇದ್ದಾರೆ. ನಾವು ಅವರ ಮನೆಗಳಲ್ಲಿ ಕೆಲಸ ನೀಡಲು ನಿರ್ಧರಿಸಿದ್ದೇವೆ. ನಮಗೆ ಸಾಕಷ್ಟು ಲಾಭ ಇರುವುದರಿಂದ ಅವರಿಗೆ ಮುಂಗಡವಾಗಿ ಪಾವತಿಸಲು, ಇನ್ನಷ್ಟು ಬೆಳೆಯಲು ಬಯಸುತ್ತೇವೆ; ಈ ಉತ್ಪನ್ನಗಳನ್ನು ಹೇಗೆ ತಯಾರಿಸಬೇಕೆಂದು ಅವರಿಗೆ ಕಲಿಸಲು ನಾವು ವೀಡಿಯೊಗಳನ್ನು ಮಾಡಬಹುದು,” ಎಂದು ಶೀಜಾ ಹೇಳಿದರು.

ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಮಾತನಾಡಿ, ಈ ಪ್ರಾಯೋಗಿಕ ಪರೀಕ್ಷೆ ಆದ ನಂತರ ಮಂಗಳವಾರದಿಂದ ಎಲ್ಲ ಸರ್ಕಾರಿ ಶಾಲೆಗಳಲ್ಲಿ ಪ್ರತಿ ಮಗುವಿಗೆ ರೂ. 2000ದಂತೆ ಜಾರಿಗೆ ತರುವುದಾಗಿ ಹೇಳಿದ್ದಾರೆ. “ಮಕ್ಕಳು ಹೇಗೆ ಹೂಡಿಕೆ ಮಾಡುವುದು, ವ್ಯಾಪಾರವನ್ನು ಪ್ರಾರಂಭಿಸುವ ಭಯವನ್ನು ಹೇಗೆ ಕಳೆದುಕೊಳ್ಳುವುದು, ಮತ್ತು ಹೇಗೆ ಲಾಭ ಗಳಿಸುವುದು ಎಂದು ಕಲಿಯುವುದು ಮತ್ತು ಅನುಭವ ಗಳಿಸುವುದೇ ಮೂಲಧನದ ಯೋಜನೆ. ಕೇವಲ ಆರು ವಾರಗಳಲ್ಲಿ ಈ ವಿದ್ಯಾರ್ಥಿಗಳು ಸ್ವಲ್ಪ ಕೈ ಹಿಡಿದು ಬೆಂಬಲ ತೋರಿಸಿದ್ದಾರೆ. ಸರ್ಕಾರಿ ಶಾಲೆಯ ಮಕ್ಕಳು ಯಶಸ್ವಿ ವ್ಯಾಪಾರಸ್ಥರಾಗಬಹುದು,” ಎಂದು ಅವರು ಹೇಳಿದರು. (ಮಾಹಿತಿ ಕೃಪೆ: ಇಂಡಿಯನ್ ಎಕ್ಸ್​ಪ್ರೆಸ್)

ಇದನ್ನೂ ಓದಿ: Rise of New India: ಮುಂದಿನ 30 ವರ್ಷದಲ್ಲಿ ಭಾರತ ಇತಿಹಾಸದಲ್ಲಿಯೇ ಅತ್ಯುತ್ತಮವನ್ನು ಸಾಧಿಸಬಲ್ಲದು, ಹೇಗೆ? ಇಲ್ಲಿದೆ ಮುಕೇಶ್ ಅಂಬಾನಿ ವ್ಯಾಖ್ಯಾನ

(Delhi Government Super Scheme To Encourage Entrepreneurship In Government School Students Here Is The Details)

Published On - 1:19 pm, Tue, 7 September 21