Stock Market New Margin Rules: ಷೇರು ಮಾರುಕಟ್ಟೆಯಲ್ಲಿ ಸೆ. 1ರಿಂದ ಹೊಸ ಮಾರ್ಜಿನ್ ನಿಯಮ; ಟ್ರೇಡರ್ಸ್ಗಳ ಆಕ್ರೋಶ
ಷೇರು ಮಾರುಕಟ್ಟೆ ನಿಯಂತ್ರಕ ಸಂಸ್ಥೆಯಾದ ಸೆಬಿಯಿಂದ ಹೊಸ ಮಾರ್ಜಿನ್ ನಿಯಮ ಪರಿಚಯಿಸಲಾಗಿದೆ. ಈ ಬಗ್ಗೆ ಟ್ರೇಡರ್ಗಳಿಂದ ಭಾರೀ ಬೇಸರ ವ್ಯಕ್ತವಾಗಿದೆ. ಏನಿದು ಹೊಸ ನಿಯಮ ಎಂಬ ಬಗ್ಗೆ ವಿವರ ಇಲ್ಲಿದೆ.
Updated on: Sep 02, 2021 | 11:47 AM
ಷೇರು ಮಾರುಕಟ್ಟೆ ನಿಯಂತ್ರಕ ಸಂಸ್ಥೆಯಾದ ಸೆಕ್ಯೂರಿಟೀಸ್ ಎಕ್ಸ್ಚೇಂಜ್ ಬೋರ್ಡ್ ಆಫ್ ಇಂಡಿಯಾ (ಸೆಬಿ) 2021ರ ಸೆಪ್ಟೆಂಬರ್ 1ನೇ ತಾರೀಕಿನಿಂದ (ಬುಧವಾರ) ಹೊಸ ನಿಯಮ ಜಾರಿಗೆ ಬಂದಿದ್ದು, ಈ ಬಗ್ಗೆ ಟ್ವಿಟ್ಟರ್ನಲ್ಲಿ ಟ್ರೇಡರ್ಗಳು ಭಾರೀ ಸಿಟ್ಟು ಹೊರಹಾಕಿದ್ದಾರೆ. #SEBIAgainstRetailers ಎಂಬ ಹ್ಯಾಷ್ಟ್ಯಾಗ್ ಮೂಲಕ ತಮ್ಮ ಆಕ್ರೋಶ ಹೊರಹಾಕುತ್ತಿದ್ದು, ಅದೀಗ ಟ್ರೆಂಡಿಂಗ್ ಆಗಿದೆ. ಹಾಗಿದ್ದರೆ ಟ್ರೇಡರ್ಗಳ ಕೋಪಕ್ಕೆ ಕಾರಣವಾದ ಸೆಬಿಯ ಹೊಸ ನಿಯಮ ಯಾವುದು ಎಂಬುದರ ವಿವರ ಈ ಲೇಖನದಲ್ಲಿದೆ. ಹೊಸ ಮಾರ್ಜಿನ್ ನಿಯಮದ ಪ್ರಕಾರ, ಫ್ಯೂಚರ್ ಅಂಡ್ ಆಪ್ಷನ್ಸ್ನಲ್ಲಿ ವಹಿವಾಟು ನಡೆಸುವವರಿಗೆ ಆ ಸ್ಟಾಕ್ನ ಒಟ್ಟು ಮೊತ್ತದ ಪೂರ್ಣ ಪ್ರಮಾಣದ ಮಾರ್ಜಿನ್, ಅಂದರೆ ಶೇ 100ರಷ್ಟು ಹಣ ಬ್ಯಾಂಕ್ ಖಾತೆಯಲ್ಲಿ ಇರಲೇಬೇಕು. ಇದು ವ್ಯಾಲ್ಯೂ ಅಟ್ ರಿಸ್ಕ್ (VaR) ಎಂದು ಎಕ್ಸ್ಚೇಂಜ್ನಿಂದ ಎಷ್ಟು ಮೊತ್ತವನ್ನು ನಿಗದಿ ಮಾಡಲಾಗುತ್ತದೋ ಆಯಾ ಸ್ಟಾಕ್ಗೆ ಅಷ್ಟು ಮೊತ್ತ ಇರಬೇಕಾಗುತ್ತದೆ. VaR ಮಾರ್ಜಿನ್ ಪ್ರತಿ ಸ್ಟಾಕ್ಗೂ ಬೇರೆ ಬೇರೆ ಇರುತ್ತದೆ ಮತ್ತು ಪೆನ್ನಿ ಸ್ಟಾಕ್ ಎಂದು ಕರೆಸಿಕೊಳ್ಳುವ ಕಡಿಮೆ ಬೆಲೆಯದ್ದಕ್ಕೆ ಹೆಚ್ಚಿನ ಮೊತ್ತ ಅಗತ್ಯ ಇರುತ್ತದೆ. ಇಲ್ಲಿಯ ತನಕ, ಅಂದರೆ ಆಗಸ್ಟ್ 31ರ ತನಕ ಒಟ್ಟಾರೆ ಮಾರ್ಜಿನ್ನ ಶೇ 75ರಷ್ಟು ಇದ್ದರೆ ಸಾಕಿತ್ತು.
ಮಾರ್ಜಿನ್ ಅಂದರೆ, ಒಂದು ಸ್ಟಾಕ್ನ ಖರೀದಿಗೆ ಇರಲೇಬೇಕಾದ ನಿರ್ದಿಷ್ಟ ಮೊತ್ತ. ಈಗ ಒಂದು ಉದಾಹರಣೆ ತೆಗೆದುಕೊಳ್ಳಿ. ರಿಲಯನ್ಸ್ ಇಂಡಸ್ಟ್ರೀಸ್ನ VaR ಮಾರ್ಜಿನ್ ಶೇ 16.11 ಮತ್ತು ರಿಲಯನ್ಸ್ ಪವರ್ಗೆ ಶೇ 100 (ಮಾರ್ಜಿನ್ ಯಾಕೆ ಜಾಸ್ತಿ ಬೇಕೆಂದರೆ ಇದನ್ನು ಪೆನ್ನಿ ಸ್ಟಾಕ್ ಎಂದು ಪರಿಗಣಿಸಲಾಗುತ್ತದೆ ಹಾಗೂ ಇದರಲ್ಲಿ ಟ್ರೇಡರ್ಗಳಿಗೆ ಅಪಾಯದ ಪ್ರಮಾಣ ಹೆಚ್ಚು). ಇದೀಗ ವಹಿವಾಟಿಗೂ ಮೊದಲೇ ಸ್ಟಾಕ್ ಬ್ರೋಕರ್ ಆದವರು ಸಂಪೂರ್ಣ ಮಾರ್ಜಿನ್ ಮೊತ್ತವು ತಮ್ಮ ಕ್ಲೈಂಟ್ಗಳ ಬಳಿ ಇದೆ ಎಂಬುದನ್ನು ಖಾತ್ರಿಪಡಿಸಬೇಕು. ಅಥವಾ ದಂಡವನ್ನು ವಿಧಿಸಲಾಗುತ್ತದೆ. ಇದಕ್ಕೂ ಮುನ್ನ ಶೇ 75ರಷ್ಟು ಮಾರ್ಜಿನ್ ಇದ್ದರೂ ಸಾಕಿತ್ತು. ಹೊಸದಾದ ಈ ಮಾರ್ಜಿನ್ ನಿಯಮಾವಳಿ ಬಗ್ಗೆ ಟ್ರೇಡರ್ಗಳು ತಮ್ಮ ಬೇಸರ ವ್ಯಕ್ತಪಡಿಸಿದ್ದಾರೆ. ಮೈಕ್ರೋಬ್ಲಾಗಿಂಗ್ ಸೈಟ್ ಟ್ವಿಟ್ಟರ್ನಲ್ಲಿ #notradingday ಹ್ಯಾಶ್ಟ್ಯಾಗ್ನಲ್ಲಿ ಟ್ರೆಂಡ್ ಆಗಿತ್ತು.
ಈಗಿನ ಹೊಸ ನಿಯಮದಿಂದ ಸ್ಟಾಕ್ ಟ್ರೇಡರ್ಸ್ ಮೇಲೆ ಪರಿಣಾಮ ಆಗುತ್ತದೆ. ಏಕೆಂದರೆ ಇಂಟ್ರಾಡೇ ಮತ್ತು ಫ್ಯೂಚರ್ಸ್ ಮಾರ್ಕೆಟ್ಸ್ಗೆ ಹೆಚ್ಚಿನ ಹಣ ಬೇಕಾಗುತ್ತದೆ. ಟ್ರೇಡಿಂಗ್ ಸೆಷನ್ ಅವಧಿಯಲ್ಲಿ ಮಾರ್ಜಿನ್ ಮೊತ್ತವನ್ನು ನಿರ್ವಹಿಸದಿದ್ದಲ್ಲಿ ದಂಡ ಬೀಳುತ್ತದೆ. ಸೆಬಿಯ ಈ ನಿಯಮದ ಹಿಂದಿನ ಉದ್ದೇಶ ಏನೆಂದರೆ, ಟ್ರೇಡರ್ಸ್ಗಳನ್ನು ಹತೋಟಿಯಲ್ಲಿ ಇಡುವುದು ಹಾಗೂ ಅಪಾಯದ ಪ್ರಮಾಣ ಕಡಿಮೆ ಮಾಡುವುದಾಗಿದೆ. ಈ ವರೆಗೆ ಹೂಡಿಕೆದಾರರು ತಮ್ಮ ಮಾರ್ಜಿನ್ ಮೊತ್ತಕ್ಕಿಂತ ಬಹಳ ಹೆಚ್ಚಿನ ಅಪಾಯ ಮೈ ಮೇಲೆ ಎಳೆದುಕೊಳ್ಳುವುದನ್ನು ನಿಲ್ಲಿಸಲು ಈ ನಿಯಮದಿಂದ ಸಹಾಯ ಆಗಲಿದೆ.
ಇದನ್ನೂ ಓದಿ: ಅಮೆರಿಕದ ಗೂಗಲ್, ಆಪಲ್ ಕಂಪೆನಿ ಷೇರುಗಳನ್ನು ಭಾರತದಿಂದ ಖರೀದಿ ಮಾಡುವುದು ಹೇಗೆ?
(SEBI New Margin Rules Introduced From September 1st 2021 Traders Angry Against Regulator)
