Car AC Death: ನೀವು ಕಾರಿನಲ್ಲಿ ಎಸಿ ಹಾಕಿಕೊಂಡು ಮಲಗುತ್ತೀರಾ?, ಸಾವು ಸಂಭವಿಸಬಹುದು

ಬೆಂಗಳೂರು (ಆ. 06): ಕಾರಿನಲ್ಲಿ ನೀವು ಎಸಿ ಆನ್ (Car AC) ಮಾಡಿ ಮಲಗುವುದು ಎಷ್ಟೇ ಆರಾಮದಾಯಕವೆನಿಸಿದರೂ, ಅದು ನಿಮಗೇ ಮಾರಕವಾಗಬಹುದು ಎಂದು ತಜ್ಞರು ಹೇಳುತ್ತಾರೆ. ಇದನ್ನು ಕೇಳಿ ನಿಮಗೆ ಆಶ್ಚರ್ಯವಾಗಬಹುದು. ಆದರೆ ಕಾರಿನ ಎಸಿ ಕೂಡ ನಿಮ್ಮ ಜೀವನದ ಶತ್ರುವಾಗಬಹುದು ಎಂದು ತಜ್ಞರು ಹೇಳುತ್ತಾರೆ. ಎಷ್ಟರ ಮಟ್ಟಿಗೆ ಎಂದರೆ ಅದು ನಿಮ್ಮ ಜೀವವನ್ನೂ ತೆಗೆಯಬಹುದು. ಇದಕ್ಕೆ ಸಾಕ್ಷಿ ಇತ್ತೀಚೆಗೆ ನೋಯ್ಡಾದಲ್ಲಿ ನಡೆದ ಒಂದು ಘಟನೆ. ಈ ಸುದ್ದಿ ತಿಳಿದ ನಂತರ ನೀವು ಕಾರ್​ನಲ್ಲಿ ಎಸಿ ಆನ್ ಮಾಡಿ ಮಲಗುವ ಮುನ್ನ ಎರಡು ಬಾರಿ ಯೋಚಿಸುವುದು ಖಚಿತ.

ಇತ್ತೀಚೆಗೆ, ನೋಯ್ಡಾದ ಸೆಕ್ಟರ್ 62 ರ ಬಳಿ ಒಂದು ಘಟನೆ ನಡೆಯಿತು, ಇದು ಎಲ್ಲರನ್ನೂ ಬೆಚ್ಚಿಬೀಳಿಸಿದೆ. ವಾಸ್ತವವಾಗಿ, ಕಾರು ಚಾಲಕ ಮತ್ತು ಅವನ ಸ್ನೇಹಿತ ಇಬ್ಬರೂ ಕ್ಯಾಬ್‌ನಲ್ಲಿ ನಿದ್ರಿಸಿದ್ದರು. ಆದರೆ, ಕಾರು ಚಾಲಕ ಎಷ್ಟು ಹೊತ್ತಾದರೂ ಮನೆಗೆ ತಲುಪದಿದ್ದಾಗ, ಚಿಂತಿತರಾದ ಕುಟುಂಬ ಸದಸ್ಯರು ಆತನನ್ನು ಹುಡುಕಲು ಪ್ರಾರಂಭಿಸಿದ್ದಾರೆ. ಕೊನೆಗೆ ಅವರು ಕಾರು ಒಂದುಕಡೆ ನಿಂತಿರುವುದು ಕಾಣಿಸಿದ್ದು, ಅದರೊಳಗೆ ಆತ ಮತ್ತು ಆತನ ಸ್ನೇಹಿತ ಇಬ್ಬರು ಮಲಗಿರುವುದು ಕಂಡುಬಂದಿದೆ. ಹೊರಗಿನಿಂದ ಎಷ್ಟು ಕರೆದರೂ ಏಳದಿದ್ದಾಗ, ಕೊನೆಯದಾಗಿ ಕಾರಿನ ಗಾಜು ಒಡೆದಿದ್ದಾರೆ. ಆದರೆ, ಈ ಸಂದರ್ಭ ಇಬ್ಬರೂ ಸಾವನ್ನಪ್ಪಿರುವುದು ಕಂಡುಬಂದಿದೆ.

ಈ ಘಟನೆಯ ನಂತರ, ಮನಸ್ಸಿಗೆ ಬರುವ ಮೊದಲ ಪ್ರಶ್ನೆ ಎಂದರೆ ಎಸಿ ಯಾರನ್ನಾದರೂ ಹೇಗೆ ಕೊಲ್ಲುತ್ತದೆ? ಎಂಬುದು. ಇವರಿಬ್ಬರೂ ಹೇಗೆ ಸಾವುಗೀಡಾದರು ಎಂಬುದನ್ನು ಕಂಡುಹಿಡಿಯಲು, ಪೊಲೀಸರು ಇಬ್ಬರ ಶವಗಳನ್ನು ಮರಣೋತ್ತರ ಪರೀಕ್ಷೆಗಾಗಿ ಆಸ್ಪತ್ರೆಗೆ ಕಳುಹಿಸಿದರು. ಎಸಿ ಆನ್ ಮಾಡಿದ ನಂತರ ಇಬ್ಬರೂ ನಿದ್ರೆಗೆ ಜಾರಿದ್ದಾರೆ ಎಂದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿದೆ. ಆದಾಗ್ಯೂ, ಕಾರಿನಲ್ಲಿ ಉಸಿರುಗಟ್ಟಿ ಇಬ್ಬರು ಸಾವನ್ನಪ್ಪಿದ್ದಾರೆ ಎಂದು ಪೊಲೀಸರು ದೃಢಪಡಿಸಿದರು.

ಇಂಗಾಲದ ಮಾನಾಕ್ಸೈಡ್ ಸೋರಿಕೆ:

ಕಾರಿನ ಎಂಜಿನ್ ಚಾಲನೆಯಲ್ಲಿರುವಾಗ, ಅದರಿಂದ ಇಂಗಾಲದ ಮಾನಾಕ್ಸೈಡ್ ಅನಿಲ ಹೊರಬರಲು ಪ್ರಾರಂಭಿಸುತ್ತದೆ. ಆದರೆ ನಿಷ್ಕಾಸ ವ್ಯವಸ್ಥೆಯಲ್ಲಿ ಯಾವುದೇ ಸಮಸ್ಯೆ ಅಥವಾ ಸೋರಿಕೆ ಉಂಟಾದರೆ, ಈ ಅನಿಲವು ಎಸಿ ವೆಂಟ್‌ಗಳ ಮೂಲಕ ಕಾರನ್ನು ಪ್ರವೇಶಿಸಿ ಮಲಗಿರುವ ವ್ಯಕ್ತಿಯ ದೇಹವನ್ನು ಪ್ರವೇಶಿಸುತ್ತದೆ. ಇದು ಕಾರಿನಲ್ಲಿ ಆಮ್ಲಜನಕದ ಪೂರೈಕೆಯನ್ನು ನಿಲ್ಲಿಸುತ್ತದೆ ಮತ್ತು ಉಸಿರುಗಟ್ಟುವಿಕೆಯಿಂದಾಗಿ ಸಾವಿಗೆ ಕಾರಣವಾಗುತ್ತದೆ.

Auto Tips: ಎಸಿ ಆನ್ ಮಾಡುವುದರಿಂದ ಕಾರಿನ ಮೈಲೇಜ್ ಎಷ್ಟು ಕಡಿಮೆಯಾಗುತ್ತದೆ?

ಆಮ್ಲಜನಕದ ಕೊರತೆ:

ಎಸಿ ಆನ್ ಆಗಿದ್ದರೆ ಮತ್ತು ಕಾರು ಸಂಪೂರ್ಣವಾಗಿ ಮುಚ್ಚಿದ್ದರೆ, ಒಳಗೆ ಗಾಳಿಯು ಪರಿಚಲನೆಯಾಗುತ್ತಲೇ ಇರುತ್ತದೆ. ನಾವು ಆಮ್ಲಜನಕವನ್ನು ತೆಗೆದುಕೊಂಡು ಇಂಗಾಲದ ಡೈಆಕ್ಸೈಡ್ ಅನ್ನು ಬಿಡುಗಡೆ ಮಾಡುತ್ತೇವೆ. ಅಂತಹ ಪರಿಸ್ಥಿತಿಯಲ್ಲಿ, ಕಾರಿನ ಕಿಟಕಿ ಸಂಪೂರ್ಣವಾಗಿ ಮುಚ್ಚಿದಾಗ, ಕಾರಿನೊಳಗಿನ ಆಮ್ಲಜನಕದ ಪ್ರಮಾಣ ಕಡಿಮೆಯಾಗುತ್ತದೆ. ಇಂಗಾಲದ ಡೈಆಕ್ಸೈಡ್ ಪ್ರಮಾಣವು ಹೆಚ್ಚಾಗುತ್ತದೆ. ಹಲವು ಬಾರಿ, ನಿದ್ರಿಸುತ್ತಿರುವ ವ್ಯಕ್ತಿಗೆ ಅದರ ಅರಿವಿರುವುದಿಲ್ಲ ಮತ್ತು ತಾನು ಉಸಿರಾಡುತ್ತಿಲ್ಲ ಎಂದು ಸಹ ತಿಳಿದಿರುವುದಿಲ್ಲ. ಇದು ಸಾವಿಗೆ ಕಾರಣವಾಗುತ್ತದೆ.

ಯಾವ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಬೇಕು?

• ಕಾರಿನಲ್ಲಿ ಮಲಗಿರುವಾಗ ಎಸಿ ಅಥವಾ ಬ್ಲೋವರ್ ಆನ್ ಮಾಡುವ ತಪ್ಪನ್ನು ಮಾಡಬೇಡಿ.
• ನೀವು ಕಾರಿನೊಳಗೆ ಮಲಗಲು ಇಚ್ಚಿಸಿದರೆ, ಅಂತಹ ಪರಿಸ್ಥಿತಿಯಲ್ಲಿ, ಹೊರಗಿನಿಂದ ತಾಜಾ ಗಾಳಿ ಒಳಗೆ ಬರುವಂತೆ ಕಿಟಕಿಯನ್ನು ಸ್ವಲ್ಪ ಕೆಳಗೆ ಮಾಡಿ.
• ವಾಹನವನ್ನು ಸಮಯಕ್ಕೆ ಸರಿಯಾಗಿ ಸರ್ವಿಸ್ ಮಾಡದಿದ್ದರೆ, ಎಂಜಿನ್ ಗ್ಯಾಸ್ ಕ್ಯಾಬಿನ್‌ಗೆ ಪ್ರವೇಶಿಸಬಹುದು.

ಅಟೋಮೊಬೈಲ್​​ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ