ಬಿಎಂಟಿಸಿ ಕಂಡಕ್ಟರ್​ಗಳಿಗೆ ಹೊಸ ತಂತ್ರಜ್ಞಾನದ ಆಂಡ್ರಾಯ್ಡ್​ ಟಿಕೆಟ್ ಮಿಷನ್, ಮತ್ತೆ ಬೆಂಗಳೂರು ರಸ್ತೆಗೆ ಡಬ್ಬಲ್ ಡೆಕರ್ ಬಸ್

ಬೆಂಗಳೂರು: ಪದೇಪದೆ ಹಾಳಾಗುತ್ತಿದ್ದ ಹಳೇ ಇಟಿಎಂ (Electronic Ticketing Machine – ETM) ಯಂತ್ರಗಳಿಂದ ಬಿಎಂಟಿಸಿ ನಿರ್ವಾಹಕರು ಸತತ ಕಿರಿಕಿರಿ ಅನುಭವಿಸುತ್ತಿದ್ದರು. ಇದನ್ನು ಮನಗಂಡ ಬಿಎಂಟಿಸಿ ಆಡಳಿತ ಮಂಡಳಿಯು ಹೊಸ ಮಾದರಿಯ ಇಟಿಎಂಗಳನ್ನು ನಿರ್ವಾಹಕರಿಗೆ ನೀಡಲು ನಿರ್ಧರಿಸಿದೆ. ಅದರಂತೆ ಪೈನ್​ಲ್ಯಾಬ್ಸ್​ ಕಂಪನಿಯಿಂದ ಹೊಸ ತಂತ್ರಜ್ಞಾನ ಹೊಂದಿರುವ 8 ಸಾವಿರ ಇಟಿಎಂಗಳನ್ನು ಖರೀದಿಸಿದೆ. ನಿರ್ವಾಹಕರು ವೇಗವಾಗಿ ಟಿಕೆಟ್ ನೀಡಲು ಸಹಕರಿಸುವ ಈ ಯಂತ್ರಗಳಿಂದ ಪ್ರಯಾಣಿಕರಿಗೂ ಅನುಕೂಲವಾಗುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಒಂದು ವರ್ಷದ ಅವಧಿಗೆ ಬಾಡಿಗೆ ಆಧಾರದ ಮೇಲೆ ಇಟಿಎಂಗಳನ್ನು ಬಿಎಂಟಿಸಿ ಪಡೆದುಕೊಂಡಿದೆ. ಆಂಡ್ರಾಯ್ಡ್ ಕಾರ್ಯಾಚರಣೆ ವ್ಯವಸ್ಥೆಯ ಮೂಲಕ ಈ ಯಂತ್ರಗಳು ಕಾರ್ಯನಿರ್ವಹಿಸುತ್ತಿವೆ. ನೂತನ ಇಟಿಎಂ ಕಾರ್ಯನಿರ್ವಹಣೆ ಬಗ್ಗೆ ಕಂಡಕ್ಟರ್​ಗಳಿಗೆ ಬಿಎಂಟಿಸಿ ಸಂಚಾರ ಅಧಿಕಾರಿಗಳು ತರಬೇತಿ ನೀಡಲಿದ್ದಾರೆ. ಡಿಸೆಂಬರ್ 10ರ ಒಳಗೆ ಹೊಸ ಇಟಿಎಂಗಳು ಕಂಡಕ್ಟರ್​ಗಳ ಕೈ ಸೇರಬಹುದು ಎಂದು ಮೂಲಗಳು ಹೇಳಿವೆ.

ಕಂಡಕ್ಟರ್ ರಹಿತ ಬಸ್​ಗಳ ಸಂಖ್ಯೆಯಲ್ಲಿ ಹೆಚ್ಚಳ

ಬೆಂಗಳೂರಿನಲ್ಲಿ ಶೀಘ್ರ 10 ಕಂಡಕ್ಟರ್ ರಹಿತ ಡಬ್ಬಲ್ ಡೆಕರ್ ಬಸ್​ಗಳನ್ನು ಓಡಿಸಲು ಬಿಎಂಟಿಸಿ ನಿರ್ಧರಿಸಿದೆ. ಕಂಡಕ್ಟರ್​ ಇಲ್ಲದಿರುವ 100 ಮಿನಿ ಬಸ್​ಗಳನ್ನೂ ಮೆಟ್ರೋ ಫೀಡರ್​ಗಳಾಗಿ ಓಡಿಸಲು ಬಿಎಂಟಿಸಿ ಮುಂದಾಗಿದೆ. ಡೀಸೆಲ್ ಬಸ್​ಗಳ ಸ್ಥಾನದಲ್ಲಿ ಎಲೆಕ್ಟ್ರಿಕ್ ಬಸ್​ಗಳನ್ನು ತರಲು ಬಿಎಂಟಿಸಿ ಯೋಜನೆ ರೂಪಿಸಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ಎಲೆಕ್ಟ್ರಿಕ್ ಬಸ್​ಗಳ ಖರೀದಿ ಪ್ರಕ್ರಿಯೆ ನಡೆಯಲಿದೆ.

ಸಾಲಬಾಧೆಯಿಂದ ಬಿಎಂಟಿಸಿ ಕಂಗಾಲು

ಕಳೆದ ಐದು ವರ್ಷಗಳಲ್ಲಿ ₹ 1,324.9 ಕೋಟಿ ಸಾಲ ಪಡೆದಿರುವ ಬಿಎಂಟಿಸಿ ಇದೀಗ ಸಾಲದ ಸುಳಿಯಲ್ಲಿ ಸಿಲುಕಿದೆ. ವಿಧಾನಸಭೆ ಅಧಿವೇಶನದಲ್ಲಿ ಪ್ರಶ್ನೆಯೊಂದಕ್ಕೆ ಉತ್ತರಿಸುವಾಗ ಸಾರಿಗೆ ಸಚಿವ ಬಿ.ಶ್ರೀರಾಮುಲು ಈ ಮಾಹಿತಿ ಬಹಿರಂಗಪಡಿಸಿದ್ದರು. ಬಸ್ ನಿಲ್ದಾಣ ನಿರ್ಮಾಣ, ಡಿಪೊ ಸ್ಥಾಪನೆ, ಬಸ್ ಖರೀದಿ, ನಿವೃತ್ತಿ ಸಂದರ್ಭದಲ್ಲಿ ಉದ್ಯೋಗಿಗಳ ಹಣಕಾಸು ಇತ್ಯರ್ಥಪಡಿಸುವುದೂ ಸೇರಿದಂತೆ ಹಲವು ಕಾರಣಗಳಿಗೆ ಬಿಎಂಟಿಸಿ ಸಾಲ ಪಡೆದುಕೊಂಡಿದೆ. ಕರ್ನಾಟಕ ನಗರ ಮೂಲಸೌಕರ್ಯ ಅಭಿವೃದ್ಧಿ ನಿಗಮ ಮತ್ತು ಕೆನರಾ ಬ್ಯಾಂಕ್​ಗಳು ಬಿಎಂಟಿಸಿಗೆ ಅತಿಹೆಚ್ಚಿನ ಪ್ರಮಾಣದ ಸಾಲ ನೀಡಿವೆ. 1997ರಿಂದ 2012ರವರೆಗೂ ಬಿಎಂಟಿಸಿ ಸತತ ಲಾಭದಲ್ಲಿಯೇ ನಡೆಯುತ್ತಿತ್ತು. ಆದರೆ ಎಸಿ ಬಸ್​ಗಳ ಖರೀದಿಗೆ ಬಂಡವಾಳ ಹೂಡಿದ್ದು ದುಬಾರಿಯಾಗಿ ಪರಿಣಮಿಸಿತು. ನಿರೀಕ್ಷೆಯಂತೆ ಜನರು ಈ ಬಸ್​ಗಳನ್ನು ಸ್ವೀಕರಿಸಲಿಲ್ಲ. ಗಾಯದ ಮೇಲೆ ಬರೆ ಎಳೆದಂತೆ ಕೊವಿಡ್​ ಸಂಕಷ್ಟವು ನಿಗಮವನ್ನು ಸಾಲದ ಸುಳಿಗೆ ಸಿಲುಕುವಂತೆ ಮಾಡಿದೆ.

Published On - 10:50 am, Tue, 22 November 22