ವಿಡಿಯೋ: ಕುಡಿದು ಗೋವಾ ಬೀದಿಯಲ್ಲಿ ರಂಪಾಟ ಮಾಡಿದ ಖ್ಯಾತ ನಟ

ಮಲಯಾಲಂ, ತಮಿಳು, ತೆಲುಗು ಸಿನಿಮಾಗಳಲ್ಲಿ ನಟಿಸಿರುವ ಜನಪ್ರಿಯ ನಟ ವಿನಾಯಕನ್, ಪದೇ ಪದೇ ತಮ್ಮ ಮಿತಿ ಮೀರಿದ ವರ್ತನೆಯಿಂದ ಸುದ್ದಿಯಾಗುತ್ತಲೇ ಇದ್ದಾರೆ. ರಜನೀಕಾಂತ್, ದುಲ್ಕರ್ ಸಲ್ಮಾನ್, ವಿಶಾಲ್, ಮಮ್ಮುಟಿ, ಮೋಹನ್​ಲಾಲ್, ಧನುಶ್ ಅಂಥಹಾ ದೊಡ್ಡ ನಟರೊಟ್ಟಿಗೆ ಸಿನಿಮಾಗಳಲ್ಲಿ ನಟಿಸಿರುವ ವಿನಾಯಕನ್ ತಮ್ಮ ದುರ್ವತನೆಯಿಂದ ಪದೇ ಪದೇ ಸುದ್ದಿಗೆ ಗ್ರಾಸವಾಗುತ್ತಿದ್ದಾರೆ. ಈಗಾಗಲೇ ಕೆಲವು ಬಾರಿ ಪೊಲೀಸರಿಂದ ಎಚ್ಚರಿಕೆ ಪಡೆದಿದ್ದರೂ ಸಹ ತಮ್ಮ ದುರ್ವರ್ತನೆಯನ್ನು ವಿನಾಯಕನ್ ಮುಂದುವರೆಸಿದ್ದಾರೆ.

ವಿನಾಯಕನ್, ಇದೀಗ ಗೋವಾದಲ್ಲಿ ಕಂಠಪೂರ್ತಿ ಕುಡಿದು, ಗೋವಾದ ರಸ್ತೆ ಬದಿಯ ಟೀ ವ್ಯಾಪಾರಿಯೊಟ್ಟಿಗೆ ಜಗಳ ಮಾಡಿಕೊಂಡಿದ್ದಾರೆ. ಆ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದೆ. ಈಗ ಹರಿದಾಡುತ್ತಿರುವ ವಿಡಿಯೋದಲ್ಲಿ ವಿನಾಯಕನ್ ಅವರ ಹಾವ ಭಾವ, ಮಾತನಾಡುತ್ತಿರುವ ರೀತಿ ನೋಡಿದರೆ ತಿಳಿಯುತ್ತದೆ ವಿನಾಯಕನ್ ವಿಪರೀತ ಕುಡಿದಿದ್ದಾರೆಂದು. ಈ ವಿಡಿಯೋ ವೈರಲ್ ಆದ ಬೆನ್ನಲ್ಲೆ, ನಟನ ಈ ದುರ್ವರ್ತನೆಯನ್ನು ನೆಟ್ಟಿಗರು ಖಂಡಿಸಿದ್ದಾರೆ.

ವಿನಾಯಕನ್ ಹೀಗೆ ಸಾರ್ವಜನಿಕವಾಗಿ ದುರ್ವರ್ತನೆ ತೋರಿರುವುದು ಇದು ಮೊದಲೇನಲ್ಲ. ಕಳೆದ ತಿಂಗಳಷ್ಟೆ ಹೈದರಾಬಾದ್ ವಿಮಾನ ನಿಲ್ದಾಣದಲ್ಲಿ ಸಿಐಎಸ್​ಎಫ್ ಸಿಬ್ಬಂದಿ ಮೇಲೆ ಜಗಳ ಮಾಡಿದ್ದರು. ಒಬ್ಬ ಸಿಬ್ಬಂದಿಯ ಮೇಲೆ ಕೈ ಮಾಡಿದ್ದರು ಎಂಬ ಆರೋಪವೂ ಕೇಳಿ ಬಂದಿತ್ತು. ಕೆಲ ಸಮಯ ವಿನಾಯಕನ್ ಅವರನ್ನು ವಶಕ್ಕೆ ಸಹ ಪಡೆಯಲಾಗಿತ್ತು.

ಇದನ್ನೂ ಓದಿ:ಹೈದರಾಬಾದ್​ನಲ್ಲಿ ಮಲಯಾಳಂ ಖ್ಯಾತ ನಟ ವಿನಾಯಕನ್ ಬಂಧನ

ಅದಕ್ಕೆ ಮುನ್ನ ಕೇರಳದ ಎರ್ನಾಕುಲಂನಲ್ಲಿ ವಿನಾಯಕನ್ ನೆರೆ ಮನೆಯವರು ನಟನ ವಿರುದ್ಧ ದೂರು ನೀಡಿದ್ದರು. ಕಂಠಪೂರ್ತಿ ಕುಡಿದು ತಡರಾತ್ರಿ ವರೆಗೆ ಗಲಾಟೆ ಮಾಡುತ್ತಿರುತ್ತಾರೆ ಎಂದು ದೂರು ನೀಡಿದ್ದರು. ವಿಚಾರಣೆಗೆ ಪೊಲೀಸ್ ಠಾಣೆಗೆ ಕರೆಸಿದಾಗಲೂ ಸಹ ಕುಡಿದುಕೊಂಡು ಬಂದಿದ್ದ ವಿನಾಯಗನ್ ಪೊಲೀಸ್ ಠಾಣೆಯಲ್ಲಿಯೂ ಸಹ ಗಲಾಟೆ ಎಬ್ಬಿಸಿದ್ದರು. ವಿನಾಯಕನ್ ಅನ್ನು ಬಂಧಿಸಿದ್ದ ಪೊಲೀಸರು ಆ ನಂತರ ಜಾಮೀನಿನ ಮೇಲೆ ಬಿಡುಗಡೆಗೊಳಿಸಿದ್ದರು.

1995 ರಿಂದಲೂ ಸಿನಿಮಾಗಳಲ್ಲಿ ನಟಿಸುತ್ತಿರುವ ವಿನಾಯಕನ್ ಬಹಳ ಒಳ್ಳೆಯ ನಟ. ಆರಂಭದಲ್ಲಿ ಬಹಳ ಸಣ್ಣ-ಪುಟ್ಟ ಪಾತ್ರಗಳಲ್ಲಿ ನಟಿಸುತ್ತಾ ಬಂದು ಈಗ ಸ್ಟಾರ್ ನಟರಿಗೆ ವಿಲನ್, ತಂದೆ, ಪ್ರಮುಖ ಪೊಷಕ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ. ದುಲ್ಕರ್ ಸಲ್ಮಾನ್ ಜೊತೆಗೆ ‘ಕಮ್ಮಾಟಿಪದಂ’ ಹೆಸರಿನ ಸಿನಿಮಾದಲ್ಲಿ ವಿನಾಯಕನ್ ನಟಿಸಿದ್ದರು. ಆ ಸಿನಿಮಾದ ಅದ್ಭುತ ನಟನೆಗೆ ಅವರಿಗೆ ರಾಜ್ಯ ಪ್ರಶಸ್ತಿ, ಫಿಲಂಫೇರ್ ಸೇರಿದಂತೆ ಹಲವು ಪ್ರಶಸ್ತಿಗಳು ಧಕ್ಕಿದ್ದವು. ಒಳ್ಳೆಯ ನಟ ಆಗಿದ್ದರೂ ಸಹ ಕುಡಿತದ ಚಟಕ್ಕೆ ಬಿದ್ದು ಅವಕಾಶಗಳನ್ನು ಕಳೆದುಕೊಳ್ಳುತ್ತಿದ್ದಾರೆ ವಿನಾಯಕನ್.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ