India vs Australia Test Series| ಕ್ರೀಡೆಯ ಮೂರು ಆಯಾಮಗಳಲ್ಲೂ ಕಾಣಿಕೆ ನೀಡುತ್ತಿರುವ ಜಡೇಜಾ ನಿಜಕ್ಕೂ ಟೀಂ ಇಂಡಿಯಾ ಟ್ರಂಪ್​ಕಾರ್ಡ್!

India vs Australia Test Series| ಕ್ರೀಡೆಯ ಮೂರು ಆಯಾಮಗಳಲ್ಲೂ ಕಾಣಿಕೆ ನೀಡುತ್ತಿರುವ ಜಡೇಜಾ ನಿಜಕ್ಕೂ ಟೀಂ ಇಂಡಿಯಾ ಟ್ರಂಪ್​ಕಾರ್ಡ್!
ರವೀಂದ್ರ ಜಡೇಜಾ

ಸಿಡ್ನಿಯಲ್ಲಿಂದು ರವೀಂದ್ರ ಜಡೇಜಾ ಆಸ್ಟ್ರೇಲಿಯಾದ 4 ವಿಕೆಟ್​ಗಳನ್ನು ಕಬಳಿಸಿದ್ದೂ ಅಲ್ಲದೆ ಶತಕ ಬಾರಿಸಿ ಟೀಮಿನ ಸ್ಕೋರನ್ನು ಹೆಚ್ಚಿಸುವ ಪ್ರಯತ್ನದಲ್ಲಿದ್ದ ಸ್ಟೀವ್ ಸ್ಮಿತ್ ಅವರನ್ನು ನೇರ ಎಸೆತವೊಂದರಿಂದ ರನೌಟ್ ಮಾಡಿ ಅತಿಥೇಯರ ಇನ್ನಿಂಗ್ಸ್​ಗೆ ಅಂತ್ಯ ಹಾಡಿದರು.

Arun Belly

|

Jan 08, 2021 | 5:34 PM

ಟೆಸ್ಟ್ ಕ್ರಿಕೆಟ್​ನಲ್ಲಿ ಪ್ರತಿದಿನದ ಆಟ ಮುಗಿದ ನಂತರ ಆಯಾ ದಿನದ ಬೆಸ್ಟ್​ ಪರ್ಫಾರ್ಮರ್ ಅಂತ ಪ್ರಶಸ್ತಿ ನೀಡುವ ಪರಿಪಾಠವೇನಾದರೂ ಇದ್ದಿದ್ದರೆ ಭಾರತ ಮತ್ತು ಆಸ್ಟ್ರೇಲಿಯಾ ನಡುವೆ ಸಿಡ್ನಿಯಲ್ಲಿ ನಡೆಯುತ್ತಿರುವ ಮೂರನೆ ಟೆಸ್ಟ್​ ಪಂದ್ಯದ ಎರಡನೆ ದಿನದಾಟದ ಪ್ರಶಸ್ತಿ ರವೀಂದ್ರ ಜಡೇಜಾಗೆ ಖಂಡಿತವಾಗಿಯೂ ದಕ್ಕುತ್ತಿತ್ತು. ಭಾರತದ ಕ್ರಿಕೆಟ್ ಪ್ರೇಮಿಗಳು ಅದಾಗಲೇ ಅವರನ್ನು ವಿಶ್ವದ ಸರ್ವಶ್ರೇಷ್ಠ ಆಲ್​ರೌಂಡರ್ ಪಟ್ಟ ಕಟ್ಟಿಬಿಟ್ಟಿದ್ದಾರೆ!

ಸಿಡ್ನಿಯಲ್ಲಿ ಜಡೇಜಾ ಆಸ್ಟ್ರೇಲಿಯಾದ 4 ವಿಕೆಟ್​ಗಳನ್ನು ಕಬಳಿಸಿದ್ದೂ ಅಲ್ಲದೆ ಶತಕ ಬಾರಿಸಿ ಟೀಮಿನ ಸ್ಕೋರನ್ನು ಹೆಚ್ಚಿಸುವ ಪ್ರಯತ್ನದಲ್ಲಿದ್ದ ಸ್ಟೀವ್ ಸ್ಮಿತ್ ಅವರನ್ನು ನೇರ ಎಸೆತವೊಂದರಿಂದ ರನೌಟ್ ಮಾಡಿ ಅತಿಥೇಯರ ಇನ್ನಿಂಗ್ಸ್​ಗೆ ಅಂತ್ಯ ಹಾಡಿದರು. ಸ್ಕ್ವೇರ್​ಲೆಗ್​ನತ್ತ ಚೆಂಡನ್ನು ತಳ್ಳಿ ಎರಡು ರನ್ ಕದಿಯುವ ಯತ್ನ ಮಾಡಿದ ಸ್ಮಿತ್ ಅಲ್ಲಿರುವ ಫೀಲ್ಡರ್ ಯಾರು ಅನ್ನುವುದನ್ನು ಮರೆತು ಎರಡನೆ ರನ್​ಗಾಗಿ ಓಡಿದರು. ಚೆಂಡನ್ನು ಫೀಲ್ಡ್​ ಮಾಡಿ ವಿಕೆಟ್​ನತ್ತ ಎಸೆಯುವಾಗ ಜಡೇಜಾಗೆ ತಾನಿದ್ದ ಸ್ಥಳದಿಂದ ಕೇವಲ ಒಂದು ವಿಕೆಟ್ ಮಾತ್ರ ಕಾಣಿಸುತ್ತಿತ್ತು. ಆದರೆ ಅವರ ಗುರಿ ಅರ್ಜುನ ಬಿಟ್ಟ ಬಾಣದಂತಿತ್ತು! ತನ್ನ ತಪ್ಪಿಗೆ ಪರಿತಪಿಸುತ್ತಾ ಅಸ್ಟ್ರೇಲಿಯಾದ ಪ್ರಿಮೀಯರ್ ಬ್ಯಾಟ್ಸ್​ಮನ್ ಪೆವಿಲಿಯನ್​ನತ್ತ ಬ್ಯಾಟೆಳೆದುಕೊಂಡು ವಾಪಸ್ಸಾದರು.

ಮೂರನೆ ಟೆಸ್ಟ್​ನ ಮೊದಲ ದಿನ ಕೇವಲ 3 ಓವರ್​ಗಳನ್ನು ಬೌಲ್ ಮಾಡಿದ್ದ ಜಡೇಜಾ, ಎರಡನೆ ದಿನವಾಗಿದ್ದ ಇಂದು ಮೊದಲ ಸೆಷನ್​ನಲ್ಲಿ ಎರಡು ವಿಕೆಟ್​ಗಳನ್ನು ಕಬಳಿಸಿದರು. ಅತಿಥೇಯರ ಸ್ಕೋರ್ 216/2 ಆಗಿದ್ದಾಗ ದಾಳಿಗಿಳಿದ ಜಡೇಜಾ, ಶತಕ ಬಾರಿಸುವುದು ನಿಶ್ವಿತವೆನಿಸಿದ್ದ ಮಾರ್ನಸ್ ಲಬಶೇನ್(91) ಅವರನ್ನು ಔಟ್ ಮಾಡಿದರು. ಜಡೇಜಾ ಎಸೆತ ಜನರೇಟ್ ಮಾಡಿದ ಹೆಚ್ಚುವರಿ ನೆಗೆತವನ್ನು ನಿಭಾಯಿಸಲು ವಿಫಲರಾದ ಲಬುಶೇನ್ ಅಜಿಂಕ್ಯಾ ರಹಾನೆಗೆ ಕ್ಯಾಚಿತ್ತು ಔಟಾದರು. ಅದಾದ ಕೆಲವೇ ಓವರ್​ಗಳ ನಂತರ ಅ್ರಮಣಕಾರಿ ಆಟಗಾರ ಮ್ಯಾಥ್ಯೂ ವೇಡ್​ರನ್ನು ಬೆಸ್ತು ಬೀಳಿಸಿ ತಮ್ಮ ಎರಡನೆ  ವಿಕೆಟ್​ ಗಳಿಸಿದರು.

ಸ್ಟೀವ್ ಸ್ಮಿತ್

ಜಡೇಜಾರ ಡಬಲ್ ಸ್ಟ್ರೈಕ್​ನಿಂದ ಉತ್ತೆಜಿತಗೊಂಡ ವೇಗದ ಬೌಲರ್ ಜಸ್ಪ್ರೀತ್ ಬುಮ್ರಾ 21 ಎಸೆತಗಳನ್ನಾಡಿಯೂ ಖಾತೆ ತೆರೆಯಲು ವಿಫಲರಾಗಿದ್ದ ಕೆಮೆರಾನ್ ಗ್ರೀನ್ ಅವರನ್ನು ಎಲ್​ಬಿ ಬಲೆಗೆ ಕೆಡವಿದ ಮೇಲೆ ಆಸ್ಟ್ರೇಲಿಯಾದ ಸ್ಕಿಪ್ಪರ್ ಟಿಮ್ ಪೈನ್ ಅವರ ಆಫ್ ಸ್ಟಂಪ್​ ಹಾರಿಸಿದರು.

ಏತನ್ಮಧ್ಯೆ, ಕಳೆದರಡು ಟೆಸ್ಟ್​ಗಳಲ್ಲಿ ದಯನೀಯವಾಗಿ ವಿಫಲರಾಗಿದ್ದ ಸ್ಮಿತ್ ತನ್ನ ಟೆಸ್ಟ್​ ಕರೀಯರ್​ನ 27ನೇ  ಮತ್ತು ಭಾರತದ ವಿರುದ್ಧ 8ನೇ ಶತಕ ಪೂರೈಸಿದರು. ಅಟಗಾರನೊಬ್ಬನ ಫಾರ್ಮ್ ಕ್ಷಣಿಕ ಆದರೆ ಕ್ಲಾಸ್​ ಶಾಶ್ವತ ಅನ್ನುವ ಮಾತೊಂದು ಕ್ರಿಕೆಟ್​ನಲ್ಲಿ ಪ್ರಚಲಿತದಲ್ಲಿದೆ. ಇದನ್ನು ಸ್ಮಿತ್ ಸಿಡ್ನಿಯಲ್ಲಿಂದು ಸಾಬೀತು ಮಾಡಿದರು.

ಮತ್ತೆ ಜದ್ದು  ವಿಷಯಕ್ಕೆ ಬರೋದಾದರೆ, ಲಂಚ್​ ನಂತರ ಅವರು ಬೌಲಿಂಗ್​ನಲ್ಲಿ ಬುಮ್ರಾ ಅವರಂಥ ನಿಖರತೆ ಪ್ರದರ್ಶಿಸಿ ಎರಡು ಯಾರ್ಕರ್​ಗಳ ಮೂಲಕ ಪ್ಯಾಟ್​ ಕಮ್ಮಿನ್ಸ್ ಮತ್ತು ನೇಥನ್ ಲಿಯಾನ್ ಅವರ ವಿಕೆಟ್​ಗಳನ್ನು ಪಡೆದರು. ಆಮೇಲೆ, ಅದೇ ನಿಖರತೆಯಿಂದ ಸ್ಕ್ವೇರ್​ಲೆಗ್ ಪೊಸಿಶನ್​ನಿಂದ ವಿಕೆಟ್​ಗಳತ್ತ ಚೆಂಡನ್ನು ಬೀಸಿ ಸ್ಮಿತ್​ರನ್ನು ರನೌಟ್ ಮಾಡಿದರು.

ಬ್ಯಾಟಿಂಗ್, ಬೌಲಿಂಗ್ ಮತ್ತು ಫಿಲ್ಡಿಂಗ್-ಕ್ರಿಕೆಟ್​ನ ಮೂರು ಆಯಾಮಗಳಲ್ಲೂ ಟೀಮಿಗೆ ಕಾಣಿಕೆ ನೀಡುತ್ತಿರುವ ಅವರು ಈ ಸರಣಿಯಲ್ಲಿ ಭಾರತಕ್ಕೆ ನಿಸ್ಸಂದೇಹವಾಗಿ ಮೋಸ್ಟ್ ವ್ಯಾಲುಯೇಬಲ್ ಆಟಗಾರ ಎನಿಸುತ್ತಿದ್ದಾರೆ.

India vs Australia Test Series ಸ್ಮಿತ್ ಸೆಂಚುರಿ.. ಜಡೇಜಾಗೆ 4 ವಿಕೆಟ್​: ಆಸ್ಟ್ರೇಲಿಯಾ ಆಲೌಟ್​

Follow us on

Related Stories

Most Read Stories

Click on your DTH Provider to Add TV9 Kannada