Hero Vida EV: ವಿಡಾ ವಿ1 ಪ್ಲಸ್ ಮತ್ತು ವಿ1 ಪ್ರೊ ವಿತರಣೆಗೂ ಮುನ್ನ ನಮ್ಮ ಬೆಂಗಳೂರಿನಲ್ಲಿ ಮೊದಲ ಶೋರೂಂ ಆರಂಭ

ವಿಡಾ(Vida) ಹೊಸ ವಿ1 ಪ್ಲಸ್(V1 Plus) ಮತ್ತು ವಿ1 ಪ್ರೊ(V1 Pro) ಎಲೆಕ್ಟ್ರಿಕ್ ಸ್ಕೂಟರ್(Electric Scooter) ಖರೀದಿಗಾಗಿ ಈಗಾಗಲೇ ಬುಕಿಂಗ್ ಸಲ್ಲಿಸಿರುವ ಗ್ರಾಹಕರಿಗೆ ಕಂಪನಿಯು ಡಿಸೆಂಬರ್ ಮಧ್ಯಂತರದಲ್ಲಿ ವಿತರಣೆ ಆರಂಭಿಸುತ್ತಿದ್ದು, ವಿತರಣೆಗೂ ಮುನ್ನ ಕಂಪನಿಯು ನಮ್ಮ ಬೆಂಗಳೂರಿನ ವಿಠಲ್ ಮಲ್ಯ ರಸ್ತೆಯಲ್ಲಿ ಹೊಸ ಶೋರೂಂ ಆರಂಭಿಸಿದೆ. ಎಕ್ಸ್‌ಪಿರೆನ್ಸ್ ಸೆಂಟರ್ ನಲ್ಲಿ(ಅನುಭವ ಮಳಿಗೆ) ಕಂಪನಿಯು ಬುಕಿಂಗ್ ದಾಖಲಾತಿಯನ್ನು ಆಧರಿಸಿ ಆಸಕ್ತ ಗ್ರಾಹಕರಿಗೆ ಟೆಸ್ಟ್ ರೈಡ್ ಒದಗಿಸುತ್ತಿದ್ದು, ಟೆಸ್ಟ್ ರೈಡ್ ಜೊತೆಗೆ ಗ್ರಾಹಕರು ಕಂಪನಿಯ ಹೊಸ ಉತ್ಪನ್ನಗಳ ಕುರಿತಾಗಿ ಹಲವಾರು ಮಾಹಿತಿಗಳನ್ನು ಒಂದೇ ವೇದಿಕೆಯಲ್ಲಿ ತಿಳಿದುಕೊಳ್ಳಬಹುದಾಗಿದೆ.

ಎಕ್ಸ್‌ಪಿರೆನ್ಸ್ ಸೆಂಟರ್ ಗಳಿಗೆ ಭೇಟಿ ನೀಡುವ ಗ್ರಾಹಕರು ಹೊಸ ಇವಿ ಸ್ಕೂಟರ್ ವೀಕ್ಷಣೆ ಜೊತೆಗೆ ಉತ್ಪನ್ನಗಳ ತಂತ್ರಜ್ಞಾನ ಬಳಕೆಯ ಕುರಿತಾದ ಕುಲಂಕೂಶವಾದ ಮಾಹಿತಿಯನ್ನು ಪಡೆದುಕೊಳ್ಳಬಹುದು. ಇದಕ್ಕಾಗಿ ಕಾಫಿ ಬಾರ್ ಮತ್ತು ಲೈಬ್ರರಿ ಕೂಡಾ ತೆರೆಯಲಾಗಿದ್ದು, ಇವಿ ತಂತ್ರಜ್ಞಾನಗಳ ಕುರಿತಾದ ಗರಿಷ್ಠ ಮಾಹಿತಿ ತಿಳಿದುಕೊಳ್ಳಲು ಗ್ರಾಹಕರಿಗೆ ಸಹಕಾರಿಯಾಗಿದೆ.

ಹೊಸ ಸಬ್ ಬ್ರಾಂಡ್ ವಿಡಾ ಅಡಿಯಲ್ಲಿ ಹೀರೋ ಮೊಟೋಕಾರ್ಪ್ ಕಂಪನಿಯು ವಿ1 ಪ್ಲಸ್ ಮತ್ತು ವಿ1 ಪ್ರೊ ಎಲೆಕ್ಟ್ರಿಕ್ ಸ್ಕೂಟರ್ ಗಳನ್ನು ಪರಿಚಯಿಸಿ ಭರ್ಜರಿ ಬೇಡಿಕೆ ಪಡೆದುಕೊಳ್ಳುತ್ತಿದ್ದು, ಹೊಸ ಸ್ಕೂಟರ್ ಗಳು ದೆಹಲಿ ಎಕ್ಸ್ ಶೋರೂಂ ಪ್ರಕಾರ ರೂ. 1.45 ಲಕ್ಷ ಬೆಲೆ ಹೊಂದಿದ್ದರೆ ವಿ1 ಪ್ರೊ ಟಾಪ್ ಎಂಡ್ ಮಾದರಿಯು ರೂ. 1.59 ಲಕ್ಷ ಬೆಲೆ ಹೊಂದಿವೆ.

ಬ್ಯಾಟರಿ ಪ್ಯಾಕ್ ಮತ್ತು ಮೈಲೇಜ್

ವಿಡಾ ಹೊಸ ಇವಿ ಸ್ಕೂಟರ್ ಗಳಲ್ಲಿ 3.9kWh ಬ್ಯಾಟರಿ ಮತ್ತು 6kW ಎಲೆಕ್ಟ್ರಿಕ್ ಮೋಟಾರ್ ಜೋಡಣೆ ಮಾಡಲಾಗಿದ್ದು, ಇದರಲ್ಲಿ ವಿಡಾ ವಿ1 ಪ್ಲಸ್ ಪ್ರತಿ ಚಾರ್ಜ್ ಗೆ 143 ಕಿ.ಮೀ ಮೈಲೇಜ್ ನೀಡಿದರೆ ವಿಡಾ ವಿ1 ಪ್ರೊ ಪ್ರತಿ ಚಾರ್ಜ್ ಗೆ 165 ಕಿ.ಮೀ ಮೈಲೇಜ್ ನೀಡುತ್ತದೆ.

ಪರ್ಫಾಮೆನ್ಸ್ ಮತ್ತು ಟಾಪ್ ಸ್ಪೀಡ್

ವಿಡಾ ವಿ1 ಪ್ಲಸ್ ಮತ್ತು ವಿ1 ಪ್ರೊ ಎರಡು ಇವಿ ಸ್ಕೂಟರ್ ಗಳು ಪ್ರತಿ ಗಂಟೆಗೆ ಗರಿಷ್ಠ 80 ಕಿ.ಮೀ ಟಾಪ್ ಸ್ಪೀಡ್ ಹೊಂದಿದ್ದು, 3.2 ಸೆಕೆಂಡ್ ಗಳಲ್ಲಿ ಸೊನ್ನೆಯಿಂದ 40 ಕಿ.ಮೀ ವೇಗ ಪಡೆದುಕೊಳ್ಳುತ್ತದೆ. ಹಾಗೆಯೇ ಹೊಸ ಇವಿ ಸ್ಕೂಟರ್ ಗಳಲ್ಲಿ ಕಂಪನಿಯು ರೀಜನರೇಟಿವ್ ಬ್ರೇಕಿಂಗ್ ಸಿಸ್ಟಂ ಹೊಂದಿರಲಿದ್ದು, ಮುಂಭಾಗದಲ್ಲಿ ಡಿಸ್ಕ್ ಬ್ರೇಕ್ ಮತ್ತು ಹಿಂಬದಿಯಲ್ಲಿ ಡ್ರಮ್ ಬ್ರೇಕ್ ನೀಡಲಾಗಿದೆ.

ಇದರಲ್ಲಿ ಮತ್ತೊಂದು ಪ್ರಮುಖ ತಂತ್ರಜ್ಞಾನ ಸೌಲಭ್ಯವೆಂದರೆ ರೈಡಿಂಗ್ ವೇಳೆ ಬ್ಯಾಟರಿ ಪ್ರಮಾಣವು ನಿಗದಿತ ಪ್ರಮಾಣಕ್ಕಿಂತ ಕಡಿಮೆಯಾದ ನಂತರವೂ ಕನಿಷ್ಠ 8 ಕಿ.ಮೀ ದೂರವನ್ನು ಪ್ರತಿ ಗಂಟೆಗೆ 10 ಕಿ.ಮೀ ವೇಗದಲ್ಲಿ ಚಾಲನೆಗೆ ಅವಕಾಶ ನೀಡುತ್ತದೆ. ಇದರಿಂದ ಟ್ರಾಫಿಕ್ ದಟ್ಟಣೆಯ ಸಂದರ್ಭದಲ್ಲಿ ಬ್ಯಾಟರಿ ಖಾಲಿಯಾದರೂ ಹತ್ತಿರ ಚಾರ್ಜಿಂಗ್ ನಿಲ್ದಾಣಕ್ಕೆ ತಲುಪಲು ಈ ಸೌಲಭ್ಯವು ಸಾಕಷ್ಟು ಸಹಕಾರಿಯಾಗಲಿದ್ದು, ಹೊಸ ಇವಿ ಸ್ಕೂಟರ್ ಗಳು ಫಾಸ್ಟ್ ಚಾರ್ಜಿಂಗ್ ಸರ್ಪೋಟ್ ಹೊಂದಿವೆ.

ಡಿಸೈನ್ ಮತ್ತು ಫೀಚರ್ಸ್

ರೆಟ್ರೊ ಲುಕ್ ಜೊತೆಗೆ ಹಲವಾರು ಪ್ರೀಮಿಯಂ ಸೌಲಭ್ಯಗಳನ್ನು ಹೊಂದಿರುವ ವಿಡಾ ವಿ1 ಪ್ಲಸ್ ಮತ್ತು ವಿ1 ಪ್ರೊ ಇವಿ ಸ್ಕೂಟರ್ ಗಳಲ್ಲಿ ಶಾರ್ಪ್ ಡಿಸೈನ್ ಎಲ್ಇಡಿ ಹೆಡ್ ಲ್ಯಾಂಪ್, ಟರ್ನ್ ಇಂಡಿಕೇಟರ್, ಸಣ್ಣ ಗಾತ್ರದ ವಿಂಡ್ ಸ್ಕ್ರೀನ್ ಮತ್ತು 7 ಇಂಚಿನ ಟಚ್ ಸ್ಕ್ರೀನ್ ಇನ್ ಸ್ಟ್ರುಮೆಂಟ್ ಕ್ಲಸ್ಟರ್ ಪ್ಯಾನೆಲ್ ಸೌಲಭ್ಯಗಳಿವೆ. ಹಾಗೆಯೇ ಹೊಸ ಇವಿ ಸ್ಕೂಟರ್ ಗಳಲ್ಲಿ ಕರ್ವ್ ಡಿಸೈನ್ ಪ್ರೇರಿತ ಸ್ಪ್ಲೀಟ್ ಸೀಟ್, ಕೀ ಲೆಸ್ ಕಂಟ್ರೊಲ್, ಎಮರ್ಜೆನ್ಸಿ ಕಾಲ್, ಕ್ರೂಸ್ ಕಂಟ್ರೊಲ್, ಟು ವೇ ಥ್ರೊಟಲ್ ಸೌಲಭ್ಯಗಳಿವೆ.

ಈ ಮೂಲಕ ಹೊಸ ವಿ1 ಪ್ಲಸ್ ಮತ್ತು ವಿ1 ಪ್ರೊ ಎಲೆಕ್ಟ್ರಿಕ್ ಸ್ಕೂಟರ್ ಗಳು ಸದ್ಯ ಮಾರುಕಟ್ಟೆಯಲ್ಲಿರುವ ಎಥರ್ 450 ಪ್ಲಸ್, 450ಎಕ್ಸ್, ಓಲಾ ಎಸ್1, ಎಸ್ ಪ್ರೊ ಮತ್ತು ಬಜಾಜ್ ಚೇತಕ್ ಇವಿ ಸ್ಕೂಟರ್ ಗಳಿಗೆ ಭರ್ಜರಿ ಪೈಪೋಟಿ ನೀಡಲಿದ್ದು, ಸದ್ಯ ಬೆಂಗಳೂರು, ದೆಹಲಿ ಮತ್ತು ಜೈಪುರ್ ನಲ್ಲಿ ಮಾತ್ರ ಖರೀದಿಗೆ ಲಭ್ಯವಾಗಿರುವ ಹೊಸ ಸ್ಕೂಟರ್ ಮಾರಾಟವು ಮುಂದಿನ ಕೆಲವೇ ದಿನಗಳಲ್ಲಿ ವಿವಿಧ ನಗರಗಳಲ್ಲೂ ಲಭ್ಯವಾಗಲಿದೆ.