ಮೈಸೂರು: ಪತ್ತೆಯಾದ ಮೂರು ಚಿರತೆ ಮರಿಗಳನ್ನು ತಾಯಿ ಜೊತೆ ಸೇರಿಸಿದ ಅರಣ್ಯ ಸಿಬ್ಬಂದಿ

ಮೈಸೂರು, ಡಿ.18: ತಾಲೂಕಿನ ಆಯರಹಳ್ಳಿ ಗ್ರಾಮದ ಜಮೀನಿನಲ್ಲಿ ಪತ್ತೆಯಾಗಿದ್ದ ಕಪ್ಪು ಮರಿ ಸೇರಿದಂತೆ ಮೂರು ಚಿರತೆ ಮರಿಗಳು (Leopard Cubs) ಇದೀಗ ತಾಯಿಯೊಂದಿಗೆ ಸೇರಿವೆ. ಅರಣ್ಯ ಇಲಾಖೆ ಸಿಬ್ಬಂದಿಯ ಹಲವು ದಿನಗಳ ಪ್ರಯತ್ನದಿಂದಾಗಿ ತಾಯಿ ಮತ್ತು ಮರಿಗಳು ಒಂದಾಗಿವೆ.

ಅಧಿಕಾರಿಗಳ ಪ್ರಕಾರ, ಡಿಸೆಂಬರ್ 12 ರಂದು ಮೈಸೂರು ತಾಲೂಕಿನ ಆಯರಹಳ್ಳಿ ಗ್ರಾಮದ ಜಮೀನಿನಲ್ಲಿ ಕಪ್ಪು ಮರಿ ಸೇರಿದಂತೆ ಮೂರು ಚಿರತೆ ಮರಿಗಳು ಪತ್ತೆಯಾಗಿದ್ದವು. ಅರಣ್ಯಾಧಿಕಾರಿಗಳು ಈ ಮರಿಗಳನ್ನು ರಕ್ಷಿಸಿ ಅವುಗಳ ತಾಯಿ ಜೊತೆ ಸೇರಿಸುವ ಕಾರ್ಯಾಚರಣೆ ನಡೆಸಿದ್ದರು. ಅದರಂತೆ ಅದೇ ಪ್ರದೇಶದಲ್ಲಿ ಮೂರು ಮರಿಗಳನ್ನು ಪೆಟ್ಟಿಗೆಯೊಳಗೆ ಇರಿಸಿ ಸಿಸಿಟಿವಿ ಕ್ಯಾಮೆರಾ ಮೂಲಕ ಮರಿಗಳ ಚಲನವಲನದ ಮೇಲೆ ನಿಗಾ ಇಡಲಾಗಿತ್ತು.

ಆದರೆ, ತಾಯಿ ಚಿರತೆ ಮರಿಗಳನ್ನು ಹುಡುಕಿಕೊಂಡು ಬಂದಿರಲಿಲ್ಲ. ಎರಡನೇ ದಿನ ಅರಣ್ಯಾಧಿಕಾರಿಗಳು ಸ್ಥಳದಲ್ಲಿ ಬೋನು ಇಟ್ಟಿದ್ದರು. ಸಂಜೆ 6 ಗಂಟೆ ಸುಮಾರಿಗೆ ತಾಯಿ ಚಿರತೆ ಬೋನಿನೊಳಗೆ ಸಿಲುಕಿತ್ತು. ಬಳಿಕ ಇದರೊಂದಿಗೆ ಮರಿಗಳನ್ನು ಸೇರಿಸಿ ಮೈಸೂರು ಮೃಗಾಲಯಕ್ಕೆ ಹೊಂದಿಕೊಂಡಿರುವ ಕೂರ್ಗಳ್ಳಿಯಲ್ಲಿರುವ ಶ್ರೀ ಚಾಮುಂಡೇಶ್ವರಿ ವನ್ಯಜೀವಿಗಳ ರಕ್ಷಣಾ ಮತ್ತು ಪುನರ್ವಸತಿ ಕೇಂದ್ರಕ್ಕೆ ಕರೆದೊಯ್ಯಲು ಅಧಿಕಾರಿಗಳು ನಿರ್ಧರಿಸಿದ್ದಾರೆ.

ಇದನ್ನೂ ಓದಿ: ಕಬ್ಬಿನ ಗದ್ದೆಯೊಂದರಲ್ಲಿ ಮೂರು ಚಿರತೆ ಮರಿ ಪತ್ತೆ, ಮೂರರಲ್ಲಿ ಒಂದು ಕಪ್ಪು!

ಪರಿಣಿತ ಪಶುವೈದ್ಯರು ಮರಿಗಳನ್ನು ತಾಯಿಯಿಂದ ಬೇರ್ಪಡಿಸಿ ಸಿಸಿಟಿವಿ ಮೂಲಕ ನಿಗಾ ಇರಿಸಿದ್ದರು. ಮೂರನೇ ಮತ್ತು ನಾಲ್ಕನೇ ದಿನ ಚಿರತೆ ಮತ್ತು ಅದರ ಮರಿಗಳನ್ನು 48 ಗಂಟೆಗಳ ಕಾಲ ನಿಕಟವಾಗಿ ನಿಗಾ ಇರಿಸಲಾಗಿತ್ತು. ಹೊಸ ಪರಿಸರಕ್ಕೆ ಹೊಂದಿಕೊಳ್ಳಲು ಅವುಗಳಿಗೆ ಅವಕಾಶ ನೀಡಲಾಯಿತು.

ಅಧಿಕಾರಿಗಳ ಪ್ರಕಾರ, ಐದನೇ ದಿನ, ಎಲ್ಲಾ ನಾಲ್ಕು ಚಿರತೆಗಳನ್ನು ಮೈಸೂರು ತಾಲೂಕಿನ ಕಾಡಿಗೆ ಕರೆದೊಯ್ದು ಕಾಡಿಗೆ ಬಿಡಲಾಯಿತು. ಆರನೇ ದಿನ ತಾಯಿ ಚಿರತೆ ಕಾಡಿಗೆ ನುಗ್ಗಿದೆ. ಹೀಗೆ ಕಾಡಿಗೆ ಹೋಗಿದ್ದ ಚಿರತೆ ಎರಡು ದಿನಗಳ ಕಾಲ ಹಿಂದಿರುಗಿಲ್ಲ. ಹೀಗಾಗಿ ಪಶುವೈದ್ಯರು ಬಾಟಲ್​ ಮೂಲಕ ಮರಿಗಳಿಗೆ ಹಾಲು ಕುಡಿಸಿದ್ದಾರೆ.

ಒಂಬತ್ತನೇ ದಿನ, ಚಿರತೆ ಹಿಂತಿರುಗಿ ತನ್ನ ಎರಡು ಮರಿಗಳನ್ನು ತೆಗೆದುಕೊಂಡು ಹೋಗಿದೆ. ಅದರಲ್ಲಿ ಒಂದು ಕಪ್ಪು ಮರಿಯಾಗಿದೆ. 10ನೇ ದಿನ ಬಂದ ಚಿರತೆ ಮತ್ತೊಂದು ಮರಿಯನ್ನು ತೆಗೆದುಕೊಂಡು ಹೋಗಿದೆ. ಮೈಸೂರು ವನ್ಯಜೀವಿ ವಿಭಾಗ, ಅರಣ್ಯ ವಿಭಾಗ ಮತ್ತು ಮೃಗಾಲಯದ ಸಿಬ್ಬಂದಿ ಮತ್ತು ಅಧಿಕಾರಿಗಳು ಮರಿಗಳು ಚಿರತೆಯೊಂದಿಗೆ ಸೇರುವುದನ್ನು ಖಚಿತಪಡಿಸಿಕೊಂಡಿದ್ದಾರೆ ಎಂದು ಅಧಿಕಾರಿಗಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ