ONDC: ಕಡಿಮೆ ಬೆಲೆಗೆ ಊಟ ಸಿಗುತ್ತೆ; ಆದ್ರೆ ಟೈಮಿಗೆ ಸರಿಯಾಗಿ ಬರುತ್ತಾ? ಸ್ವಿಗ್ಗಿ, ಜೊಮಾಟೋಗಳ ಅಖಾಡಕ್ಕೆ ಒಎನ್ಡಿಸಿ
Swiggy, Zomato Face Challenge From ONDC: ಈಗ ಬಹುತೇಕ ಎಲ್ಲಾ ಕ್ಷೇತ್ರಗಳಿಗೂ ಒಎನ್ಡಿಸಿ ಅಡಿ ಇಡುತ್ತಿದೆ. ಫುಡ್ ಡೆಲಿವರಿ ಕ್ಷೇತ್ರದಲ್ಲಿ ಒಎನ್ಡಿಸಿ ಅಸ್ತಿತ್ವ ಹೆಚ್ಚುತ್ತಿದೆ. ಮುಂಬರುವ ದಿನಗಳಲ್ಲಿ ಜನರು ಜೊಮಾಟೊ, ಸ್ವಿಗ್ಗಿಗಿಂತ ಒಎನ್ಡಿಸಿ ಪ್ಲಾಟ್ಫಾರ್ಮ್ ಮೂಲಕ ಆಹಾರ ಆರ್ಡರ್ ಮಾಡುವುದು ಹೆಚ್ಚಾಗಬಹುದು.
Updated on: May 08, 2023 | 1:17 PM
ಬೆಂಗಳೂರು: ಇತ್ತೀಚೆಗೆ ಬೆಂಗಳೂರಿನಲ್ಲಿ ಬಿಡುಗಡೆಯಾದ ನಮ್ಮ ಯಾತ್ರಿ ಆ್ಯಪ್ (Namma Yatri App) ಬಗ್ಗೆ ಎಲ್ಲರೂ ಕೇಳಿರಬಹುದು. ಒಲಾ ಮತ್ತು ಊಬರ್ನ ಪ್ರಾಬಲ್ಯದ ಇ–ಟ್ರಾನ್ಸ್ಪೋರ್ಟ್ ಕ್ಷೇತ್ರದಲ್ಲಿ ನಮ್ಮ ಯಾತ್ರಿ ಹೆಚ್ಚೂಕಡಿಮೆ ಸಂಚಲನವನ್ನೇ ಸೃಷ್ಟಿಸಿದೆ. ಒಲಾ, ಊಬರ್ಗಿಂತಲೂ ಕಡಿಮೆ ಬೆಲೆಗೆ ಆಟೋ ಪ್ರಯಾಣ ಸೇವೆ ನೀಡುತ್ತಿದೆ ನಮ್ಮ ಯಾತ್ರಿ. ಮೇಲಾಗಿ, ಓಲಾ, ಊಬರ್ಗಳಿಗೆ ಭಾರೀ ಪ್ರಮಾಣದಲ್ಲಿ ಕಮಿಷನ್ ಕೊಡಬೇಕಾದ ಕಷ್ಟದಲ್ಲಿದ್ದ ಆಟೋ ಪ್ರಯಾಣಿಕರಲ್ಲಿ ಬಹಳ ಮಂದಿ ಈಗ ನಮ್ಮ ಯಾತ್ರಿ ವೇದಿಕೆಗೆ ಶಿಫ್ಟ್ ಆಗಿದ್ದಾರೆ. ಯಾವ ಮಧ್ಯವರ್ತಿಯೂ ಇಲ್ಲದೇ ಆಟೋರಿಕ್ಷಾ ಮತ್ತು ಗ್ರಾಹಕರ ಮಧ್ಯೆ ನೇರವಾಗಿ ನಡೆಯುವ ಒಪ್ಪಂದ. ಹೀಗಾಗಿ, ಆಟೋರಿಕ್ಷಾ ಚಾಲಕರಿಗೂ ಹೆಚ್ಚು ಹಣ ಸಿಗುತ್ತದೆ, ಗ್ರಾಹಕರಿಗೂ ಕಡಿಮೆ ದರ ಬರುತ್ತದೆ. ಇದನ್ನು ಸಾಧ್ಯವಾಗಿಸಿದ್ದೇ ಒಎನ್ಡಿಸಿ (ONDC). ಈಗ ಬಹುತೇಕ ಎಲ್ಲಾ ಕ್ಷೇತ್ರಗಳಿಗೂ ಒಎನ್ಡಿಸಿ ಅಡಿ ಇಡುತ್ತಿದೆ. ಫುಡ್ ಡೆಲಿವರಿ ಕ್ಷೇತ್ರದಲ್ಲಿ ಒಎನ್ಡಿಸಿ ಅಸ್ತಿತ್ವ ಹೆಚ್ಚುತ್ತಿದೆ. ಮುಂಬರುವ ದಿನಗಳಲ್ಲಿ ಜನರು ಜೊಮಾಟೊ, ಸ್ವಿಗ್ಗಿಗಿಂತ ಒಎನ್ಡಿಸಿ ಪ್ಲಾಟ್ಫಾರ್ಮ್ ಮೂಲಕ ಆಹಾರ ಆರ್ಡರ್ ಮಾಡುವುದು ಹೆಚ್ಚಾಗಬಹುದು.
ಏನಿದು ಒಎನ್ಡಿಸಿ? ಹೋಮ್ ಡೆಲಿವರಿ ಆ್ಯಪ್ಗಳಿಗಿಂತ ಇದು ಹೇಗೆ ಭಿನ್ನ?
ಅದುವೇ ಒಎನ್ಡಿಸಿ. ಒಎನ್ಡಿಸಿ (ONDC) ಎಂದರೆ ಓಪನ್ ನೆಟ್ವರ್ಕ್ ಫಾರ್ ಡಿಜಿಟಲ್ ಕಾಮರ್ಸ್. ಇದು ಆ್ಯಪ್ ಅಲ್ಲ. ಸರ್ವಿಸ್ ಸೆಕ್ಟರ್ನ ಉದ್ದಿಮೆಗಳಿಗೆ ಮತ್ತು ಗ್ರಾಹಕರಿಗೆ ಪೂರಕವಾಗುವಂತಹ ತಂತ್ರಜ್ಞಾನ ವೇದಿಕೆಯೊಂದನ್ನು ರೂಪಿಸಿದೆ. ಇದು ಮಧ್ಯವರ್ತಿಯ ಅವಶ್ಯಕತೆ ಇಲ್ಲದೇ ಉದ್ದಿಮೆ ಮತ್ತು ಗ್ರಾಹಕರ ಮಧ್ಯೆ ನೇರ ಕೊಂಡಿ ಏರ್ಪಡಿಸುತ್ತದೆ. ಓಲಾ, ಊಬರ್, ಜೊಮಾಟೋ, ಸ್ವಿಗ್ಗಿ, ಅಮೇಜಾನ್ ಇತ್ಯಾದಿ ಸಂಸ್ಥೆಗಳು ನೇರವಾಗಿ ವಸ್ತುಗಳನ್ನು ಇಟ್ಟುಕೊಂಡು ಮಾರುವುದಿಲ್ಲ. ಬದಲಾಗಿ ಉದ್ದಿಮೆ ಮತ್ತು ಗ್ರಾಹಕರ ಮಧ್ಯೆ ಮಧ್ಯವರ್ತಿಗಳಾಗಿರುತ್ತವೆ. ಎರಡೂ ಕಡೆಯಿಂದ ಕಮಿಷನ್ ಪಡೆದು ಲಾಭ ಮಾಡಿಕೊಳ್ಳುತ್ತವೆ. ಪರಿಣಾಮವಾಗಿ ಉದ್ದಿಮೆ ಮತ್ತು ಗ್ರಾಹಕ ಇಬ್ಬರಿಗೂ ಹೊರೆ ಹೆಚ್ಚಿರುತ್ತದೆ. ಈಗ ಒಎನ್ಡಿಸಿ ಈ ಮಧ್ಯವರ್ತಿ ಪಾತ್ರವನನ್ನು ಮೊಟಕುಗೊಳಿಸುತ್ತದೆ.
ಇದನ್ನೂ ಓದಿ: Tenant Rights: ಮನೆ ಓನರ್ ಕಿರಿಕ್ ಮಾಡುತ್ತಾರಾ? ಬಾಡಿಗೆದಾರರಿಗಿರುವ 10 ಹಕ್ಕುಗಳ ಬಗ್ಗೆ ತಿಳಿದಿರಿ
ಒಎನ್ಡಿಸಿ ಹೇಗೆ ಕಾರ್ಯನಿರ್ವಹಿಸುತ್ತದೆ?
ವಿವಿಧ ಹೋಟೆಲ್ಗಳು, ಅಂಗಡಿಗಳು ಇತ್ಯಾದಿ ಉದ್ದಿಮೆಗಳು ಒಎನ್ಡಿಸಿಗೆ ನೊಂದಾಯಿತವಾಗಬೇಕಾಗದ ಅವಶ್ಯಕತೆ ಇದೆ. ಈಗ ಪೇಟಿಎಂ, ಮೀಶೋ, ಮ್ಯಾಜಿಕ್ಪಿನ್, ಮೈಸ್ಟೋರ್ ಇತ್ಯಾದಿ ಇಕಾಮರ್ಸ್ ಸಂಸ್ಥೆಗಳು ಒಎನ್ಡಿಸಿಗೆ ಪಾರ್ಟ್ನರ್ ಆಗಿವೆ. ಈ ಇಕಾಮರ್ಸ್ ಕಂಪನಿಗಳ ಆ್ಯಪ್ ಅಥವಾ ಪ್ಲಾಟ್ಫಾರ್ಮ್ಗಳಲ್ಲಿ ಒಎನ್ಡಿಸಿಗೆ ಜೋಡಿತವಾದ ಸರ್ವಿಸ್ಗಳ ಪಟ್ಟಿ ಇರುತ್ತದೆ. ಗ್ರಾಹಕರು ಅದನ್ನು ಆಯ್ದುಕೊಂಡು ಆರ್ಡರ್ ಕೊಡಬಹುದು. ಉದಾಹರಣೆಗೆ ಪೇಟಿಎಂಗೆ ಹೋಗಿ ಅಲ್ಲಿ ಒಎನ್ಡಿಸಿ ಎಂದು ಸರ್ಚ್ ಮಾಡಿದರೆ ಫುಡ್ ಅಂಡ್ ಗ್ರೋಸರಿ ವಿಭಾಗ ಸಿಗುತ್ತದೆ. ಅದರಲ್ಲಿ ಪಟ್ಟಿಯಾಗಿರುವ ಆಹಾರವಸ್ತುಗಳನ್ನು ಗ್ರಾಹಕರು ಅಲ್ಲಿಯೇ ಆರ್ಡರ್ ಮಾಡಬಹುದು. ಪೇಟಿಎಂ ಬಹಳ ನಗಣ್ಯ ಎನಿಸುವ ಕಮಿಷನ್ ಹಣ ಪಡೆಯುತ್ತದೆ.
ಜೊಮಾಟೊ, ಸ್ವಿಗ್ಗಿಗಿಂತ ಬಹಳ ಕಡಿಮೆ ಬೆಲೆಗೆ ಆಹಾರ ಸಿಗುತ್ತದೆ
ಫುಡ್ ಡೆಲಿವರಿ ಕ್ಷೇತ್ರದಲ್ಲಿ ಒಎನ್ಡಿಸಿ ಒಳ್ಳೆಯ ಯಶಸ್ಸು ಕಾಣುತ್ತಿದೆ ಎಂದು ಹೇಳಲಾಗುತ್ತಿದೆ. ಸ್ವಿಗ್ಗಿ ಮತ್ತು ಜೊಮಾಟೋದಲ್ಲಿ ನೀವು ಆರ್ಡರ್ ಮಾಡುವ ಆಹಾರದ ಬೆಲೆಗಿಂತ ಬಹಳ ಕಡಿಮೆ ಬೆಲೆಗೆ ಒಎನ್ಡಿಸಿ ಮೂಲಕ ಪಡೆಯಬಹುದು. ಈ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಎರಡೂ ದರಗಳ ಹೋಲಿಕೆಗಳಿರುವ ಸ್ಕ್ರೀನ್ಶಾಟ್ಗಳು ಶೇರ್ ಆಗುತ್ತಿವೆ. ಕೆಲವೊಮ್ಮೆ ಒಎನ್ಡಿಸಿಯಲ್ಲಿ ಆಹಾರ ಬೆಲೆ ಅರ್ಧದಷ್ಟು ಕಡಿಮೆ ಇದೆ.
ಯಾರು ಡೆಲಿವರಿ ಮಾಡುತ್ತಾರೆ? ಸದ್ಯ ಒಎನ್ಡಿಸಿಯಲ್ಲಿರುವುದು ಇದೊಂದೇ ಗೊಂದಲದ ಗೂಡು
ನಿಯಮದ ಪ್ರಕಾರ ನಾವು ಒಎನ್ಡಿಸಿಯಲ್ಲಿ ಆರ್ಡರ್ ಮಾಡುವ ಆಹಾರವನ್ನು ಗ್ರಾಹಕರಿಗೆ ತಲುಪಿಸುವ ಜವಾಬ್ದಾರಿ ಆ ರೆಸ್ಟೋರೆಂಟ್ಗೆ ಇರುತ್ತದೆ. ಎಲ್ಲಾ ರೆಸ್ಟೋರೆಂಟ್ಗಳೂ ಸ್ವಂತಕ್ಕೆ ಡೆಲಿವರಿ ಬಾಯ್ಗಳನ್ನು ಇಟ್ಟುಕೊಳ್ಳಲು ಅಗುವುದಿಲ್ಲ. ಆಗ ಗ್ರಾಹಕರಿಗೆ ಆಹಾರ ತಲುಪುವುದು ವಿಳಂಬವಾಗಬಹುದು.
ಸ್ವಿಗ್ಗಿ, ಜೊಮಾಟೋವಾದರೆ ಅವುಗಳದ್ದೇ ಆದ ಡೆಲಿವರಿ ಸಿಬ್ಬಂದಿ ಇರುತ್ತಾರೆ. ಹೀಗಾಗಿ, ಬಹಳ ತ್ವರಿತವಾಗಿ ಗ್ರಾಹಕರಿಗೆ ವಸ್ತುಗಳು ತಲುಪುತ್ತವೆ. ಒಎನ್ಡಿಸಿಯಲ್ಲಿ ಈ ಒಂದು ಕೊರತೆಯನ್ನು ತುಂಬುವ ಅಗತ್ಯವಿದೆ. ಡೆಲಿವರಿಗೆಂದು ಬೇರೆ ಪ್ಲಾಟ್ಫಾರ್ಮ್ಗಳು ಜೋಡಿತಗೊಂಡರೆ ಈ ಸಮಸ್ಯೆ ಬಗೆಹರಿಯಬಹುದು.
