ಜುಲೈ 18ರಂದು ನಭಕ್ಕೆ ಹಾರಲಿದೆ ಐತಿಹಾಸಿಕ ವಿಕ್ರಮ್-1 ರಾಕೆಟ್; ಜೊತೆಯಲ್ಲಿ ಮೋದಿ ಹಸ್ತಾಕ್ಷರದ ವಂದೇ ಮಾತರಂ ಮೆಸೇಜ್
Skyroot Aerospace's Vikram-1 rocket launch on July 18th: ಹೈದರಾಬಾದ್ ಮೂಲದ ಖಾಸಗಿ ಬಾಹ್ಯಾಕಾಶ ಸಂಸ್ಥೆ ಸ್ಕೈರೂಟ್ ಏರೋಸ್ಪೇಸ್ ಅಭಿವೃದ್ದಿಪಡಿಸಿದ ವಿಕ್ರಮ್-1 ರಾಕೆಟ್ ಉಡಾವಣೆ ಜುಲೈ 17ರಂದು ನಡೆಯಲಿದೆ. ಸತೀಶ್ ಧವನ್ ಸ್ಪೇಸ್ ಸೆಂಟರ್ನಿಂದ ನಾಳೆ ಇದರ ಪ್ರಾಯೋಗಿಕ ಉಡಾವಣೆ ಆಗಲಿದೆ. ಇದರ ಜೊತೆಯಲ್ಲಿ ನಭಕ್ಕೆ ಹೋಗಲಿರುವ ವಿವಿಧ ಪೇಲೋಡ್ಗಳಲ್ಲಿ ಮೋದಿ ಹಸ್ತಾಕ್ಷರದ ವಂದೇ ಮಾತರಂ ಸಂದೇಶವೂ ಇದೆ.
ಹೈದರಾಬಾದ್, ಜುಲೈ 17: ಖಾಸಗಿ ಬಾಹ್ಯಾಕಾಶ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಭಾರತದ ಪಾಲಿಗೆ ಮತ್ತೊಂದು ಐತಿಹಾಸಿಕ ಕ್ಷಣ ಹತ್ತಿರವಾಗುತ್ತಿದೆ. ಹೈದರಾಬಾದ್ ಮೂಲದ ಖಾಸಗಿ ಬಾಹ್ಯಾಕಾಶ ನವೋದ್ಯಮ (Startup) ಆದ ‘ಸ್ಕೈರೂಟ್ ಏರೋಸ್ಪೇಸ್’ (Skyroot Aerospace) ಅಭಿವೃದ್ಧಿಪಡಿಸಿರುವ ‘ವಿಕ್ರಮ್-1’ (Vikram-1) ರಾಕೆಟ್ನ ಮೊದಲ ಪ್ರಾಯೋಗಿಕ ಉಡಾವಣೆ (Test Flight-1) ನಾಳೆ, ಜುಲೈ 18, ಶನಿವಾರದಂದು ಆಂಧ್ರದ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ (SDSC-SHAR) ನಡೆಯಲಿದೆ.
ಈ ಐತಿಹಾಸಿಕ ಫ್ಲೈಟ್ನಲ್ಲಿ ಹಲವು ಪೇಲೋಡ್ಗಳು ಸಾಗಲಿವೆ. ಅದರಲ್ಲಿ ಪ್ರಧಾನಿ ಮೋದಿ ಹಸ್ತಾಕ್ಷರದ ‘ವಂದೇ ಮಾತರಂ’ ಸಂದೇಶವೂ ಇದೆ. ಸ್ಕೈರೂಟ್ ಏರೋಸ್ಪೇಸ್ ಸಂಸ್ಥೆಯು ಈ ವಿಶೇಷ ಉಪಕ್ರಮವನ್ನು ‘ಮಿಷನ್ ಆಗಮನ್’ ಎಂದು ಕರೆದಿದೆ. ಭಾರತದಲ್ಲಿ ಬೆಳೆಯುತ್ತಿರುವ ಖಾಸಗಿ ಬಾಹ್ಯಾಕಾಶ ಕ್ಷೇತ್ರಕ್ಕೆ ಇಡೀ ದೇಶದ ಬೆಂಬಲವನ್ನು ಬಿಂಬಿಸಲು ಈ ವಿಶಿಷ್ಟ ಯೋಜನೆಯನ್ನು ರೂಪಿಸಲಾಗಿದೆ. ಪ್ರಧಾನಿ ಮೋದಿ ಅವರ ಹಸ್ತಾಕ್ಷರದ ವಂದೇ ಮಾತರಂ ಸಂದೇಶದೊಂದಿಗೆ ಸ್ಕೈರೂಟ್ ತಂಡದ ಸದಸ್ಯರು, ಹೂಡಿಕೆದಾರರು, ನೀತಿ ನಿರೂಪಕರು ಮತ್ತು ಜಾಗತಿಕ ಹಿತೈಷಿಗಳು ಕೈಯಾರೆ ಬರೆದ ಪತ್ರಗಳು ಕೂಡ ಈ ರಾಕೆಟ್ ಮೂಲಕ ಬಾಹ್ಯಾಕಾಶಕ್ಕೆ ಸೇರಲಿವೆ.
ಇದನ್ನೂ ಓದಿ: ಕೇವಲ 4 ನಿಮಿಷಗಳಲ್ಲಿ ಚಾರ್ಜ್; ವಿಜ್ಞಾನಿಗಳಿಂದ ಸೋಡಿಯಂ ಮೆಟಲ್ ಬ್ಯಾಟರಿ ಕ್ರಾಂತಿ
ಭಾರತೀಯ ನೆಲದ ಮೊದಲ ಖಾಸಗಿ ಆರ್ಬಿಟಲ್ ಯತ್ನ
ಭಾರತೀಯ ನೆಲದಿಂದ ಉಡಾವಣೆಯಾಗಲಿರುವ ಮೊದಲ ಖಾಸಗಿ ಆರ್ಬಿಟಲ್ ದರ್ಜೆಯ (Orbital-class) ರಾಕೆಟ್ ಎಂಬ ಹೆಗ್ಗಳಿಕೆಗೆ ‘ವಿಕ್ರಮ್-1’ ಪಾತ್ರವಾಗಲಿದೆ. ಈ ಮೈಲಿಗಲ್ಲು ಭಾರತದ ವಾಣಿಜ್ಯ ಬಾಹ್ಯಾಕಾಶ ಉದ್ಯಮದ ಸಾಮರ್ಥ್ಯವನ್ನು ಜಗತ್ತಿಗೆ ಪ್ರದರ್ಶಿಸಲಿದೆ.
ಬಾಹ್ಯಾಕಾಶಕ್ಕೆ ಹೊತ್ತೊಯ್ಯಲಿರುವ ಇತರ ಪೇಲೋಡ್ಗಳು
ಕೇವಲ ಸ್ಮರಣಿಕೆಗಳು ಮಾತ್ರವಲ್ಲದೆ, ವಿಕ್ರಮ್-1 ರಾಕೆಟ್ ತಾಂತ್ರಿಕ ಪ್ರದರ್ಶನಕ್ಕಾಗಿ ದೇಶ-ವಿದೇಶಗಳ ವಿವಿಧ ಸ್ಟಾರ್ಟ್ಅಪ್ಗಳ ಉಪಗ್ರಹಗಳನ್ನು ಹೊತ್ತೊಯ್ಯಲಿದೆ. ಇವುಗಳಲ್ಲಿ, ಗ್ರಾಹಾ ಸ್ಪೇಸ್ (Grahaa Space), ಕಾಸ್ಮೋಸರ್ವ್ (Cosmoserve), ಡಿಕ್ಯೂಬ್ಡ್ (DCubed), ಸ್ಕೈರೂಟ್ನ ಸ್ವಂತದ ‘ಸ್ಕೋಪ್’ (SCOPE) ತಂತ್ರಜ್ಞಾನ ಸೇರಿವೆ.
ಇದನ್ನೂ ಓದಿ: ಬುಲೆಟ್ ರೈಲು ಕಾರಿಡಾರ್ ವೇಗದ ಪ್ರಗತಿ; ಜಪಾನ್ನಿಂದ ಇ10 ಬರುವಷ್ಟರಲ್ಲೇ ಭಾರತ ನಿರ್ಮಿತ ಟ್ರೈನ್ ಬಳಕೆಗೆ ನಿರ್ಧಾರ
ಕಾಸ್ಮೋಸ್ ಡೈಮಂಡ್ಸ್ ಸಂಸ್ಥೆಯ ‘ಕಾಸ್ಮಿಕ್ ಬ್ಲೂಮ್’ ಎಂಬ ಡೈಮಂಡ್ ಕಲಾಕೃತಿ ಮತ್ತು ಸೂಕ್ಷ್ಮ-ಕಲೆಯ (Micro-art) ಪೇಲೋಡ್ ಕೂಡ ಬಾಹ್ಯಾಕಾಶ ಸೇರಲಿದೆ.
ಉಡಾವಣೆಗೆ ಅಗತ್ಯವಿರುವ ಎಲ್ಲಾ ರೀತಿಯ ವಾಯುಪ್ರದೇಶ (Airspace) ಮತ್ತು ಸಾಗರ ಸುರಕ್ಷತಾ ಅನುಮತಿಗಳನ್ನು ಈಗಾಗಲೇ ಪಡೆಯಲಾಗಿದೆ. ರಾಕೆಟ್ ಹಾರಾಟದ ಹಾದಿಯಲ್ಲಿ ಬರುವ ನಿರ್ಬಂಧಿತ ವಲಯಗಳ ಕುರಿತು ಅಧಿಕೃತ ಪ್ರಕಟಣೆಗಳನ್ನು ಕೂಡ ಹೊರಡಿಸಲಾಗಿದೆ. ಭಾರತದ ಬಾಹ್ಯಾಕಾಶ ಯಾನದಲ್ಲಿ ಈ ಜುಲೈ 18 ರ ಉಡಾವಣೆ ಒಂದು ಹೊಸ ಇತಿಹಾಸ ಬರೆಯಲಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ