Menstrual Hygiene Day 2021: ಸ್ಯಾನಿಟರಿ ಪ್ಯಾಡ್ಗಳೆಷ್ಟು ಸುರಕ್ಷಿತ..? ಮುಟ್ಟಿನಲ್ಲಿ ಸ್ವಚ್ಛತೆ ನಿರ್ಲಕ್ಷ್ಯ ಮಾಡಿದರೆ ಕ್ಯಾನ್ಸರ್ ಅಪಾಯ!
ವಿಶ್ವ ಋತುಚಕ್ರ ನೈರ್ಮಲ್ಯ ದಿನ: ಮುಟ್ಟಿನ ಸಂದರ್ಭದಲ್ಲಿ ಲೈಂಗಿಕ ಕ್ರಿಯೆ ನಡೆಸುವುದರಿಂದ ಗರ್ಭಿಣಿಯಾಗುವ ಸಂಭವ ಇರುವುದಿಲ್ಲ ಎಂದು ಅನೇಕ ಮಹಿಳೆಯರು ಭಾವಿಸುತ್ತಾರೆ. ಹಾಗೇ ಸೆಕ್ಸ್ಗೆ ಮುಂದಾಗುತ್ತಾರೆ ಕೂಡ. ಆದರೆ ಇದು ಸರಿಯಾದ ಕ್ರಮವಲ್ಲ.
ಮುಟ್ಟು ನಿಸರ್ಗ ಸಹಜ ಕ್ರಿಯೆ..ಆದರೆ ಆ ನಾಲ್ಕರಿಂದ ಏಳು ದಿನಗಳ ಕಾಲ ಮಹಿಳೆಯ ದೈಹಿಕ ಮತ್ತು ಮಾನಸಿಕ ಸ್ಥಿತಿ ಸಹಜವಾಗಿ ಇರುವುದಿಲ್ಲ..ಗರ್ಭಕೋಶದ ಒಳಪದರ ಕಳಚಿ ಅದು ರಕ್ತದ ರೂಪದಲ್ಲಿ ಯೋನಿಯ ಮೂಲಕ ವಿಸರ್ಜನೆ ಆಗುವ ಆ 4-7ದಿನಗಳಲ್ಲಿ ಸ್ತ್ರೀಯರು ತಮ್ಮ ಆರೋಗ್ಯ, ಜನನಾಂಗ-ದೇಹದ ಸ್ವಚ್ಛತೆಯ ಕಡೆಗೆ ಗಮನಕೊಡಬೇಕು. ಈ ಸಮಯದಲ್ಲಿ ಮಹಿಳೆಯರು ಜನನಾಂಗಕ್ಕೆ ಧರಿಸುವ ಒಳ ಉಡುಪಿನೊಟ್ಟಿಗೆ ಕಾಟನ್ ಬಟ್ಟೆಯಾಗಲಿ, ಸ್ಯಾನಿಟರಿ ನ್ಯಾಪ್ಕಿನ್ಗಳಾಗಲಿ ಬಳಸಬೇಕು. ಈಗಂತೂ ಟಾಂಪೂನ್, ಮುಟ್ಟಿನ ಕಪ್ಗಳಂಥ ಇನ್ನಷ್ಟು ಸಲಕರಣೆಗಳು ಲಭ್ಯ ಇವೆ. ಆದರೆ ಒಂದೇ ಬೇಸರದ ಸಂಗತಿಯೆಂದರೆ ಅವೆಲ್ಲ ಬಡವರ್ಗದ ಮಹಿಳೆಯರ ಕೈಗೆಟಕುವುದಿಲ್ಲ. ದುಬಾರಿ ಬೆಲೆ..ಅರಿವಿನ ಕೊರತೆ..ಹೀಗೆ ಕೆಲವು ಕಾರಣಗಳಿಂದ ಅನೇಕ ಮಹಿಳೆಯರು ಅದೇ ಕಾಟನ್ ಬಟ್ಟೆಯ ಮೊರೆ ಹೋಗುತ್ತಿದ್ದಾರೆ. ಮತ್ತೆ ಅದನ್ನು ಸ್ವಚ್ಛವಾಗಿ ಇಟ್ಟುಕೊಳ್ಳಲು ಸಾಧ್ಯವಾಗದೆ ಹಲವು ರೀತಿಯ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದಾರೆ.
ಬಳಸುತ್ತಿರುವ ಸ್ಯಾನಿಟರಿ ಪ್ಯಾಡ್ಗಳು ಎಷ್ಟು ಸುರಕ್ಷಿತ? ಇನ್ನು ಮಹಿಳೆಯರು ಸಾಮಾನ್ಯವಾಗಿ ಬಳಸುವುದು ಸ್ಯಾನಿಟರಿ ಪ್ಯಾಡ್ಗಳನ್ನು. ಅದೆಷ್ಟೋ ಜನರ ಪ್ರಥಮ ಆದ್ಯತೆ ಈ ಸ್ಯಾನಿಟರಿ ನ್ಯಾಪಕಿನ್ (ಪ್ಯಾಡ್ ಅಥವಾ ಟವೆಲ್ ಎಂದೂ ಕರೆಯಲಾಗುತ್ತದೆ)ಗಳು. ಆದರೆ ಸದ್ಯ ಹೆಚ್ಚಿನ ಪ್ರಮಾಣದಲ್ಲಿ ಬಳಕೆಯಾಗುತ್ತಿರುವ ಪ್ಲಾಸ್ಟಿಕ್-ಕೆಮಿಕಲ್ ಯುಕ್ತ ಸ್ಯಾನಿಟರಿ ಪ್ಯಾಡ್ಗಳು ಪರಿಸರಕ್ಕೂ ಮಾರಕ. ಅಷ್ಟೇ ಅಲ್ಲ ಆರೋಗ್ಯದ ಮೇಲೆಯೂ ಕ್ರಮೇಣ ದುಷ್ಪರಿಣಾಮ ಬೀರುತ್ತವೆ. ಬಳಸಿದ ಸ್ಯಾನಿಟರಿ ಪ್ಯಾಡ್ಗಳನ್ನು ಸೂಕ್ತರೀತಿಯಲ್ಲಿ ವಿಲೇವಾರಿ ಮಾಡಲು ಎಲ್ಲರಿಗೂ ಅವಕಾಶ ಇರುವುದಿಲ್ಲ. ಬೇಕಾಬಿಟ್ಟಿ ಬಿಸಾಕಿದರೆ ಅದು ಮಣ್ಣಿಗೆ ಮಾರಕ. ಹಾಗೆ ಎಸೆಯುವ ಪ್ಯಾಡ್ಗಳು ಎಲ್ಲೆಲ್ಲೋ ಬಿದ್ದು ಮಣ್ಣಿನೊಳಗೆ ಸೇರಬಹುದು. ಸಾಮಾನ್ಯವಾಗಿ ಬಳಕೆಯಾಗುತ್ತಿರುವ ಸ್ಯಾನಿಟರಿ ಪ್ಯಾಡ್ಗಳಲ್ಲಿ ಶೇ.90ರಷ್ಟು ಪ್ಲಾಸ್ಟಿಕ್ ಬಳಕೆಯಾಗುತ್ತಿದ್ದು, ಜೈವಿಕ ವಿಘಟನೆ ಆಗುವುದಿಲ್ಲ. ಸಂಪೂರ್ಣವಾಗಿ ಮಣ್ಣಿನಲ್ಲಿ ಕರಗಲು ಏನಿಲ್ಲವೆಂದರೂ 500 ರಿಂದ 800 ವರ್ಷಗಳು ಬೇಕು.
ಇನ್ನು ಈ ಪ್ಯಾಡ್ಗಳನ್ನು ಆಗಾಗ ಬದಲಿಸಬೇಕು. ಇಲ್ಲದಿದ್ದರೆ ಸ್ರಾವ ಸೋರಿಕೆಯಾಗುತ್ತದೆ. ಹಾಗೇ, ಸ್ರಾವ ಕಡಿಮೆ ಇದ್ದರೂ ದಿನದಲ್ಲಿ ತುಂಬ ಹೊತ್ತು ಒಂದೇ ಪ್ಯಾಡ್ನ್ನು ಧರಿಸಿರಬಾರದು. ಹಾಗೇ ಮಾಡುವುದರಿಂದ ಅದರಲ್ಲಿರುವ ರಾಸಾಯನಿಕಗಳು ದೇಹಕ್ಕೆ ಮಾರಕ ಆಗಬಹುದು ಎನ್ನುತ್ತಾರೆ ತಜ್ಞರು. ಇನ್ನು ಕೆಲವರಿಗಂತೂ ಸ್ಯಾನಿಟರಿ ನ್ಯಾಪ್ಕಿನ್ಗಳನ್ನು ಬಳಸಿದರೆ ಜನನಾಂಗದ ಸುತ್ತಮುತ್ತ ಕೆಂಪು ಕಲೆ, ತುರಿಕೆಯಂತಹ ಸಮಸ್ಯೆಗಳೂ ಕಾಣಿಸಿಕೊಳ್ಳುತ್ತವೆ.
ಸ್ಯಾನಿಟರಿ ಪ್ಯಾಡ್ಗಳನ್ನು ಎಷ್ಟು ಗಂಟೆಗೊಮ್ಮೆ ಬದಲಿಸಬೇಕು? ಸ್ಯಾನಿಟರಿ ಪ್ಯಾಡ್ಗಳಿಂದ ಟಾಕ್ಸಿಕ್ ಶಾಕ್ ಸಿಂಡ್ರೋಮ್ ಕಾಣಿಸಿಕೊಳ್ಳುವ ಸಾಧ್ಯತೆಯೂ ಇರುತ್ತದೆ. ಇದು ಅಪರೂಪವಾದರೂ ತೀರ ನಿರ್ಲಕ್ಷ್ಯ ಮಾಡುವಂಥದ್ದಲ್ಲ. ಒಂದೇ ಪ್ಯಾಡ್ನ್ನು ಸುದೀರ್ಘ ಸಮಯದವರೆಗೆ ಧರಿಸಿದರೆ ಈ ಸಿಂಡ್ರೋಮ್ ಕಾಣಿಸಿಕೊಳ್ಳುತ್ತದೆ. ಇನ್ನು ಒಂದು ಪ್ಯಾಡ್ನ್ನು ದಿನಗಟ್ಟಲೆ ಹಾಕಿಕೊಂಡಿದ್ದರೆ ಬೇರೆ ರೀತಿಯ ಕೆಲವು ಅಲರ್ಜಿಗಳೂ ಉಂಟಾಗಬಹುದು. ವಾಸನೆಯೂ ಬರಲು ಶುರುವಾಗುತ್ತದೆ. (ಕಾಟನ್ ಬಟ್ಟೆಗಳೂ ಅಷ್ಟೇ, ಬಿಸಿನೀರಿನಲ್ಲಿ ತೊಳೆದು ಸ್ವಚ್ಛವಾಗಿಟ್ಟುಕೊಳ್ಳಬೇಕು. ಇಲ್ಲದಿದ್ದರೆ ಅದರಿಂದಲೂ ಸೋಂಕು ಉಂಟಾಗುತ್ತದೆ. ಒಂದೇ ಬಟ್ಟೆಯನ್ನು ಐದಾರು ತಿಂಗಳ ಋತುಸ್ರಾವಕ್ಕೆ ಬಳಸಬಾರದು. ) ಹೀಗಾಗಿ ನಾಲ್ಕು ಗಂಟೆಗೊಮ್ಮೆಯಾದರೂ ಪ್ಯಾಡ್ ಬದಲಿಸಬೇಕು. ನಿಮಗೆ ಅಷ್ಟೇನೂ ರಕ್ತಸ್ರಾವ ಆಗುತ್ತಿಲ್ಲವಾದ 6 ತಾಸಿನವರೆಗೂ ಪ್ಯಾಡ್ ಬದಲಿಸಬೇಕು ಎಂದೇನಿಲ್ಲ. ಕೆಲವರು 10- 12ಗಂಟೆಯಾದರೂ ಸ್ಯಾನಿಟರಿ ಪ್ಯಾಡ್ ಬದಲಿಸುವುದಿಲ್ಲ. ತಜ್ಞರು ನೀಡುವ ಸಲಹೆ ಪ್ರಕಾರ ಹಾಗೇ ಮಾಡುವುದು ತಪ್ಪು. ಇದರಿಂದ ಯೋನಿಯಲ್ಲಿ ಸೋಂಕು ಕಾಣಿಸಿಕೊಳ್ಳುತ್ತದೆ. ಅಲರ್ಜಿ, ತುರಿಕೆ, ವಾಸನೆ ಸಮಸ್ಯೆ ಕಾಣಿಸಿಕೊಳ್ಳಬಹುದಾಗಿದೆ.
ಸ್ಯಾನಿಟರಿ ಪ್ಯಾಡ್ ಬಳಸುವ ಮಹಿಳೆಯರು ಗಮನಿಸಲೇಬೇಕಾದ ಅಂಶಗಳಿವು.. 1. ಈಗಂತೂ ಸಿಕ್ಕಾಪಟೆ ವಿಧದ ಸ್ಯಾನಿಟರಿ ಪ್ಯಾಡ್ಗಳು ಮಾರುಕಟ್ಟೆಯಲ್ಲಿ ಸಿಗುತ್ತವೆ. ಆದರೆ ಮಹಿಳೆಯರು ಉತ್ತಮ ಗುಣಮಟ್ಟದ ಪ್ಯಾಡ್ಗಳನ್ನು ಆಯ್ಕೆ ಮಾಡಿಕೊಳ್ಳಬೇಕು. ಅಗ್ಗದ, ಅಶುದ್ಧ ಸ್ಯಾನಿಟರಿ ಪ್ಯಾಡ್ಗಳ ಬಳಕೆಯಿಂದ ಮೂತ್ರನಾಳದ ಸೋಂಕು, ಫಂಗಲ್ ಸೋಂಕು ಉಂಟಾಗಬಹುದು. 2. ಒಂದೇ ಪ್ಯಾಡ್ನ್ನು ದೀರ್ಘ ಅವಧಿಯವರೆಗೆ ಧರಿಸಿಕೊಂಡಿದ್ದರೆ ಯೋನಿಯಲ್ಲಿ ಶಿಲೀಂದ್ರ ಸೋಂಕು ಕಾಣಿಸಿಕೊಳ್ಳುತ್ತದೆ. ಅಲರ್ಜಿ, ತುರಿಕೆ ಉಂಟಾಗುತ್ತದೆ. ವಾಸನೆಯೂ ಬರುತ್ತದೆ. 3. ದೊಡ್ಡ ಬಟ್ಟೆ, ಮೂರ್ನಾಲ್ಕು ಪ್ಯಾಡ್ಗಳನ್ನು ಒಟ್ಟಿಗೆ ಬಳಸುವುದರಿಂದ ತೊಡೆ ಸಂದು ಕೊರೆಯುತ್ತದೆ. ಇಲ್ಲವೆ ಕೆಂಪಾಗಿ ಉರಿಯಲು ಪ್ರಾರಂಭವಾಗುತ್ತದೆ. 4. ಮುಟ್ಟಿನ ಸಂದರ್ಭದಲ್ಲಿ ಲೈಂಗಿಕ ಕ್ರಿಯೆ ನಡೆಸುವುದರಿಂದ ಗರ್ಭಿಣಿಯಾಗುವ ಸಂಭವ ಇರುವುದಿಲ್ಲ ಎಂದು ಅನೇಕ ಮಹಿಳೆಯರು ಭಾವಿಸುತ್ತಾರೆ. ಹಾಗೇ ಸೆಕ್ಸ್ಗೆ ಮುಂದಾಗುತ್ತಾರೆ ಕೂಡ. ಆದರೆ ಇದು ಸರಿಯಾದ ಕ್ರಮವಲ್ಲ. ಹೀಗೆ ರಕ್ತಸ್ರಾವ ಆಗುತ್ತಿರುವ ಸಂದರ್ಭದಲ್ಲಿ ಸಂಭೋಗ ನಡೆಸುವುದರಿಂದ ಹೆಪಟೈಟಿಸ್ ಬಿಯಂಥ ಹಲವು ಸೋಂಕು ಉಂಟಾಗುವ ಸಾಧ್ಯತೆ ಹೆಚ್ಚಾಗಿರುತ್ತದೆ. 5.ಸ್ಯಾನಿಟರಿ ನ್ಯಾಪ್ಕಿನ್ಗಳನ್ನು ಮುಟ್ಟಿದ ನಂತರ, ಪ್ಯಾಡ್ ಬದಲಿಸಿಕೊಂಡ ನಂತರ ಸ್ವಚ್ಛವಾಗಿ ಕೈ ತೊಳೆದುಕೊಳ್ಳಬೇಕು. ಇಲ್ಲದಿದ್ದರೆ ಅದೇ ಕೈಯಿಂದ ಆಹಾರ ಸೇವನೆ ಮಾಡುವುದು ಹಲವು ಕಾಯಿಲೆಗಳಿಗೆ ಕಾರಣವಾಗಬಹುದು. 6. ಮುಟ್ಟಿನ ಸಂದರ್ಭದಲ್ಲಿ ಸ್ವಚ್ಛತೆ ಕಾಪಾಡಿಕೊಳ್ಳದೆ ಇದ್ದರೆ ಗರ್ಭಕಂಠದ ಕ್ಯಾನ್ಸರ್ ಬರುವ ಸಾಧ್ಯತೆ ಇದೆ. ಭಾರತದಲ್ಲಿ ಗರ್ಭಕಂಠದ ಕ್ಯಾನ್ಸರ್ ಪ್ರಮಾಣ ಹೆಚ್ಚಿದೆ. ಪ್ರತಿವರ್ಷ ಸರಾಸರಿ 70,000 ಮಹಿಳೆಯರು ಈ ಕ್ಯಾನ್ಸರ್ಗೆ ತುತ್ತಾಗುತ್ತಿದ್ದಾರೆ.
ಇದನ್ನೂ ಓದಿ: ವಿಶ್ವ ಋತುಚಕ್ರ ನೈರ್ಮಲ್ಯ ದಿನ: ಮುಟ್ಟಿನ ಬಗ್ಗೆ ಮೌಢ್ಯ, ಮುಜುಗರ ಬೇಡವೇ ಬೇಡ; ಆ ದಿನಗಳಲ್ಲಿ ಸ್ವಚ್ಛತೆಯೇ ಆದ್ಯತೆಯಾಗಲಿ
(Menstrual Hygiene Day 2021 Special Story about use of sanitary napkins and side effects)
Published On - 8:09 am, Fri, 28 May 21
