ಏಪ್ರಿಲ್​ನಿಂದ ಜೂನ್ ಅವಧಿಯಲ್ಲಿ 14.57 ಲಕ್ಷ ಮೇಡ್ ಇನ್ ಇಂಡಿಯಾ ವಾಹನಗಳ ರಫ್ತು

ನವದೆಹಲಿ, ಜುಲೈ 20: ಈ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕವಾದ ಏಪ್ರಿಲ್​ನಿಂದ ಜೂನ್​ವರೆಗಿನ ಅವಧಿಯಲ್ಲಿ ಭಾರತದಿಂದ ವಾಹನಗಳ ರಫ್ತು (Auto exports) ಶೇ. 22ರಷ್ಟು ಹೆಚ್ಚಳಗೊಂಡಿದೆ. ವಾಹನೋದ್ಯಮದ ಸಂಘಟನೆಯಾದ ಎಸ್​ಐಎಎಂ (SIAM) ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ದ್ವಿಚಕ್ರ ವಾಹನಗಳು ಹಾಗೂ ಕಮರ್ಷಿಯಲ್ ವಾಹನಗಳ ರಫ್ತು ಗಣನೀಯವಾಗಿ ಏರಿಕೆಯಾದ ಪರಿಣಾಮ ಒಟ್ಟಾರೆ ವಾಹನ ರಫ್ತು ಶೇ. 22ರಷ್ಟು ಹೆಚ್ಚಾಗಲು ಸಾಧ್ಯವಾಗಿದೆ.

2024ರ ಏಪ್ರಿಲ್​ನಿಂದ ಜೂನ್​ವರೆಗಿನ ಕ್ವಾರ್ಟರ್​ನಲ್ಲಿ 11,92,566 ಯುನಿಟ್​ಗಳು ರಫ್ತಾಗಿದ್ದವು. ಈ ವರ್ಷದ ಇದೇ ಅವಧಿಯಲ್ಲಿ 14,57,461 ಯುನಿಟ್​ಗಳು ರಫ್ತಾಗಿವೆ. ಈ ಪೈಕಿ ಪ್ಯಾಸೆಂಜರ್ ವಾಹನಗಳ ರಫ್ತು 2,04,330 ಯುನಿಟ್ ತಲುಪಿದೆ. ಇದು ಯಾವುದೇ ಕ್ವಾರ್ಟರ್​ನಲ್ಲಿ ಕಂಡ ಅತಿಹೆಚ್ಚು ಪ್ಯಾಸೆಂಜರ್ ವಾಹನಗಳ ರಫ್ತು. ಮಧ್ಯಪ್ರಾಚ್ಯ ಮತ್ತು ಲ್ಯಾಟಿನ್ ಅಮೆರಿಕ ಭಾಗಗಳಲ್ಲಿನ ಮಾರುಕಟ್ಟೆಗಳಿಗೆ ಇವು ಹೆಚ್ಚಾಗಿ ರಫ್ತಾಗಿವೆ.

ಇದನ್ನೂ ಓದಿ: ಭಾರತದಿಂದ ಮೊದಲ ಕ್ವಾರ್ಟರ್​ನಲ್ಲಿ 5 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ ರಫ್ತು

ಇವೆರಡು ಭಾಗಗಳು ಮಾತ್ರವಲ್ಲ, ಶ್ರೀಲಂಕಾ, ನೇಪಾಳ, ಜಪಾನ್, ಆಸ್ಟ್ರೇಲಿಯಾ ಇತ್ಯಾದಿ ದೇಶಗಳಿಗೆ ಭಾರತದಿಂದ ಹಲವು ವಾಹನಗಳು ರಫ್ತಾಗಿವೆ.

ಪ್ರಾಬಲ್ಯ ಮುಂದುವರಿಸಿದ ಮಾರುತಿ ಸುಜುಕಿ

ಭಾರತದ ನಂಬರ್ ಒನ್ ವಾಹನ ಕಂಪನಿಯಾದ ಮಾರುತಿ ಸುಜುಕಿ ರಫ್ತು ಮಾರುಕಟ್ಟೆಯಲ್ಲೂ ನಂಬರ್ ಒನ್ ಸ್ಥಾನದಲ್ಲಿ ಮುಂದುವರಿದಿದೆ. ಏಪ್ರಿಲ್​ನಿಂದ ಜೂನ್​ವರೆಗಿನ ಕ್ವಾರ್ಟರ್​ನಲ್ಲಿ ಮಾರುತಿ ಸುಜುಕಿಯ 96,181 ಯುನಿಟ್​ಗಳು ರಫ್ತಾಗಿವೆ. ಭಾರತದ ಒಟ್ಟಾರೆ ಪ್ಯಾಸೆಂಜರ್ ವಾಹನಗಳ ರಫ್ತಿನಲ್ಲಿ ಈ ಕಂಪನಿ ಪಾಲು ಹತ್ತಿರ ಹತ್ತಿರ ಅರ್ಧದಷ್ಟಿದೆ.

ಹ್ಯೂಂಡಾಯ್ ಮೋಟಾರ್ಸ್ ಕಂಪನಿಯು 48,140 ಪ್ಯಾಸೆಂಜರ್ ವಾಹನಗಳನ್ನು ಭಾರತದಿಂದ ಬೇರೆ ದೇಶಗಳಿಗೆ ರಫ್ತು ಮಾಡಿವೆ.

ಇದನ್ನೂ ಓದಿ: ಕಳೆದ 6 ತಿಂಗಳಲ್ಲಿ ಅತಿ ಹೆಚ್ಚು ಮಾರಾಟವಾದ ಕಾರು ಯಾವುದು ಗೊತ್ತೇ?: ಇದರ ಬೆಲೆ ಕೇವಲ 6 ಲಕ್ಷ ರೂ.

ದ್ವಿಚಕ್ರ ವಾಹನಗಳ ರಫ್ತು…

ಭಾರತದಲ್ಲಿ ತಯಾರಾದ ದ್ವಿಚಕ್ರ ವಾಹನಗಳು ಮೊದಲ ತ್ರೈಮಾಸಿಕದಲ್ಲಿ 11,36,942 ಯುನಿಟ್​ಗಳಷ್ಟು ರಫ್ತಾಗಿವೆ. ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಟೂ ವ್ಹೀಲರ್​ಗಳ ರಫ್ತಿನಲ್ಲಿ ಶೇ. 23ರಷ್ಟು ಏರಿಕೆ ಆಗಿದೆ.

ಇನ್ನು, ಕಮರ್ಷಿಯಲ್ ವಾಹನಗಳು ಈ ಅವಧಿಯಲ್ಲಿ 19,427 ಯುನಿಟ್​ಗಳು, ತ್ರಿಚಕ್ರ ವಾಹನಗಳು 95,796 ಯುನಿಟ್​ಗಳಷ್ಟು ರಫ್ತಾಗಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ