ಜನರಿಂದ ಅಧಿಕ ವಿದ್ಯುತ್​ ಬಿಲ್​ ವಸೂಲಿ, ಆದ್ರೆ ಸರ್ಕಾರಿ ಇಲಾಖೆ-ಸಂಸ್ಥೆಗಳ ಸಾವಿರಾರು ಕೋಟಿ ಬಿಲ್​​ ಬಾಕಿ, ಮೌನವಹಿಸಿದ ಸರ್ಕಾರ

ಬೆಂಗಳೂರು: ಗೃಹ ಜ್ಯೋತಿ (Gruha Jyoti) ಯೋಜನೆ ಅಡಿ ರಾಜ್ಯ ಸರ್ಕಾರ 200 ಯುನಿಟ್​​ವರೆಗು ಪ್ರತಿ ಮನೆಗೆ ಉಚಿತ ವಿದ್ಯುತ್​​ (Free Electricity) ಅಂತ ಘೋಷಿಸಿದೆ. ಆದರೆ ಇದಕ್ಕೂ ಮುನ್ನ ಜನರು ಏರಿಕೆಯಾದ ವಿದ್ಯುತ್​ ಬಿಲ್ (Electricity Bill)​​ ದರದಿಂದ ಪರದಾಡುತ್ತಿದ್ದಾರೆ. ಈ ಬಿಲ್​​​ ಗ್ರಾಹಕರು ಕಡ್ಡಾಯವಾಗಿ ಕಟ್ಟಬೇಕಾಗಿದ್ದು, ಇಲ್ಲವಾದಲ್ಲಿ 200 ಯುನಿಟ್​ ಉಚಿತ ವಿದ್ಯುತ್​ ಸಿಗುವುದಿಲ್ಲ ಎಂದು ಎಸ್ಕಾಂ ಅಧಿಕಾರಿಗಳು ಹೇಳುತ್ತಿದ್ದಾರೆ. ಆದರೆ ಎಸ್ಕಾಂ ಅಧಿಕಾರಿಗಳು ಜನರಿಗೊಂದು, ಸರ್ಕಾರಿ ಇಲಾಖೆ ಮತ್ತು ಸಂಸ್ಥೆಗಳಿಗೊಂದು ನಿಯಮ ಮಾಡಲು ಹೊರಟಿದ್ದಾರಾ ಎಂಬ ಅನುಮಾನ ವ್ಯಕ್ತವಾಗಿದೆ. ಹೌದು ಸರ್ಕಾರಿ ಇಲಾಖೆ ಮತ್ತು ಸಂಸ್ಥೆಗಳು ಎಸ್ಕಾಂಗಳಿಗೆ ಕಟ್ಟಬೇಕಾದ ಕೋಟಿ ಕೋಟಿ ಬಿಲ್​​ ಅನ್ನು ಬಾಕಿ ಉಳಿಸಿಕೊಂಡರೂ, ಅಧಿಕಾರಿಗಳು ಮಾತ್ರ ಧ್ವನಿ ಎತ್ತದೆ ಶಾಂತರೂಪಿಗಳಾಗಿದ್ದಾರೆ.

ಸರ್ಕಾರಿ ಇಲಾಖೆ ಮತ್ತು ಸಂಸ್ಥೆಗಳು ಕರೆಂಟ್ ಬಳಸಿ ಬೆಸ್ಕಾಂಗೆ ಬಿಲ್‌ಕಟ್ಟದೆ ನಿರ್ಲಕ್ಷ್ಯ ವಹಿಸಿದ್ದು, ವಿವಿಧ ಸರ್ಕಾರಿ ಇಲಾಖೆ ಮತ್ತು ಸಂಸ್ಥೆಗಳಿಗೆ 5 ಸಾವಿರ ಕೋಟಿಗೂ ಹೆಚ್ಚು ಬಿಲ್ ಬಾಕಿ ಇದೆ. ಪ್ರತಿ ವರ್ಷ ಕರೆಂಟ್ ಬಿಲ್ ಬಾಕಿ ಹೆಚ್ಚುತ್ತಲೇ ಇದ್ದು, ಜೊತೆಗೆ ಬಡ್ಡಿಯೂ ಏರುತ್ತಿದೆ. ಆದರೂ ಸರ್ಕಾರಿ ಇಲಾಖೆ ಮತ್ತು ಸಂಸ್ಥೆಗಳು ಬಿಲ್ ಕಟ್ಟಲು ಮೀನಾಮೇಷ ಎಣಿಸುತ್ತಿವೆ.

ಇದನ್ನೂ ಓದಿ: ವಿದ್ಯುತ್ ದರ ಏರಿಕೆ ಬಗ್ಗೆ ಟೀಕೆ: ಬೆಸ್ಕಾಂ ವ್ಯವಸ್ಥಾಪಕ ನಿರ್ದೇಶಕ ಮಹಾಂತೇಶ ಬೀಳಗಿ ಸ್ಪಷ್ಟನೆ

ಕಳೆದ ವರ್ಷ ಮಾರ್ಚ್ ತಿಂಗಳಿಂದ 2023ವರೆಗೆ ಬರಬೇಕಾದ ಬಿಲ್ ಬಾಕಿ ಇದ್ದು, ಇದೀಗ ಗೃಹಜ್ಯೋತಿ ಉಚಿತ ವಿದ್ಯುತ್​ ಹಿನ್ನೆಲೆ ಬಾಕಿ ಉಳಿಸಿಕೊಂಡ ಬಿಲ್​​ಗಳನ್ನು ಕ್ಲಿಯರ್ ಮಾಡುವಂತೆ ಬೆಸ್ಕಾಂ ಸರ್ಕಾರಿ ಇಲಾಖೆ ಮತ್ತು ಸಂಸ್ಥೆಗಳಿಗೆ ನೋಟೀಸ್ ನೀಡಿದೆ.

ಸರ್ಕಾರಿ ಇಲಾಖೆ ಮತ್ತು ಸಂಸ್ಥೆಗಳಿಂದ ಬರಬೇಕಾದ ಬಾಕಿ

1. BBMP (ವಾರ್ಡ್​​ಗಳ ಬೀದಿ ದೀಪಗಳು) – 640 ಕೋಟಿ
2. BBMP (ಬೀದಿ ದೀಪ) – 52.56 ಕೋಟಿ
3. BWSSB ಬೋರ್ ವೆಲ್ – 468.25 ಕೋಟಿ
4. ನೀರಾವರಿ ಇಲಾಖೆ – 46.91 ಕೋಟಿ
5. ಸ್ಲಮ್ ಬೋರ್ಡ್ – 16.69 ಕೋಟಿ
6. ಪವರ್ ಲೂಮ್ ಕಚೇರಿ – 4.52 ಕೋಟಿ
7. ಸ್ಥಳೀಯ ಗ್ರಾಮೀಣ ಸಂಸ್ಥೆಗಳು – 3,785.87 ಕೋಟಿ
8. ಸ್ಥಳೀಯ ನಗರ ಸಂಸ್ಥೆಗಳು – 113.16 ಕೋಟಿ
9. ಇತರೆ ಸರ್ಕಾರಿ ಇಲಾಖೆ ಕಚೇರಿ – 43.49 ಕೋಟಿ
10. ಕೇಂದ್ರ ಸರ್ಕಾರ – 33.02 ಕೋಟಿ

ಒಟ್ಟು 5,246.64 ಕೋಟಿ ಬಾಕಿ ಇದೆ

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ