ಬಳಕೆಯಲ್ಲಿ ಇಲ್ಲದೆ ನಿಷ್ಕ್ರಿಯಗೊಂಡ ಬ್ಯಾಂಕ್ ಖಾತೆಗಳನ್ನು ಮತ್ತೆ ಸಕ್ರಿಯಗೊಳಿಸುವ ಕ್ರಮ
Inactive and dormant account activation: ಎರಡು ವರ್ಷದವರೆಗೆ ಯಾವುದೇ ಹಣ ವಿತ್ಡ್ರಾ ಆಗದೇ ಉಳಿಯುವ ಬ್ಯಾಂಕ್ ಖಾತೆಗಳನ್ನು ಇನಾಪರೇಟಿವ್ ಅಕೌಂಟ್ ಎಂದು ವರ್ಗೀಕರಣ ಮಾಡಲಾಗುತ್ತದೆ. 10 ವರ್ಷ ಹೀಗೆ ಸ್ಥಗಿತಗೊಂಡಿರುವ ಖಾತೆಗಳ ಹಣವನ್ನು ಅನ್ಕ್ಲೇಮ್ಡ್ ಡೆಪಾಸಿಟ್ ಎಂದು ಪರಿಗಣಿಸಲಾಗುತ್ತದೆ. ಈ ರೀತಿ ಡಾರ್ಮೆಂಟ್ ಆಗಿರುವ ಖಾತೆಗಳನ್ನು ಮತ್ತೆ ಸಕ್ರಿಯಗೊಳಿಸುವ ಕ್ರಮಗಳ ಬಗ್ಗೆ ಮಾಹಿತಿ ಇಲ್ಲಿದೆ...
ಒಂದಕ್ಕಿಂತ ಹೆಚ್ಚು ಬ್ಯಾಂಕ್ ಖಾತೆಗಳನ್ನು ಹೊಂದಿರುವುದು ಸಾಮಾನ್ಯ. ಕೆಲವೊಮ್ಮೆ ಕೆಲ ಖಾತೆಗಳನ್ನು ನಿರ್ವಹಿಸದೇ ವರ್ಷಗಟ್ಟಲೆ ಬಿಟ್ಟಿರಬಹುದು. ನಿರ್ದಿಷ್ಟ ಅವಧಿಯವರೆಗೆ ಒಂದು ಬ್ಯಾಂಕ್ ಖಾತೆಯನ್ನು ಬಳಸದೇ ಬಿಟ್ಟರೆ ಅದು ಇನಾಪರೇಟಿವ್ ಅಥವಾ ಡಾರ್ಮಂಟ್ ಅಕೌಂಟ್ ಆಗುತ್ತದೆ. ಅಂದರೆ ನಿಷ್ಕ್ರಿಯ ಖಾತೆಯಾಗಿರುತ್ತದೆ. ಆ ಖಾತೆಯಲ್ಲಿ ಹಣ ಇದ್ದರೆ ಅದನ್ನು ಹಿಂಪಡೆಯಲು ಆಗುವುದಿಲ್ಲ. ಒಂದು ರೀತಿಯಲ್ಲಿ ಖಾತೆಯನ್ನು ಮುಟ್ಟುಗೋಲು ಹಾಕಿದ ಸ್ಥಿತಿ ಅದು. ಆರ್ಬಿಐ ನಿಯಮಗಳ ಪ್ರಕಾರ ಎರಡು ವರ್ಷಗಳವರೆಗೆ ಯಾವುದೇ ವಹಿವಾಟು ಆಗದ ಖಾತೆಗಳನ್ನು ಇನಾಪರೇಟಿವ್ ಅಕೌಂಟ್ ಎಂದು ವರ್ಗೀಕರಿಸಲಾಗುತ್ತದೆ.
ಅದೇ 10 ವರ್ಷ ಕಾಲ ನಿರ್ವಹಣೆ ಆಗದೇ ಉಳಿದ ಖಾತೆಯಲ್ಲಿನ ಹಣವನ್ನು ಅನ್ಕ್ಲೇಮ್ಡ್ ಡೆಪಾಸಿಟ್ಸ್ ಎಂದೂ ವರ್ಗೀಕರಿಸಲಾಗುತ್ತದೆ. ನೀವು ಎಫ್ಡಿ ಇಟ್ಟು ಪೂರ್ಣವಾಗಿ ಮರೆತು ಹೋಗಿದ್ದೀರಿ ಎಂದಿಟ್ಟುಕೊಳ್ಳಿ. ಆ ಠೇವಣಿ ಮೆಚ್ಯೂರ್ ಆಗಿ 10 ವರ್ಷವಾದರೂ ನೀವು ಹಿಂಪಡೆಯದೇ ಹೋದರೆ ಅದೂ ಕೂಡ ಅನ್ಕ್ಲೇಮ್ಡ್ ಡೆಪಾಸಿಟ್ ಎಂದು ವರ್ಗೀಕೃತವಾಗುತ್ತದೆ.
ಇದನ್ನೂ ಓದಿ: ಮ್ಯೂಚುವಲ್ ಫಂಡ್ ಹೂಡಿಕೆದಾರರ ಗಮನಕ್ಕೆ; ಸೆಬಿ ತರುತ್ತಿದೆ ನಾಮಿನಿ, ಕೆವೈಸಿ ನಿಯಮ ಬದಲಾವಣೆ
ಇನಾಪರೇಟಿವ್ ಅಕೌಂಟ್ ಅನ್ನು ಸಕ್ರಿಯಗೊಳಿಸುವ ಕ್ರಮಗಳು
ಗ್ರಾಹಕರು ತಮ್ಮ ಇನಾಪರೇಟಿವ್ ಬ್ಯಾಂಕ್ ಖಾತೆಯನ್ನು ಮತ್ತೆ ಸಕ್ರಿಯಗೊಳಿಸಬೇಕಾದರೆ ಬ್ಯಾಂಕ್ ಕಚೇರಿಗೆ ಹೋಗಿ ಕೆವೈಸಿ ದಾಖಲೆಗಳನ್ನು ಸಲ್ಲಿಸಬೇಕಾಗುತ್ತದೆ.
ಅದಕ್ಕೆ ಮುನ್ನ ಕಚೇರಿಯಲ್ಲಿ ಅಕೌಂಟ್ ಆ್ಯಕ್ಟಿವೇಶನ್ಗೆ ಅರ್ಜಿ ಮೂಲಕ ಮನವಿ ಸಲ್ಲಿಸಬೇಕು. ಬಳಿಕ ಕೆವೈಸಿ ದಾಖಲೆ ಸಲ್ಲಿಸಬೇಕು. ನಿಮ್ಮ ಅರ್ಜಿ ಸಲ್ಲಿಕೆಯಾಗಿ ಮೂರು ಕಾರ್ಯದಿನಗಳಲ್ಲಿ ಅಕೌಂಟ್ ಸಕ್ರಿಯಗೊಳ್ಳುವ ಸಾಧ್ಯತೆ ಇದೆ. ಆಕ್ಟಿವೇಟ್ ಆದಾಗ ನಿಮಗೆ ಎಸ್ಸೆಮ್ಮೆಸ್ ಅಥವಾ ಇಮೇಲ್ ಮೂಲಕ ಅಲರ್ಟ್ ಮೆಸೇಜ್ ತಲುಪುತ್ತದೆ.
ಇನಾಪರೇಟಿವ್ ಅಕೌಂಟ್ನ ಹಣಕ್ಕೆ ಬಡ್ಡಿ ಸಿಗುತ್ತಾ?
ಒಂದು ಖಾತೆ ನಿರ್ವಹಣೆ ಆಗದೆ ಇನಾಪರೇಟಿವ್ ಆಗಿದ್ದರೂ ಕೂಡ ಕನಿಷ್ಠ ಬಡ್ಡಿ ಸಂದಾಯವಾಗುತ್ತಾ ಹೋಗುತ್ತದೆ. ಸೇವಿಂಗ್ಸ್ ಅಕೌಂಟ್ನ ಬಡ್ಡಿ ಸಿಗುತ್ತದೆ. ನಿಶ್ಚಿತ ಠೇವಣಿಗೂ ಕೂಡ ಮೆಚ್ಯೂರ್ ಆದ ನಂತರದ ಅವಧಿಗೆ ಆ ಹಣಕ್ಕೆ ಸೇವಿಂಗ್ಸ್ ಅಕೌಂಟ್ನ ಬಡ್ಡಿ ಮಾತ್ರ ಸಿಗುತ್ತದೆ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
