ಷೇರು ಮಾರುಕಟ್ಟೆಯಲ್ಲಿ ಎಫ್ ಅಂಡ್ ಒ ವ್ಯವಹಾರಕ್ಕೆ ಕಡಿವಾಣ ಹಾಕಲು ಸೆಬಿ ಕ್ರಮ; ಹೊಸ ನಿಯಮಗಳು ಸದ್ಯದಲ್ಲೇ ಜಾರಿ
SEBI looking to curb Futures and Options trading: ಒಂದು ರೀತಿಯಲ್ಲಿ ಷೇರು ಮಾರುಕಟ್ಟೆಯಲ್ಲಿ ಜೂಜಾಟದಂತಿರುವ ಎಫ್ ಅಂಡ್ ಒ ಟ್ರೇಡಿಂಗ್ನಲ್ಲಿ ಹಣ ಕಳೆದುಕೊಳ್ಳುವವರ ಸಂಖ್ಯೆ ಹೆಚ್ಚಿದೆ. ಇದನ್ನು ಗಮನಿಸಿರುವ ಸೆಬಿ, ಎಫ್ ಅಂಡ್ ಒ ಟ್ರೇಡಿಂಗ್ಗೆ ಕಡಿವಾಣ ಹಾಕಲು ಮಾರ್ಗೋಪಾಯ ಹುಡುಕಲು ಸಮಿತಿಯೊಂದನ್ನು ರಚಿಸಿತ್ತು. ಈ ಸಮಿತಿ ಏಳು ಕ್ರಮಗಳನ್ನು ಶಿಫಾರಸು ಮಾಡಿದೆ. ತಜ್ಞರೊಂದಿಗೆ ಸಮಾಲೋಚನೆ ನಡೆಸಿ ಅಂತಿಮವಾಗಿ ತೀರ್ಮಾಣ ಮಾಡಲಿದೆ ಸೆಬಿ.
ನವದೆಹಲಿ, ಜುಲೈ 9: ಷೇರು ಮಾರುಕಟ್ಟೆ ನಿಯಂತ್ರಣ ಪ್ರಾಧಿಕಾರವಾದ ಸೆಬಿ ಈಗ ಫ್ಯೂಚರ್ಸ್ ಅಂಡ್ ಆಪ್ಷನ್ಸ್ ವ್ಯವಹಾರಗಳಿಗೆ ಮೂಗುದಾರ ಹಾಕಲು ಮುಂದಾಗಿದೆ. ಸೆಬಿ ರಚಿಸಿದ್ದ ಕಾರ್ಯಕಾರಿ ಸಮಿತಿಯೊಂದು ಎಫ್ ಅಂಡ್ ಒ ಸಂಬಂಧ ಕೆಲ ಕ್ರಮಗಳಿಗೆ ಶಿಫಾರಸು ಮಾಡಿದೆ. ಇದರಲ್ಲಿ ಡಿರೈವೇಟಿವ್ ಕಾಂಟ್ರಾಕ್ಟ್ಗಳ ಕನಿಷ್ಠ ಲಾಟ್ ಗಾತ್ರವನ್ನು 20ರಿಂದ 30 ಲಕ್ಷಕ್ಕೆ ಏರಿಸುವ ಸಲಹೆಯೂ ಇದರಲ್ಲಿ ಇದೆ. ಸದ್ಯ ಈ ಲಾಟ್ ಸೈಜ್ ಐದು ಲಕ್ಷ ರೂ ಇದೆ. ಇದನ್ನು ಕನಿಷ್ಠ ನಾಲ್ಕು ಪಟ್ಟಾದರೂ ಹೆಚ್ಚಿಸಬೇಕು ಎಂಬುದು ಸಮಿತಿಯ ಶಿಫಾರಸಾಗಿದೆ.
ಎಫ್ ಅಂಡ್ ಒ ಎಂದೇ ಖ್ಯಾತವಾಗಿರುವ ಫ್ಯೂಚರ್ಸ್ ಮತ್ತು ಆಪ್ಷನ್ಸ್ ಎಂಬುವುವು ಒಂದು ವಿಧದ ಟ್ರೇಡಿಂಗ್ಗಳಾಗಿವೆ. ಇವನ್ನು ಡಿರವೇಟಿವ್ ಮಾರ್ಕೆಟ್ ಎಂದೂ ಕರೆಯಲಾಗುತ್ತದೆ. ಡಿರವೇಟಿವ್ ಎಂದರೆ ಒಂದು ವಸ್ತುವಿನ ಮೌಲ್ಯದ ಆಧಾರಿತವಾದುದು. ಒಂದು ರೀತಿಯಲ್ಲಿ ಬೆಟ್ಟಿಂಗ್ನಂತೆ. ಈ ಕಾರಣಕ್ಕೆ ಬಹಳಷ್ಟು ಹೂಡಿಕೆದಾರರು ಎಫ್ ಅಂಡ್ ಒ ದಲ್ಲಿ ಅದೃಷ್ಟ ಪರೀಕ್ಷೆ ಮಾಡಲು ಹೋಗಿ ಹಣ ಕಳೆದುಕೊಂಡಿರುವುದಿದೆ. ಈ ರೀತಿ ಎಫ್ ಅಂಡ್ ಒ ಟ್ರೇಡಿಂಗ್ ಮಾಡುವ ಪ್ರತೀ 10ರಲ್ಲಿ 9 ಮಂದಿ ನಷ್ಟ ಅನುಭವಿಸುತ್ತಿದ್ದಾರೆ.
ಇದನ್ನೂ ಓದಿ: ಬಜೆಟ್ಗೆ ಮುನ್ನ ರೈಲ್ವೆ ಕ್ಷೇತ್ರದ ಷೇರುಗಳ ಬೆಲೆ ಭರ್ಜರಿ ಏರಿಕೆ; ಕಾರಣ ಇಲ್ಲಿದೆ…
ಇತ್ತೀಚಿನ ದಿನಗಳಲ್ಲಿ ಭಾರತದಲ್ಲಿ ಎಫ್ ಅಂಡ್ ಒ ಹೆಚ್ಚು ಜನಪ್ರಿಯವಾಗುತ್ತಿದೆ. ಬಹಳಷ್ಟು ರೀಟೇಲ್ ಹೂಡಿಕೆದಾರರು ಈ ರೀತಿಯ ಟ್ರೇಡಿಂಗ್ನಲ್ಲಿ ತೊಡಗಿಸಿಕೊಳ್ಳುತ್ತಿರುವುದು ಸೆಬಿ ಗಮನಕ್ಕೆ ಬಂದಿತ್ತು. ಹೂಡಿಕೆದಾರರ ಹಿತಾಸಕ್ತಿಗೆ ಇದು ಧಕ್ಕೆ ತರುವಂತಿರುವುದರಿಂದ ಎಫ್ ಅಂಡ್ ಒ ನಿಯಂತ್ರಣಕ್ಕೆ ಏನು ಕ್ರಮ ತೆಗೆದುಕೊಳ್ಳಬಹುದು ಎಂದು ಪರಿಶೀಲಿಸಲು ಸಮಿತಿಯೊಂದನ್ನು ಸೆಬಿ ನೇಮಿಸಿತ್ತು.
ಡಿರವೇಟಿವ್ ಕಾಂಟ್ರಾಕ್ಟ್ಗಳ ಮಿನಿಮಮ್ ಲಾಟ್ ಸೈಜ್ ಅನ್ನು ಹೆಚ್ಚಿಸುವುದು ಮಾತ್ರವಲ್ಲದೆ, ಆಪ್ಷನ್ಸ್ ಕಾಂಟ್ರಾಕ್ಟ್ಗೆ ಸ್ಟ್ರೈಕ್ ಪ್ರೈಸ್ಗೆ ಮಿತಿ ಹಾಕಬಹುದು ಎಂದು ಈ ಸಮಿತಿ ಶಿಫಾರಸು ಮಾಡಿದೆ. ಇವೆರಡೂ ಸೇರಿದಂತೆ ಏಳು ಶಿಫಾರಸುಗಳನ್ನು ಈ ಸಮಿತಿ ಸಲ್ಲಿಸಿದೆ.
ಎಫ್ ಅಂಡ್ ಒ ನಿಯಂತ್ರಕ್ಕೆ ಸೆಬಿಗೆ ಬಂದಿರುವ ಪ್ರಸ್ತಾವಗಳಿವು
- ಡಿರವೇಟಿವ್ ಕಾಂಟ್ರಾಕಟ್ಗಳ ಕನಿಷ್ಠ ಲಾಟ್ ಗಾತ್ರವನ್ನು 5 ಲಕ್ಷ ರೂನಿಂದ 30 ಲಕ್ಷ ರೂಗೆ ಹೆಚ್ಚಿಸುವುದು.
- ಆಪ್ಷನ್ಸ್ ಕಾಂಟ್ರಾಕ್ಟ್ನ ಸ್ಟ್ರೈಕ್ ಪ್ರೈಸ್ಗೆ ಮಿತಿ
- ವಾರದ ಆಪ್ಷನ್ಸ್ ಅನ್ನು ಒಂದಕ್ಕೆ ಮಿತಿಗೊಳಿಸುವುದು
- ವಾಯಿದೆ ದಿನದ ಕ್ಯಾಲಂಡರ್ ಸ್ಪ್ರೆಡ್ ಬೆನಿಫಿಟ್ ಅನ್ನು ತೆಗೆದುಹಾಕುವುದು
- ಅಪ್ಷನ್ಸ್ನ ಖರೀದಿದಾರರಿಂದ ಮುಂಗಡವಾಗಿ ಪ್ರೀಮಿಯಮ್ ಸಂಗ್ರಹಿಸುವುದು.
- ಪೊಸಿಶನ್ ಲಿಮಿಟ್ ಮೇಲೆ ಕಣ್ಣಿಡುವುದು.
- ಕಾಂಟ್ರಾಕ್ಟ್ ವಾಯಿದೆ ಅಂತ್ಯ ಸಮೀಪದಲ್ಲಿ ಅಗತ್ಯವಾದ ಮಾರ್ಜಿನ್ನಲ್ಲಿ ಹೆಚ್ಚಳ ಮಾಡುವುದು.
ಈ ಏಳು ಪ್ರಸ್ತಾಪಗಳನ್ನು ಜಾರಿ ಮಾಡುವುದರ ಅನುಕೂಲ ಮತ್ತು ಅನನುಕೂಗಳೇನು ಎಂಬ ವಿವರವನ್ನು ಸೆಬಿ ನೇಮಿತ ತಜ್ಞರ ಗುಂಪೊಂದು ಚರ್ಚಿಸಲಿದೆ.
ಇದನ್ನೂ ಓದಿ: ಜೂನ್ನಲ್ಲಿ 42.4 ಲಕ್ಷ ಹೊಸ ಡೀಮ್ಯಾಟ್ ಖಾತೆ ರಚನೆ; ಷೇರುಪೇಟೆಯತ್ತ ಮುಗಿಬಿದ್ದ ಹೊಸಬರು
ಎಫ್ ಅಂಡ್ ಒ ಎಂದರೇನು?
ಎಫ್ ಎಂದರೆ ಫ್ಯೂಚರ್ಸ್. ಒ ಎಂದರೆ ಆಪ್ಷನ್ಸ್. ಎರಡೂ ಕೂಡ ಇಬ್ಬರ ಮಧ್ಯೆ ನಡೆಯುವ ಒಪ್ಪಂದ ಆಧಾರಿತ ಟ್ರೇಡಿಂಗ್ ಆಗಿದೆ. ಫ್ಯೂಚರ್ಸ್ ಟ್ರೇಡಿಂಗ್ನಲ್ಲಿ ಒಂದು ಷೇರನ್ನು ನಿರ್ದಿಷ್ಟ ದಿನದಂದು ನಿರ್ದಿಷ್ಟ ಮೊತ್ತಕ್ಕೆ ಮಾರಲು ಅಥವಾ ಖರೀದಿಸಲು ಒಪ್ಪಂದ ಅಥವಾ ಕಾಂಟ್ರಾಕ್ಟ್ ನಡೆಯುತ್ತದೆ. ಆಪ್ಷನ್ಸ್ನಲ್ಲೂ ಇದೇ ರೀತಿ ಕಾಂಟ್ರಾಕ್ಟ್ ನಡೆಯುತ್ತದೆ. ಆದರೆ, ಇಲ್ಲಿ ಹೂಡಿಕೆದಾರರಿಗೆ ಗುತ್ತಿಗೆಯಿಂದ ಹಿಂದಕ್ಕೆ ಸರಿಯುವ ಅವಕಾಶ ಇರುತ್ತದೆ. ಆದರೆ, ನಿರ್ದಿಷ್ಟ ಶುಲ್ಕ ಪಾವತಿಸಬೇಕಾಗುತ್ತದೆ.
ಭಾರತದಲ್ಲಿ ಬಹಳ ಹೆಚ್ಚು ಎಫ್ ಅಂಡ್ ಒ ಟ್ರೇಡಿಂಗ್ ನಡೆಯುತ್ತಿದೆ. ಇದರಲ್ಲಿ ಫ್ಯೂಚರ್ಸ್ ಟ್ರೇಡಿಂಗ್ ಶೇ. 20, ಆಪ್ಷನ್ಸ್ ಟ್ರೇಡಿಂಗ್ ಶೇ. 80ರಷ್ಟು ಜನರು ತೊಡಗಿಸಿಕೊಂಡಿರುವುದುಂಟು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
