ಹಿಜಾಬ್​ ಇಸ್ಲಾಂನಲ್ಲಿ ಅತ್ಯಂತ ಮುಖ್ಯವೆಂದು ಕುರಾನ್​ ಹೇಳಿಲ್ಲ, ಸುಮ್ಮನೆ ಹೋಗಿ ವಿದ್ಯೆ ಕಲಿಯಿರಿ: ಕೇರಳ ರಾಜ್ಯಪಾಲ ಆರಿಫ್​ ಮೊಹಮ್ಮದ್ ಖಾನ್

ದೆಹಲಿ: ಕರ್ನಾಟಕದಲ್ಲಿ ನಡೆಯುತ್ತಿರುವ ಹಿಜಾಬ್​ ವಿವಾದಕ್ಕೆ (Hijab Row) ರಾಷ್ಟ್ರಾದ್ಯಂತ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿದ್ದರೂ, ಬಹುತೇಕ ಮುಸ್ಲಿಂ ನಾಯಕರೆಲ್ಲ ಹಿಜಾಬ್​ ಪರವಾಗಿಯೇ ಧ್ವನಿ ಎತ್ತಿದ್ದಾರೆ. ಹೀಗಿರುವಾಗ ಕೇರಳದ ರಾಜ್ಯಪಾಲ, ಹಿರಿಯ ಮುಸ್ಲಿಂ ಮುಖಂಡರಾದ ಆರಿಫ್​ ಮೊಹಮ್ಮದ್ ಖಾನ್​ ಅವರೊಂದು ವಿಭಿನ್ನ ಹೇಳಿಕೆ ನೀಡಿದ್ದಾರೆ. ಹಿಜಾಬ್​ ಎಂಬುದು ಇಸ್ಲಾಮ್​ನ ಅವಿಭಾಜ್ಯ ಅಂಗವಲ್ಲ. ಸಿಖ್ಖರಿಗೆ ಟರ್ಬನ್​ ತುಂಬ ಮುಖ್ಯ. ಹಾಗಂತ ಇಸ್ಲಾಂನಲ್ಲಿ ಹಿಜಾಬ್ ಅಷ್ಟೇ ಮುಖ್ಯ ಎಂದು ಭಾವಿಸಬೇಕಿಲ್ಲ ಎಂದು ಹೇಳಿದ್ದಾರೆ.  ಕುರಾನ್​​ನಲ್ಲಿ ಹಿಜಾಬ್​​ನ್ನು ಏಳು ಬಾರಿ ಉಲ್ಲೇಖಿಸಲಾಗಿದೆ. ಆದರೆ ಅದನ್ನೆಲ್ಲೂ ಮುಸ್ಲಿಂ ಮಹಿಳೆಯರ ಉಡುಪು ಸಂಹಿತೆಯಲ್ಲಿ ಕಡ್ಡಾಯ ಎಂದು ಹೇಳಿಲ್ಲ. ಇದು ಪರದಾ ಪದ್ಧತಿಗೆ ಸಂಬಂಧಿಸಿದ ವಿಚಾರ ಎಂದು ಮಾಹಿತಿ ನೀಡಿದ್ದಾರೆ.

ಹಿಜಾಬ್​ ವಿವಾದ ಮಿತಿಮೀರಿದೆ. ಅನೇಕರು ವಿವಿಧ ವಾದವನ್ನು ಮಂಡಿಸುತ್ತಿದ್ದಾರೆ. ಅದರಲ್ಲಿ ಒಂದು ವರ್ಗದ ಜನರು, ಸಿಖ್​ ಸಮುದಾಯದ ವಿದ್ಯಾರ್ಥಿಗಳು ಟರ್ಬನ್​ ಇಟ್ಟುಕೊಂಡೇ ಕ್ಲಾಸ್​ ರೂಮಿಗೆ ಬರುತ್ತಾರೆ. ಆದರೆ ಮುಸ್ಲಿಂ ಹುಡುಗಿಯರಿಗೇಕೆ ಹಿಜಾಬ್​ ಧರಿಸಿ ಬರಲು ಅವಕಾಶ ಕೊಡುತ್ತಿಲ್ಲ ಎಂಬ ಪ್ರಶ್ನೆಯನ್ನು ಎತ್ತಿದ್ದಾರೆ. ಇದು ಸರಿಯಾದ ವಾದವಲ್ಲ. ಸಿಖ್ಖರಿಗೆ ಟರ್ಬನ್​ ಅತ್ಯಂತ ಮುಖ್ಯ. ಆದರೆ ಹಿಜಾಬ್​ನ್ನು ಅದಕ್ಕೆ ಹೋಲಿಸುವಂತಿಲ್ಲ. ಮುಸ್ಲಿಂ ಹುಡುಗಿಯರಿಗೆ ಹಿಜಾಬ್ ಕಡ್ಡಾಯವೆಂದು ಕುರಾನ್​​ನಲ್ಲಿ ಎಲ್ಲಿಯೂ ಉಲ್ಲೇಖವಿಲ್ಲ ಎಂದು ಕೇರಳ ರಾಜ್ಯಪಾಲರು ವಿವರಿಸಿದ್ದಾರೆ.

ಎಲ್ಲ ಧರ್ಮಗಳ, ಎಲ್ಲ ಹೆಣ್ಣುಮಕ್ಕಳೂ ಕೂಡ ತಮಗೆ ಬೇಕಾದಂತೆ ವಸ್ತ್ರ ಧರಿಸಬಹುದು. ಆದರೆ ಶಿಕ್ಷಣ ಎಂದು ಬಂದಾಗ, ಅವರು ಓದುತ್ತಿರುವ ಶಿಕ್ಷಣ ಸಂಸ್ಥೆಯ ನಿಯಮಗಳನ್ನು ಪಾಲಿಸಲೇಬೇಕು. ಆ ಸಂಸ್ಥೆಯಲ್ಲಿ ವಸ್ತ್ರ ಸಂಹಿತೆ ಏನಿದೆಯೋ ಅದರಂತೆ ನಡೆದುಕೊಳ್ಳಬೇಕಾಗುತ್ತದೆ.  ಇದೀಗ ಶುರುವಾಗಿರುವ ಹಿಜಾಬ್​ ವಿವಾದವೆಂಬುದು ಬಹುದೊಡ್ಡ ಪಿತೂರಿ. ಮುಸ್ಲಿಂ ಮಹಿಳೆಯರ ಹಕ್ಕು ರಕ್ಷಣೆ, ಅಭಿವೃದ್ಧಿಯಾಗುತ್ತಿರುವುದನ್ನು ಸಹಿಸಿಕೊಳ್ಳಲು ಸಾಧ್ಯವಾಗದವರು ಮಾಡುತ್ತಿರುವ ಕೆಲಸ ಇದು.  ಇಂಥ ಪಿತೂರಿಗೆಲ್ಲ ಹೆಣ್ಣುಮಕ್ಕಳು ಬಲಿಯಾಗಬಾರದು ಎಂದು ಹೇಳಿದ ಕೇರಳ ರಾಜ್ಯಪಾಲರು, ವಿದ್ಯಾಭ್ಯಾಸ ಬಹಿಷ್ಕರಿಸಿ, ಪ್ರತಿಭಟನೆಗೆ ಇಳಿದಿರುವ ಹಿಜಾಬ್​ ಹೋರಾಟಗಾರ್ತಿಯರಿಗೆ ವಾಪಸ್​ ಕ್ಲಾಸ್​ರೂಮಿಗೆ ಹೋಗಿ, ಶಿಕ್ಷಣ ಕಲಿಯುವಂತೆ ಸಲಹೆ ನೀಡಿದ್ದಾರೆ.

ಈ ಹಿಂದೆ ತಾಲಿಬಾನಿಗಳ ವಿರುದ್ಧ ಕೂಡ ಆರಿಫ್​ ಮೊಹಮ್ಮದ್ ಖಾನ್ ಕಿಡಿಕಾರಿದ್ದರು. ತಾಲಿಬಾನಿಗಳೇ ರೂಪಿಸಿಕೊಂಡ ಕಾನೂನಿಗೆ ಷರಿಯತ್ ಎಂದು ಕರೆಯಲು ಸಾಧ್ಯವಿಲ್ಲ. ನಿಜಕ್ಕೂ ಕುರಾನ್​ಗೆ ಷರಿಯತ್ ಕಾನೂನು ಎನ್ನಲಾಗುತ್ತದೆ. ಆದರೆ ಈಗೀಗ ಕಂಡವರೆಲ್ಲ ಕಾನೂನು ರಚಿಸಿ, ಅದಕ್ಕೆ ಷರಿಯತ್​ ಎಂದು ನಾಮಕರಣ ಮಾಡುತ್ತಿದ್ದಾರೆ ಎಂದು ಹೇಳಿದ್ದರು. ಅಷ್ಟೇ ಅಲ್ಲ, ದೇಶದಲ್ಲಿ ಮುಸ್ಲಿಂ ನಾಯಕತ್ವವನ್ನು ಮುಂಚೂಣಿಗೆ ತರಲು ಪ್ರಯತ್ನ ಮಾಡುತ್ತಿರುವ ಎಐಎಂಐಎಂ ಮುಖ್ಯಸ್ಥ ಅಸಾದುದ್ದೀನ್​ ಓವೈಸಿ ವಿರುದ್ಧ ವಾಗ್ದಾಳಿ ನಡೆಸಿದ್ದ ಆರೀಫ್​ ಮೊಹಮ್ಮದ್​ ಖಾನ್​, ಈ ಜನರು ತಮಗೆ ಪ್ರತ್ಯೇಕ ಗುರುತು ಬೇಕು ಎಂಬ ಬಗ್ಗೆ ಮಾತನಾಡುವುದನ್ನು ನಿಲ್ಲಿಸಬೇಕು. ನಾನೊಬ್ಬ ಭಾರತೀಯ ಎಂಬುದೇ ಪ್ರತಿಯೊಬ್ಬನ ಗುರುತಾಗಿರಬೇಕು ಎಂದಿದ್ದರು.

ಇದನ್ನೂ ಓದಿ: Valentine’s Day 2022 : ವ್ಯಾಲೆಂಟೈನ್ಸ್‌ ಡೇ ಇತಿಹಾಸ ಹೇಗಿದೆ ಗೊತ್ತಾ? “ಲುಪರ್ಕಾಲಿಯಾ” ಹಬ್ಬವೇ ವ್ಯಾಲೆಂಟೈನ್ಸ್‌ ಡೇ