ಮಥಾಯಿಸ್ ಜೊತೆ ಡೇಟಿಂಗ್ ಒಪ್ಪಿಕೊಂಡ ತಾಪ್ಸೀ | Taapsee is in relationship with Danish Badminton player

  • Arun Belly
  • Published On - 18:42 PM, 14 Nov 2020

ಸಿನಿಮಾ ನಟನಟಿಯರ ಬಗ್ಗೆ ಒಂದು ಮಾತಿದೆ. ಅವರ ತಮ್ಮ ವೈಯಕ್ತಿಕ ಬದುಕೊಂದನ್ನು ಬಿಟ್ಟು ಉಳಿದೆಲ್ಲ ಸೆಲಿಬ್ರಿಟಿಗಳ ವೈಯಕ್ತಿಕ ಬದುಕು ಕುರಿತು ಧಾರಾಳವಾಗಿ ಮಾತಾಡುತ್ತಾರೆ, ಗಾಸಿಪ್ ಮಾಡುತ್ತಾರೆ. ಬಾಲಿವುಡ್​ನಲ್ಲಿ ಭಾರಿ ಹೆಸರು ಮಾಡಿರುವ, ಅತ್ಯಂತ ಪ್ರತಿಭಾವಂತ ನಟಿ ತಾಪ್ಸೀ ಪನ್ನು ಯಾರಿಗೆ ಗೊತ್ತಿಲ್ಲ? ಆಕೆಯೂ ಇತರ ನಟ ನಟಿಯರಿಗಿಂತ ಭಿನ್ನವಲ್ಲ.

ಪರದೆಯ ಮೇಲೆ ತೀರ ಗಂಭೀರವಾದ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುವ ಈಕೆಗೂ ಒಬ್ಬರ ಮೇಲೆ ಪ್ರೀತಿ ಹುಟ್ಟಿಬಿಟ್ಟಿದೆಯಂತೆ. ಆದರೆ, ಬೇರೆಯವರಂತೆ ಈಕೆ ಸಹ ಇದುವರೆಗೆ ವಿಷಯವನ್ನು ಮುಚ್ಚಿಟ್ಟಿದ್ದಳು. ಆದರೆ ಈ ಸೆಲಿಬ್ರಿಟಿಗಳ ಸಮಸ್ಯೆಯೇನು ಗೊತ್ತಾ? ಸಾರ್ವಜನಿಕ ಪ್ರದೇಶಗಳಲ್ಲಿ ಅವರನ್ನು ಜನ ಗುರುತಿಸಿಬಿಡುತ್ತಾರೆ. ಹಾಗಾಗಿ ರೋಮಾನ್ಸ್ ಮಾಡಬೇಕಾದರೆ ಬಹಳ ಕದ್ದುಮುಚ್ಚಿ ಮಾಡಬೇಕಾಗುತ್ತದೆ.

ಅಂದಹಾಗೆ, ಈ ಸುಂದರಿಯ ಬದುಕನ್ನು ಪ್ರವೇಶಿರುವುದು ಭಾರತೀಯನಲ್ಲ ಅನ್ನೋದು ಅಕೆಯನ್ನು ಆರಾಧಿಸುತ್ತಿರುವ ಲಕ್ಷಾಂತರ ಪಡ್ಡೆಗಳಿಗೆ ನಿರಾಶೆ ಮತ್ತು ಸೋಜಿಗವನ್ನುಂಟು ಮಾಡಬಹುದು. ಹೌದು, 2010 ರಲ್ಲೇ ದಕ್ಷಿಣ ಭಾರತದ ಚಿತ್ರಗಳ ಮೂಲಕ ಸಿನಿಮಾರಂಗ ಪ್ರವೇಶಿಸಿದರೂ 2012 ರಲ್ಲಿ ಬಿಡುಗಡೆಯಾದ ‘ಚಷ್ಮೆ ಬದ್ದೂರ್’ ಹೆಸರಿನ ಹಿಂದಿ ಚಿತ್ರದಿಂದ ಬಾಲಿವುಡ್​ಗೆ ಜಿಗಿದು ‘ಪಿಂಕ್’, ‘ನಾಮ್ ಶಬಾನಾ’, ‘ಮುಲ್ಕ್’, ‘ಮಿಶನ್ ಮಂಗಲ್’ ಮತ್ತು ‘ಥಪ್ಪಡ್’ ಮೊದಲಾದವು ಸೇರಿದಂತೆ ಇನ್ನೂ ಹಲವಾರು ಹಿಂದಿ ಚಿತ್ರಗಳಲ್ಲಿ ತನ್ನ ಮನೋಜ್ಞ ಅಭಿನಯದಿಂದ ಜನಪ್ರಿಯತೆಯ ಶಿಖರ ತಲುಪಿರುವ ಆಕೆ ಡೆನ್ಮಾರ್ಕ್​ನ ಬ್ಯಾಡ್ಮಿಂಟನ್ ಆಟಗಾರ ಮಥಾಯಿಸ್ ಬೊ ಒಂದಿಗೆ ಡೇಟಿಂಗ್ ಮಾಡುತ್ತಿರುವುದನ್ನು ಒಪ್ಪಿಕೊಂಡಿದ್ದಾರೆ.

ಇದುವರೆಗೆ ವಿಷಯವನ್ನು ಮುಚ್ಚಿಟ್ಟಿದ್ದು ಯಾಕೆ ಮೇಡಂ ಅಂತ, ಮಾಧ್ಯಮದವರು ಕೇಳಿದಾಗ, 33 ವರ್ಷದ ತಾಪ್ಸೀ, ಮೀಡಿಯಾದಲ್ಲೆಲ್ಲ ಅದು ದೊಡ್ಡ ಸುದ್ದಿಯಾಗಿ, ತನ್ನ ಕರೀಯರ್ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತಿತ್ತು ಅಂತ ಹೇಳಿದ್ದಾರೆ.

ಮಥಾಯಿಸ್​ರನ್ನು ಬ್ಯಾಡ್ಮಿಂಟನ್ ಪಂದ್ಯವೊಂದು ನಡೆಯುತ್ತಿದ್ದಾಗ ಭೇಟಿಯಾದ ನಂತರ, ಟ್ವೀಟ್​ಗಳ ಮೂಲಕ ತಮ್ಮ ನಡುವೆ ಕಮ್ಯುನಿಕೇಷನ್ ಶುರುವಾಯಿತು ಎಂದು ಹೇಳುವ ನಟಿ ಅದೀಗ ಪ್ರೀತಿಗೆ ತಿರುಗಿದೆ ಅಂದಿದ್ದಾರೆ.

ತಮ್ಮಿಬ್ಬರ ನಡುವಿನ ಸಂಬಂಧ, ಸಮಾಧಾನಕರವಾಗಿದೆ, ಸಂತಸಮಯವಾಗಿದೆ, ಸ್ಥಿರವಾಗಿದೆ, ಮತ್ತು ತೃಪ್ತಿದಾಯಕವಾಗಿದೆ ಎಂದು ಆಕೆ ಹೇಳಿದ್ದಾರೆ.