ಮೈ ಲಾರ್ಡ್ ಅಂತ ಹೇಳ್ಬೇಡಿ, ನನ್ನ ಅರ್ಧ ಸಂಬಳ ನಿಮಗೆ ಕೊಡ್ತೀನಿ: ಸುಪ್ರೀಂಕೋರ್ಟ್ ನ್ಯಾಯಾಧೀಶ

ದೆಹಲಿ ನವೆಂಬರ್ 03: ನ್ಯಾಯಾಂಗ ಪ್ರಕ್ರಿಯೆಯಲ್ಲಿ ವಕೀಲರು ಪದೇ ಪದೇ “ಮೈ ಲಾರ್ಡ್” (My Lord) ಮತ್ತು “ಯುವರ್ ಲಾರ್ಡ್‌ಶಿಪ್ಸ್” ಎಂದು ಸಂಬೋಧಿಸುತ್ತಿರುವುದಕ್ಕೆ ಸುಪ್ರೀಂಕೋರ್ಟ್ (Supreme Court) ನ್ಯಾಯಾಧೀಶರೊಬ್ಬರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ‘ಮೈ ಲಾರ್ಡ್ಸ್’ ಎಂದು ಎಷ್ಟು ಬಾರಿ ಹೇಳುತ್ತೀರಿ? ನೀವು ಇದನ್ನು ಹೇಳುವುದನ್ನು ನಿಲ್ಲಿಸಿದರೆ, ನನ್ನ ಅರ್ಧ ಸಂಬಳ ಕೊಟ್ಟು ಬಿಡ್ತೀನಿ ಎಂದು ಹಿರಿಯ ನ್ಯಾಯಮೂರ್ತಿ ಎಎಸ್ ಬೋಪಣ್ಣ ಜತೆ ಪೀಠದಲ್ಲಿ ಕುಳಿತಿದ್ದ ನ್ಯಾಯಮೂರ್ತಿ ಪಿ.ಎಸ್.ನರಸಿಂಹ (Justice PS Narasimha) ಹಿರಿಯ ವಕೀಲರಲ್ಲಿ ಹೇಳಿದ್ದಾರೆ. ಬುಧವಾರ ನ್ಯಾಯಾಲಯದಲ್ಲಿ ವಿಚಾರಣೆ ವೇಳೆ ಅವರು ಈ ಮಾತು ಹೇಳಿದ್ದಾರೆ.

ವಕೀಲರು, ವಾದಗಳ ಸಮಯದಲ್ಲಿ, ನ್ಯಾಯಾಧೀಶರನ್ನು “ಮೈ ಲಾರ್ಡ್” ಅಥವಾ “ಯುವರ್ ಲಾರ್ಡ್‌ಶಿಪ್ಸ್” ಎಂದು ಸಂಬೋಧಿಸುತ್ತಾರೆ. ಆಚರಣೆಯನ್ನು ವಿರೋಧಿಸುವವರು ಇದನ್ನು ವಸಾಹತುಶಾಹಿ ಯುಗದ ಅವಶೇಷ ಮತ್ತು ಗುಲಾಮಗಿರಿಯ ಸಂಕೇತವೆಂದು ಕರೆಯುತ್ತಾರೆ. ಬದಲಿಗೆ ‘ಸರ್’ ಎಂದು ಏಕೆ ಬಳಸಬಾರದು ಎಂದು ಕೇಳಿದಾಗ, ನ್ಯಾಯಮೂರ್ತಿ ನರಸಿಂಹ ಅವರು ‘ಮೈ ಲಾರ್ಡ್ಸ್’ ಎಂಬ ಪದವನ್ನು ಹಿರಿಯ ವಕೀಲರು ಎಷ್ಟು ಬಾರಿ ಉಚ್ಚರಿಸಿದ್ದಾರೆ ಎಂದು ಅವರು ಲೆಕ್ಕ ಹಾಕುತ್ತೇನೆ ಎಂದಿದ್ದಾರೆ.

2006 ರಲ್ಲಿ, ಬಾರ್ ಕೌನ್ಸಿಲ್ ಆಫ್ ಇಂಡಿಯಾವು ಯಾವುದೇ ವಕೀಲರು ನ್ಯಾಯಾಧೀಶರನ್ನು “ಮೈ ಲಾರ್ಡ್” ಮತ್ತು “ಯುವರ್ ಲಾರ್ಡ್‌ಶಿಪ್” ಎಂದು ಸಂಬೋಧಿಸುವುದಿಲ್ಲ ಎಂದು ನಿರ್ಧರಿಸುವ ನಿರ್ಣಯವನ್ನು ಅಂಗೀಕರಿಸಿದ್ದರೂ ಅದನ್ನು ಯಾರೂ ಪಾಲಿಸುತ್ತಿಲ್ಲ.

‘ಮೈ ಲಾರ್ಡ್’ ಅಥವಾ ‘ಯುವರ್ ಲಾರ್ಡ್‌ಶಿಪ್ಸ್’ ಎಂದು ಕರೆಯುವ ಅಭ್ಯಾಸ

ಈ ಹಿಂದೆ 2013 ರಲ್ಲಿ, ನ್ಯಾಯಾಲಯಗಳಲ್ಲಿ “ಮೈ ಲಾರ್ಡ್” ಅಥವಾ “ಯುವರ್ ಲಾರ್ಡ್‌ಶಿಪ್ಸ್” ಅನ್ನು ಬಳಸುವುದನ್ನು ನಿಷೇಧಿಸುವಂತೆ ಕೋರಿ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಲಾಯಿತು, ಇದನ್ನು ವಸಾಹತುಶಾಹಿ ಯುಗದ ಕುರುಹು ಮತ್ತು ಗುಲಾಮಗಿರಿಯ ಸಂಕೇತ ಎಂದು ಕರೆಯಲಾಯಿತು. “ಇದು ದೇಶದ ಘನತೆಗೆ ವಿರುದ್ಧವಾಗಿದೆ” ಎಂದು ಆರೋಪಿಸಿ ಭಾರತದಾದ್ಯಂತ ನ್ಯಾಯಾಲಯಗಳಲ್ಲಿ “ಮೈ ಲಾರ್ಡ್” ಅಥವಾ “ಯುವರ್ ಲಾರ್ಡ್‌ಶಿಪ್ಸ್” ಅನ್ನು ಬಳಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲು ಉನ್ನತ ನ್ಯಾಯಾಲಯದ ನಿರ್ದೇಶನವನ್ನು ಕೋರಿ ಹಿರಿಯ ವಕೀಲರೊಬ್ಬರು ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯನ್ನು ಸಲ್ಲಿಸಿದ್ದಾರೆ.

ಇದನ್ನೂ ಓದಿ: ವಕೀಲರು ನ್ಯಾಯಾಲಯದ ಮುಂದೆ ಕೈಮುಗಿದು ವಾದಿಸಬೇಕಾಗಿಲ್ಲ; ನ್ಯಾಯಾಧೀಶರು ದೇವರಲ್ಲ: ಕೇರಳ ಹೈಕೋರ್ಟ್

2014 ರಲ್ಲಿ ಸುಪ್ರೀಂ ಕೋರ್ಟ್ ಈ ವಿಷಯದ ಬಗ್ಗೆ ಏನು ಹೇಳಿತ್ತು?

ಒಂದು ವರ್ಷದ ನಂತರ 2014 ರಲ್ಲಿ, ಸುಪ್ರೀಂ ಕೋರ್ಟ್ ನ್ಯಾಯಾಧೀಶರನ್ನು ನ್ಯಾಯಾಲಯಗಳಲ್ಲಿ ಗೌರವಯುತ ಮತ್ತು ಘನತೆಯಿಂದ ಸಂಬೋಧಿಸಬೇಕು ಮತ್ತು ಅವರನ್ನು “ಮೈ ಲಾರ್ಡ್”, “ಯುವರ್ ಲಾರ್ಡ್‌ಶಿಪ್” ಅಥವಾ “ಯುವರ್ ಆನರ್” ಎಂದು ಕರೆಯುವುದು ಕಡ್ಡಾಯವಲ್ಲ ಎಂದು ಹೇಳಿತು. “ಇದು ಕಡ್ಡಾಯ ಎಂದು ನಾವು ಯಾವಾಗ ಹೇಳಿದ್ದೇವೆ. ನೀವು ನಮ್ಮನ್ನು ಗೌರವಯುತವಾಗಿ ಮಾತ್ರ ಕರೆಯಬಹುದು” ಎಂದು ನ್ಯಾಯಮೂರ್ತಿಗಳಾದ ಎಚ್‌ಎಲ್ ದತ್ತು ಮತ್ತು ಎಸ್‌ಎ ಬೋಬ್ಡೆ ಅವರನ್ನೊಳಗೊಂಡ ಪೀಠವು ನ್ಯಾಯಾಲಯಗಳಲ್ಲಿ ನ್ಯಾಯಾಧೀಶರನ್ನು “ಮೈ ಲಾರ್ಡ್” ಅಥವಾ ಯುವರ್ ಲಾರ್ಡ್‌ಶಿಪ್” ಎಂದು ಸಂಬೋಧಿಸಿದ ಅರ್ಜಿಯ ವಿಚಾರಣೆಯ ಸಂದರ್ಭದಲ್ಲಿ ಹೇಳಿತ್ತು

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ