Google: ಗೂಗಲ್ ಕಂಪೆನಿಗೆ ಬಿತ್ತು 4392 ಕೋಟಿ ರೂ. ಹೊಸ ದಂಡ; ಸಾಲಾಗಿ ಬೀಳುತ್ತಿರುವ ದಂಡಕ್ಕೆ ಹೊಸ ಸೇರ್ಪಡೆ
ಜುಲೈ 13ನೇ ತಾರೀಕು ಫ್ರಾನ್ಸ್ನಲ್ಲಿ ಗೂಗಲ್ ಕಂಪೆನಿಗೆ ಜುಲೈ 13ನೇ ತಾರೀಕು ಫ್ರಾನ್ಸ್ನಲ್ಲಿ 50 ಕೋಟಿ ಯುರೋ ದಂಡ ಹಾಕಲಾಗಿದೆ. ಫ್ರಾನ್ಸ್ನ ಸುದ್ದಿ ಪ್ರಸಾರ ನಿಯಮಾವಳಿಗಳಿಗೆ ಪೂರ್ಣವಾಗಿ ಬದ್ಧವಾಗಿಲ್ಲ ಎಂಬ ಕಾರಣಕ್ಕೆ ಇಷ್ಟು ದೊಡ್ಡ ಮೊತ್ತದ ದಂಡ ತೆರಬೇಕಾಗಿದೆ.
Updated on:Jul 14, 2021 | 12:03 PM
ವಿಶ್ವದಾದ್ಯಂತ ಹೆಸರಾದ ಗೂಗಲ್ (Google) ಕಂಪೆನಿಗೆ ಮೇಲಿಂದ ಮೇಲೆ ದಂಡ ಬೀಳುತ್ತಲೇ ಇದೆ. ಇದೀಗ ಜುಲೈ 13ನೇ ತಾರೀಕು ಫ್ರಾನ್ಸ್ನಲ್ಲಿ 50 ಕೋಟಿ ಯುರೋ ದಂಡ ಹಾಕಲಾಗಿದೆ. ಇವತ್ತಿಗೆ ಭಾರತದ ರೂಪಾಯಿ ಲೆಕ್ಕದಲ್ಲಿ ಹೇಳುವುದಾದರೆ, 4392.20 ಕೋಟಿ ಆಗುತ್ತದೆ. ಫ್ರಾನ್ಸ್ನ ಸುದ್ದಿ ಪ್ರಸಾರ ನಿಯಮಾವಳಿಗಳಿಗೆ ಪೂರ್ಣವಾಗಿ ಬದ್ಧವಾಗಿಲ್ಲ ಎಂಬ ಕಾರಣಕ್ಕೆ ಇಷ್ಟು ದೊಡ್ಡ ಮೊತ್ತದ ದಂಡ ತೆರಬೇಕಾಗಿದೆ. ವಿವಿಧ ನಿಯಮಾವಳಿಗಳ ಉಲ್ಲಂಘನೆಗಾಗಿ ಈಚೆಗೆ ಗೂಗಲ್ಗೆ ವಿಧಿಸಿರುವ ದಂಡದಲ್ಲಿ ಇದು ಹೊಸ ಸೇರ್ಪಡೆ ಆಗಿದೆ. ಸುದ್ದಿ ಪ್ರಸಾರ ಮಾಡುವ ಸಂಸ್ಥೆಗಳಾದ ಎಎಫ್ಪಿ, ಎಪಿಐಜಿ ಮತ್ತು ಎಸ್ಇಪಿಎಂನಿಂದ ಆಲ್ಫಾಬೆಟ್ ಮಾಲೀಕತ್ವದ ಗೂಗಲ್ ಜತೆಗೆ ಉತ್ತಮ ಒಪ್ಪಂದವೊಂದಕ್ಕೆ ಬರಲು ವಿಫಲವಾಗಿದ್ದವು. ಇಂಟರ್ನೆಟ್ನಲ್ಲಿನ ಸುದ್ದಿಗೆ ಸಂಭಾವನೆ ವಿಚಾರದಲ್ಲಿ ಒಮ್ಮತದ ತೀರ್ಮಾನಕ್ಕೆ ಬರಲು ಸಾಧ್ಯವಾಗಿರಲಿಲ್ಲ. ಈಚಿನ ಯುರೋಪಿಯನ್ ಒಕ್ಕೂಟದ (EU) ನಿರ್ದೇಶನ ಪ್ರಕಾರ ಈ Neighboring Rights ಸೃಷ್ಟಿಗೆ ಕಾರಣ ಆಗಿತ್ತು ಎಂದು ರಾಯಿಟರ್ಸ್ ವರದಿ ಮಾಡಿದೆ.
2 ತಿಂಗಳಲ್ಲಿ ಪರಿಹಾರ ನೀಡಬೇಕು ವಿಶ್ವಾಸಕ್ಕೆ ಧಕ್ಕೆ ಆಗಿದ್ದಲ್ಲಿ ಅದರ ಮೇಲೆ ಕಣ್ಗಾವಲು ಇರಿಸುವ ಸಂಸ್ಥೆಗಳು ಇವೆ. ಅವು ವಿತರಿಸುವ ತಾತ್ಕಾಲಿಕ ಆದೇಶಗಳನ್ನು ಗೂಗಲ್ ಉಲ್ಲಂಘನೆ ಮಾಡಿದೆಯಾ ಎಂಬುದು ಈ ಪ್ರಕರಣದ ಕೇಂದ್ರಬಿಂದುವಾಗಿತ್ತು. ಮೂರು ತಿಂಗಳ ಸಮಯ ನೀಡಿ, ಸುದ್ದಿ ಪ್ರಸಾರಕರ ಜತೆಗೆ ಮಾತುಕತೆ ನಡೆಸುವಂತೆ ತಿಳಿಸಿದ್ದವು. ಒಂದು ವೇಳೆ ಮುಂದಿನ 2 ತಿಂಗಳಲ್ಲಿ ಸುದ್ದಿ ಪ್ರಸಾರಕರಿಗೆ ಪರಿಹಾರವನ್ನು ನೀಡದಿದ್ದಲ್ಲಿ ಹೆಚ್ಚುವರಿ ದಂಡವಾಗಿ ದಿನಕ್ಕೆ 9 ಲಕ್ಷ ಯುರೋ ತನಕ ದಂಡ ಬೀಳುತ್ತದೆ. ಗೂಗಲ್ಗೆ ಭಾರೀ ಪ್ರಮಾಣದ ದಂಡ, ಅದರಲ್ಲೂ ಯುರೋಪಿಯನ್ ಒಕ್ಕೂಟದ ಸಂಸ್ಥೆಗಳಿಂದ ಬೀಳುತ್ತಿರುವುದು ಇದೇ ಮೊದಲೇನಲ್ಲ. ಜೂನ್ನ ಆರಂಭದಲ್ಲಿ ಫ್ರೆಂಚ್ ಸ್ಪರ್ಧಾತ್ಮಕ ಆಯೋಗವು ಗೂಗಲ್ಗೆ 22 ಕೋಟಿ ಯುರೋ ದಂಡ ಹಾಕಿತ್ತು. ಆನ್ಲೈನ್ ಜಾಹೀರಾತು ವಲಯದಲ್ಲಿ ಫ್ರಾನ್ಸ್ ಮಾರುಕಟ್ಟೆ ಸಾಮರ್ಥ್ಯವನ್ನು ನಿಂದಿಸಿದ್ದಕ್ಕಾಗಿ ಈ ನಿರ್ಧಾರ ಕೈಗೊಳ್ಳಲಾಗಿತ್ತು.
ಅಮೆರಿಕದ ಕ್ಯಾಲಿಫೋರ್ನಿಯಾ ಮೂಲದ ಗೂಗಲ್ ಅನುಸರಿಸುವ ಪದ್ಧತಿ ಗಂಭೀರವಾಗಿದೆ. ಗೂಗಲ್ನ ಸ್ಪರ್ಧಿಗಳನ್ನು ಕೆಲವು ಮಾರ್ಕೆಟ್ನಲ್ಲಿ ಮತ್ತು ಮೊಬೈಲ್ ಸೈಟ್ಸ್ ಪಬ್ಲಿಷರ್ಸ್ ಹಾಗೂ ಅಪ್ಲಿಕೇಷನ್ಗಳಲ್ಲಿ ಅವರು ದಂಡಿಸುತ್ತಾರೆ ಎಂದು ಸ್ಪರ್ಧಾ ಪ್ರಾಧಿಕಾರ ತಿಳಿಸಿದೆ. ಯುರೋಪ್ನಲ್ಲಿ ತಮ್ಮ ವೆಬ್ಸೈಟ್ಗಳ ಸರ್ಚ್ ಬಾರ್ನಲ್ಲಿ ನ್ಯಾಯಸಮ್ಮತ ಅಲ್ಲದ ನಿಬಂಧನೆಗಳನ್ನು ಹೇರಿದ್ದಕ್ಕಾಗಿ ಗೂಗಲ್ಗೆ 2019ರ ಮಾರ್ಚ್ನಲ್ಲಿ ವಿಶ್ವಾಸದ್ರೋಹ ನಿಯಮಾವಳಿಗಳು ಮೀರಿದ್ದಕ್ಕಾಗಿ 149 ಕೋಟಿ ಯುರೋ ದಂಡ ಹಾಕಲಾಗಿತ್ತು. ನಂಬಿಕೆದ್ರೋಹದ ಕಾನೂನು ಏಕೆ ರೂಪಿಸಲಾಗುತ್ತದೆ ಅಂದರೆ, ಉದ್ಯಮದಲ್ಲಿ ನ್ಯಾಯಸಮ್ಮತವಾದ ಸ್ಪರ್ಧೆಯನ್ನು ಪ್ರೋತ್ಸಾಹಿಸಬೇಕು ಮತ್ತು ಯಾವುದೇ ಕಂಪೆನಿಗೆ ಮಾರುಕಟ್ಟೆಯಲ್ಲಿ ಏಕಸ್ವಾಮ್ಯ ಸಾಧಿಸುವುದಕ್ಕೆ ಅವಕಾಶ ನೀಡಬಾರದು ಎಂಬ ಉದ್ದೇಶ ಇರುತ್ತದೆ.
ಆಂಡ್ರಾಯಿಡ್ ಮೊಬೈಲ್ ಸಾಧನಗಳಲ್ಲಿ ಕಾನೂನುಬಾಹಿರ ಕೃತ್ಯ ಅದಕ್ಕೂ ಮುಂಚೆ, 2018ರ ಜುಲೈ ತಿಂಗಳಲ್ಲಿ ಆಯೋಗದಿಂದ ಗೂಗಲ್ ಮೇಲೆ 434 ಕೋಟಿ ಯುರೋ ದಂಡ ಹಾಕಲಾಗಿತ್ತು. ಆಂಡ್ರಾಯಿಡ್ ಮೂಲಕ ಕಾರ್ಯ ನಿರ್ವಹಿಸುವ ಮೊಬೈಲ್ ಸಾಧನಗಳಲ್ಲಿ ಕಾನೂನುಬಾಹಿರ ಪದ್ಧತಿಗಳನ್ನು ಅನುಸರಿಸಲಾಗುತ್ತಿದೆ ಎಂಬ ಆರೋಪ ಬಂದಿತ್ತು. ಆಂಡ್ರಾಯಿಡ್ ಸಾಧನಗಳನ್ನು ತಯಾರಿಸುವವರು ಮತ್ತು ಮೊಬೈಲ್ ನೆಟ್ವರ್ಕ್ ಆಪರೇಟರ್ಗಳ ಮೇಲೆ ಕಾನೂನಿಗೆ ವಿರುದ್ಧವಾಗಿ ನಿರ್ಬಂಧ ಹೇರಿ, ಸಾಮಾನ್ಯ ಇಂಟರ್ನೆಟ್ ಸರ್ಚ್ನಲ್ಲಿ ತಮ್ಮದೇ ಪಾರಮ್ಯ ಇರುವಂತೆ ಮಾಡುತ್ತಿರುವುದು ಯುರೋಪಿಯನ್ ಆಯೋಗದ ಗಮನಕ್ಕೆ ಬಂದಿತ್ತು. ಇನ್ನು 2017ರಲ್ಲಿ 242 ಕೋಟಿ ಯುರೋ ದಂಡವನ್ನು ಗೂಗಲ್ಗೆ ವಿಧಿಸಲಾಗಿತ್ತು. ಗೂಗಲ್ನ ಸರ್ಚ್ ರಿಸಲ್ಟ್ ಪುಟದ ಮೇಲ್ಭಾಗದಲ್ಲಿ ತನ್ನದೇ ಶಾಪಿಂಗ್ ಹೋಲಿಕೆ ಸೇವೆಯನ್ನು ಪ್ರಮೋಟ್ ಮಾಡುತ್ತದೆ ಎಂದು ಆರೋಪಿಸಲಾಗಿತ್ತು.
“ಗೂಗಲ್ನ ಹೋಲಿಕೆ ಶಾಪಿಂಗ್ ಸೇವೆಯ ತಂತ್ರವು ಪ್ರತಿಸ್ಪರ್ಧಿಗಳಿಗಿಂತ ತನ್ನ ಉತ್ಪನ್ನವನ್ನು ಉತ್ತಮವಾಗಿವೆ ಎನ್ನುವ ಮೂಲಕ ಗ್ರಾಹಕರನ್ನು ಆಕರ್ಷಿಸುವುದರ ಬಗ್ಗೆ ಮಾತ್ರವಲ್ಲ. ಬದಲಾಗಿ, ಗೂಗಲ್ ಸರ್ಚ್ ಫಲಿತಾಂಶಗಳಲ್ಲಿ ತನ್ನದೇ ಆದ ಹೋಲಿಕೆ ಶಾಪಿಂಗ್ ಸೇವೆಯನ್ನು ಪ್ರಮೋಟ್ ಮಾಡುವ ಮೂಲಕ ಮತ್ತು ಪ್ರತಿಸ್ಪರ್ಧಿಗಳನ್ನು ನಿಂದಿಸುವ ಮೂಲಕ ಸರ್ಚ್ ಎಂಜಿನ್ ಆಗಿ ತನ್ನ ಮಾರುಕಟ್ಟೆ ಪ್ರಾಬಲ್ಯವನ್ನು ದುರುಪಯೋಗಪಡಿಸಿಕೊಂಡಿದೆ,” ಎಂದು ಸ್ಪರ್ಧೆ ನೀತಿಯ ಉಸ್ತುವಾರಿ ಆಯುಕ್ತ ಮಾರ್ಗರೆಟ್ ವೆಸ್ಟಾಗರ್ ಹೇಳಿದ್ದಾರೆ. ಅಂದಹಾಗೆ ಗೂಗಲ್ ವಿರುದ್ಧ ಅನೇಕ ಪ್ರಕರಣಗಳು ಯುರೋಪಿಯನ್ ಒಕ್ಕೂಟದ ಮೇಲ್ಮನವಿಯಲ್ಲಿ ಉಳಿದಿವೆ.
ಇದನ್ನೂ ಓದಿ: Google Report: ಐಟಿ ನಿಯಮಗಳಡಿ ಮೊದಲ ವರದಿ ಪ್ರಕಟಿಸಿದ ಗೂಗಲ್; ಏಪ್ರಿಲ್ ತಿಂಗಳಲ್ಲಿ ದಾಖಲಾಗಿದ್ದು 27,762 ದೂರುಗಳು
ಇದನ್ನೂ ಓದಿ: JioPhone Next: ಗೂಗಲ್ ಮತ್ತು ರಿಲಯನ್ಸ್ ಸಂಸ್ಥೆ ಅಭಿವೃದ್ಧಿಪಡಿಸಿರುವ ಈ ಹೊಸ ಸ್ಮಾರ್ಟ್ಫೋನ್ ಬಗ್ಗೆ ತಿಳಿದುಕೊಳ್ಳಿ
(European Union authorities imposed hefty penalty to Google for not comply with norms. Here is the details)
Published On - 12:00 pm, Wed, 14 July 21
