IPL 2021: ಯುಜ್ವೇಂದ್ರ ಜೊತೆಗಿನ ಸ್ನೇಹದ ಕುರಿತು ಮನಬಿಚ್ಚಿ ಮಾತಾಡಿರುವ ‘ಕೋಟಿವೀರ’ ಗ್ಲೆನ್ ಮ್ಯಾಕ್ಸ್​ವೆಲ್!

2021 ಸೀಸನ್ನಿನ ಉಳಿದ ಭಾಗದಲ್ಲೂ ಮ್ಯಾಕ್ಸ್​ವೆಲ್ ಇದೇ ಬಗೆಯ ಪ್ರದರ್ಶನಗಳನ್ನು ನೀಡಲಿ ಎಂಬ ಆಶಯವನ್ನು ಆರ್​ಸಿಬಿ ಅಭಿಮಾನಿಗಳು ಇಟ್ಟುಕೊಂಡಿದ್ದಾರೆ. ಮ್ಯಾಕ್ಸ್​ವೆಲ್ ಮತ್ತು ಆರ್​ಸಿಬಿ ನಾಯಕ ವಿರಾಟ್​ ಕೊಹ್ಲಿ ನಡುವೆ ಪರಸ್ಪರ ಆದರ, ಅಭಿಮಾನ ಮತ್ತು ಮೆಚ್ಚುಗೆಗಳಿವೆ.

  • TV9 Web Team
  • Published On - 6:32 AM, 14 Apr 2021
IPL 2021: ಯುಜ್ವೇಂದ್ರ ಜೊತೆಗಿನ ಸ್ನೇಹದ ಕುರಿತು ಮನಬಿಚ್ಚಿ ಮಾತಾಡಿರುವ ‘ಕೋಟಿವೀರ’ ಗ್ಲೆನ್ ಮ್ಯಾಕ್ಸ್​ವೆಲ್!
ಯುಜ್ವೇಂದ್ರ ಚಹಲ್ ಮತ್ತು ಗ್ಲೆನ್ ಮ್ಯಾಕ್ಸವೆಲ್

ಇಂಡಿಯನ್​ ಪ್ರಿಮೀಯರ್​ ಲೀಗ್ ಹರಾಜು ಪ್ರಕ್ರಿಯೆಯಲ್ಲಿ ಪ್ರತಿಬಾರಿ ಭಾರೀ ಮೊತ್ತಕ್ಕೆ ಬಿಕರಿಯಾಗುವ ಅಸ್ಟ್ರೇಲಿಯಾದ ಆಲ್​ರೌಂಡರ್ ಗ್ಲೆನ್ ಮ್ಯಾಕ್ಸ್​ವೆಲ್ ಈ ಬಾರಿಯ ಸೀಸನ್ ಅನ್ನು ಪಾಸಿಟಿವ್ ನೋಟ್​ನೊಂದಿಗೆ ಆರಂಭಿಸಿದ್ದಾರೆ. ನಿಮಗೆ ನೆನಪಿರಬಹುದು, ಕಳೆದ ಸೀಸನ್​ನಲ್ಲಿ ಪಂಜಾಬ್​ ಕಿಂಗ್ಸ್ (ಆಗಿನ ಕಿಂಗ್ಸ್ ಇಲೆವೆನ್ ಪಂಜಾಬ್) ಪರ ಆಡಿದ್ದ ಮ್ಯಾಕ್ಸ್​ವೆಲ್​ಗೆ ಇಡೀ ಸೀಸನ್​ನಲ್ಲಿ ಒಂದೇ ಒಂದು ಸಿಕ್ಸ್ ಬಾರಿಸಲು ಸಾಧ್ಯವಾಗಿರಲಿಲ್ಲ. ಬೌಲಿಂಗ್​ನಲ್ಲೂ ಅವರು ಯಾವುದೇ ಕರಾಮತ್ತು ತೋರದ ಕಾರಣ ಫ್ರಾಂಚೈಸಿಯ ಮಾಲೀಕರಾಗಿರುವ ಪ್ರೀತಿ ಜಿಂಟಾ ಮತ್ತು ಇತರರು ಅವರನ್ನು ಕೈಬಿಡುವ ನಿರ್ಧಾರ ತೆಗೆದುಕೊಂಡರು. ಆದರೆ ಫೆಬ್ರವರಿಯಲ್ಲಿ ನಡೆದ ಮಿನಿ ಹರಾಜಿನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಫ್ರಾಂಚೈಸಿಯ ಮಾಲೀಕರು ಬೃಹತ್​ ಮೊತ್ತ ಎನ್ನಬಹುದಾದ 14.25 ಕೋಟಿ ರೂಪಾಯಿಗಳಿಗೆ ಅವರನ್ನು ಖರೀದಿಸಿದರು. ಈ ತಂಡದ ಪರ ಅವರ ಈ ಸೀಸನ್ ಉತ್ತಮವಾಗಿಯೇ ಅರಂಭಗೊಂಡಿದೆ. ಅವರು ಮುಂಬೈ ವಿರುದ್ಧ ಆಡಿದ ಪಂದ್ಯದಲ್ಲಿ 28 ಎಸೆತಗಳಲ್ಲಿ 39 ರನ್ (3 ಬೌಂಡರಿ 2 ಸಿಕ್ಸ್) ಬಾರಿಸಿದರು.

2021 ಸೀಸನ್ನಿನ ಉಳಿದ ಭಾಗದಲ್ಲೂ ಮ್ಯಾಕ್ಸ್​ವೆಲ್ ಇದೇ ಬಗೆಯ ಪ್ರದರ್ಶನಗಳನ್ನು ನೀಡಲಿ ಎಂಬ ಆಶಯವನ್ನು ಆರ್​ಸಿಬಿ ಅಭಿಮಾನಿಗಳು ಇಟ್ಟುಕೊಂಡಿದ್ದಾರೆ. ಮ್ಯಾಕ್ಸ್​ವೆಲ್ ಮತ್ತು ಆರ್​ಸಿಬಿ ನಾಯಕ ವಿರಾಟ್​ ಕೊಹ್ಲಿ ನಡುವೆ ಪರಸ್ಪರ ಆದರ, ಅಭಿಮಾನ ಮತ್ತು ಮೆಚ್ಚುಗೆಗಳಿವೆ. ಹಾಗೆಯೇ, ಟೀಮಿನ ಸ್ಟಾರ್ ಸ್ಪಿನ್ನರ್ ಯುಜ್ವೇಂದ್ರ ಚಹಲ್ ಜೊತೆ ಅವರ ದೋಸ್ತಿ ಜೋರಾಗಿದೆ, ಚಹಲ್ ಜೊತೆಗಿನ ಸ್ನೇಹದ ಬಗ್ಗೆ ಮ್ಯಾಕ್ಸ್​ವೆಲ್ ಮನಬಿಚ್ಚಿ ಮಾತಾಡಿದ್ದಾರೆ.

‘ನನ್ನ ಈ ಪುಟ್ಟ ಸ್ನೇಹಿತನೊಂದಿಗೆ ಆಡುವುದನ್ನು ನಾನು ಎದುರು ನೋಡುತ್ತಿದ್ದೇನೆ. ಇಲ್ಲಿಗೆ ಬಂದ ಎರಡೇ ದಿನಗಳ ನಂತರ ಅವರು ನನ್ನನ್ನು ಕೀಟಲೆ ಮಾಡುವುದು, ಕಾಲೆಳೆಯುವುದನ್ನು ಆರಂಭಿಸಿದ್ದಾರೆ,’ ಎಂದು ಆರ್​ಸಿಬಿ ನೀಡಿದ ಸಂದರ್ಶನದಲ್ಲಿ ಮ್ಯಾಕ್ಸ್​ವೆಲ್ ಹೇಳಿದ್ದಾರೆ.

‘2013ರಲ್ಲಿ ನಾವಿಬ್ಬರೂ ಮುಂಬೈ ಇಂಡಿಯನ್ಸ್ ತಂಡದಲ್ಲಿದ್ದೆವು. ಹಾಗಾಗಿ ನಾವು ಬಹಳ ವರ್ಷಗಳಿಂದ ಸ್ನೇಹಿತರು. ಅಲ್ಲಿಂದೀಚೆಗೆ ಈ ಸ್ನೇಹ ಗಾಢವಾಗುತ್ತಾ ಸಾಗಿದೆ. ನಾವು ಭೇಟಿಯಾದಾಗೆಲ್ಲ ಮಾಡುವ ಮೊದಲ ಕೆಲಸವೆಂದರೆ ಬಿಗಿಯಾಗಿ ತಬ್ಬಿಕೊಳ್ಳುವುದು. ನಾವು ಮೈದಾನದಲ್ಲಿ ಜೊತೆಯಾಗಿ ಆಡುತ್ತೇವೆ, ಅವರು ಬೌಲಿಂಗ್ ಮಾಡಿದರೆ ನಾನು ಬ್ಯಾಟಿಂಗ್ ಮಾಡುತ್ತೇನೆ,’ ಎಂದು ಮ್ಯಾಕ್ಸ್​ವೆಲ್ ಹೇಳಿದ್ದಾರೆ.

‘ನಮ್ಮಿಬ್ಬರ ನಡುವೆ ತಮಾಷೆ ಕೀಟಲೆ ನಡೆಯುತ್ತಲೇ ಇರುತ್ತದೆ, ಮುಗುಳ್ನಗು ನಮ್ಮ ಮುಖದಲ್ಲಿ ಸದಾ ಮನೆ ಮಾಡಿರುತ್ತದೆ. ತೀವ್ರ ಪೈಪೋಟಿ ಹೊರತಾಗಿಯೂ, ತಮಾಷೆ ಮಾಡಿಕೊಳ್ಳುತ್ತಾ ಆಟವಾಡುತ್ತಿದ್ದರೆ, ಕ್ರಿಕೆಟ್ ನಿಜಕ್ಕೂ ಮೋಜೆನಿಸುತ್ತದೆ,’ ಎಂದು ಮಾಕ್ಸ್​ವೆಲ್ ಹೇಳಿದ್ದಾರೆ.

ಬುಧವಾರದಂದು ಸನ್​ರೈಸರ್ಸ್ ಹೈದರಾಬಾದ್ ವಿರುದ್ಧ ನಡೆಯುವ ಪಂದ್ಯದಲ್ಲೂ ಮ್ಯಾಕ್ಸ್​ವೆಲ್ ಉತ್ತಮ ಪ್ರದರ್ಶನ ನೀಡುವ ಬಗ್ಗೆ ಭರವಸೆ ಇಟ್ಟುಕೊಂಡಿದ್ದಾರೆ.

ಇದನ್ನೂ ಓದಿ: IPL 2021: ವೈಯಕ್ತಿಕ ದುಃಖ ಮೆಟ್ಟಿನಿಂತು ಪದಾರ್ಪಣೆಯ ಪಂದ್ಯದಲ್ಲೇ ಕ್ರಿಕೆಟ್​ ಪ್ರೇಮಿಗಳ ಮನ ಗೆದ್ದ ರಾಜಸ್ತಾನ್ ರಾಯಲ್ಸ್​ ತಂಡದ ಚೇತನ್

IPL 2021: 63 ವರ್ಷದ ಈ ಉದ್ಯಮಿಗೂ ಐಪಿಎಲ್​ನಲ್ಲಿ ಆಡುವ ಆಸೆಯಂತೆ! ಆದರೆ ಷರತ್ತುಗಳು ಅನ್ವಯ