Heat or Eat: ಫ್ಯಾನ್ ಹಾಕೋಕೆ ಕರೆಂಟ್ ಇಲ್ಲ, ಅಡುಗೆ ಮಾಡೋಕೆ ಗ್ಯಾಸ್ ಇಲ್ಲ; ಯೂರೋಪ್ನಲ್ಲಿ ಹಾಹಾಕಾರ
ಅಡುಗೆ ಅನಿಲ ಖರೀದಿಗೆ ಹಣವಿಲ್ಲದ ಬ್ರಿಟನ್ ಜನರು ಹಸಿ ಆಹಾರದ ರೆಸಿಪಿ ಹುಡುಕುತ್ತಿದ್ದಾರೆ. ಸೆಖೆಗೆ ಬೆವರು ಸುರಿಯುತ್ತಿದ್ದರೂ ಫ್ಯಾನ್ ಹಾಕಲು ಅವರಿಗೆ ಕರೆಂಟ್ ಬಿಲ್ ಭಯ.
ಜರ್ಮನಿ, ಬ್ರಿಟನ್ ಸೇರಿದಂತೆ ಯೂರೋಪ್ನ ಹಲವು ಶ್ರೀಮಂತ ದೇಶಗಳು ಹಣದುಬ್ಬರದಿಂದ (Inflation) ತತ್ತರಿಸಿದ್ದು ಸಾಮಾನ್ಯ ಜನರ ದೈನಂದಿನ ಬದುಕಿನ ರೀತಿನೀತಿಗಳೇ ಬದಲಾಗಿವೆ. ಈ ವರ್ಷ ಯೂರೋಪ್ನಲ್ಲಿ ದಾಖಲೆ ಮಟ್ಟದ ಉಷ್ಣಾಂಶ ಏರಿಕೆಯಾಗಿದೆ (Heat Wave in Europe). ಆದರೆ ಹವಾನಿಯಂತ್ರಕಗಳು (ಎಸಿ) ಅಥವಾ ಫ್ಯಾನ್ ಬಳಸಲು ಜನರಿಗೆ ಸಾಧ್ಯವಾಗುತ್ತಿಲ್ಲ. ಬಟ್ಟೆಗಳಿಗೆ ಐರನ್ ಮಾಡಲು, ಧಾನ್ಯ-ತರಕಾರಿ ಬೇಯಿಸಿ ಅಡುಗೆ ಮಾಡಲೂ ಹಿಂಜರಿಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ವಿದ್ಯುತ್ ಮತ್ತು ಅಡುಗೆ ಅನಿಲದ ಬೆಲೆ ವಿಪರೀತ ಹೆಚ್ಚಾಗಿದ್ದು, ದುಡಿಮೆಯ ಬಹುಪಾಲು ಇವೆರೆಡಕ್ಕೆ ವ್ಯಯವಾಗುತ್ತಿರುವ ಹಿನ್ನೆಲೆಯಲ್ಲಿ ಜನರು ಅನಿವಾರ್ಯವಾಗಿ ಜೀವನಶೈಲಿಯಲ್ಲಿ ಬದಲಾವಣೆ ಮಾಡಿಕೊಳ್ಳುತ್ತಿದ್ದಾರೆ. ಬಹುತೇಕ ದೇಶಗಳಲ್ಲಿ ವಿದ್ಯುತ್ ಮತ್ತು ಅಡುಗೆ ಅನಿಲದ ಬಳಕೆ ಕಡಿಮೆಯಾಗಿದೆ.
ಇನ್ನು ಕೆಲವೇ ತಿಂಗಳುಗಳಲ್ಲಿ ಯೂರೋಪ್ನಲ್ಲಿ ಚಳಿಗಾಲ ಆರಂಭವಾಗಲಿದ್ದು, ರಷ್ಯಾ-ಉಕ್ರೇನ್ ಗಲಭೆ ಒಂದು ಹಂತಕ್ಕೆ ಬಂದು ಅನಿಲ ಸರಬರಾಜು ಮೊದಲ ಸ್ಥಿತಿಗೆ ಮರಳದಿದ್ದರೆ ಪರಿಸ್ಥಿತಿ ಮತ್ತಷ್ಟು ವಿಷಮಿಸಲಿದೆ. ಜರ್ಮನಿ ಮತ್ತು ನಾರ್ವೆ, ಬ್ರಿಟನ್ ದೇಶಗಳಲ್ಲಿ ಸಾಮಾಜಿಕ ಅಸಂತುಷ್ಟಿ ಹೆಚ್ಚಾಗಿ ಜನರು ಬೀದಿಗಳಿದು ಪ್ರತಿಭಟಿಸುವ ಸಾಧ್ಯತೆಯಿದೆ. ಬ್ರಿಟನ್ನ ರೈಲ್ವೆ ಇಲಾಖೆ, ಬಂದರು ನೌಕರರು ಹಾಗೂ ಜರ್ಮನಿಯ ಲುಫ್ತಾನ್ಸಾ ಏರ್ಲೈನ್ಸ್ ಸಿಬ್ಬಂದಿ ವೇತನ ಏರಿಕೆಗೆ ಆಗ್ರಹಿಸಿ ಪ್ರತಿಭಟನೆ ನಡೆಸಿದ್ದರು. ಹಣದುಬ್ಬರ ಮತ್ತು ಬದಲಾದ ಜೀವನಶೈಲಿಯು ಜನರ ಆಕ್ರೋಶವಾಗಿ ಬದಲಾಗಿ, ಸಮಾಜದ ಹಲವು ವರ್ಗಗಳಲ್ಲಿ ಅಸಮಾಧಾನ ಹೆಚ್ಚಾಗಬಹುದು. ಡಿಸೆಂಬರ್ ಹೊತ್ತಿಗೆ ಪ್ರತಿಭಟನೆಗಳು ಈ ದೇಶಗಳಲ್ಲಿ ಸಾಮಾನ್ಯವಾಗಬಹುದು ಎಂದು ‘ಸಿವಿಲ್ ಅನ್ರೆಸ್ಟ್ ಇಂಡೆಕ್ಸ್’ (ಸಾಮಾಜಿಕ ಅಶಾಂತಿ ಸೂಚ್ಯಂಕ) ಉಲ್ಲೇಖಿಸಿ ರಾಯಿಟರ್ಸ್ ವರದಿ ಮಾಡಿದೆ.
ಯೂರೋಪ್ ದೇಶಗಳ ಲಕ್ಷಾಂತರ ಜನರು ಬೆಲೆಏರಿಕೆಯಿಂದ ಅಕ್ಷರಶಃ ತತ್ತರಿಸಿದ್ದು, ಸೆಖೆಯಿಂದ ಬೆವರುತ್ತಿದ್ದಾಗಲೂ, ಕರೆಂಟ್ ಇದ್ದರೂ ಫ್ಯಾನ್ ಸ್ವಿಚ್ ಹಾಕುತ್ತಿಲ್ಲ. ಇಂಗ್ಲೆಂಡ್ನ ಗ್ರಿಮ್ಸ್ಬಿ ಎನ್ನುವ ಪಟ್ಟಣದಲ್ಲಿರುವ ಫಿಲಿಪ್ ಕೀಟ್ಲೆ ಇಂಥವರ ಪೈಕಿ ಒಬ್ಬರು. ‘ಈ ವರ್ಷದ ವಿಪರೀತ ಸೆಖೆ. ಹಾಗಂತೆ ಫ್ಯಾನ್ ಹಾಕೋಣ ಅಂದ್ರೆ ಭಯವಾಗುತ್ತೆ. ನನ್ನ ಬ್ಯಾಂಕ್ ಪಾಸ್ಬುಕ್ ಒಮ್ಮೆ ನೋಡಿ. ಈ ಪಾಟಿ ಕರೆಂಟ್ ಬಿಲ್ ಕಟ್ಟುವಷ್ಟು ದುಡ್ಡು ನನ್ನ ಹತ್ರ ಇಲ್ಲ’ ಎನ್ನುತ್ತಾರೆ ಅವರು.
‘ನಿಮಗೆ ಇನ್ನೊಂದು ತಮಾಷೆ ಗೊತ್ತಾ’ ಎಂದು ಅವರು ರಾಯಿಟರ್ಸ್ ವರದಿಗಾರರನ್ನು ಕೇಳಿದ್ದಾರೆ. ‘ನಾನು ಇತ್ತೀಚೆಗೆ ಬೇಯಿಸದೇ ತಿನ್ನುವಂಥ ಆಹಾರಗಳನ್ನು ಹೆಚ್ಚಾಗಿ ಬಳಸುತ್ತಿದ್ದೇನೆ. ನಮ್ಮ ಮನೆಗೆ ಅಡುಗೆ ಅನಿಲದ ಸಂಪರ್ಕವಿದೆ, ಸರಬರಾಜೂ ಆಗುತ್ತಿದೆ. ಆದರೆ ಅದನ್ನು ಬಳಸಿದ ನಂತರ ತುಂಬಬೇಕಾದ ಬಿಲ್ ನೆನಪಿಸಿಕೊಂಡರೆ ಭಯವಾಗುತ್ತದೆ’ ಎಂದು ಅವರು ಅಳಲು ತೋಡಿಕೊಂಡರು.
ಶತಮಾನಗಳ ಕಾಲ ಹಲವು ದೇಶಗಳನ್ನು ಆಳಿದ್ದ, ಸೂರ್ಯಮುಳುಗದ ಸಾಮ್ರಾಜ್ಯ ಕಟ್ಟಿದ್ದ ಬ್ರಿಟನ್ನ ಕಷ್ಟವೇ ಇಷ್ಟಿರುವಾಗ ಉಳಿದ ದೇಶಗಳ ಕಥೆ ಕೇಳಬೇಕೆ? ಕೊರೊನಾದಿಂದ ಆಗಷ್ಟೇ ಚೇತರಿಸಿಕೊಳ್ಳುತ್ತಿದ್ದ ಆರ್ಥಿಕತೆಗೆ ರಷ್ಯಾ-ಉಕ್ರೇನ್ ಸಂಘರ್ಷ ಮತ್ತೊಂದು ಮಾರಕ ಹೊಡೆತ ನೀಡಿದ್ದು, ಚೇತರಿಸಿಕೊಳ್ಳುವುದು ಯಾವಾಗ ಎಂಬ ಪ್ರಶ್ನೆಗೆ ಅಲ್ಲಿನ ನಾಗರಿಕರು ಉತ್ತರ ಹುಡುಕುತ್ತಿದ್ದಾರೆ. ಕಳೆದ ಒಂದು ವರ್ಷದ ಅವಧಿಯಲ್ಲಿ ಯೂರೋಪ್ನಲ್ಲಿ ಅಡುಗೆ ಅನಿಲದ ಸರಾಸರಿ ಬೆಲೆಯು ಶೇ 550ರಷ್ಟು (ಐದು ಪಟ್ಟು) ಹೆಚ್ಚಾಗಿದೆ. ಬ್ರಿಟನ್ನಲ್ಲಿ ಒಂದು ಮನೆಯ ಸರಾಸರಿ ಅಡುಗೆ ಅನಿಲ ವೆಚ್ಚವು 3,549 ಪೌಂಡ್ ಆಗಿದೆ.
ಯೂರೋಪ್ನ ಹಲವು ಸರ್ಕಾರವು ಸಹಾಯಧನಗಳನ್ನು ಘೋಷಿಸಿ ಜನರಿಗೆ ನೆರವಾಗಲು ಯತ್ನಿಸಿವೆ. ಆದರೆ ಅದರಿಂದಲೂ ಹೆಚ್ಚು ಪ್ರಯೋಜನವಾಗಿಲ್ಲ. ಚಳಿಗಾಲದಲ್ಲಿ ಪ್ರತಿವರ್ಷವೂ ಯೂರೋಪ್ನಲ್ಲಿ ಇಂಧನ ಮತ್ತು ವಿದ್ಯುತ್ ಬಳಕೆ ಹೆಚ್ಚಾಗಿರುತ್ತದೆ. ಮನೆಗಳಲ್ಲಿ ಶಾಖ ಉತ್ಪಾದಿಸುವ ಉಪಕರಣಗಳಿಗೆ ಅಡುಗೆ ಅನಿಲ ಮತ್ತು ವಿದ್ಯುತ್ ಬಳಕೆಯಾಗುವುದರಿಂದ ಅದನ್ನು ನಿರ್ವಹಿಸುವುದು ಹೇಗೆಂಬ ಚಿಂತೆ ಜನರನ್ನು ಕಾಡುತ್ತಿದೆ. 2021ರ ಚಳಿಗಾಲಕ್ಕೆ ಹೋಲಿಸಿದರೆ ಈ ಬಾರಿಯ ಚಳಿಗಾಲದಲ್ಲಿ ಇಂಧನ-ವಿದ್ಯುತ್ ಬಳಕೆಗಾಗಿ ಯೂರೋಪಿಯನ್ನರು ದುಪಟ್ಟು ಹಣ ತೆರುತ್ತಾರೆ ಎಂದು ವಿಶ್ಲೇಷಿಸಲಾಗಿದೆ. ಈ ವರ್ಷದ ಅಕ್ಟೋಬರ್ ನಂತರ ಬ್ರಿಟನ್ನಲ್ಲಿ ಬಡವರ ಸಂಖ್ಯೆ ಹೆಚ್ಚಾಗಬಹುದು. ಸಾಕಷ್ಟು ಜನರು ಇಂಧನ ಶುಲ್ಕ ಭರಿಸಲು ಸಾಧ್ಯವಾಗದೆ ಚಳಿಗಾಲದಲ್ಲಿ ಹಲವು ಕಷ್ಟನಷ್ಟ ಅನುಭವಿಸಬಹುದು ಎಂಬ ಆತಂಕ ಸರ್ಕಾರದ ವಲಯದಲ್ಲಿ ವ್ಯಕ್ತವಾಗಿದೆ.
ಆಹಾರವೂ ಸಿಗುತ್ತಿಲ್ಲ, ಶಾಖವೂ ಇಲ್ಲ; ಅಲ್ಲಿನ ಜನರ ಪರಿಸ್ಥಿತಿ ವಿವರಿಸುವ ಇಂಥ ಟ್ವೀಟ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಇವೆ. ಈ ಪೈಕಿ ಒಂದನ್ನು ಇಲ್ಲಿ ನೀಡಲಾಗಿದೆ…
For victims at home, if they can’t afford to heat or eat, then how can they afford to leave? Funding for frontline services is limited. Funding for long term support services is non-existent. Who will assist a victim leaving and navigating the justice system for (probably) years?
— #thecourtsaid (@NataliePage31) September 5, 2022
ಇದನ್ನೂ ಓದಿ: Rupee Weakens: ಯೂರೋಪ್ನಲ್ಲಿ ಇಂಧನ ಬಿಕ್ಕಟ್ಟು: ಡಾಲರ್ ಎದುರು 20 ವರ್ಷಗಳ ಕನಿಷ್ಠ ಮಟ್ಟಕ್ಕೆ ಕುಸಿದ ರೂಪಾಯಿ
Published On - 6:00 am, Tue, 6 September 22