ಹಿಂದೂಸ್ತಾನ್ 228-201 LWಗೆ ಡಿಜಿಸಿಎ ಸಮ್ಮತಿ; HALನಿಂದ ತಯಾರಾಗಲಿವೆ ಕಮರ್ಷಿಯಲ್ ವಿಮಾನಗಳು
HAL To Produce Commercial Aircrafts: ಜರ್ಮನಿಯ ಡಾರ್ನಿಯರ್ ವಿಮಾನ ತಯಾರಿಕೆಗೆ ಲೈಸೆನ್ಸ್ ಹೊಂದಿರುವ ಹೆಚ್ಎಎಲ್ ಸಂಸ್ಥೆ, ಒಂದಷ್ಟು ಮಾರ್ಪಾಡು ಮಾಡಿ ಪುಟ್ಟ ಕಮರ್ಷಿಯಲ್ ವಿಮಾನ ತಯಾರಿಸಿದೆ. ಡಿಜಿಸಿಎ ಅನುಮೋದನೆ ಪಡೆದಿರುವ ಈ ವಿಮಾನಗಳು ದೇಶೀಯ ಮಾರ್ಗಗಳಲ್ಲಿ ಸಂಚರಿಸುವ ಸಾಧ್ಯತೆ ಇದೆ.
Updated on: Feb 28, 2023 | 2:40 PM
ನವದೆಹಲಿ: ಬೆಂಗಳೂರು ಮೂಲದ ರಕ್ಷಣಾ ವೈಮಾನಿಕ ಸಂಸ್ಥೆ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿ (HAL) ಹಗುರವಾದ ಕಮರ್ಷಿಯಲ್ ವಿಮಾನಗಳ ತಯಾರಿಕೆಗೆ ಇನ್ನಷ್ಟು ಪುಷ್ಟಿ ಸಿಗುತ್ತಿದೆ.. ಎಚ್ಎಎಲ್ನ ಹಿಂದೂಸ್ತಾನ್ 228-201 ಎಲ್ಡಬ್ಲ್ಯೂ (Hindustan 228-201 LW) ವಿಮಾನಕ್ಕೆ ಡಿಜಿಸಿಎ ಅನುಮೋದನೆ ಕೊಟ್ಟಿದೆ. ಇದರಿಂದ ಹೆಚ್ಎಎಲ್ನ ಮಹತ್ವ ಇನ್ನಷ್ಟು ಹೆಚ್ಚಾಗಲಿದ್ದು, ಕೇಂದ್ರದ ಉಡಾನ್ ಯೋಜನೆಗೂ ಬಲ ಸಿಗಲಿದೆ. ಹಾಗೆಯೇ, ಮೇಡ್ ಇನ್ ಇಂಡಿಯಾ ಯೋಜನೆಯೂ ಬಲಗೊಳ್ಳಲಿದೆ.
ಜರ್ಮನಿಯ ಡಾರ್ನಿಯರ್ (Dornier) ಸಂಸ್ಥೆಯ ಡಾರ್ನಿಯರ್-228 ವಿಮಾನದ ರೂಪಾಂತರವೇ ಎಚ್ಎಎಲ್ನ ಹೊಸ ವಿಮಾನ. ಡಾರ್ನಿಯರ್ ವಿಮಾನಗಳನ್ನು ಭಾರತೀಯ ನೌಕಾಪಡೆ ಮತ್ತು ಕರಾವಳಿ ಕಾವಲುಪಡೆಗಳು ಸಮುದ್ರದಲ್ಲಿ ಪಹರೆ ನಡೆಸಲು ಬಳಸುತ್ತವೆ. ಈ ವಿಮಾನಗಳ ತಯಾರಿಕೆಗೆ ಲೈಸೆನ್ಸ್ ಅನ್ನು ಎಚ್ಎಎಲ್ ಹೊಂದಿದೆ. ಇದೀಗ ಈ ವಿಮಾನವನ್ನು ತುಸು ಬದಲಾವಣೆ ಮಾಡಿ ಕಮರ್ಷಿಯಲ್ ಬಳಕೆಗೆ ಅನುವಾಗುವಂತಹ ವಿಮಾನವನ್ನು ಎಚ್ಎಎಲ್ ರೂಪಿಸಿದೆ.
ಹಿಂದೂಸ್ತಾನ್ 228-201 ಎಲ್ಡಬ್ಲ್ಯೂ ವಿಮಾನವು 19 ಪ್ರಯಾಣಿಕ ಸೀಟಿಂಗ್ ಹೊಂದಿದೆ. ಇದರ ಟೇಕಾಫ್ ತೂಕ 5,695 ಕಿಲೋ ಇದೆ. ಇದರಿಂದ ಈ ವಿಮಾನವು 5,700 ಕಿಲೋ ಒಳಗಿನ ವಿಮಾನಗಳ ವಿಭಾಗಕ್ಕೆ ಸೇರುತ್ತದೆ. ಹಾಗೆಯೇ ಈ ವಿಮಾನ ಚಲಾಯಿಸಲು ವಿಶೇಷ ಪರಿಣಿತಿ ಬೇಕಿಲ್ಲ. ಕಮರ್ಷಿಯಲ್ ಪೈಲಟ್ಗಳು ಎಚ್ಎಎಲ್ನ ಈ ವಿಮಾನವನ್ನು ಚಲಾಯಸಬಹುದು. ಇದರ ಕಾರ್ಯಾಚರಣೆ ವೆಚ್ಚವೂ ಕಡಿಮೆ ಎನ್ನಲಾಗಿದೆ.
ಇದನ್ನೂ ಓದಿ: Narendra Modi: ಕೃತಕ ಬುದ್ಧಿಮತ್ತೆಯಿಂದ ಪರಿಹರಿಸಬಲ್ಲ 10 ಸಮಸ್ಯೆಗಳನ್ನು ಗುರುತಿಸಿ: ಪ್ರಧಾನಿ ನರೇಂದ್ರ ಮೋದಿ
ಎಚ್ಎಎಲ್ನ ಈ ನೂತನ ಕಮರ್ಷಿಯಲ್ ವಿಮಾನವು ಚಿಕ್ಕ ದೂರದ ಮಾರ್ಗಗಳಿಗೆ ಸೂಕ್ತವಾಗಿವೆ. ಹೀಗಾಗಿ, ಭಾರತದೊಳಗೆ ವಿವಿಧ ನಗರಗಳ ಮಧ್ಯೆ ಸಂಚಾರಕ್ಕೆ ಇವುಗಳನ್ನು ಬಳಸಬಹುದಾಗಿದೆ. ಶಿವಮೊಗ್ಗ ಇತ್ಯಾದಿ ಟಯರ್ 3 ನಗರಗಳಲ್ಲಿ ಎಚ್ಎಎಲ್ನ ಹೊಸ ವಿಮಾನಗಳು ಸಂಚರಿಸುವ ಸಾಧ್ಯತೆ ಇದೆ.
ಇದೇ ವೇಳೆ, ಹೆಚ್ಎಎಲ್ನ 6200 ಕಿಲೋ ಟೇಕಾಫ್ ತೂಕದ ವಿಮಾನಕ್ಕೂ ಡಿಜಿಸಿಎ ಅನುಮೋದನೆ ಕೊಟ್ಟಿದೆ. ಈ ವಿಮಾನ ಕೂಡ ಡಾರ್ನಿಯರ್ ವಿಮಾನದ ರೂಪಾಂತರವೇ. ಇದನ್ನು ಸರಕು ಸಾಗಣೆಗೆ ಬಳಸುವ ಸಾಧ್ಯತೆ ಇದೆ. ಹೆಚ್ಎಎಲ್ ಈಗಾಗಲೇ 17 ಸೀಟ್ಗಳ ಡಾರ್ನಿಯರ್-228 ವಿಮಾನವನ್ನು ಕಮರ್ಷಿಯಲ್ ಬಳಕೆಗೆ ಕಳೆದ ವರ್ಷ ಬಿಡುಗಡೆ ಮಾಡಿದೆ. ಉಡಾನ್ ಯೋಜನೆ ಅಡಿ ಇದನ್ನು ಅರುಣಾಚಲಪ್ರದೇಶಕ್ಕೆ ನಿಯೋಜಿಸಲಾಗಿದೆ. ಈಗ ಡಿಜಿಸಿಎ ಅನುಮೋದನೆ ಕೊಟ್ಟಿರುವುದು ಡಾರ್ನಿಯರ್-228 ವಿಮಾನದ ರೂಪಾಂತರ ವಿಮಾನ. ಇದು 19 ಸೀಟರ್ನದ್ದಾಗಿದೆ.
ಸಾಮಾನ್ಯವಾಗಿ ಕಮರ್ಷಿಯಲ್ ಫ್ಲೈಟ್ಗಳಲ್ಲಿ ನೂರಕ್ಕಿಂತ ಹೆಚ್ಚು ಸೀಟುಗಳಿರುತ್ತವೆ. ಹೆಚ್ಎಎಲ್ನ ವಿಮಾನಗಳು ತೀರಾ ಹಗುರದ್ದಾಗಿದ್ದು ಕಿರು ದೂರದ ಸ್ಥಳಗಳಲ್ಲಿ ಸಂಚರಿಸಲು ಹೇಳಿ ಮಾಡಿಸಿವೆ.
