‘ಇನ್‌ಸೈಡ್.. ಔಟ್‌ಸೈಡ್..’ ಕಾರಣಕ್ಕೆ ‘ಆರ್ಯಭಟ’ ವಿನಯ್ ಗೌಡ ಫುಲ್ ಟ್ರೋಲ್; ಖಡಕ್ ತಿರುಗೇಟು

ಬಿಗ್ ಬಾಸ್ ಮಾಜಿ ಸ್ಪರ್ಧಿ ಹಾಗೂ ನಟ ವಿನಯ್ ಗೌಡ (Vinay Gowda) ತಮ್ಮನ್ನು ಟ್ರೋಲ್ ಮಾಡುತ್ತಿರುವವರಿಗೆ ಸಾಮಾಜಿಕ ಜಾಲತಾಣದಲ್ಲಿ ತಕ್ಕ ಉತ್ತರ ನೀಡಿದ್ದಾರೆ. ‘ಬಿಗ್ ಬಾಸ್ ಅಗ್ನಿಪರೀಕ್ಷೆ’ಯಲ್ಲಿ ವೃತ್ತಕ್ಕೆ ಎಷ್ಟು ಸೈಡ್ ಇರುತ್ತದೆ ಎಂದು ಕೇಳಿದಾಗ ಅವರು ನೀಡಿದ್ದ ಉತ್ತರ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ನೆಟ್ಟಿಗರು ಅವರನ್ನು ‘ಆರ್ಯಭಟ’ ಎಂದು ಕರೆದು ತಮಾಷೆ ಮಾಡಿದ್ದರು. ಇದೀಗ ಅದೇ ವಿಚಾರವಾಗಿ ವಿನಯ್ ಪೋಸ್ಟ್ ಹಂಚಿಕೊಂಡಿದ್ದಾರೆ.

ವಿನಯ್ ಗೌಡ ಈ ಹಿಂದೆ ‘ಬಿಗ್ ಬಾಸ್ ಅಗ್ನಿಪರೀಕ್ಷೆ’ಯಲ್ಲಿ ಭಾಗವಹಿಸಿದ್ದಾಗ ಸ್ಪರ್ಧಿಗೆ ಪ್ರಶ್ನೆ ಕೇಳಿದ್ದರು. ‘ವೃತ್ತಕ್ಕೆ ಎಷ್ಟು ಸೈಡ್ ಇರುತ್ತದೆ’ ಎಂದು ಕೇಳಿದರು. ಇದಕ್ಕೆ ಉತ್ತರಿಸಿದ ಸ್ಪರ್ಧಿ, ‘ಯಾವುದೇ ಸೈಡ್ ಇರೋದಿಲ್ಲ’ ಎಂದಿದ್ದರು. ವಿನಯ್ ಇದಕ್ಕೆ ಉತ್ತರ ನೀಡಿದ್ದರು. ವೃತ್ತಕ್ಕೆ ‘ಇನ್‌ಸೈಡ್’ ಮತ್ತು ‘ಔಟ್‌ಸೈಡ್’ ಎಂಬ ಎರಡು ಸೈಡ್ ಇರುತ್ತದೆ ಎಂದು ಉತ್ತರಿಸಿದ್ದರು. ಈ ವಿಚಿತ್ರ ಉತ್ತರ ಭಾರಿ ಟ್ರೋಲ್‌ಗೆ ಕಾರಣವಾಗಿತ್ತು.

ಈ ಟ್ರೋಲ್‌ಗಳ ಬಗ್ಗೆ ಈಗ ಪೋಸ್ಟ್ ಮಾಡಿರುವ ವಿನಯ್, ‘ಇನ್‌ಸೈಡ್ ಮತ್ತು ಔಟ್‌ಸೈಡ್.. ಯಾರಿಗೆ ಬೇಕು ಬಿಡಿ. ನನ್ನ ಸೋಶಿಯಲ್ ಮೀಡಿಯಾ ಎಂಗೇಜ್‌ಮೆಂಟ್ ಅನ್ನು ಆಕಾಶಕ್ಕೆ ಏರಿಸಿದ್ದಕ್ಕೆ ನಿಮ್ಮೆಲ್ಲರಿಗೂ ಧನ್ಯವಾದಗಳು’ ಎಂದು ಲೇವಡಿ ಮಾಡಿದ್ದಾರೆ.

‘ನೀವು ಪ್ರೀತಿ ತೋರಿಸುತ್ತಿದ್ದೀರಾ ಅಥವಾ ನನ್ನನ್ನು ಎಷ್ಟು ದ್ವೇಷಿಸುತ್ತೀರಿ ಎಂದು ದೊಡ್ಡ ಪ್ರಬಂಧ ಬರೆಯುತ್ತಿದ್ದೀರಾ ಎಂಬುದು ಇಂಟರ್‌ನೆಟ್ ಅಲ್ಗಾರಿದಂಗೆ ಮುಖ್ಯವಲ್ಲ. ಅದಕ್ಕೆ ಕೇವಲ ಹೈ ಟ್ರಾಫಿಕ್ ಮಾತ್ರ ಕಾಣುತ್ತದೆ. ನಿಮ್ಮ ಪ್ರತಿಯೊಂದು ಕೋಪದ ಕಾಮೆಂಟ್ ಹಾಗೂ ವೈರಲ್ ಎಡಿಟ್ ನನ್ನ ಪ್ರೊಫೈಲ್ ಅನ್ನು ಎಲ್ಲರ ಫೀಡ್‌ನಲ್ಲೂ ಟಾಪ್‌ಗೆ ಕೊಂಡೊಯ್ಯುತ್ತಿದೆ. ನೀವೆಲ್ಲರೂ ಪುಕ್ಕಟೆಯಾಗಿ ನನಗೆ ಮಾರ್ಕೆಟಿಂಗ್ ಮಾಡಿಕೊಡುತ್ತಿದ್ದೀರಿ’ ಎಂದು ವ್ಯಂಗ್ಯವಾಡಿದ್ದಾರೆ.

ಇದನ್ನೂ ಓದಿ: ಬಿಗ್‌ಬಾಸ್ ಅಗ್ನಿಪರೀಕ್ಷೆಯಲ್ಲಿ ಗಲಾಟೆ: ‘ವಿನಯ್ ಗೌಡ ಅಲ್ಲಿರೋದಕ್ಕೆ ಲಾಯಕ್ಕಿಲ್ಲ’ ಎಂದ ಸ್ಪರ್ಧಿ

ಅಷ್ಟೇ ಅಲ್ಲದೆ, ಪೋಸ್ಟ್‌ನ ಕೊನೆಯಲ್ಲಿ ‘ಪ್ರೀತಿಯಿಂದ ನಿಮ್ಮ ಆರ್ಯಭಟ’ ಎಂದು ಬರೆದು ತಮಗೆ ಇಟ್ಟಿದ್ದ ಹೆಸರಿನಲ್ಲೇ ಟ್ರೋಲರ್ಸ್‌ಗೆ ಟಾಂಗ್ ಕೊಟ್ಟಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.