SMS Charges: ಮೊಬೈಲ್ ಫಂಡ್ ವರ್ಗಾವಣೆಗೆ ಎಸ್ಎಂಎಸ್ ಶುಲ್ಕ ಮನ್ನಾ ಮಾಡಿದ ಎಸ್​ಬಿಐ

ಬೆಂಗಳೂರು: ಭಾರತದ ಅತಿದೊಡ್ಡ ಬ್ಯಾಂಕ್ ಎನಿಸಿರುವ ‘ಭಾರತೀಯ ಸ್ಟೇಟ್ ಬ್ಯಾಂಕ್’ (State Bank of India – SBI) ಮೊಬೈಲ್ ಮೂಲಕ ಹಣ ವರ್ಗಾವಣೆ ವಿಧಿಸುತ್ತಿದ್ದ ಎಸ್ಎಂಎಸ್ ಸಂದೇಶದ ಶುಲ್ಕವನ್ನು ಮನ್ನಾ ಮಾಡುವುದಾಗಿ ಘೋಷಿಸಿದೆ. ಬಳಕೆದಾರರು ಈಗ ಯುಎಸ್ಎಸ್​ಡಿ (Unstructured Supplementary Service Data – USSED) ಸೇವೆಗಳ ಮೂಲಕ ಯಾವುದೇ ಹೆಚ್ಚುವರಿ ಶುಲ್ಕವಿಲ್ಲದೆ ವಹಿವಾಟು ನಡೆಸಬಹುದು ಎಂದು ಎಸ್​ಬಿಐ ಮಾಹಿತಿ ನೀಡಿದೆ. ಈ ಕುರಿತು ತನ್ನ ಟ್ವಿಟರ್ ಹ್ಯಾಂಡಲ್​ನಲ್ಲಿ ಟ್ವೀಟ್ ಮಾಡಿರುವ ಎಸ್​ಬಿಐ, ‘ಮೊಬೈಲ್ ಮೂಲಕ ನಗದು ವರ್ಗಾವಣೆ-ವಹಿವಾಟು ಮೇಲಿನ ಎಸ್ಎಂಎಸ್ ಶುಲ್ಕಗಳನ್ನು ಈಗ ಮನ್ನಾ ಮಾಡಲಾಗಿದೆ. ಬಳಕೆದಾರರು ಈಗ ಯಾವುದೇ ಹೆಚ್ಚುವರಿ ಶುಲ್ಕಗಳಿಲ್ಲದೆ ವಹಿವಾಟು ನಡೆಸಬಹುದು’ ಎಂದು ಹೇಳಿದೆ.

ಬಳಕೆದಾರರು ಹಣ ಕಳುಹಿಸಲು, ಹಣ ವಿನಂತಿಸಲು, ಖಾತೆಯಲ್ಲಿರುವ ಬಾಕಿ ಮೊತ್ತ ತಿಳಿಯಲು, ಮಿನಿ ಸ್ಟೇಟ್​ಮೆಂಟ್​ ಪಡೆಯಲು ಹಾಗೂ ಯುಪಿಐ ಪಿನ್ ಬದಲಾವಣೆ ಸೇರಿದಂತೆ ಹಲವು ಸೇವೆಗಳನ್ನು ಯಾವುದೇ ಹೆಚ್ಚುವರಿ ವೆಚ್ಚವಿಲ್ಲದೆ ಪಡೆಯಬಹುದು ಎಂದು ಎಸ್​ಬಿಐ ಹೇಳಿದೆ.

ಏನಿದು ಯುಎಸ್​ಎಸ್​ಡಿ

ಯುಎಸ್​ಎಸ್​ಡಿ ವ್ಯವಸ್ಥೆಯನ್ನು ಸಾಮಾನ್ಯವಾಗಿ ಮೊಬೈಲ್ ಸೇವಾದಾತ ಕಂಪನಿಗಳು ಟಾಕ್​ಟೈಮ್ ಬ್ಯಾಲೆನ್ಸ್​ ಅಥವಾ ಖಾತೆಯ ಮಾಹಿತಿ ಪರಿಶೀಲಿಸುವ ಸೇವೆ ಒದಗಿಸಲು ನೀಡುತ್ತವೆ. ಇತ್ತೀಚಿನ ದಿನಗಳಲ್ಲಿ ಇದೇ ಸೇವೆಯನ್ನು ಮೊಬೈಲ್ ಬ್ಯಾಂಕಿಂಗ್ ವಹಿವಾಟುಗಳಿಗೂ ಬಳಸಲಾಗುತ್ತಿದೆ. ಈ ಸೇವೆಯು ಸ್ಮಾರ್ಟ್​​ಫೋನ್​ಗಳಲ್ಲಿ ಮಾತ್ರವೇ ಅಲ್ಲ, ಫೀಚರ್ ಫೋನ್​ಗಳಲ್ಲಿಯೂ ಕಾರ್ಯನಿರ್ವಹಿಸುತ್ತದೆ. ಪ್ರಸ್ತುತ ಭಾರತದಲ್ಲಿ ಸುಮಾರು 100 ಕೋಟಿ ಮೊಬೈಲ್ ಫೋನ್​ಗಳು ಬಳಕೆಯಲ್ಲಿವೆ ಎಂದು ಅಂದಾಜಿಸಲಾಗಿದೆ. ಈ ಪೈಕಿ ಸುಮಾರು 65 ಕೋಟಿ ಮೊಬೈಲ್​ಗಳು ಫೀಚರ್ ಫೋನ್​ಗಳಾಗಿವೆ. ಇಂಥ ಫೋನ್​ಗಳನ್ನು ಬಳಸುವವರಿಗೆ ಯುಎಸ್​ಎಸ್​ಡಿ ಹೆಚ್ಚಿನ ಅನುಕೂಲಗಳನ್ನು ಒದಗಿಸುತ್ತದೆ.

SMS charges now waived off on mobile fund transfers! Users can now conveniently transact without any additional charges.#SBI #StateBankOfIndia #AmritMahotsav #FundTransfer pic.twitter.com/MRN1ysqjZU

— State Bank of India (@TheOfficialSBI) September 17, 2022

ಬೆಂಚ್​ಮಾರ್ಕ್ ದರ ಹೆಚ್ಚಳ

ಎಸ್​ಬಿಐ ತನ್ನ ಬೆಂಚ್​ ಮಾರ್ಕ್ ಪ್ರೈಮ್ ಲೆಂಡಿಂಗ್ (ಸಾಲ ನೀಡುವ ಗರಿಷ್ಠ ಬಡ್ಡಿ) ದರವನ್ನು 70 ಮೂಲಾಂಶಗಳಷ್ಟು ಹೆಚ್ಚಿಸಿದೆ. ಎಸ್​ಬಿಐ ವೆಬ್​ಸೈಟ್​ನಲ್ಲಿ ಪ್ರಕಟಿಸಿರುವ ಮಾಹಿತಿಯ ಪ್ರಕಾರ, ಪರಿಷ್ಕೃತ ಬಡ್ಡಿದರವು ಸೆಪ್ಟೆಂಬರ್ 15ರಿಂದ ಜಾರಿಗೆ ಬರಲಿದ್ದು, ಶೇ 13.45ರ ಗರಿಷ್ಠ ಬಡ್ಡಿ ದರವನ್ನು ನಿಗದಿಪಡಿಸಲಾಗಿದೆ. ಬ್ಯಾಂಕ್ ಸಾಲಸ ನೀಡುವ ಕನಿಷ್ಠ ಬಡ್ಡಿದರವನ್ನು ಶೇ 8.7ಕ್ಕೆ ಹೆಚ್ಚಿಸಿದೆ. ಈ ಬೆಳವಣಿಗೆಯಿಂದ ಸಾಲಗಾರರ ಇಎಂಐ ಮಾಸಿಕ ಕಂತಿನ ಪ್ರಮಾಣವೂ ಹೆಚ್ಚಾಗಲಿದೆ.

ಪ್ರತಿ ಮೂರು ತಿಂಗಳಿಗೆ ಒಮ್ಮೆ ಮಾರುಕಟ್ಟೆ ಪರಿಸ್ಥಿತಿ ಆಧರಿಸಿ ಬ್ಯಾಂಕ್​ಗಳು ಬಿಪಿಎಲ್ಆರ್ ಮತ್ತು ಮೂಲ ದರಗಳನ್ನೂ ಪರಿಷ್ಕರಿಸುತ್ತವೆ. ಎಸ್​ಬಿಐನ ಸಾಲದ ದರ ಪರಿಷ್ಕರಣೆಯನ್ನು ಮುಂದಿನ ದಿನಗಳಲ್ಲಿ ಇತರ ಬ್ಯಾಂಕುಗಳು ಅನುಸರಿಸುವ ಸಾಧ್ಯತೆಯಿದೆ.