Ethical Hacking Career: ಎಥಿಕಲ್ ಹ್ಯಾಕರ್ ಆಗುವುದು ಹೇಗೆ? ಉದ್ಯೋಗಾವಕಾಶ ಮತ್ತು ಟಾಪ್ ಇನ್​ಸ್ಟಿಟ್ಯೂಟ್​​ಗಳ ಮಾಹಿತಿ

ಒಂದು ಕಂಪನಿಯ ಅಥವಾ ವಯಕ್ತಿಕ ಡಾಟಾ (ದತ್ತಾಂಶ)ವನ್ನು ಇನ್ನೊಬ್ಬರು ಕದಿಯುವುದನ್ನು ತಡೆಯಲು ಎಥಿಕಲ್ ಹ್ಯಾಕರ್​ಗಳ ಅಗತ್ಯವಿದೆ. ಹಾಗಾಗಿ ನೈತಿಕ ಹ್ಯಾಕಿಂಗ್​​ನಿಂದ ಬಹಳಷ್ಟು ಪ್ರಯೋಜನಗಳಿವೆ. ಇಂದು, ಡಾಟಾವು ಎಲ್ಲ ಸಂಸ್ಥೆಯ ಮುಖ್ಯ ಸ್ತಂಭ ಎನ್ನಬಹುದು. ಒಂದು ಸಂಸ್ಥೆಯು ಯಾವುದೇ ತೊಂದರೆ ಇಲ್ಲದೆ ಸಾಗಬೇಕಾದರೆ ಅದರ ಡಾಟಾಗಳು ಸುರಕ್ಷಿತವಾಗಿರಬೇಕು. ದಾಳಿಕೋರರು ಒಂದು ಸಂಸ್ಥೆಯ ಸಿಸ್ಟಮ್ ಒಳಗೆ ನುಸುಳಿ ಕಂಪನಿಯ ವಯಕ್ತಿಕ ಡಾಟಾವನ್ನು ತಪ್ಪಾಗಿ ಬಳಸಿಕೊಳ್ಳಲು ಅದನ್ನು ಕದಿಯಬಹುದು. ಇಂತಹ ಸಂದರ್ಭದಲ್ಲಿ ನೈತಿಕ ಹ್ಯಾಕರ್‌ಗಳು ಈ ದುರ್ಘಟನೆಯನ್ನು ತಡೆಯುತ್ತಾರೆ, ಪರೀಕ್ಷೆಗಳನ್ನು ನಡೆಸಿ ಭದ್ರತಾ ವ್ಯವಸ್ಥೆಯನ್ನು ಬಲಪಡಿಸುತ್ತಾರೆ.

ತಮ್ಮ ಡಾಟಾವನ್ನು ಕಾಪಾಡಿಕೊಳ್ಳಲು ಎಲ್ಲ ಕಂಪನಿ ಮತ್ತು ವ್ಯವಹಾರಗಳು ಇಚ್ಚಿಸುತ್ತದೆ. ಇದೇ ಕಾರಣಕ್ಕೆ ನೈತಿಕ ಹ್ಯಾಕರ್ ಉದ್ಯೋಗಗಳು ಈಗ ಬಹು ಬೇಡಿಕೆಯಲ್ಲಿವೆ. ಬ್ಯಾಂಕಿಂಗ್, ಶಿಕ್ಷಣ, ಸರ್ಕಾರ, ಮಿಲಿಟರಿ ಯಾವುದೇ ರೀತಿಯ ಉದ್ಯಮಗಳಲ್ಲಿ ಡಾಟಾ ಕಾಪಾಡಿಕೊಳ್ಳುವುದು ಬಹು ಮುಖ್ಯ. ನೈತಿಕ ಹ್ಯಾಕರ್‌ಗಳು ಸಿಸ್ಟಮ್‌ಗೆ ನುಗ್ಗಿ ದುರ್ಬಲ ಪ್ರದೇಶಗಳನ್ನು ಗುರುತಿಸುತ್ತಾರೆ, ಇಂತಹ ದೌರ್ಬಲ್ಯಕ್ಕೆ ಕರಣವೇನೆಂಬುದನ್ನು ಪರಿಶೀಲಿಸುತ್ತಾರೆ. ಸಮಸ್ಯೆಯನ್ನು ಗುರುತಿಸಿದ ನಂತರ ಸಿಸ್ಟಮ್‘ಗಳನ್ನು ಸಂಭಾವ್ಯ ಬೆದರಿಕೆಯಿಂದ ರಕ್ಷಿಸುತ್ತಾರೆ.

ಎಥಿಕಲ್ ಹ್ಯಾಕಿಂಗ್ ಎಂದರೇನು?

ಎಥಿಕಲ್ ಹ್ಯಾಕಿಂಗ್ ಎನ್ನುವುದು ಸಂಸ್ಥೆಯ ರಕ್ಷಣೆಯನ್ನು ಪರೀಕ್ಷಿಸಲು ಕಂಪ್ಯೂಟರ್‌ಗಳು ಮತ್ತು ಇತರೆ ಡಿವೈಸ್​ಗಳನ್ನು ಕಾನೂನುಬದ್ಧವಾಗಿ ಹ್ಯಾಕ್ ಮಾಡುವ ಕ್ರಿಯೆಯಾಗಿದೆ. ನೈತಿಕ ಹ್ಯಾಕಿಂಗ್‌ನ ವೃತ್ತಿಜೀವನಕ್ಕೆ ಪೂರ್ವಭಾವಿ ನಿಲುವು ಬೇಕಾಗುತ್ತದೆ, ಏಕೆಂದರೆ ನೈತಿಕ ಹ್ಯಾಕರ್ ಸೈಬರ್ ಅಪರಾಧಗಳನ್ನು ತಡೆಗಟ್ಟುತ್ತಾನೆ ಮತ್ತು ಯಾವುದೇ ಅನಧಿಕೃತ ನುಸುಳುವಿಕೆಯಿಂದ ಸಿಸ್ಟಮ್​ಗಳನ್ನು ರಕ್ಷಿಸುತ್ತಾನೆ. ನೈತಿಕ ಹ್ಯಾಕರ್‌ಗಳು ಐಟಿ ಭದ್ರತೆಯ ಬಲವನ್ನು ಪರಿಶೀಲಿಸುತ್ತಾರೆ, ಡೇಟಾ ಸುರಕ್ಷತೆಯನ್ನು ಖಚಿತಪಡಿಸುತ್ತಾರೆ ಮತ್ತು ಅಕ್ರಮ ಹ್ಯಾಕಿಂಗ್ ಚಟುವಟಿಕೆಗಳಿಂದ ಕಂಪ್ಯೂಟರ್ ಸಿಸ್ಟಮ್‌ಗಳನ್ನು ರಕ್ಷಿಸುತ್ತಾರೆ.

ಇನ್ನೊಂದು ರೀತಿಯಲ್ಲಿ ಹೇಳುವುದಾದರೆ, ಎಥಿಕಲ್ ಹ್ಯಾಕಿಂಗ್ ನೆಟ್‌ವರ್ಕ್‌ನಲ್ಲಿನ ದುರ್ಬಲತೆಯನ್ನು ಗುರುತಿಸುವ ತಂತ್ರವನ್ನು ಸೂಚಿಸುತ್ತದೆ. ಹಿಂಪಡೆಯಲಾದ ಮಾಹಿತಿಯನ್ನು ಸುರಕ್ಷಿತವಾಗಿ ಕಾಪಾಡಿಕೊಳ್ಳಲು ಮತ್ತು ಆಯಾ ನೆಟ್‌ವರ್ಕ್ ಅನ್ನು ಹೆಚ್ಚು ದೃಢವಾಗಿ ಮತ್ತು ಸುರಕ್ಷಿತವಾಗಿಸಲು ನೈತಿಕ ಹ್ಯಾಕಿಂಗ್ ಬಳಸಲಾಗುತ್ತದೆ.

ಎಥಿಕಲ್ ಹ್ಯಾಕರ್ ಆಗುವುದು ಹೇಗೆ?

ನೈತಿಕ ಹ್ಯಾಕರ್ ಆಗಲು ಈ ಕೆಳಗಿನ ಹಂತಗಳನ್ನು ಪರಿಶೀಲಿಸಿ:

ಹಂತ 1: 10 ನೇ ತರಗತಿ ನಂತರ, ಭೌತಶಾಸ್ತ್ರ, ರಸಾಯನಶಾಸ್ತ್ರ, ಗಣಿತ ಮತ್ತು ಕಂಪ್ಯೂಟರ್ ವಿಜ್ಞಾನವನ್ನು ನಿಮ್ಮ ಮುಖ್ಯ ವಿಷಯಗಳಾಗಿ ವಿಜ್ಞಾನದ ಸ್ಟ್ರೀಮ್ ಅನ್ನು ಆರಿಸಿಕೊಳ್ಳಿ.

ಹಂತ 2: 12 ನೇ ತರಗತಿ (PUC) ನಂತರ, ಬಿಟೆಕ್ (BTech), ಬಿಇ (BE), ಅಥವಾ ಬಿಎಸ್‘ಸಿ (BSc) ಆಯ್ಕೆಮಾಡಿ. ಎಂಜಿನಿಯರಿಂಗ್‌ನಲ್ಲಿ ಕಂಪ್ಯೂಟರ್ ಸೈನ್ಸ್/ಐಟಿ ಆಯ್ಕೆ ಮಾಡಿ. ಪ್ರತಿಷ್ಠಿತ ಸಂಸ್ಥೆಗಳು ನೀಡುವ ಸೈಬರ್‌ ಸೆಕ್ಯುರಿಟಿ ಮತ್ತು ನೈತಿಕ ಹ್ಯಾಕಿಂಗ್‌ಗೆ ಸಂಬಂಧಿಸಿದ ವೃತ್ತಿಪರ ಕೋರ್ಸ್‌ಗಳಿಗೆ ಸಹ ನೀವು ದಾಖಲಾಗಬಹುದು.

ಹಂತ 3: ಪದವಿಯ ನಂತರ, ಕಂಪ್ಯೂಟರ್ ಸೈನ್ಸ್‌ನಲ್ಲಿ ಎಂಟೆಕ್ ಅಥವಾ ಎಂಎಸ್​ಸಿ ಆಗಿ ಉನ್ನತ ಶಿಕ್ಷಣವನ್ನು ಪಡೆಯುವುದು ಒಳ್ಳೆಯದು. ಐಐಟಿ ಮತ್ತು ಐಐಎಸ್ಸಿ ಯಂತಹ ಸರ್ಕಾರಿ ಮಾನ್ಯತೆ ಪಡೆದ ಸಂಸ್ಥೆಗಳಿಂದ ಸ್ನಾತಕೋತ್ತರ ಮತ್ತು ಡಾಕ್ಟರೇಟ್ ಪಡೆಯಬೇಕಾದರೆ, ಅಭ್ಯರ್ಥಿಗಳು ಗೇಟ್ (GATE) ಪರೀಕ್ಷೆಗಯನ್ನು ಪಾಸ್ ಮಾಡಬೇಕಾಗುತ್ತದೆ. ನಿಮ್ಮ ಅರ್ಹತೆಯ ಆಧಾರದ ಮೇಲೆ ನಿಮಿಗೆ ವಿದ್ಯಾರ್ಥಿವೇತನದ ಅವಕಾಶಗಳು ಸಿಗುತ್ತದೆ.

ಹಂತ 4: ಸಿ, ಸಿ++, ಪೈಥಾನ್, ಜಾವಾ ಮತ್ತು ರೂಬಿ (C, C++, Python, Java and Ruby) ಸೇರಿದಂತೆ ಟ್ರೆಂಡಿಂಗ್ ಪ್ರೋಗ್ರಾಮಿಂಗ್ ಭಾಷೆಗಳನ್ನು ಕರಗತ ಮಾಡಿಕೊಳ್ಳಿ.

ಹಂತ 5: ಸಿಐಎಸ್ಎಸ್ಪಿ (CISSP), ಟಿಐಸಿಎಸ್‘ಎ (TICSA), ಸೆಕ್ಯೂರಿಟಿ+, ಕ್ಲೌಡ್ ಕಂಪ್ಯೂಟಿಂಗ್, ಅಪಾಯ ನಿರ್ವಹಣೆ ಮತ್ತು ಅಪ್ಲಿಕೇಶನ್ ಅಭಿವೃದ್ಧಿಯಂತಹ ಕ್ಷೇತ್ರದಲ್ಲಿ ವೃತ್ತಿಪರ ಸರ್ಟಿಫಿಕೇಟ್‘ಗಳನ್ನು ಪಡೆಯಲು ಪ್ರಯತ್ನಿಸಿ. ಸರ್ಟಿಫೈಡ್ ಎಥಿಕಲ್ ಹ್ಯಾಕರ್(CEH) ಕೋರ್ಸ್ ಮುಗಿಸಿರುವುದು ಅನೇಕ ಸಂಸ್ಥೆಗಳಲ್ಲಿ ಕಡ್ಡಾಯವಾಗಿದೆ.

ನೈತಿಕ ಹ್ಯಾಕಿಂಗ್‌ನಲ್ಲಿ ವೃತ್ತಿ ಆಯ್ಕೆಗಳು:

1. ಸರ್ಕಾರಿ/ಖಾಸಗಿ ಸಂಸ್ಥೆಗಳು

ಇತ್ತೀಚಿನ ದಿನಗಳಲ್ಲಿ ಸೈಬರ್ ಬೆದರಿಕೆಗಳು ಹೆಚ್ಚಾಗುತ್ತಿವೆ. ಸೈಬರ್‌ಸ್ಪೇಸ್‌ನಲ್ಲಿ ಬೆದರಿಕೆ, ದಾಳಿಗಳಿಂದ ಸಂಸ್ಥೆಗಳನ್ನು ರಕ್ಷಿಸಲು ನೈತಿಕ ಹ್ಯಾಕರ್‌ಗಳ ಹುಡುಕಾಟದಲ್ಲಿ ಸಂಸ್ಥೆಗಳು ನಿರಂತರವಾಗಿ ತೊಡಗಿರುತ್ತವೆ. ಸ್ವತಂತ್ರವಾಗಿ (Freelancing) ಕೆಲಸ ಮಾಡಲು ಮತ್ತು ಅನೇಕ ಸಂಸ್ಥೆಗಳಿಗೆ ಕೆಲಸ ಮಾಡಲು ಸಹ ಅವಕಾಶವಿದೆ.

ಸೈಬರ್ ಬೆದರಿಕೆಗಳು ಮತ್ತು ಸೈಬರ್ ಭಯೋತ್ಪಾದನೆಯನ್ನು ದೂರವಿರಿಸಲು ಸರ್ಕಾರಗಳಿಗೆ ನೈತಿಕ ಹ್ಯಾಕರ್‌ಗಳ ಅಗತ್ಯವಿದೆ. ಪ್ರತಿ ರಾಷ್ಟ್ರಕ್ಕೂ, ಹೆಚ್ಚಿನ ಪ್ರಾಮುಖ್ಯತೆಯ ಡೇಟಾವನ್ನು ಮತ್ತು ಅದರ ನಾಗರಿಕರ ಡೇಟಾವನ್ನು ಸುರಕ್ಷಿತವಾಗಿರಿಸುವುದು ಮುಖ್ಯವಾಗಿರುತ್ತದೆ.

ವೈಟ್ ಹ್ಯಾಟ್ ಹ್ಯಾಕರ್‌ಗಳು ಅಥವಾ ನೈತಿಕ ಹ್ಯಾಕರ್‌ಗಳು ಡೇಟಾದ ಭದ್ರತೆಯನ್ನು ಸರ್ಕಾರಕ್ಕೆ ಒದಗಿಸುತ್ತಾರೆ. ಸೈಬರ್ ಸೆಕ್ಯುರಿಟಿ ತಜ್ಞರು ಅಸ್ತಿತ್ವದಲ್ಲಿರುವ ವ್ಯವಸ್ಥೆಯಲ್ಲಿ ಲೋಪದೋಷಗಳನ್ನು ಕಂಡುಕೊಂಡು ವ್ಯವಸ್ಥೆಯನ್ನು ಬಲಪಡಿಸಲು ಕ್ರಮಗಳನ್ನು ತೆಗೆದುಕೊಳ್ಳುತ್ತಾರೆ.

2. ನೆಟ್ವರ್ಕ್ ಸೆಕ್ಯುರಿಟಿ ಇಂಜಿನಿಯರ್:

ನೆಟ್‌ವರ್ಕ್ ಸೆಕ್ಯುರಿಟಿ ಇಂಜಿನಿಯರ್ ಕಾರ್ಪೊರೇಟ್ ವೈಡ್ ಏರಿಯಾ ನೆಟ್ವರ್ಕ್ (WAN), ಲೋಕಲ್ ಏರಿಯಾ ನೆಟ್ವರ್ಕ್ (LAN) ಮತ್ತು ಇತರ ಸರ್ವರ್ ಆರ್ಕಿಟೆಕ್ಚರ್‌ನ ಅನುಷ್ಠಾನ, ನಿರ್ವಹಣೆ ಮತ್ತು ಏಕೀಕರಣವನ್ನು ನಿರ್ವಹಿಸುತ್ತಾರೆ. ಎಲ್ಲಾ ರೀತಿಯ ಬೆದರಿಕೆಗಳು, ದೋಷಗಳು, ಮಾಲ್‌ವೇರ್, ದಾಳಿಗಳು ಇತ್ಯಾದಿಗಳಿಂದ ಸಿಸ್ಟಮ್ ಅನ್ನು ರಕ್ಷಿಸುತ್ತಾರೆ. ಸೈಬರ್ ಭದ್ರತಾ ಕಾರ್ಯವಿಧಾನವನ್ನು ಬಲಪಡಿಸುವುದು ಇವರ ಹೊಣೆ. ಬ್ಯಾಂಕ್‌ಗಳು, ಆರೋಗ್ಯ, ಶಿಕ್ಷಣ, ಮಿಲಿಟರಿ, ಸಾರಿಗೆ ಇತ್ಯಾದಿಗಳಂತಹ ಪ್ರತಿಯೊಂದು ಉದ್ಯಮದಲ್ಲಿಯೂ ಈ ವೃತ್ತಿಪರರ ಅವಶ್ಯಕತೆ ಹೆಚ್ಚಾಗಿರುತ್ತದೆ.

3. ನೆಟ್ವರ್ಕ್ ಸೆಕ್ಯುರಿಟಿ ಅಡ್ಮಿನಿಸ್ಟ್ರೇಟರ್

ನೆಟ್‌ವರ್ಕ್ ಸೆಕ್ಯುರಿಟಿ ನಿರ್ವಾಹಕರು ನೆಟ್‌ವರ್ಕ್ ಭದ್ರತಾ ನೀತಿಗಳನ್ನು ಬರೆಯುತ್ತಾರೆ, ಆ ನೀತಿಗಳನ್ನು ಸರಿಯಾಗಿ ಅಳವಡಿಸಿ ಸಿಸ್ಟಮ್‘ಗಳನ್ನು ನವೀಕರಿಸುತ್ತಾರೆ. ಈ ವೃತ್ತಿಪರರು ಭದ್ರತಾ ವ್ಯವಸ್ಥೆಗಳನ್ನು ನವೀಕರಿಸಲು ಮತ್ತು ನೆಟ್‌ವರ್ಕ್ ಅನ್ನು ಮೇಲ್ವಿಚಾರಣೆ ಮಾಡುವ ಮೂಲಕ ಯಾವುದೇ ಬೆದರಿಕೆಗಳನ್ನು ಬಾರದಂತೆ ತಡೆಯುತ್ತಾರೆ. ಇವರು ಸಂಸ್ಥೆಯ ಕಂಪ್ಯೂಟರ್ ನೆಟ್ವರ್ಕ್ ವ್ಯವಸ್ಥೆಯನ್ನು ಬಲಪಡಿಸುತ್ತಾರೆ. ಇತರ ಕಾರ್ಯಗಳ ಹೊರತಾಗಿ, ನೆಟ್‌ವರ್ಕ್ ಸಿಸ್ಟಮ್‌ಗಳನ್ನು ನವೀಕರಿಸುವುದು ನೆಟ್‌ವರ್ಕ್ ಭದ್ರತಾ ನಿರ್ವಾಹಕರ ಮತ್ತೊಂದು ಜವಾಬ್ದಾರಿಯಾಗಿದೆ.

ಸರಾಸರಿ, ನೆಟ್‌ವರ್ಕ್ ಭದ್ರತಾ ನಿರ್ವಾಹಕರ ವಾರ್ಷಿಕ ವೇತನವು 6.7 ಲಕ್ಷ ರೂ. ವಾರ್ಷಿಕ ವೇತನ 3.5 ಲಕ್ಷ ರೂ.ಗಳಿಂದ 10.6 ಲಕ್ಷ ರೂ.ಗಳವರೆಗೆ ಇರುತ್ತದೆ.

4. ಸೆಕ್ಯೂರಿಟಿ ಕನ್ಸಲ್ಟೆಂಟ್:

ಭದ್ರತಾ ಸಲಹೆಗಾರರು (Security Consultants) ಅಸ್ತಿತ್ವದಲ್ಲಿರುವ ಐಟಿ ವ್ಯವಸ್ಥೆಗಳು ಮತ್ತು ಮೂಲಸೌಕರ್ಯಗಳನ್ನು ಯಾವುದೇ ದೌರ್ಬಲ್ಯ ಇಲ್ಲದ ಹಾಗೆ ಪರಿಶೀಲಿಸುತ್ತಾರೆ. ನಂತರ ಅವರು ಯಾವುದೇ ಅನಧಿಕೃತ ಪ್ರವೇಶ, ಡೇಟಾ ಮಾರ್ಪಾಡು ಅಥವಾ ಡೇಟಾ ನಷ್ಟವನ್ನು ತಡೆಯಲು ಐಟಿ ಭದ್ರತಾ ಪರಿಹಾರಗಳನ್ನು ಅಭಿವೃದ್ಧಿಪಡಿಸುತ್ತಾರೆ ಮತ್ತು ಕಾರ್ಯಗತಗೊಳಿಸುತ್ತಾರೆ. ಭದ್ರತಾ ಸಲಹೆಗಾರರು ಭದ್ರತಾ ವ್ಯವಸ್ಥೆಗಳನ್ನು ವಿಶ್ಲೇಷಿಸಿ ಬಲಪಡಿಸುತ್ತಾರೆ. ಸಂಭಾವ್ಯ ಉಲ್ಲಂಘನೆಗಳನ್ನು ಅಧ್ಯಯನ ಮಾಡಿ ಕಂಪನಿಯ ಕಾರ್ಯವಿಧಾನಗಳು ತಡೆಗಟ್ಟದಂತೆ ಮೇಲ್ವಿಚಾರಣೆ ಮಾಡುತ್ತಾರೆ.

ಭದ್ರತಾ ಸಲಹೆಗಾರರ ಸರಾಸರಿ ವಾರ್ಷಿಕ ವೇತನವು 10.9 ಲಕ್ಷಗಳು. ವಾರ್ಷಿಕ 5.4 ಲಕ್ಷ ರೂ. ಗಳಿಂದ ವಾರ್ಷಿಕ 20 ಲಕ್ಷ ರೂ. ಗಳವರೆಗೆ ಇರುತ್ತದೆ.

5. ಪೆನೆಟ್ರೇಷನ್ ಟೆಸ್ಟರ್:

ಪೆನೆಟ್ರೇಷನ್ ಟೆಸ್ಟರ್ ಕೆಲಸ ಕಂಪ್ಯೂಟರ್ ಸಿಸ್ಟಮ್‌ ಮತ್ತುಸಾಫ್ಟ್‌ವೇರ್‌ಗಳನ್ನು ಯಾರಾದರು ತಿದ್ದುಪಡಿ ಮಾಡಿದ್ದಾರೆಯೇ ಕಂಡುಹಿಡಿಯುವುದು. ಪೆನೆಟ್ರೇಷನ್ ಟೆಸ್ಟರ್ ಪ್ರಾಥಮಿಕ ಜವಾಬ್ದಾರಿಗಳೆಂದರೆ: ಪೆನೆಟ್ರೇಷನ್ ಟೆಸ್ಟ್‘ಗಳನ್ನು ಯೋಜಿಸುವುದು ಮತ್ತು ವಿನ್ಯಾಸಗೊಳಿಸುವುದು, ಪರೀಕ್ಷೆಗಳು ಮತ್ತು ಇತರ ಸಿಮ್ಯುಲೇಶನ್‌ಗಳನ್ನು ಕೈಗೊಳ್ಳುವುದು, ವರದಿ, ಶಿಫಾರಸುಗಳನ್ನು ರಚಿಸುವುದು, ಭದ್ರತಾ ಸುಧಾರಣೆಗಳ ಕುರಿತು ನಿರ್ವಹಣೆಗೆ ಸಲಹೆ ನೀಡುವುದು, ಸಂಸ್ಥೆಯ ಸೈಬರ್‌ ಸುರಕ್ಷತೆಯನ್ನು ಸುಧಾರಿಸಲು ಇತರ ಉದ್ಯೋಗಿಗಳೊಂದಿಗೆ ಕೆಲಸ ಮಾಡುವುದು.

ಪೆನೆಟ್ರೇಷನ್ ಟೆಸ್ಟರ್ ಉತ್ತಮ ನೈತಿಕ ಹ್ಯಾಕಿಂಗ್ ವೃತ್ತಿಜೀವನ ಎಂದೂ ಹೇಳಬಹುದು. ಇವರು ಕಂಪ್ಯೂಟರ್ ಸಿಸ್ಟಮ್‌, ಅಪ್ಲಿಕೇಶನ್‌ ಮತ್ತು ನೆಟ್‌ವರ್ಕ್‌ಗಳಲ್ಲಿ ಪರೀಕ್ಷೆಯನ್ನು ನಡೆಸುತ್ತಾರೆ. ವ್ಯವಸ್ಥೆಯಲ್ಲಿನ ದೌರ್ಬಲ್ಯಗಳನ್ನು ಪರೀಕ್ಷಿಸಲು, ನಿರ್ಣಯಿಸಲು ಮತ್ತು ಗುರುತಿಸಲು ಇವರು ಯೋಗ್ಯರಾಗಿರುತ್ತಾರೆ. ಇವರ ಸಂಶೋಧನೆಗಳ ಆಧಾರದ ಮೇಲೆ ಸಂಸ್ಥೆಗಳಿಗೆ ಸಲಹೆ ನೀಡುತ್ತಾರೆ ಮತ್ತು ವ್ಯವಸ್ಥೆಗಳನ್ನು ಬಲಪಡಿಸುವಲ್ಲಿ ಸಹಾಯ ಮಾಡುತ್ತಾರೆ.

ಸರಿ ಸುಮಾರು, ಪೆನೆಟ್ರೇಶನ್ ಪರೀಕ್ಷಕನ ವೇತನವು ವರ್ಷಕ್ಕೆ 7.2 ಲಕ್ಷ ರೂ. ವಾರ್ಷಿಕ ವೇತನವು 2 ಲಕ್ಷ ರೂ. ಗಳಿಂದ ವರ್ಷಕ್ಕೆ 26 ಲಕ್ಷ ರೂ. ಗಳವರೆಗೆ ಇರುತ್ತದೆ.

ಭಾರತದಲ್ಲಿನ ಉನ್ನತ ನೈತಿಕ ಹ್ಯಾಕಿಂಗ್ ಸಂಸ್ಥೆಗಳು:

ನೀವು ಪದವಿ ಪೂರ್ವವನ್ನು ಕಂಪ್ಯೂಟರ್ ಸೈನ್ಸ್‌ನಲ್ಲಿ ಪ್ರಾರಂಭಿಸಬಹುದು ಮತ್ತು ವಿವಿಧ ಸರ್ಟಿಫಿಕೇಟ್ ಮತ್ತು ಹೆಚ್ಚಿನ ಅಧ್ಯಯನಗಳೊಂದಿಗೆ ಮುಂದುವರಿಯಬಹುದು. ಪದವಿ ಪೂರ್ವ ಮಟ್ಟಕ್ಕೆ ಕಂಪ್ಯೂಟರ್ ವಿಜ್ಞಾನವನ್ನು ಒದಗಿಸುವ ಕೆಲವು ಉತ್ತಮ ಸಂಸ್ಥೆಗಳು:-

• ದೆಹಲಿ ತಾಂತ್ರಿಕ ವಿಶ್ವವಿದ್ಯಾಲಯ, ದೆಹಲಿ
• ಐಐಟಿ ದೆಹಲಿ
• ಐಐಟಿ ಬಾಂಬೆ
• ಐಐಟಿ ಖರಗ್‌ಪುರ
• ಐಐಟಿ ಕಾನ್ಪುರ
• ಐಐಟಿ ರೂರ್ಕಿ
• ಐಐಟಿ ಗುವಾಹಟಿ
• ಐಐಟಿ ಭುವನೇಶ್ವರ
• ಬಿಟ್ಸ್ ಪಿಲಾನಿ
• ಎನ್’ಐಟಿ ತಿರುಚ್ಚಿ

ನೈತಿಕ ಹ್ಯಾಕಿಂಗ್ ಕುರಿತು ವಿಶೇಷ ಕೋರ್ಸ್‌ಗಳು/ ಪ್ರಮಾಣಪತ್ರಗಳನ್ನು ಈ ಕೆಳಗಿನ ಸಂಸ್ಥೆಯು ಒದಗಿಸುತ್ತದೆ:

• ಇಂಡಿಯನ್ ಸ್ಕೂಲ್ ಆಫ್ ಎಥಿಕಲ್ ಹ್ಯಾಕಿಂಗ್ (ISOEH), ಕೋಲ್ಕತ್ತಾ
• ಇಸಿ ಕೌನ್ಸಿಲ್, ಬಹು ಸ್ಥಳಗಳು
• ಅಂಕಿತ್ ಫಡಿಯ ಸರ್ಟಿಫೈಡ್ ಎಥಿಕಲ್ ಹ್ಯಾಕರ್, ಬಹು ಸ್ಥಳಗಳು/ಆನ್‌ಲೈನ್
• ಇನ್​ಸ್ಟಿಟ್ಯೂಟ್ ಆಫ್ ಎಥಿಕಲ್ ಹ್ಯಾಕಿಂಗ್ ಮತ್ತು ಫೋರೆನ್ಸಿಕ್ಸ್, ಒಡಿಶಾ
• ಅರಿಜೋನಾ ಇನ್ಫೋಟೆಕ್, ಪುಣೆ
• ಇನ್‌ಸ್ಟಿಟ್ಯೂಟ್ ಆಫ್ ಇನ್ಫರ್ಮೇಷನ್ ಸೆಕ್ಯುರಿಟಿ, ಬಹು ಸ್ಥಳಗಳು
• ಕ್ವೆಸ್ಟ್ ಇನ್​ಸ್ಟಿಟ್ಯೂಟ್ ಆಫ್ ನಾಲೆಡ್ಜ್ (QUIK), ಮುಂಬೈ