‘ತುಂಬಾಡ್ 2’ ಶೂಟಿಂಗ್ ಅಖಾಡಕ್ಕೆ ಆಲಿಯಾ ಭಟ್ ಎಂಟ್ರಿ; ಹೆಚ್ಚಿತು ನಿರೀಕ್ಷೆ

ಬಾಲಿವುಡ್‌ನ ಐಕಾನಿಕ್ ಹಾರರ್ ಸಿನಿಮಾ ‘ತುಂಬಾಡ್’ ಸಿನಿಮಾಗೆ (Tumbaad Movie) ಸೀಕ್ವೆಲ್ ಕೆಲಸಗಳು ಅಧಿಕೃತವಾಗಿ ಆರಂಭಗೊಂಡಿವೆ. ಈ ಚಿತ್ರದ ದ್ವಿತೀಯ ಭಾಗದಲ್ಲಿ ಬಾಲಿವುಡ್‌ನ ಖ್ಯಾತ ನಟಿ ಆಲಿಯಾ ಭಟ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಪ್ರಸ್ತುತ ನಟಿ ಆಲಿಯಾ ಭಟ್ ಅವರು ಚಿತ್ರತಂಡವನ್ನು ಸೇರಿಕೊಂಡಿದ್ದು, ಚಿತ್ರೀಕರಣದ ಅಂಗಳದಲ್ಲಿ ಕಾಣಿಸಿಕೊಂಡಿದ್ದಾರೆ. ಇದು ಪ್ರೇಕ್ಷಕರಲ್ಲಿ ತೀವ್ರ ಕುತೂಹಲ ಹೆಚ್ಚಿಸಿದೆ.

ಚಿತ್ರೀಕರಣದ ಸೆಟ್‌ನಿಂದ ಆಲಿಯಾ ಭಟ್ ಅವರ ಹೊಸ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಸರಳ ಉಡುಪಿನಲ್ಲಿ ಕಾಣಿಸಿಕೊಂಡಿರುವ ನಟಿ, ಸಿನಿಮಾದ ತಾಂತ್ರಿಕ ತಂಡದ ಜೊತೆಗೆ ಪೋಸ್ ನೀಡಿದ್ದಾರೆ. ನದಿ ಹಾಗೂ ಹಳೆಯ ಕೋಟೆಯ ಹಿನ್ನೆಲೆಯಲ್ಲಿ ಈ ಹಂತದ ಚಿತ್ರೀಕರಣ ನಡೆಯುತ್ತಿದೆ. ಸೋಹಮ್ ಶಾ ಅವರು ಆಲಿಯಾ ಭಟ್ ಅವರನ್ನು ಈ ಹಾರರ್ ಪ್ರಪಂಚಕ್ಕೆ ಅಧಿಕೃತವಾಗಿ ಸ್ವಾಗತಿಸಿದ್ದಾರೆ.

ಈ ಚಿತ್ರದ ಮೂಲಕ ಆಲಿಯಾ ಭಟ್ ಮೊದಲ ಬಾರಿಗೆ ಸಂಪೂರ್ಣ ಹಾರರ್ ಕಥಾಹಂದರ ಹೊಂದಿರುವ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ನಟ ಸೋಹಮ್ ಶಾ ಮತ್ತು ನವಾಜುದ್ದೀನ್ ಸಿದ್ದಿಕಿ ಜೊತೆಗೆ ಅವರು ತೆರೆ ಹಂಚಿಕೊಳ್ಳಲಿದ್ದಾರೆ. ಈ ಸೀಕ್ವೆಲ್​​ನಲ್ಲಿ ನವಾಜುದ್ದೀನ್ ಸಿದ್ದಿಕಿ ಅವರ ಪಾತ್ರ ಅತ್ಯಂತ ಪ್ರಮುಖವಾಗಿದೆ. ಆದರೂ ಪಾತ್ರಗಳ ವಿವರವನ್ನು ಚಿತ್ರತಂಡ ಗುಪ್ತವಾಗಿಟ್ಟಿದೆ.

ಆದೇಶ್ ಪ್ರಸಾದ್ ನಿರ್ದೇಶನದಲ್ಲಿ ಈ ಸಿನಿಮಾ ಮೂಡಿಬರುತ್ತಿದೆ. ದುರಾಸೆ, ಭಯ ಹಾಗೂ ಮಾನವ ಸಹಜ ಗುಣಗಳ ಸುತ್ತ ಕಥೆ ಸಾಗಲಿದೆ. ಪ್ರಥಮ ಭಾಗಕ್ಕಿಂತಲೂ ಭಿನ್ನವಾದ ಕಥೆಯನ್ನು ಇದು ತೆರೆದಿಡಲಿದೆ. ಮುಂಬೈನಲ್ಲಿ ಬೃಹತ್ ಸೆಟ್ ನಿರ್ಮಿಸಿ ಚಿತ್ರೀಕರಣ ನಡೆಸಲಾಗುತ್ತಿದೆ. ಸರಿ ಸುಮಾರು 7 ರಿಂದ 8 ಎಕರೆ ಜಾಗದಲ್ಲಿ ಇಡೀ ನಗರದ ಮಾದರಿಯನ್ನು ನಿರ್ಮಿಸಲಾಗಿದೆ.

ಇದನ್ನೂ ಓದಿ: ಸಮಂತಾರನ್ನು ಹಿಂದಿಕ್ಕಿ ‘ತುಂಬಾಡ್’ ಪ್ರಪಂಚ ಪ್ರವೇಶಿಸಿದ ಆಲಿಯಾ ಭಟ್

ಈ ಚಿತ್ರವನ್ನು 2027ರ ಡಿಸೆಂಬರ್ 3ರಂದು ವಿಶ್ವದಾದ್ಯಂತ ಚಿತ್ರಮಂದಿರಗಳಲ್ಲಿ ಅದ್ಧೂರಿಯಾಗಿ ಬಿಡುಗಡೆ ಮಾಡಲು ಯೋಜನೆ ರೂಪಿಸಲಾಗಿದೆ. ‘ತುಂಬಾಡ್ 2’ ಮೂಲಕ ಮತ್ತೆ ದುರಾಸೆಯ ಇತಿಹಾಸ ಮರುಕಳಿಸಲಿದೆ ಎಂದು ನಿರ್ಮಾಪಕ ಸೋಹಮ್ ಶಾ ಹೇಳಿದ್ದಾರೆ. ಪ್ರೇಕ್ಷಕರಿಗೆ ಕಣ್ಣಿಗೆ ಕಟ್ಟುವಂತಹ ಹೊಸ ಅನುಭವ ನೀಡಲು ಇಡೀ ತಂಡ ಶ್ರಮಿಸುತ್ತಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.