World IVF Day 2024 : ಐವಿಎಫ್‌ ಚಿಕಿತ್ಸೆಯಿಂದ ಮಗು ಪಡೆಯಲು ಮುಂದಾಗಿದ್ದಾರಾ? ಹಾಗಾದ್ರೆ ಈ ವಿಷಯಗಳು ತಿಳಿದಿರಲಿ

ತಾಯಿಯಾಗುವುದು ಹೆಣ್ಣಿನ ಜೀವನದ ಸಂತಸದ ಘಳಿಗೆಯಲ್ಲಿ ಒಂದು. ಪ್ರತಿಯೊಂದು ಹೆಣ್ಣಿಗೂ ಜೀವನದಲ್ಲಿ ತಾಯ್ತತನದ ಸುಖವನ್ನು ಅನುಭವಿಸಬೇಕು ಎನ್ನುವುದಿರುತ್ತದೆ. ಆದರೆ ಎಷ್ಟೋ ಹೆಣ್ಣು ಮಕ್ಕಳಿಗೆ ತಾಯಿಯಾಗುವುದಕ್ಕೆ ಸಾಧ್ಯವಾಗುವುದಿಲ್ಲ. ಅಂತಹವರಿಗೆ ಈ ಇನ್‌ ವಿಟ್ರೋ ಫಲೀಕರಣ (ಐವಿಎಫ್‌) ತಂತ್ರಜ್ಞಾನವು ವರದಾನವಾಗಿದೆ. ಮಕ್ಕಳನ್ನು ಹೊಂದಲು ಸಾಧ್ಯವಾಗದ ಹೆಣ್ಣು ಮಕ್ಕಳು ಕೃತಕ ಗರ್ಭಧಾರಣೆಯಂತಹ ವಿಧಾನವನ್ನು ಅನುಸರಿಸುತ್ತಿದ್ದಾರೆ. ಐವಿಎಫ್ ಸಂತಾನೋತ್ಪತ್ತಿ ತಂತ್ರಜ್ಞಾನದ ಪ್ರಕ್ರಿಯೆಯಾಗಿದೆ. ಇದರ ಮೂಲಕ ವೀರ್ಯವನ್ನು ಮೊಟ್ಟೆಯೊಂದಿಗೆ ಫಲವತ್ತಾಗಿಸಿ ಆರೋಗ್ಯಕರ ಭ್ರೂಣವನ್ನು ಉತ್ಪಾದಿಸಲು ಸಹಾಯ ಮಾಡುತ್ತದೆ. ಆ ಬಳಿಕ ಭ್ರೂಣವನ್ನು ಗರ್ಭಾಶಯದಲ್ಲಿ ಅಳವಡಿಸಿ ಗರ್ಭವತಿಯಾಗುವಂತೆ ಮಾಡಲಾಗುತ್ತದೆ. ಇದರಿಂದ ಎಷ್ಟೋ ಹೆಣ್ಣು ಮಕ್ಕಳು ತಾಯ್ತತನದ ಸುಖವನ್ನು ಅನುಭವಿಸುವಂತಾಗಿದೆ. ಈ ಚಿಕಿತ್ಸೆಯ ಪ್ರಾಮುಖ್ಯತೆಯನ್ನು ಎತ್ತಿ ಹಿಡಿಯುವ ವಿಶ್ವ ಐವಿಎಫ್‌ ದಿನವನ್ನು ಆಚರಿಸಲಾಗುತ್ತದೆ.

ವಿಶ್ವ ಐವಿಎಫ್‌ ದಿನದ ಇತಿಹಾಸ ಹಾಗೂ ಮಹತ್ವ

ಜುಲೈ 25, 1978 ರಂದು ಜನಿಸಿದ ಲೂಯಿಸ್ ಜಾಯ್ ಬ್ರೌನ್ ಐವಿಎಫ್ ಕಾರ್ಯವಿಧಾನದ ಮೂಲಕ ಜನಿಸಿದ ಮೊದಲ ಮಗುವಾಗಿದೆ. ಈ ದಿನದಿಂದ ಐವಿಎಫ್‌ ಶಿಶುಗಳನ್ನು ಗರ್ಭಧರಿಸಲು ವಿಶ್ವಾಸಾರ್ಹ ಸಂತಾನೋತ್ಪತ್ತಿ ತಂತ್ರಜ್ಞಾನವೆಂದು ಗುರುತಿಸಲಾಗಿದೆ. ಅಂದಿನಿಂದ ಪ್ರತಿ ವರ್ಷ ವಿಶ್ವ ಐವಿಎಫ್‌ ದಿನವನ್ನು ಆಚರಿಸಿಕೊಂಡು ಬರಲಾಗುತ್ತಿದೆ. ಮಕ್ಕಳಿಲ್ಲದ ದಂಪತಿಗಳಿಗೆ ಆಶಾ ಕಿರಣವಾದ ಐವಿಎಫ್ ಚಿಕಿತ್ಸೆಯ ಬಗೆಗಿನ ಮಾಹಿತಿ ನೀಡುವ ಸಲುವಾಗಿ ಹಾಗೂ ಪ್ರಾಮುಖ್ಯತೆಯನ್ನು ಎತ್ತಿ ಹಿಡಿಯುವ ಸಲುವಾಗಿ ಈ ದಿನವು ಮಹತ್ವಕಾರಿಯಾಗಿದೆ.

ಇದನ್ನೂ ಓದಿ: ರಾತ್ರಿಯಿಡೀ ಸಂಗಾತಿಯನ್ನು ತಬ್ಬಿಕೊಂಡು ಮಲಗುವುದರಿಂದ ಈ ಎಲ್ಲ ಆರೋಗ್ಯ ಪ್ರಯೋಜನ

ಈ ಐವಿಎಫ್‌ ಚಿಕಿತ್ಸೆ ಪಡುವವರಿಗೆ ಈ ವಿಷಯಗಳು ತಿಳಿದಿರಲಿ

* ಯಾರು ಐವಿಎಫ್‌ ಚಿಕಿತ್ಸೆಗೆ ಒಳಪಡುತ್ತಾರೋ ಅವರು ಆಹಾರ ಸೇವನೆಯತ್ತ ಹೆಚ್ಚು ಗಮನ ಹರಿಸಬೇಕು. ಹಣ್ಣು, ಸೊಪ್ಪು, ತರಕಾರಿ, ಪೋಷಕಾಂಶವಿರುವ ಆಹಾರಗಳನ್ನು ಹೆಚ್ಚೆಚ್ಚು ಸೇವಿಸುವುದು ಒಳ್ಳೆಯದು.

* ದಿನಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ನೀರು ಕುಡಿಯುವ ಅಭ್ಯಾಸವನ್ನು ಬೆಳೆಸಿಕೊಳ್ಳಬೇಕು. ನೀರಿನ ಬದಲು ಫ್ರೆಶ್ ಜ್ಯೂಸ್ ಕುಡಿಯುವುದು ಉತ್ತಮ.

* ದಿನಕ್ಕೆ ಎಂಟು ಗಂಟೆಗಳ ಕಾಲ ನಿದ್ದೆ ಅವಶ್ಯಕ. ಒಳ್ಳೆಯ ನಿದ್ದೆಯೊಂದಿಗೆ ವಿಶ್ರಾಂತಿಯು ಅಗತ್ಯವಾಗಿದೆ.

* ಈ ಚಿಕಿತ್ಸೆ ಒಳಗಾಗುವವರು ಮಾನಸಿಕ ಒತ್ತಡಕ್ಕೆ ಒಳಗಾಗದೇ ಮನಸ್ಸನ್ನು ಶಾಂತವಾಗಿಟ್ಟುಕೊಳ್ಳಬೇಕು. ಹೀಗಾಗಿ ಯೋಗ, ವ್ಯಾಯಾಮ ಹಾಗೂ ಧ್ಯಾನದತ್ತ ತೊಡಗಿಸಿಕೊಂಡರೆ ಉತ್ತಮ.

* ಧೂಮಪಾನ, ಮದ್ಯಪಾನದಂತಹ ಕೆಟ್ಟ ಚಟಗಳಿಂದ ದೂರವಿರಬೇಕು.

ಆರೋಗ್ಯಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ