ಮೇಡ್​ ಇನ್ ಚೀನಾ ಉತ್ಪನ್ನಗಳ ಖರೀದಿಯಿಂದ ಹಿಂದಕ್ಕೆ ಸರಿದ ಶೇ 40ಕ್ಕೂ ಹೆಚ್ಚು ಭಾರತೀಯರು; ಸಮೀಕ್ಷೆಯಲ್ಲಿ ಕಂಡು ಬಂದಿದ್ದೇನು?

Made in China products: ಭಾರತ ಮತ್ತು ಚೀನಾ ಮಧ್ಯೆ ಗಾಲ್ವಾನ್ ಉದ್ವಿಗ್ನತೆಗೆ ಒಂದು ವರ್ಷ (ಜೂನ್ 15, 2021) ಪೂರ್ತಿಯಾಗಿದೆ. ಈ ಅವಧಿಯಲ್ಲಿ ಶೇ 40ಕ್ಕೂ ಹೆಚ್ಚು ಭಾರತೀಯ ಗ್ರಾಹಕರು ಮೇಡ್ ಇನ್ ಚೀನಾ ಉತ್ಪನ್ನಗಳಿಂದ ಹಿಂದೆ ಸರಿದಿರುವುದಾಗಿ ಸಮೀಕ್ಷೆಯೊಂದರಲ್ಲಿ ಹೇಳಿದ್ದಾರೆ.

ಮೇಡ್​ ಇನ್ ಚೀನಾ ಉತ್ಪನ್ನಗಳ ಖರೀದಿಯಿಂದ ಹಿಂದಕ್ಕೆ ಸರಿದ ಶೇ 40ಕ್ಕೂ ಹೆಚ್ಚು ಭಾರತೀಯರು; ಸಮೀಕ್ಷೆಯಲ್ಲಿ ಕಂಡು ಬಂದಿದ್ದೇನು?
ಸಾಂದರ್ಭಿಕ ಚಿತ್ರ
TV9kannada Web Team

| Edited By: Srinivas Mata

Jun 15, 2021 | 1:05 PM

ಭಾರತ ಮತ್ತು ಚೀನಾ ಮಧ್ಯೆ ಗಾಲ್ವಾನ್ ಕಣಿವೆ ಉದ್ವಿಗ್ನತೆ ಉದ್ಭವಿಸಿದ ನಂತರ, ಎರಡು ದೇಶಗಳ ಮಧ್ಯೆ ವಾಣಿಜ್ಯ ವ್ಯವಹಾರಗಳಿಗೆ ಪೆಟ್ಟು ಬಿದ್ದಿದೆ. ಈ ಬೆಳವಣಿಗೆಯಾಗಿ ಒಂದು ವರ್ಷ ಕಳೆದಿದೆ. ಲೋಕಲ್​ಸರ್ಕಲ್ಸ್​ನಿಂದ ನಡೆಸಿರುವ ಸಮೀಕ್ಷೆ ಪ್ರಕಾರ, ಕಳೆದ 12 ತಿಂಗಳಲ್ಲಿ ಶೇ 40ಕ್ಕೂ ಹೆಚ್ಚು ಗ್ರಾಹಕರು ಮೇಡ್ ಇನ್ ಚೀನಾ ಉತ್ಪನ್ನಗಳನ್ನು ಖರೀದಿ ಮಾಡುವುದರಿಂದ ಹಿಂದಕ್ಕೆ ಸರಿದಿದ್ದಾರೆ. ಗಾಲ್ವಾನ್ ಉದ್ವಿಗ್ನತೆಯ ನಂತರ ಭಾರತ ಸರ್ಕಾರದಿಂದ ಟಿಕ್​ಟಾಕ್​, ಕ್ಲಬ್ ಫ್ಯಾಕ್ಟರಿ ಸೇರಿದಂತೆ ಚೈನೀಸ್​ ಆ್ಯಪ್​ಗಳನ್ನು ನಿಷೇಧಿಸಲಾಯಿತು. ಸ್ಥಳೀಯವಾಗಿ ವಸ್ತುಗಳ ಉತ್ಪಾದನೆ ಮತ್ತು ಮಾರಾಟ ಮಾಡುವ ಸಲುವಾಗಿ ಆತ್ಮನಿರ್ಭರ್ ಯೋಜನೆಯನ್ನು ಆರಂಭಿಸಿತು. ಇದರ ಜತೆಗೆ ಸ್ಥಳೀಯ ವರ್ತಕರು ಸಹ ಚೀನಾದಿಂದ ಗ್ರಾಹಕ ಬಳಕೆ ವಸ್ತುಗಳ ಆಮದು ಕಡಿಮೆ ಮಾಡಿಕೊಳ್ಳುವಂತೆ ಕರೆ ನೀಡಿದರು.

ಅಂದಹಾಗೆ, ಸಮೀಕ್ಷೆಯ ಸಲುವಾಗಿ ಲೋಕಲ್​ಸರ್ಕಲ್ಸ್​ನಿಂದ 18,000 ಮಂದಿಯ ಅಭಿಪ್ರಾಯವನ್ನು ಸಂಗ್ರಹಿಸಲಾಗಿದೆ. 281 ಜಿಲ್ಲೆಗಳ ಗ್ರಾಹಕರನ್ನು ಮಾತನಾಡಿಸಲಾಗಿದೆ. ಸಮೀಕ್ಷೆಯಲ್ಲಿ ಕಂಡುಬಂದ ಅಂಕಿ- ಅಂಶದ ಪ್ರಕಾರ, ಕಳೆದ 12 ತಿಂಗಳಲ್ಲಿ ಶೇ 43ರಷ್ಟು ಭಾರತೀಯ ಗ್ರಾಹಕರು ಚೀನಾ ಉತ್ಪನ್ನವನ್ನು ಖರೀದಿ ಮಾಡಿಲ್ಲ. ಸಮೀಕ್ಷೆಯಲ್ಲಿ ಸಂಗ್ರಹವಾದ ಅಂಕಿ- ಅಂಶದ ಪ್ರಕಾರ, ಶೇ 34ರಷ್ಟು ಮಂದಿ ತಾವು ಒಂದೆರಡು ಚೀನಾ ಪ್ರಾಡಕ್ಟ್​ಗಳನ್ನು ಖರೀದಿಸಿರುವುದಾಗಿ ಹೇಳಿದ್ದಾರೆ. ಶೇ 8ರಷ್ಟು ಮಂದಿ 3ರಿಂದ 5 ವಸ್ತುಗಳು, ಶೇ 4ರಷ್ಟು ಮಂದಿ 5ರಿಂದ 10 ವಸ್ತುಗಳು, ಶೇ 3ರಷ್ಟು ಮಂದಿ 10- 15 ಉತ್ಪನ್ನ, ಶೇ 1ರಷ್ಟು ಮಂದಿ 20ಕ್ಕೂ ಹೆಚ್ಚು, ಮತ್ತು ಇತರ ಶೇ 1ರಷ್ಟು ಮಂದಿ 15ರಿಂದ 20 ಪ್ರಾಡಕ್ಟ್​ಗಳನ್ನು ಖರೀದಿಸಿರುವುದಾಗಿ ಹೇಳಿದ್ದಾರೆ.

ಆದರೂ ಮೇಡ್​ ಇನ್ ಚೀನಾ ಉತ್ಪನ್ನಗಳ ಮೇಲೆ ಭಾರತದ ಅವಲಂಬನೆ ಈಗಲೂ ಹೆಚ್ಚಿಗೆ ಇದ್ದೇ ಇದೆ. ಎಲೆಕ್ಟ್ರಿಕಲ್ ಮಷಿನರಿ, ಅಪ್ಲೈಯನ್ಸಸ್, ಫಾರ್ಮಾಸ್ಯುಟಿಕಲ್ಸ್ ಔಷಧ ಉತ್ಪಾದನೆ ಹಾಗೂ ಎಲೆಕ್ಟ್ರಾನಿಕ್ಸ್​ಗಳಿಗೆ ಕಳೆದ ವರ್ಷ ಬೇಡಿಕೆ ಹೆಚ್ಚಾಗಿ ಕಂಡುಬಂದಿತ್ತು ಎನ್ನಲಾಗಿದೆ. ಮೇಡ್ ಇನ್​ ಚೀನಾದ ಹಲವು ಉತ್ಪನ್ನಗಳಿಗೆ ಪರ್ಯಾಯವಾಗಿ ಭಾರತದ ಉತ್ಪನ್ನಗಳು ಇಲ್ಲ. ಒಂದು ವೇಳೆ ಇದ್ದರೂ ಬೆಲೆ ತುಂಬ ಜಾಸ್ತಿ ಹಾಗೂ ಗುಣಮಟ್ಟ ಮತ್ತು ಆ ವೈಶಿಷ್ಟ್ಯ ಇಲ್ಲ. ಅದೇ ರೀತಿ ಜಾಗತಿಕ ಮಟ್ಟದ ಗ್ಯಾಜೆಟ್ ತಯಾರಕರು ಹಲವರು ಚೀನಾದಲ್ಲಿ ಕಾರ್ಖಾನೆಯನ್ನು ಹೊಂದಿದ್ದಾರೆ. ಜಾಗತಿಕ ಅಗತ್ಯವನ್ನು ಚೀನಾದ ಕಾರ್ಖಾನೆಗಳಿಂದಲೇ ಪೂರೈಸುತ್ತಾರೆ. ಅಂಥ ಪ್ರಾಡಕ್ಟ್​ಗಳ ಮೇಲೆ ಬ್ರ್ಯಾಂಡ್​ನೇಮ್ ಅವುಗಳದೇ ಇದ್ದರೂ ಆ ಉತ್ಪನ್ನಗಳು ಚೀನಾದಲ್ಲಿ ತಯಾರಿಸಲಾಗುತ್ತದೆ ಎಂದು ಲೋಕಲ್​ಸರ್ಕಲ್ಸ್​ ಸಮೀಕ್ಷೆಯಲ್ಲಿ ತಿಳಿಸಿದೆ. ಉದಾಹರಣೆಗೆ, ಕೊರೊನಾ ಎರಡನೇ ಅಲೆಯಲ್ಲಿ ಖರೀದಿ ಮಾಡಿದ ಪಲ್ಸ್ ಆಕ್ಸಿಮೀಟರ್​ಗಳು ದೊಡ್ಡ ಪ್ರಮಾಣದಲ್ಲಿ ಚೀನಾದಲ್ಲಿ ತಯಾರು ಆದಂಥದ್ದು. ಭಾರತೀಯರು ಅವುಗಳನ್ನು ಖರೀದಿ ಮಾಡಿದ್ದಾರೆ.

ಇದನ್ನೂ ಓದಿ: Galwan Valley Clash: ಚೀನಾ ಸೈನಿಕರ ಕ್ರೌರ್ಯಕ್ಕೆ ಸಾಕ್ಷಿಯಾದ ಗಾಲ್ವಾನ್​ ಸಂಘರ್ಷಕ್ಕೆ ಒಂದು ವರ್ಷ; ಎಲ್​ಎಸಿಯಲ್ಲಿ ಇಂದಿಗೂ ಹೈ ಅಲರ್ಟ್​

(More than 40% of Indian consumers refrain from made in China products in last one year, after Galwan valley tension between India and China, according to Survey by LocalCircles)

ತಾಜಾ ಸುದ್ದಿ

Follow us on

Related Stories

Most Read Stories

Click on your DTH Provider to Add TV9 Kannada