Monkeypox: ಮಂಕಿಪಾಕ್ಸ್ ರೋಗದ ಲಕ್ಷಣಗಳೇನು? ಯಾವಾಗ ಚಿಕಿತ್ಸೆ ಪಡೆಯಬೇಕು?
Monkeypox Symtoms: ಮಂಕಿಪಾಕ್ಸ್ ಜ್ವರ, ತಲೆನೋವು, ಸ್ನಾಯು ನೋವು ಮತ್ತು ಬಳಲಿಕೆಯಿಂದ ಪ್ರಾರಂಭವಾಗುತ್ತದೆ. ಮಂಕಿಪಾಕ್ಸ್ ವಿರುದ್ಧ ಸ್ವಲ್ಪ ರಕ್ಷಣೆ ನೀಡುವ ಲಸಿಕೆ ಇದೆ. ಆದರೂ ಇದು ಸಾಮಾನ್ಯ ಬಳಕೆಗೆ ಲಭ್ಯವಿಲ್ಲ
Updated on:Jun 25, 2022 | 9:28 AM
ಬೆಂಗಳೂರು: ಇದೀಗ ವಿಶ್ವಾದ್ಯಂತ ಆತಂಕ ಮೂಡಿಸಿರುವ ಮಂಕಿಪಾಕ್ಸ್ (Monkeypox) ಎಂಬುದು ವೈರಸ್ನಿಂದ ಉಂಟಾಗುವ ಅಪರೂಪದ ಸೋಂಕು. ಇದು ಮಧ್ಯ ಮತ್ತು ಪಶ್ಚಿಮ ಆಫ್ರಿಕಾದ ಅರಣ್ಯ ಪ್ರದೇಶಗಳಲ್ಲಿ ಕೆಲವು ಪ್ರಾಣಿಗಳಿಂದ ಹಬ್ಬುತ್ತದೆ. ಆದರೆ, ಇತ್ತೀಚೆಗೆ ಹಲವು ದೇಶದ ಜನರಲ್ಲಿ ಈ ಪ್ರಕರಣಗಳು ವರದಿಯಾಗಿವೆ. ಹಾಗಾದರೆ, ಮಂಕಿಪಾಕ್ಸ್ ಹೇಗೆ ಹರಡುತ್ತವೆ? ಅದರ ಲಕ್ಷಣಗಳೇನು? ಈ ಸೋಂಕು ಹರಡದಂತೆ ಎಚ್ಚರ ವಹಿಸುವುದು ಹೇಗೆ? ಇತ್ಯಾದಿ ಮಾಹಿತಿ ಇಲ್ಲಿದೆ. ಈ ಬಗ್ಗೆ ಪೆಡ್ಸ್ ಸಾಂಕ್ರಾಮಿಕ ರೋಗಗಳ ಸಲಹೆಗಾರ (ಅಮೆರಿಕನ್ ಬೋರ್ಡ್ ಪ್ರಮಾಣೀಕೃತ ವೈದ್ಯ ಡಾ. ಮನು ಚೌಧರಿ ಮಾಹಿತಿ ನೀಡಿದ್ದಾರೆ.
ಮಂಕಿಪಾಕ್ಸ್ ಹೇಗೆ ಹರಡುತ್ತದೆ?: – ಇದು ಸಿಡುಬು ವೈರಸ್ಗೆ ನಿಕಟ ಸಂಬಂಧ ಹೊಂದಿದೆ. ಮಂಕಿಪಾಕ್ಸ್ ವೈರಸ್ ಸೋಂಕಿತ ಪ್ರಾಣಿ ಅಥವಾ ವ್ಯಕ್ತಿಯೊಂದಿಗೆ ನಿಕಟ ಸಂಪರ್ಕದಿಂದ ಹರಡಬಹುದು.
– ಸಾಮಾನ್ಯವಾಗಿ ದದ್ದು, ಹುಣ್ಣುಗಳು ಹೊಂದಿರುವ ವ್ಯಕ್ತಿಯೊಂದಿಗೆ ಚರ್ಮದಿಂದ ಚರ್ಮದ ಸಂಪರ್ಕಕ್ಕೆ ಒಳಗಾದರೆ ಮನುಷ್ಯನಿಂದ ಮನುಷ್ಯನಿಗೆ ಈ ಸೋಂಕು ಹರಡುತ್ತದೆ.
– ಇದು ನಿಕಟ ಲೈಂಗಿಕ ಸಂಪರ್ಕದ ಸಮಯದಲ್ಲಿ ಉಸಿರಾಟದ ಹನಿಗಳು ಅಥವಾ ಮೌಖಿಕ ದ್ರವಗಳ ಮೂಲಕವೂ ಹರಡಬಹುದು (ಚುಂಬನ; ಮೌಖಿಕ, ಗುದ, ಅಥವಾ ಯೋನಿ ಸಂಭೋಗ).
– ಮಂಕಿಪಾಕ್ಸ್ ವೈರಸ್ನಿಂದ ಕಲುಷಿತಗೊಂಡಿರುವ ಬಟ್ಟೆಗಳು, ವಸ್ತುಗಳು ಅಥವಾ ಮೇಲ್ಮೈಗಳೊಂದಿಗಿನ ಸಂಪರ್ಕವು (ಬಟ್ಟೆ, ಹಾಸಿಗೆ ಅಥವಾ ಟವೆಲ್ಗಳಂತಹವು) ಸಹ ಸೋಂಕು ಹರಡಲು ಕಾರಣವಾಗಬಹುದು.
ಮಂಕಿಪಾಕ್ಸ್ನ ಲಕ್ಷಣಗಳು?: ಮಾನವರಲ್ಲಿ ಮಂಕಿಪಾಕ್ಸ್ನ ಲಕ್ಷಣಗಳು ಸಿಡುಬಿನ ಲಕ್ಷಣಗಳಿಗೆ ಸ್ವಲ್ಪಮಟ್ಟಿಗೆ ಹೋಲುತ್ತದೆ. ಮಂಕಿಪಾಕ್ಸ್ ಜ್ವರ, ತಲೆನೋವು, ಸ್ನಾಯು ನೋವು ಮತ್ತು ಬಳಲಿಕೆಯಿಂದ ಪ್ರಾರಂಭವಾಗುತ್ತದೆ. ಸಿಡುಬು ಮತ್ತು ಮಂಕಿಪಾಕ್ಸ್ ರೋಗಲಕ್ಷಣಗಳ ನಡುವಿನ ಪ್ರಮುಖ ವ್ಯತ್ಯಾಸವೆಂದರೆ ಮಂಕಿಪಾಕ್ಸ್ ದುಗ್ಧರಸ ಗ್ರಂಥಿಗಳು ಊದಿಕೊಳ್ಳಲು ಕಾರಣವಾಗುತ್ತದೆ (ಲಿಂಫಡೆನೋಪತಿ), ಆದರೆ ಸಿಡುಬು ಇದನ್ನು ಮಾಡುವುದಿಲ್ಲ. ಮಂಕಿಪಾಕ್ಸ್ಗೆ ಅವಧಿಯು (ಸೋಂಕಿನಿಂದ ರೋಗಲಕ್ಷಣಗಳವರೆಗೆ) ಸಾಮಾನ್ಯವಾಗಿ 7-14 ದಿನಗಳು ಅಥವಾ 5-21 ದಿನಗಳವರೆಗೆ ಇರುತ್ತದೆ.
ಇದನ್ನೂ ಓದಿ: Monkeypox: ಮಂಕಿಪಾಕ್ಸ್ ಸೋಂಕನ್ನು ಸಾಂಕ್ರಾಮಿಕ ರೋಗವೆಂದು ಘೋಷಣೆ
ರೋಗ ಲಕ್ಷಣಗಳು: – ಜ್ವರ – ತಲೆನೋವು – ಸ್ನಾಯು ನೋವುಗಳು – ಬೆನ್ನುನೋವು – ಊದಿಕೊಂಡ ದುಗ್ಧರಸ ಗ್ರಂಥಿಗಳು – ಚಳಿ – ನಿಶ್ಯಕ್ತಿ
ಜ್ವರ ಕಾಣಿಸಿಕೊಂಡ ನಂತರ 1ರಿಂದ 3 ದಿನಗಳಲ್ಲಿ (ಕೆಲವೊಮ್ಮೆ ಇನ್ನೂ ಹೆಚ್ಚು) ರೋಗಿಯಲ್ಲಿ ದದ್ದುಗಳು ಕಾಣಿಸಿಕೊಳ್ಳುತ್ತದೆ. ಮೊದಲು ಮುಖದ ಮೇಲೆ ದದ್ದು ಪ್ರಾರಂಭವಾಗುತ್ತದೆ. ನಂತರ ದೇಹದ ಇತರ ಭಾಗಗಳಿಗೆ ಹರಡುತ್ತದೆ. ಈ ಅನಾರೋಗ್ಯವು ಸಾಮಾನ್ಯವಾಗಿ 2-4 ವಾರಗಳವರೆಗೆ ಇರುತ್ತದೆ. ಆಫ್ರಿಕಾದಲ್ಲಿ, ಮಂಕಿಪಾಕ್ಸ್ ರೋಗಕ್ಕೆ ತುತ್ತಾಗುವ 10 ಜನರಲ್ಲಿ 1 ವ್ಯಕ್ತಿಯಲ್ಲಿ ಸಾವಿಗೆ ಕಾರಣವಾಗುತ್ತದೆ ಎಂದು ಹೇಳಲಾಗಿದೆ.
– ಮಾನವನ ಮಂಕಿಪಾಕ್ಸ್ ಸೋಂಕುಗಳು ಅಪರೂಪವಾದುದು.
– ಮೇ 2022ರ ಮೊದಲು ಆಫ್ರಿಕಾದ ಹೊರಗಿನ ದೇಶಗಳಲ್ಲಿ ವಾಸಿಸುವ ಜನರಲ್ಲಿ ಸಂಭವಿಸಿದ ಸೋಂಕುಗಳು ಮಂಕಿಪಾಕ್ಸ್ (ಸ್ಥಳೀಯ ಪ್ರದೇಶಗಳು) ಹರಡುವ ಸ್ಥಳಗಳಿಗೆ ಅಥವಾ ಸೋಂಕಿತ ಪ್ರಾಣಿಗಳಿಗೆ ಒಡ್ಡಿಕೊಳ್ಳುವುದರೊಂದಿಗೆ ಸಂಬಂಧಿಸಿದೆ.
– ಮತ್ತೆ 2022ರ ಮೇ 13 ಮತ್ತು ಮೇ 26ರ ನಡುವೆ ವಿಶ್ವ ಆರೋಗ್ಯ ಸಂಸ್ಥೆ ಈ ಸೋಂಕನ್ನು ವರದಿ ಮಾಡಿದೆ.257 ಮಂಕಿಪಾಕ್ಸ್ನ ಪ್ರಯೋಗಾಲಯ-ದೃಢಪಡಿಸಿದ ಪ್ರಕರಣಗಳು ಮತ್ತು ಸುಮಾರು 120 ಶಂಕಿತ ಪ್ರಕರಣಗಳು ಪತ್ತೆಯಾಗಿವೆ.
– 35 ದೇಶಗಳಲ್ಲಿ ಒಟ್ಟು 1879 ಪ್ರಕರಣಗಳು ದೃಢಪಟ್ಟಿವೆ. ಭಾರತದಿಂದ ಯಾವುದೇ ದೃಢೀಕೃತ ಪ್ರಕರಣ ವರದಿಯಾಗಿಲ್ಲ.
ವೈದ್ಯಕೀಯ ಚಿಕಿತ್ಸೆಯನ್ನು ಯಾವಾಗ ಪಡೆಯಬೇಕು?: – ಮಧ್ಯ ಅಥವಾ ಪಶ್ಚಿಮ ಆಫ್ರಿಕನ್ ದೇಶಗಳಿಗೆ ಅಥವಾ ಇತರ ದೇಶಗಳಿಗೆ ಮಂಕಿಪಾಕ್ಸ್ ದೃಢಪಡಿಸಿದ ಪ್ರಕರಣಗಳೊಂದಿಗೆ ಅವರ ರೋಗಲಕ್ಷಣಗಳು ಪ್ರಾರಂಭವಾಗುವ ಮೊದಲಿನ ತಿಂಗಳಿನಲ್ಲಿ ಪ್ರಯಾಣಿಸಿದ್ದರೆ ವೈದ್ಯರ ಬಳಿ ಚಿಕಿತ್ಸೆ ಪಡೆಯಬೇಕು.
– ದೃಢಪಡಿಸಿದ ಅಥವಾ ಶಂಕಿತ ಮಂಕಿಪಾಕ್ಸ್ ಹೊಂದಿರುವ ವ್ಯಕ್ತಿಯೊಂದಿಗೆ ಸಂಪರ್ಕವನ್ನು ಹೊಂದಿದ್ದರೆ.
– ಮಂಕಿಪಾಕ್ಸ್ ಇರುವ ಇತರರೊಂದಿಗೆ ನಿಯಮಿತವಾಗಿ ಅಥವಾ ನಿಕಟ ಸಂಪರ್ಕವನ್ನು ಹೊಂದಿರುವ ವ್ಯಕ್ತಿ ವೈದ್ಯರನ್ನು ಭೇಟಿಯಾಗಬೇಕು.
ಮಂಕಿಪಾಕ್ಸ್ ಸೋಂಕಿಗೆ ಹೇಗೆ ಚಿಕಿತ್ಸೆ ನೀಡಲಾಗುತ್ತದೆ?: – ಯಾವುದೇ ನಿರ್ದಿಷ್ಟ ಚಿಕಿತ್ಸೆಗಳು ಪ್ರಸ್ತುತ ಲಭ್ಯವಿಲ್ಲ.
– ರೋಗನಿರ್ಣಯ ಮಾಡಿದ ವ್ಯಕ್ತಿಗಳು ಮನೆಯಲ್ಲಿ ತಮ್ಮನ್ನು ಪ್ರತ್ಯೇಕಿಸಿಕೊಳ್ಳಬೇಕು. ಅವರ ಚರ್ಮದ ಗಾಯಗಳು ವಾಸಿಯಾಗುವವರೆಗೆ ಇತರರೊಂದಿಗೆ ನಿಕಟ ಸಂಪರ್ಕವನ್ನು ತಪ್ಪಿಸಬೇಕು.
– ತೀವ್ರವಾದ ಸೋಂಕಿನ ರೋಗಿಗಳು ಅಥವಾ ರೋಗನಿರೋಧಕ ಶಕ್ತಿ ಇಲ್ಲದವರು, ಗರ್ಭಿಣಿಯರು, ಹಾಲುಣಿಸುವವರು ಅಥವಾ 8 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು ಆಂಟಿವೈರಲ್ ಔಷಧಿ ಅಥವಾ ಪ್ರತಿಕಾಯ ಚಿಕಿತ್ಸೆಗಾಗಿ ಪಡೆಯಬೇಕು. (ಇಂಟ್ರಾವೆನಸ್ ವ್ಯಾಕ್ಸಿನಿಯಾ ಇಮ್ಯೂನ್ ಗ್ಲೋಬ್ಯುಲಿನ್)
– ಟೆಕೊವಿರಿಮಾಟ್ (TPOXX ಎಂದೂ ಕರೆಯುತ್ತಾರೆ) ಒಂದು ಆಂಟಿವೈರಲ್ ಔಷಧಿಯಾಗಿದ್ದು, ಇದು ವಯಸ್ಕರು ಮತ್ತು ಮಕ್ಕಳಲ್ಲಿ ಸಿಡುಬು ಚಿಕಿತ್ಸೆಗಾಗಿ ಮತ್ತು ತೀವ್ರತರವಾದ ಪ್ರಕರಣಗಳಲ್ಲಿ ಮಂಕಿಪಾಕ್ಸ್ಗೆ ಸಹ ಬಳಸಬಹುದು.
ಮಂಕಿಪಾಕ್ಸ್ ಸೋಂಕು ತಡೆಗಟ್ಟುವಿಕೆ ಹೇಗೆ?: – ಸೋಂಕಿತ ಪ್ರಾಣಿಗಳು, ಜನರು ಅಥವಾ ಪ್ರಾಣಿಗಳು ಬಳಸುವ ವಸ್ತುಗಳು ಅಥವಾ ಮಂಕಿಪಾಕ್ಸ್ ಸೋಂಕಿತ ಜನರೊಂದಿಗೆ ಸಂಪರ್ಕವನ್ನು ತಪ್ಪಿಸುವ ಮೂಲಕ ಸೋಂಕನ್ನು ತಡೆಯಬಹುದು.
– ಮಂಕಿಪಾಕ್ಸ್ ವಿರುದ್ಧ ಸ್ವಲ್ಪ ರಕ್ಷಣೆ ನೀಡುವ ಲಸಿಕೆ ಇದೆ. ಆದರೂ ಇದು ಪ್ರಸ್ತುತ ಸಾಮಾನ್ಯ ಬಳಕೆಗೆ ಲಭ್ಯವಿಲ್ಲ.
Published On - 9:23 am, Sat, 25 June 22
