ಕೊವಿಡ್ ವಿರುದ್ಧ ಕೊವ್ಯಾಕ್ಸಿನ್ ಶೇ 50ರಷ್ಟು ಪರಿಣಾಮಕಾರಿ: ಲ್ಯಾನ್ಸೆಟ್ ವರದಿ

ದೆಹಲಿ: ಭಾರತದ ಕೊರೊನಾವೈರಸ್ (Coronavirus)​​ ಇಮ್ಯುನೈಸೇಶನ್ ಡ್ರೈವ್‌ನಲ್ಲಿ ಬಳಸಲಾಗುವ ಪ್ರಮುಖ ಲಸಿಕೆಗಳಲ್ಲಿ ಒಂದಾದ ಕೊವ್ಯಾಕ್ಸಿನ್(Covaxin) ರೋಗಲಕ್ಷಣದ ಕೊವಿಡ್ (Covid19) ವಿರುದ್ಧ ಕೇವಲ ಶೇ 50 ರಕ್ಷಣೆಯನ್ನು ಒದಗಿಸುತ್ತದೆ, ರಿಯಲ್ ಟೈಮ್ ಅಧ್ಯಯನದ ಪ್ರಕಾರ ಈ ಲಸಿಕೆ ಆರಂಭದಲ್ಲಿ ಯೋಚಿಸಿದ್ದಕ್ಕಿಂತ ಕಡಿಮೆ ಪರಿಣಾಮಕಾರಿ ಎಂದು ಸೂಚಿಸುತ್ತದೆ. ದಿ ಲ್ಯಾನ್ಸೆಟ್ ಸಾಂಕ್ರಾಮಿಕ ರೋಗಗಳ ಜರ್ನಲ್‌ನಲ್ಲಿ ಪ್ರಕಟವಾದ ಅಧ್ಯಯನದ ಪ್ರಕಾರ ಈ ವರ್ಷದ ಆರಂಭದಲ್ಲಿ ಭಾರತವು ತನ್ನ ಎರಡನೇ ಪ್ರಮುಖ ಕೊವಿಡ್ ತರಂಗದಿಂದ ತತ್ತರಿಸುತ್ತಿದ್ದಂತೆ, ದೆಹಲಿಯ ಆಲ್ ಇಂಡಿಯಾ ಇನ್‌ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್‌ನ ಸಂಶೋಧಕರು ಏಪ್ರಿಲ್ 15 ಮತ್ತು ಮೇ 15 ನಡುವೆ ಸೋಂಕಿನ ಲಕ್ಷಣಗಳನ್ನು ತೋರಿಸುತ್ತಿರುವ ಮತ್ತು ಆರ್‌ಟಿ-ಪಿಸಿಆರ್ ಪರೀಕ್ಷೆಗೆ ಒಳಗಾಗುತ್ತಿರುವ ಆಸ್ಪತ್ರೆಯ 2,714 ಆರೋಗ್ಯ ಕಾರ್ಯಕರ್ತರ ಡೇಟಾವನ್ನು ವಿಶ್ಲೇಷಿಸಿದ್ದಾರೆ. ಜನವರಿಯಲ್ಲಿ ದೇಶದ ವ್ಯಾಕ್ಸಿನೇಷನ್ ಅಭಿಯಾನದ ಆರಂಭದಲ್ಲಿ ಏಮ್ಸ್ ನಲ್ಲಿನ ಸಿಬ್ಬಂದಿಗೆ ಕೊವ್ಯಾಕ್ಸಿನ್ ಅನ್ನು ಪ್ರತ್ಯೇಕವಾಗಿ ನೀಡಲಾಯಿತು, ಇದು ಭಾರತದ ರಾಜ್ಯ ನಿಧಿಯ ಆರೋಗ್ಯ ಸಂಶೋಧನಾ ಸಂಸ್ಥೆ ಮತ್ತು ಸ್ಥಳೀಯ ಕಂಪನಿ ಭಾರತ್ ಬಯೋಟೆಕ್ ಇಂಟರ್ನ್ಯಾಷನಲ್ ಲಿಮಿಟೆಡ್‌ನಿಂದ ಸಹಯೋಗದಿಂದ ಅಭಿವೃದ್ಧಿಪಡಿಸಲ್ಪಟ್ಟಿದೆ. ಎರಡು ವಾರಗಳ ಅಥವಾ ಅದಕ್ಕಿಂತ ಹೆಚ್ಚಿನ ಅವಧಿಯ ಎರಡು ಡೋಸ್ ಲಸಿಕೆ ಪೂರ್ಣಗೊಳಿಸಿದ ನಂತರ, ರೋಗಲಕ್ಷಣದ ಕೊವಿಡ್ ವಿರುದ್ಧ ಲಸಿಕೆಯ ಪರಿಣಾಮಕಾರಿತ್ವವು ಅಂತಿಮ ಹಂತದ ಪರೀಕ್ಷೆಗಳಲ್ಲಿ ಸ್ಥಾಪಿಸಲಾದ ಮಧ್ಯಂತರ ಫಲಿತಾಂಶಗಳ ಶೇ 77. ಕ್ಕಿಂತ ಕಡಿಮೆಯಾಗಿದೆ ಎಂದು ಲೇಖಕರು ಕಂಡುಕೊಂಡಿದ್ದಾರೆ.  ಇದರ ಅಧ್ಯಯನವು ಈ ತಿಂಗಳ ಆರಂಭದಲ್ಲಿ ದಿ ಲ್ಯಾನ್ಸೆಟ್‌ನಲ್ಲಿ ಪ್ರಕಟವಾಯಿತು. ಆಸ್ಪತ್ರೆಯ ಉದ್ಯೋಗಿಗಳಲ್ಲಿ ಹೆಚ್ಚಿನ ಸೋಂಕಿನ ಪ್ರಮಾಣಗಳು ಮತ್ತು ವೈರಸ್‌ಗೆ ಒಡ್ಡಿಕೊಳ್ಳುವಿಕೆಯು ಕೊವ್ಯಾಕ್ಸಿನ್‌ನ ದುರ್ಬಲ ರಿಯಲ್ ಟೈಮ್ ಪರಿಣಾಮಕಾರಿತ್ವಕ್ಕೆ ಕೊಡುಗೆ ನೀಡಿರಬಹುದು, ಜೊತೆಗೆ ಇತ್ತೀಚೆಗೆ ಹೊರಹೊಮ್ಮಿದ ಡೆಲ್ಟಾ ರೂಪಾಂತರವು ಲಸಿಕೆಯ ರಕ್ಷಣೆಯನ್ನು ಕುಂಠಿತಗೊಳಿಸುವ ಸಾಧ್ಯತೆಯಿದೆ ಎಂದು ಸಂಶೋಧಕರು ಹೇಳಿದ್ದಾರೆ.

“ನಮ್ಮ ಅಧ್ಯಯನವು ಈ ಕ್ಷೇತ್ರದಲ್ಲಿ BBV152 ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದರ ಸಂಪೂರ್ಣ ಚಿತ್ರವನ್ನು ನೀಡುತ್ತದೆ ಮತ್ತು ಭಾರತದಲ್ಲಿ ಕೊವಿಡ್ -19 ಉಲ್ಬಣಗೊಳ್ಳುವ ಪರಿಸ್ಥಿತಿಗಳ ಸಂದರ್ಭ ಮತ್ತು ಡೆಲ್ಟಾ ರೂಪಾಂತರದ ಸಂಭವನೀಯ ಪ್ರತಿರಕ್ಷಣಾ ತಪ್ಪಿಸಿಕೊಳ್ಳುವ ಸಾಮರ್ಥ್ಯವನ್ನು ಪರಿಗಣಿಸಬೇಕು” ಎಂದು ನವದೆಹಲಿಯ ಏಮ್ಸ್ ನಲ್ಲಿನ ಮೆಡಿಸಿನ್ ನ ಹೆಚ್ಚುವರಿ ಪ್ರಾಧ್ಯಾಪಕ ಮನೀಶ್ ಸೋನೆಜಾ ಲಸಿಕೆಯ ವೈಜ್ಞಾನಿಕ ಹೆಸರನ್ನು ಉಲ್ಲೇಖಿಸಿ ಹೇಳಿರುವುದಾಗಿ ಪ್ರಕಟಣೆಯಲ್ಲಿದೆ.

2021 ರ ಆರಂಭದಲ್ಲಿ ಭಾರತದಾದ್ಯಂತ ವ್ಯಾಪಕವಾಗಿ ಹರಡಲು ಪ್ರಾರಂಭಿಸಿದ ಅತ್ಯಂತ ಸಾಂಕ್ರಾಮಿಕ ಡೆಲ್ಟಾ ರೂಪಾಂತರದ ವಿರುದ್ಧ ಬಹುತೇಕ ಎಲ್ಲಾ ಕೊವಿಡ್ ಲಸಿಕೆಗಳು ಕಡಿಮೆ ಪರಿಣಾಮಕಾರಿತ್ವವನ್ನು ತೋರಿಸುತ್ತವೆ ಎಂದು ವಿವಿಧ ಅಧ್ಯಯನಗಳು ಸೂಚಿಸಿದರೆ, ಕೊವ್ಯಾಕ್ಸಿನ್‌ನ ಹೊಸ ಸಂಶೋಧನೆಯು ಭಾರತವು ಸಾಗರೋತ್ತರ ಲಸಿಕೆ ಸಾಗಣೆಯನ್ನು ಪುನರಾರಂಭಿಸುತ್ತಿದ್ದಂತೆ ಭಾರತ್ ಬಯೋಟೆಕ್ ಉತ್ಪಾದನೆಯನ್ನು ಹೆಚ್ಚಿಸುತ್ತಿರುವ ಸಮಯದಲ್ಲಿ ಲಸಿಕೆ ಮನವಿಯನ್ನು ತಗ್ಗಿಸಬಹುದು.

ಇಲ್ಲಿಯವರೆಗೆ ಭಾರತದಲ್ಲಿ 130 ಮಿಲಿಯನ್ ಡೋಸ್ ಕೊವ್ಯಾಕ್ಸಿನ್ ಅನ್ನು ನೀಡಲಾಗಿದೆ. ಭಾರತ್ ಬಯೋಟೆಕ್ ಲಸಿಕೆಯನ್ನು ವ್ಯಾಪಕವಾಗಿ ಪ್ರಚಾರ ಮಾಡಿದ ಸರ್ಕಾರ, ಜನವರಿಯಲ್ಲಿ 3 ನೇ ಹಂತದ ಮಾನವ ಪ್ರಯೋಗಗಳನ್ನು ಪೂರ್ಣಗೊಳಿಸುವ ಮೊದಲು ಲಸಿಕೆಯ ಆರಂಭಿಕ ಅಧಿಕಾರವನ್ನು ಒಳಗೊಂಡ ವಿವಾದಗಳಿಗೆ ಬಾಗಿಲು ಮುಚ್ಚಲು ಪ್ರಯತ್ನಿಸಿದೆ. ಆ ಸಮಯದಲ್ಲಿ ದೇಶದಲ್ಲಿ ವ್ಯಾಪಕವಾದ ಲಸಿಕೆ ಹಿಂಜರಿಕೆಯೂ ಕಂಡು ಬಂತು.

ವಿಶ್ವ ಆರೋಗ್ಯ ಸಂಸ್ಥೆಯ ಸ್ವತಂತ್ರ ತಾಂತ್ರಿಕ ಸಮಿತಿಯು ನವೆಂಬರ್ ಆರಂಭದಲ್ಲಿ ಕೊವ್ಯಾಕ್ಸಿನ್‌ಗೆ ತುರ್ತು ಅನುಮೋದನೆಯನ್ನು ನೀಡುವ ಮುನ್ನ ಹೆಚ್ಚಿನ ಮಾಹಿತಿಗಾಗಿ ಭಾರತ್ ಬಯೋಟೆಕ್ ಅನ್ನು ಪದೇ ಪದೇ ಕೇಳುತ್ತಿತ್ತು. ಹೈದರಾಬಾದ್ ಮೂಲದ ಲಸಿಕೆ ತಯಾರಕರ ಅಧ್ಯಕ್ಷ ಕೃಷ್ಣ ಎಲಾ, ಸಾಂಪ್ರದಾಯಿಕ ನಿಷ್ಕ್ರಿಯ-ವೈರಸ್ ತಂತ್ರಜ್ಞಾನವನ್ನು ಬಳಸಿಕೊಂಡು ಅಭಿವೃದ್ಧಿಪಡಿಸಲಾದ ಲಸಿಕೆ ಸುತ್ತಲಿನ ಟೀಕೆಗಳಿಂದಾಗಿ ವಿಶ್ವ ಆರೋಗ್ಯ ಸಂಸ್ಥೆಯ ಅನುಮೋದನೆಗೆ ಹೆಚ್ಚಿನ ಸಮಯತೆಗೆದುಕೊಂಡಿತು ಎಂದಿದ್ದಾರೆ.

ಏಮ್ಸ್ ಅಧ್ಯಯನವು ಆಸ್ಪತ್ರೆಗೆ ದಾಖಲು, ತೀವ್ರ ರೋಗ ಮತ್ತು ಸಾವಿನ ವಿರುದ್ಧ ಲಸಿಕೆಯ ಪರಿಣಾಮಕಾರಿತ್ವವನ್ನು ಅಂದಾಜು ಮಾಡಿಲ್ಲ ಎಂದು ಸಂಶೋಧಕರು ಹೇಳಿದ್ದಾರೆ. ಆದರೆ ವಿಭಿನ್ನ ಸಮಯದ ಮಧ್ಯಂತರಗಳಲ್ಲಿ ರಕ್ಷಣೆಯನ್ನು ಅಂದಾಜು ಮಾಡಲು ವಿನ್ಯಾಸಗೊಳಿಸಲಾಗಿಲ್ಲ ಎಂದು ಒಪ್ಪಿಕೊಂಡರು. ನಿರ್ದಿಷ್ಟ ರೂಪಾಂತರದ ಕಾರಣದಿಂದಾಗಿ ರೋಗಿಗಳು ರೋಗಲಕ್ಷಣಗಳನ್ನು ಹೊಂದಿದ್ದಾರೆಯೇ ಎಂದು ಕಂಡುಹಿಡಿಯಲು ರೋಗಿಗಳನ್ನು ಪರೀಕ್ಷಿಸಲಾಗಿಲ್ಲ ಮತ್ತು ಲೇಖಕರು ಸಹ ಕೊಮೊರ್ಬಿಡಿಟಿಗಳು ಮತ್ತು ಮುಂಚಿನ ಸೋಂಕುಗಳ ಬಗ್ಗೆ ಮಾಹಿತಿಯ ಕೊರತೆಯನ್ನು ಸೂಚಿಸಿದ್ದಾರೆ.

ಇದನ್ನೂ ಓದಿ: ಭಾರತದಲ್ಲಿ ಕೊವಿಡ್​ 19 ಲಸಿಕೆ ಮೂರನೇ ಡೋಸ್​ ಅಗತ್ಯವಿದೆಯಾ?-ಏಮ್ಸ್​ ನಿರ್ದೇಶಕರ ಉತ್ತರ ಹೀಗಿದೆ