ಇನ್ನೊಂದು ವರ್ಷದಲ್ಲಿ ಎರಡು ಪಟ್ಟು ಹೆಚ್ಚಲಿದೆಯಂತೆ ಬಿಟ್ಕಾಯಿನ್ ಮೌಲ್ಯ; 2,00,000 ಡಾಲರ್ ಬೆಲೆ ಪಡೆಯಲಿದೆ ಈ ಕ್ರಿಪ್ಟೋಕರೆನ್ಸಿ
Cryptocurrency mania continues: ಕ್ರಿಪ್ಟೋಕರೆನ್ಸಿಗಳ ಬೆಲೆ, ಅದರಲ್ಲೂ ಬಿಟ್ಕಾಯಿನ್ ಬೆಲೆ ಇತ್ತೀಚಿನ ದಿನಗಳಿಂದ ಬಹಳ ವೇಗವಾಗಿ ಹೆಚ್ಚುತ್ತಿದೆ. ಟ್ರಂಪ್ ಅಧಿಕಾರದ ಗದ್ದುಗೆಗೆ ಕೂರುವವರೆಗೂ ಮಾತ್ರವಲ್ಲ, ಇನ್ನೂ ಹಲವು ವರ್ಷ ಈ ಏರಿಕೆಯ ವೇಗ ಹೀಗೇ ಮುಂದುವರಿಯಲಿದೆ. ವರದಿಗಳ ಪ್ರಕಾರ 1,00,000 ಡಾಲರ್ ಸಮೀಪ ಇರುವ ಬಿಟ್ಕಾಯಿನ್ ಬೆಲೆ 2030-33ರೊಳಗೆ 10 ಲಕ್ಷ ಡಾಲರ್ ಆಗುವ ಸಾಧ್ಯತೆ ಇದೆ.
ನವದೆಹಲಿ, ನವೆಂಬರ್ 24: ಅಮೆರಿಕನ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೊನಾಲ್ಡ್ ಟ್ರಂಪ್ ಗೆದ್ದ ಬಳಿಕ ಕ್ರಿಪ್ಟೋಕರೆನ್ಸಿಗಳಿಗೆ ಇನ್ನಿಲ್ಲದ ಬೇಡಿಕೆ ಬಂದಿದೆ. ಮಂದಗತಿಯಲ್ಲಿ ಏರಿಕೆ ಆಗುತ್ತಿದ್ದ ಕ್ರಿಪ್ಟೋಗಳ ಬೆಲೆಯ ಹೆಚ್ಚಳ ವೇಗ ಸಖತ್ತಾಗಿ ಏರಿದೆ. ವಿಶ್ವದ ಅತಿದೊಡ್ಡ ಕ್ರಿಪ್ಟೋಕರೆನ್ಸಿಯಾದ ಬಿಟ್ಕಾಯಿನ್ ಅಂತೂ ವಿಶ್ವದ ಅಗ್ರಮಾನ್ಯ ಸಂಪತ್ತುಗಳ ಪೈಕಿ ಒಂದೆನಿಸಿದೆ. ಇವತ್ತು ಒಂದು ಬಿಟ್ಕಾಯಿನ್ ಬೆಲೆ 98,191.82 ಡಾಲರ್ ಇದೆ. ನಿನ್ನೆ ಶನಿವಾರ ಒಂದು ಹಂತದಲ್ಲಿ ಅದರ ಬೆಲೆ 99,916 ಡಾಲರ್ವರೆಗೂ ಹೋಗಿತ್ತು. ಒಂದು ಲಕ್ಷ ಡಾಲರ್ ಮೈಲಿಗಲ್ಲು ಇನ್ನೇನು ಮುಟ್ಟೇಬಿಟ್ಟಿತು ಎನಿಸಿತ್ತು. ಸೋಮವಾರದ ಟ್ರೇಡಿಂಗ್ನಲ್ಲಿ ಆ ಮೈಲಿಗಲ್ಲು ಮುಟ್ಟುವುದು ನಿಶ್ಚಿತ.
ಇದಕ್ಕಿಂತ ಅಚ್ಚರಿಯ ಸುದ್ದಿಯೊಂದಿದೆ. ಮುಂಬರುವ ವರ್ಷಗಳಲ್ಲಿ ಬಿಟ್ಕಾಯಿನ್ ಹಾಗೂ ಇತರ ಕ್ರಿಪ್ಟೋಕರೆನ್ಸಿಗಳ ಮೌಲ್ಯ ಬಹಳ ವೇಗವಾಗಿ ಹೆಚ್ಚಲಿದೆಯಂತೆ. ಬರ್ನ್ಸ್ಟೀನ್ ಎನ್ನುವ ಗ್ಲೋಬಲ್ ಇನ್ವೆಸ್ಟ್ಮೆಂಟ್ ಸಂಸ್ಥೆಯ ಪ್ರಕಾರ 2025ರಲ್ಲಿ ಒಂದು ಬಿಟ್ಕಾಯಿನ್ ಬೆಲೆ 2,00,000 ಡಾಲರ್ ತಲುಪಬಹುದು. 2029ರಲ್ಲಿ ಅದರ ಬೆಲೆ ಬರೋಬ್ಬರಿ 5,00,000 ಡಾಲರ್ ಆಗಬಹುದು. ಅಷ್ಟೇ ಅಲ್ಲ, 2033ರಲ್ಲಿ 10 ಲಕ್ಷ ಡಾಲರ್ ಆಗಬಹುದು. ಅಂದರೆ ಇನ್ನು, 9 ವರ್ಷದಲ್ಲಿ ಬಿಟ್ಕಾಯಿನ್ ಬೆಲೆ ಕನಿಷ್ಠ 10 ಪಟ್ಟಾದರೂ ಹೆಚ್ಚಲಿದೆ.
ಇದನ್ನೂ ಓದಿ: ಭಾರತದ ಸ್ಟಾರ್ಟಪ್ಗಳಿಗೆ ಈ ವಾರ ಫಂಡಿಂಗ್ ಸುಗ್ಗಿ; ಶೇ. 226ರಷ್ಟು ಫಂಡಿಂಗ್ ಹೆಚ್ಚಳ
2033ರಲ್ಲಿ ಒಂದು ಬಿಟ್ಕಾಯಿನ್ ಅನ್ನು ಹೊಂದಲು ನೀವು ಎಂಟು ಕೋಟಿಗೂ ಅಧಿಕ ರುಪಾಯಿ ತೆರಬೇಕಾಗಬಹುದು. ಆರ್ಕ್ ಇನ್ವೆಸ್ಟ್ ಎನ್ನುವ ಸಂಸ್ಥೆಯ ಸಿಇಒ ಕ್ಯಾಥೀ ವುಡ್ ಪ್ರಕಾರ ಬಿಟ್ಕಾಯಿನ್ 10 ಲಕ್ಷ ಡಾಲರ್ ಮೌಲ್ಯವನ್ನು 2030ರಲ್ಲೇ ಮುಟ್ಟಬಹುದಂತೆ.
ಬಿಟ್ಕಾಯಿನ್ಗೆ ಈ ಪರಿ ಕ್ರೇಜ್ ಹುಟ್ಟುತ್ತಿರುವುದ್ಯಾಕೆ?
ಹಿಂದೆಲ್ಲಾ ಕ್ರಿಪ್ರೋಕರೆನ್ಸಿಗಳ ಬಗ್ಗೆ ಅನುಮಾನದ ದೃಷ್ಟಿಕೋನ ಹೊಂದಿದ್ದ ಡೊನಾಲ್ಡ್ ಟ್ರಂಪ್ ಕಳೆದ ಒಂದೆರಡು ವರ್ಷದಿಂದ ಅಭಿಪ್ರಾಯ ಬದಲಿಸಿಕೊಂಡಿದ್ದಾರೆ. ಕ್ರಿಪ್ಟೋಕರೆನ್ಸಿಗಳ ಬಗ್ಗೆ ಅವರು ಹೆಚ್ಚು ಒಲವು ಬೆಳೆಸಿಕೊಂಡಿದ್ದಾರೆ. ಈಗ ಅವರು ಅಧ್ಯಕ್ಷರಾಗಿ ಆಯ್ಕೆಯಾಗಿರುವುದು ಕ್ರಿಪ್ಟೋ ಜಗತ್ತಿನ ಉತ್ಸಾಹ ಹೆಚ್ಚಿಸಿದೆ. ಕ್ರಿಪ್ಟೋದ ಪ್ರಬಲ ಸಮರ್ಥಕ ಮತ್ತು ಪ್ರಚಾರಕರೆನಿಸಿರುವ ಇಲಾನ್ ಮಸ್ಕ್ ಅವರೂ ಸರ್ಕಾರದ ಭಾಗವಾಗಿರುವುದು ಉತ್ಸಾಹ ಇಮ್ಮಡಿಗೊಳ್ಳುವಂತೆ ಮಾಡಿದೆ.
ಇದನ್ನೂ ಓದಿ: ಬ್ಯಾಂಕ್ನಿಂದ ಕ್ಯಾಷ್ ಪಡೆದರೆ ತೆರಿಗೆ ಕಡಿತ ಆಗುತ್ತೆ… ನೀವು ತಿಳಿದಿರಲೇಬೇಕಾದ ನಿಯಮಗಳಿವು…
ಈ ಮೇಲಿನ ಒಂದು ಕಾರಣವಾದರೆ, ಮತ್ತೊಂದು ಕಾರಣವು ಬಿಟ್ಕಾಯಿನ್ ಬೆಲೆ ಜಾರಿಗೆ ಬರಲಿರುವುದು. ಪೆನ್ಸಿಲ್ವೇನಿಯಾದ ಬಿಟ್ಕಾಯಿನ್ ಸ್ಟ್ರಾಟಿಜಿಕ್ ರಿಸರ್ವ್ ಕಾಯ್ದೆ, ಬಿಟ್ಕಾಯಿನ್ ಬಿಲ್ ಅನ್ನು ಜಾರಿಗೊಳಿಸುವ ಸಾಧ್ಯತೆ ಇದೆ. ಇದೇನಾದರೂ ಆದಲ್ಲಿ ಡಾಲರ್ ಹಾಗೂ ಚಿನ್ನವನ್ನು ಮೀಸಲು ಸಂಪತ್ತಾಗಿ ಇಟ್ಟುಕೊಳ್ಳುವಂತೆ ಬಿಟ್ಕಾಯಿನ್ ಅನ್ನೂ ಸರ್ಕಾರ ಶೇಖರಿಸಿಕೊಳ್ಳಬಹುದು. ಹೀಗಾಗಿ, ಬಿಟ್ಕಾಯಿನ್ಗೆ ಇನ್ನಿಲ್ಲದ ಬೇಡಿಕೆ ಇದೆ. ಇತರ ಕ್ರಿಪ್ಟೋಕರೆನ್ಸಿಗಳಿಗಿಂತ ಬಿಟ್ಕಾಯಿನ್ನ ಬೆಲೆ ಹೆಚ್ಚು ವೇಗದಲ್ಲಿ ಹೆಚ್ಚುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ