ಜಾತಿ ಗಣತಿ ವರದಿ 2017ರಲ್ಲೇ ತಯಾರಾದರೂ  ಯಾಕೆ ಸಾರ್ವಜನಿಕಗೊಳಿಸಿಲ್ಲ ಅಂತ ಸರ್ಕಾರದಲ್ಲಿದ್ದವರನ್ನು ಕೇಳಬೇಕು: ಬಿಕೆ ಹರಿಪ್ರಸಾದ್

ದೆಹಲಿ: ಕಾಂಗ್ರೆಸ್ ಕಾರ್ಯಕಾರಿಣಿ ಸಮಿತಿ ಸಭೆ ಬಳಿಕ ಸುದ್ದಿಗಾರರೊಂದಿಗೆ ಮಾತಾಡಿದ ಪಕ್ಷದ ಹಿರಿಯ ನಾಯಕ ಮತ್ತು ವಿಧಾನ ಪರಿಷತ್ ಸದಸ್ಯ ಬಿಕೆ ಹರಿಪ್ರಸಾದ್ (BK Hariprasad) ಜಾತಿ ಗಣತಿ (caste census) ಬಗ್ಗೆ ಮಾತಾಡಿದರು. 2013 ರಲ್ಲಿ ಜಾತಿ ಗಣತಿ ನಡೆಸಲು ಕಾಂತರಾಜ್ ಆಯೋಗವನ್ನು (Kantharaj Commission) ನೇಮಿಸಲಾಗಿತ್ತು ಮತ್ತು ಆಯೋಗವು 2017 ರಲ್ಲೇ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಿತ್ತು. ಆದರೆ ಅದನ್ನು ಯಾಕೆ ಸಾರ್ವಜನಿಕಗೊಳಿಸಲಿಲ್ಲ ಅಂತ ಸರ್ಕಾರದಲ್ಲಿರುವವರನ್ನೇ ಕೇಳಬೇಕು ಎಂದು ಹರಿಪ್ರಸಾದ್ ಹೇಳಿದರು. ಜಾತಿ ಗಣತಿಯನ್ನು ಸಾರ್ವಜನಿಕಗೊಳಿಸಿದಂತೆ ಯಾವುದಾದರೂ ಸಮುದಾಯದ ಒತ್ತಡವಿದೆಯಾ ಅಂತ ಕೇಳಿದ ಪ್ರಶ್ನೆಗೆ ಅವರು, ಜಾತಿ ಗಣತಿ ಎಲ್ಲ ಸಮುದಾಯಗಳನ್ನು ಸಂತೃಪ್ತಿಪಡಿಸಲಾಗದು. ವರದಿಯಲ್ಲಿ ತಪ್ಪು-ಒಪ್ಪುಗಳಿರುತ್ತವೆ ಎಂದರು. ಆದರೆ ಅವುಗಳನ್ನು ಚರ್ಚೆ ನಡೆಸಿ ತಿದ್ದುಪಡಿಗಳ ಮೂಲಕ ಸರಿಪಡಿಸಬಹುದು, ಅದೇನೂ ದೊಡ್ಡ ವಿಷಯವಲ್ಲ ಎಂದ ಅವರು ಅದನ್ನು ಸಾರ್ವಜನಿಕಗೊಳಿಸದಿರುವುದು ತಪ್ಪು ಎಂದು ಹೇಳಿದರು. ಕಾರ್ಯಕಾರಿಣಿ ಸಭೆಯಲ್ಲಿ ಕರ್ನಾಟಕ ಜಾತಿಗಣತಿ ಬಗ್ಗೆ ಚರ್ಚೆಯಾಯಿತೇ ಅಂತ ಕೇಳಿದಾಗ ಚರ್ಚೆ ಆಗಲಿಲ್ಲ ಆದರೆ ಮುಖ್ಯಮಂತ್ರಿಗಳು ವರದಿ ರೆಡಿಯಿದೆ ಅಂತ ಸಭೆಗೆ ತಿಳಿಸಿದರು ಎಂದು ಹರಿಪ್ರಸಾದ್ ಹೇಳಿದರು.

ಮತ್ತಷ್ಟು ವಿಡಿಯೋ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ