ಕುರಿ ಕೊಳ್ಳುವವನಿಗೆ ಖೆಡ್ಡಾ ತೋಡಿ, ತಾವೇ ಹಳ್ಳಕ್ಕೆ ಬಿದ್ದ ಖತರ್ನಾಕ್ ಗ್ಯಾಂಗ್​

ವಿಜಯಪುರ: ಜಿಲ್ಲೆಯಲ್ಲಿ ಅಪರಾಧ ಕೃತ್ಯಗಳು ದಿನೇ ದಿನೆ ಹೆಚ್ಚುತ್ತಲೇ ಇವೆ. ಕೊರೊನಾ ಕಾಟದ ಮಧ್ಯೆಯೂ ಕಳ್ಳಕಾಕರು ತಮ್ಮ ಕಸುಬನ್ನು ಬಿಟ್ಟಿಲ್ಲ. ಇದಕ್ಕೆ ಸಾಕ್ಷಿ ಕೆಲವು ದಿನಗಳ ಹಿಂದೆ ಜಿಲ್ಲೆಯ ಚಡಚಣ ತಾಲೂಕಿನ ಝಳಕಿಯಲ್ಲ ನಡೆದ ಘಟನೆ.

ಕುರಿ ವ್ಯಾಪಾರಿಯನ್ನ ದೋಚಲು ಭರ್ಜರಿ ಸ್ಕೆಚ್​!
ಜೂನ್ 17ರಂದು ದೂರದ ಮೈಸೂರು ಜಿಲ್ಲೆಯ ನಂಜನಗೂಡಿನ ನಿವಾಸಿ ಸಲ್ಮಾನ್​ ಪಾಶಾ ಬಟಾಣಿ ಎಂಬ 25 ವರ್ಷದ ವ್ಯಾಪಾರಿ ಕುರಿಗಳನ್ನು ಖರೀದಿ ಮಾಡಲು ಝಳಕಿಗೆ ಬಂದಿದ್ದ. ಪಟ್ಟಣದ ಹೋಟೆಲ್​ವೊಂದರ ಬಳಿ ನಿಂತಿದ್ದ ಈತನನ್ನು ಗಮಿನಿಸಿದ ದರೋಡೆಕೋರರ ಗುಂಪೊಂದು ಸಲ್ಮಾನ ಪಾಶಾ ಕುರಿಗಳನ್ನು ಖರೀದಿ ಮಾಡಲು ಬಂದಿದ್ದಾನೆ ಎಂದು ಗೊತ್ತುಮಾಡಿಕೊಂಡು ಇವನ ಬಳಿ ತುಂಬಾ ಹಣವಿರಬಹುದು. ಎತ್ತಾಕೊಂಡ್ರೆ ಚೆನ್ನಾಗಿ ಹಣ ಸಿಗುತ್ತೆ ಅಂತಾ ಕೂಡಲೇ ಸ್ಕೆಚ್​ ಹಾಗಿದ್ರು.

ಕುರಿಗಳನ್ನು ಸಾಗಿಸಲು ತಾನು ತಂದಿದ್ದ ಲಾರಿ ಬಳಿ ನಿಂತಿದ್ದ ಸಲ್ಮಾನ ಪಾಶಾನನ್ನ ಗ್ಯಾಂಗ್​ನ ಸದಸ್ಯ ಅಜಿತ್​ ರಾಠೋಡ್ ಈತನ ಬಳಿ ಬಂದು ನಮ್ಮ ಬಳಿಯಿರುವ ಕುರಿಗಳಿನ್ನ ಮಾರಬೇಕಿತ್ತು. ಒಮ್ಮೆ ನೋಡ ಬನ್ನಿ ಎಂದು ಸಲ್ಮಾನ್​ನನ್ನ ಪುಸಲಾಯಿಸಿ ತನ್ನೊಟ್ಟಿಗೆ ಬೈಕ್ ಮೇಲೆ ಕರೆದುಕೊಂಡು ಹೊರಟ.

ಕಿಡ್ನಾಪ್​ ಮಾಡಿ ಕೊಲೆ ಬೆದರಿಕೆ:
ಝಳಕಿ ಬಳಿಯ ಭೀಮಾಶಂಕರ ಸಕ್ಕರೆ ಕಾರ್ಖಾನೆ ಹತ್ರ ಇದ್ದ ಜಮೀನಿನಲ್ಲಿ ಮೇಯುತ್ತಿದ್ದ ಕುರಿಗಳನ್ನು ತೋರಿಸಿ ವ್ಯವಹಾರ ಕುದುರಿಸುವಂತೆ ಮಾತನಾಡಿದ್ದಾನೆ. ಇದೇ ವೇಳೆ ಮತ್ತೊಂದು ಬೈಕ್​ನಲ್ಲಿ ಬಂದ ಗ್ಯಾಂಗ್​ನ ಮೂವರು ಸದಸ್ಯರು ಸಲ್ಮಾನ್​ ಪಾಶಾರನ್ನ ಅಡ್ಡಗಟ್ಟಿ, ಚಾಕೂ ತೋರಿಸಿ ಕೊಲೆ ಮಾಡುವ ಬೆದರಿಕೆ ಹಾಕಿದ್ರು. ನಂತರ ಆತನ ಬಳಿಯಿದ್ದ 2 ಲಕ್ಷ 75 ಸಾವಿರ ರೂಪಾಯಿ ಕಸಿದುಕೊಂಡು ಅಲ್ಲಿಂದ ಪರಾರಿಯಾಗಿದ್ರು.

ಘಟನೆಯಿಂದ ತುಸು ನಲುಗಿ ಹೋಗಿದ್ದ ಸಲ್ಮಾನ್​ ಕೂಡಲೇ ಝಳಕಿ ಪೊಲೀಸರನ್ನ ಸಂಪರ್ಕಿಸಿ ನಡೆದುದನ್ನು ವಿವರಿಸಿದ. ಪ್ರಕರಣವನ್ನ ಗಂಭೀರವಾಗಿ ಪರಿಗಣಿಸಿದ ಜಿಲ್ಲಾ ಎ.ಸ್ಪಿ ಅನುಪಮ್​ ಅಗರ್ವಾಲ್ ದರೋಡೆಕೋರರ ಗ್ಯಾಂಗ್​ನ ಬಂಧಿಸಲು ಇಂಡಿಯ DySPಎಂ.ಬಿ ಸಂಕದ ನೇತೃತ್ವದಲ್ಲಿ ತಂಡ ರಚಿಸಿದರು. ಚಡಚಣ CPI ಚಿದಂಬರ, ಝಳಕಿ PSIಪರಶುರಾಮ್ ಮನಗೂಳಿ ಸೇರಿದಂತೆ ಇತರರಿದ್ದ ತಂಡ ದರೋಡಕೋರರ ಗ್ಯಾಂಗ್​ನ ಹಿಡಿಯಲು ಜಾಲ ಬೀಸಿದರು.

ಪೊಲೀಸರ​ ವಿಚಾರಣೆಯಲ್ಲಿ ಸತ್ಯ ಬಿಚ್ಚಿಟ್ಟ ಗ್ಯಾಂಗ್​:
ನಿನ್ನೆ ಸಾಯಂಕಾಲ ಇಂಡಿ ತಾಲೂಕಿನ ಚಣೇಗಾಂವ್ ಗ್ರಾಮದಲ್ಲಿ ಅನುಮಾನಾಸ್ಪದವಾಗಿ ಓಡಾಡುತ್ತಿದ್ದ ನಾಲ್ವರನ್ನು ವಶಕ್ಕೆ ಪಡೆದು ವಿಚಾರಣೆಗೆ ಒಳಪಡಿಸಿದರು. ಖಾಕಿಯ ಖಡಕ್​ ವರ್ಕ್​ಔಟ್​ಗೆ ಈ ಖತರ್ನಾಕ ಗ್ಯಾಂಗ್​ ಕೊನೆಗೂ ತಾನು ಮಾಡಿದ ಕೃತ್ಯವನ್ನು ಒಪ್ಪಿಕೊಂಡಿದೆ. ಅಜಿತ್​ ರಾಠೋಡ್​ ಅಲ್ಲದೆ ಆತನನ ಸಹಚರರಾದ ಸಚಿನ್ ಚವ್ಹಾಣ, ಸಿದ್ದು ಚವ್ಹಾಣ ಹಾಗೂ ಉಮೇಶ ರಾಠೋಡ್​ನ ಹಿಡಿಯುವಲ್ಲಿ ಖಾಕಿ ಯಶಸ್ವಿಯಾಗಿದೆ. ಜೊತೆಗೆ ಬಂಧಿತರಿಂದ 2.70 ಲಕ್ಷ ರೂಪಾಯಿ ಹಾಗೂ ಕೃತ್ಯಕ್ಕೆ ಬಳಸಿದ ಎರಡು ಬೈಕ್ ಮತ್ತು ಚಾಕೂವನ್ನು ಸಹ ವಶಪಡಿಸಿಕೊಂಡಿದ್ಧಾರೆ. ಸದ್ಯಕ್ಕೆ ನಾಲ್ವರು ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಶೋಕಿ ಜೀವನ ನಡೆಸಲು ಬಯಸಿದ್ದ ಈ 20ರ ಆಸುಪಾಸಿನ ಯುವಕರಿಗೆ ಬೇಗ ದುಡ್ಡು ಮಾಡಲು ಹೊಳೆದಿದ್ದೇ ಈ ಅಡ್ಡದಾರಿ. ದುಡ್ಡಿರೋನು ಮಾತ್ರ ಇಡೀ ಪ್ರಪಂಚನ ತನ್ನ ಅಡಿಯಾಳು ಮಾಡ್ಕೊಂಡು ಆಳೋದು. ಆಳಾಗಿ ಹಾಳಾಗತ್ಯಾ ಇಲ್ಲ ಆಳುಗಳಿಗೆಲ್ಲಾ ದೊರೆ ಆಗ್ತ್ಯಾ ಎಂಬ ಕನ್ನಡದ ಸಿಲಿಕಾನ್​ ಸಿಟಿಯ ಚಿತ್ರದ ಡೈಲಾಗ್​ನಂತೆ ತಾವೂ ಕೂಡ ಅರಸರಾಗಲು ಹೊರಟಿದ್ದರು. ಆದರೆ ಆಳಲು ಬಯಸಿದ ಯುವಕರು ಇಂದು ಬದುಕು ಹಾಳು ಮಾಡಿಕೊಂಡಿದ್ದಾರೆ. -ಅಶೋಕ ಯಡಳ್ಳಿ