World Laughter Day: ನೋವಿಗೆ ನಗುವಿನ ಔಷಧಿ ನೀಡಿದ ಚಾಪ್ಲಿನ್​ ಅವರ 5 ಬೆಸ್ಟ್​ ಸಿನಿಮಾಗಳು

ಕಷ್ಟದ ದಿನಗಳ ಬಗ್ಗೆ ಜನರಿಗೆ ತಿಳಿಸಿ ಹೇಳಲು ಕೂಡ ನಗುವನ್ನೇ ಬಳಸಿದ ಒಬ್ಬ ಮಹಾನ್​ ಕಲಾವಿದ ಚಾರ್ಲಿ ಚಾಪ್ಲಿನ್​. ಇಂದಿಗೂ ದಿ ಬೆಸ್ಟ್​ ಕಾಮಿಡಿ ಸಿನಿಮಾಗಳ ಪಟ್ಟಿಯಲ್ಲಿ ಚಾಪ್ಲಿನ್​ ಸಿನಿಮಾಗಳು ಮುಂಚೂಣಿಯ ಸ್ಥಾನ ಪಡೆದುಕೊಳ್ಳುತ್ತವೆ.

  • TV9 Web Team
  • Published On - 12:50 PM, 2 May 2021
World Laughter Day: ನೋವಿಗೆ ನಗುವಿನ ಔಷಧಿ ನೀಡಿದ ಚಾಪ್ಲಿನ್​ ಅವರ 5 ಬೆಸ್ಟ್​ ಸಿನಿಮಾಗಳು
ದಿ ಕಿಡ್​ ಸಿನಿಮಾದಲ್ಲಿ ಚಾಪ್ಲಿನ್​

ಇಂದು (ಮೇ 2) ವಿಶ್ವ ನಗು ದಿನ. ಸದ್ಯದ ಪರಿಸ್ಥಿತಿಯಲ್ಲಿ ಯಾರ ಮುಖದಲ್ಲೂ ನಗು ಮೂಡುವುದು ಕಷ್ಟ. ಕೊರೊನಾ ಮಹಾಮಾರಿಯಿಂದಾಗಿ ಎಲ್ಲೆಲ್ಲೂ ಶೋಕವೇ ತಾಂಡವ ಆಡುತ್ತಿದೆ. ಕಷ್ಟದ ದಿನಗಳ ಬಗ್ಗೆ ಜನರಿಗೆ ತಿಳಿಸಿ ಹೇಳಲು ಕೂಡ ನಗುವನ್ನೇ ಬಳಸಿದ ಒಬ್ಬ ಮಹಾನ್​ ಕಲಾವಿದ ಚಾರ್ಲಿ ಚಾಪ್ಲಿನ್​. ಇಂದಿಗೂ ದಿ ಬೆಸ್ಟ್​ ಕಾಮಿಡಿ ಸಿನಿಮಾಗಳ ಪಟ್ಟಿಯಲ್ಲಿ ಚಾಪ್ಲಿನ್​ ಸಿನಿಮಾಗಳು ಮುಂಚೂಣಿಯ ಸ್ಥಾನ ಪಡೆದುಕೊಳ್ಳುತ್ತವೆ. ಹತ್ತು ಹಲವು ಕಾರಣಗಳಿಗಾಗಿ ಚಾಪ್ಲಿನ್​ ಚಿತ್ರಗಳು ಜನಮೆಚ್ಚುಗೆ ಗಳಿಸಿವೆ. ಅದರಲ್ಲೂ ಈ 5 ಸಿನಿಮಾಗಳಿಗೆ ವಿಶೇಷ ಸ್ಥಾನಮಾನವಿದೆ.

1. ದಿ ಕಿಡ್​

ಈ ಸಿನಿಮಾ ತೆರೆಕಂಡಿದ್ದು 1921ರಲ್ಲಿ. ಇದು ಚಾರ್ಲಿ ಚಾಪ್ಲಿನ್​ ಅವರ ಮೊದಲ ಪೂರ್ಣಾವಧಿ ಸಿನಿಮಾ. ಇದು ಮೂಕಿ ಚಿತ್ರ. ಯಾವುದೇ ಸಂಭಾಷಣೆಗಳು ಇಲ್ಲದೇ ಬರೀ ಆಂಗಿಕ ಅಭಿನಯದಲ್ಲೇ ಜನರನ್ನು ನಕ್ಕು ನಗಿಸುವ ಈ ಸಿನಿಮಾ ಅನೇಕ ಸೂಕ್ಷ್ಮ ವಿಚಾರಗಳನ್ನು ಪ್ರೇಕ್ಷಕರಿಗೆ ತಿಳಿಸುತ್ತದೆ. ನಟನೆ ಜೊತೆಗೆ ಕಥೆ, ನಿರ್ದೇಶನ, ನಿರ್ಮಾಣವನ್ನೂ ಚಾಪ್ಲಿನ್​ ಅವರೇ ಮಾಡಿದ್ದರು. ಆ ಕಾಲಕ್ಕೆ ‘ದಿ ಕಿಡ್​’ ಭರ್ಜರಿ ಯಶಸ್ಸು ಗಳಿಸಿತ್ತು.

2. ಗೋಲ್ಡ್​ ರಶ್​

1925ರಲ್ಲಿ ಈ ಸಿನಿಮಾ ತೆರೆಕಂಡಿತ್ತು. ಚಿನ್ನ ಹುಡುಕುವ ಸಲುವಾಗಿ ಮುಗಿ ಬೀಳುವ ಜನರ ಕಥೆ ಈ ಸಿನಿಮಾದಲ್ಲಿದೆ. ಚಿನ್ನದ ಆಸೆಗಾಗಿ ಬಂದಿರುವ ಇತರೆ ಜನರ ನಡುವೆ ಕಥಾನಾಯಕ ಕೂಡ ಸೇರಿಕೊಳ್ಳುತ್ತಾನೆ. ವಿಪರೀತ ಹಿಮ ಬೀಳುವ ಪ್ರದೇಶವಾದ್ದರಿಂದ ಒಂದು ಮನೆಯಲ್ಲಿ ಆಶ್ರಯ ಪಡೆಯುವುದು ಅನಿವಾರ್ಯ ಆಗುತ್ತದೆ. ಆ ಮನೆಯಲ್ಲಿ ನಡೆಯುವ ವಿಲಕ್ಷಣ ಘಟನೆಗಳು ಪ್ರೇಕ್ಷಕರಲ್ಲಿ ಸಿಕ್ಕಾಪಟ್ಟೆ ನಗು ಉಕ್ಕಿಸುತ್ತವೆ.

3. ಸಿಟಿ ಲೈಟ್ಸ್​

1931ರಲ್ಲಿ ತೆರೆಕಂಡ ಈ ಸಿನಿಮಾದಲ್ಲಿ ಕಣ್ಣಿಲ್ಲದ ಹುಡುಗಿಯ ಜೊತೆ ಪ್ರೀತಿಯಲ್ಲಿ ಬೀಳುತ್ತಾನೆ ಕಥಾನಾಯಕ. ಆ ಹುಡುಗಿ ತನ್ನ ಅಜ್ಜಿ ಜೊತೆಯಲ್ಲಿ ವಾಸಿಸುತ್ತಿರುತ್ತಾಳೆ. ಅವರದ್ದು ಕಷ್ಟದ ಬದುಕು. ಅಜ್ಜಿ ಮತ್ತು ಮೊಮ್ಮಗಳ ಬದುಕಿಗೆ ಆಸರೆ ಆಗಲಿ ಎಂದು ಕಷ್ಟಪಟ್ಟು ಹಣ ಸಂಪಾದನೆ ಮಾಡಲು ಕಥನಾಯಕ ಮಾಡುವ ಎಲ್ಲ ಪ್ರಯತ್ನಗಳು ವಿಫಲ ಆಗುತ್ತವೆ. ಆ ಮೂಲಕ ಪ್ರೇಕ್ಷಕರಲ್ಲಿ ನಕ್ಕಿ ನಗಿಸುತ್ತವೆ. ಕೊನೆಯಲ್ಲಿ ಆತನ ಕಾರ್ಯ ಯಶಸ್ವಿ ಆಗುತ್ತದೆ.

4. ಮಾಡರ್ನ್​ ಟೈಮ್ಸ್

ಚಾಪ್ಲಿನ್​ ವೃತ್ತಿಜೀವನದ ಅತಿ ಜನಪ್ರಿಯ ಸಿನಿಮಾಗಳಲ್ಲಿ ಇದೂ ಒಂದು. ಇದು ಚಾಪ್ಲಿನ್​ ನಟಿಸಿದ ಕೊನೆಯ ಮೂಕಿ ಸಿನಿಮಾ. 1936ರಲ್ಲಿ ತೆರೆಕಂಡ ಈ ಚಿತ್ರದ ಬಳಿಕ ಅವರು ಡೈಲಾಗ್​ ಇರುವ ಸಿನಿಮಾಗಳನ್ನು ಮಾಡಿದರು. ಹೆಸರೇ ಸೂಚಿಸುವಂತೆ ಆಧುನಿಕತೆಗೆ ಒಗ್ಗಿಕೊಳ್ಳಲು ಮನುಷ್ಯರು ಮಾಡುವ ಪ್ರಯತ್ನಗಳ ಬಗ್ಗೆ ಸಿನಿಮಾ ಮಾತನಾಡುತ್ತದೆ. ಫ್ಯಾಕ್ಟರಿ ಕೆಲಸಗಾರನಾಗಿ, ನಿರುದ್ಯೋಗಿಯಾಗಿ ಚಾಪ್ಲಿನ್​ ಅದ್ಭುತವಾಗಿ ನಟಿಸಿದ್ದಾರೆ. ಗಂಭೀರವಾದ ವಿಷಯಗಳನ್ನು ಅವರು ಕಾಮಿಡಿ ಮೂಲಕ ಈ ಸಿನಿಮಾದಲ್ಲಿ ಹೇಳಿದ್ದಾರೆ.

5. ದಿ ಗ್ರೇಟ್​ ಡಿಕ್ಟೇಟರ್​

ಸಂಭಾಷಣೆಗಳನ್ನು ಒಳಗೊಂಡ ಚಾಪ್ಲಿನ್​ ಅವರ ಮೊದಲ ಸಿನಿಮಾ ದಿ ಗ್ರೇಟ್​ ಡಿಕ್ಟೇಟರ್​. 1940ರಲ್ಲಿ ಈ ಸಿನಿಮಾ ಬಿಡುಗಡೆ ಆಯಿತು. ಎರಡನೇ ಮಹಾಯುದ್ಧದ ಸಮಯದಲ್ಲಿ ಸರ್ವಾಧಿಕಾರಿ ಹಿಟ್ಲರ್​ನ ಆಡಳಿತ ಮತ್ತು ವ್ಯಕ್ತಿತ್ವವನ್ನು ಟೀಕಿಸುವ ಉದ್ದೇಶದಿಂದ ಈ ಸಿನಿಮಾ ಮಾಡಲಾಯಿತು. ಯುದ್ಧದ ಭೀಕರತೆ, ಅಮಾಯಕರ ಸಾವು, ಸರ್ವಾಧಿಕಾರದ ಅಪಾಯ ಮುಂತಾದ ವಿಚಾರಗಳನ್ನು ಹಾಸ್ಯದ ಮೂಲಕ ಜನರಿಗೆ ಮನಮುಟ್ಟುವಂತೆ ಹೇಳುವ ಕಾರಣಕ್ಕಾಗಿ ಈ ಚಿತ್ರ ಇಂದಿಗೂ ಗ್ರೇಟ್​ ಎನಿಸಿಕೊಂಡಿದೆ.

ಇದನ್ನೂ ಓದಿ:

World Laughter Day 2021: ವಿಶ್ವ ನಗು ದಿನಕ್ಕೆ ಮೀಮ್ಸ್ ಮತ್ತು ವಿಡಿಯೋಗಳ ಕೊಡುಗೆ ಏನು?