ಜಮೀನು ವ್ಯಾಜ್ಯಕ್ಕೆ ತಂದೆ-ಮಗನೇ ಬಲಿ: ಕಬ್ಬು ಕಟಾವು ಮಾಡಲು ಹೋದವರ ಮೇಲೆ ಮಾರಣಾಂತಿಕ ಹಲ್ಲೆ

ವಿಜಯಪುರ, ನ.14: ಬೇರೆಯವರ ಜಮೀನಿನ ವ್ಯಾಜ್ಯವೊಂದು ಮುಗ್ಧ ತಂದೆ ಮತ್ತು ಮಗನ ಜೀವವನ್ನೇ ಬಲಿ ತೆಗೆದುಕೊಂಡಿರುವ ಘಟನೆ ವಿಜಯಪುರ ಜಿಲ್ಲೆಯ ಕೊಲ್ಹಾರ ತಾಲೂಕಿನ ತಡಲಗಿ ಗ್ರಾಮದಲ್ಲಿ ನಡೆದಿದೆ. ಕಬ್ಬು ಕಟಾವು ಮಾಡುವ ವಿಚಾರವಾಗಿ ನಡೆದ ಎರಡು ಗುಂಪುಗಳ ನಡುವಿನ ಗಲಾಟೆ ವಿಕೋಪಕ್ಕೆ ತಿರುಗಿ, ದೊಣ್ಣೆ ಹಾಗೂ ಕಲ್ಲುಗಳಿಂದ ಹಲ್ಲೆ ನಡೆಸಿದ ಪರಿಣಾಮ ತಂದೆ ಹಾಗೂ ಮಗ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಏನಿದು ಘಟನೆ? ಕಬ್ಬು ಕಟಾವು ವೇಳೆ ನಡೆದಿದ್ದೇನು?

ವಿಜಯಪುರ ಜಿಲ್ಲೆ ಕೊಲ್ಹಾರ ತಾಲೂಕಿನ ತಡಲಗಿ ಗ್ರಾಮದ ಹನುಮಂತ ಸಾಲವಾಡಗಿ ಹಾಗೂ ಆತನ ಪುತ್ರ ಮಂಜುನಾಥ ಸಾಲವಾಡಗಿ ತಮ್ಮ ಸಂಬಂಧಿಕರೊಂದಿಗೆ ಕೃಷಿಕಾಯಕ ಮಾಡಿಕೊಂಡು ಜೀವನ ನಡೆಸುತ್ತಿದ್ದರು. ಅದೇ ಗ್ರಾಮದ ಹನುಮವ್ವ ಮೇಟಿ ಎಂಬುವವರಿಗೆ ಸೇರಿದ ಸರ್ವೇ ನಂಬರ್ 213/2 ರ 8 ಎಕರೆ ಜಮೀನನ್ನು ಕಳೆದ ಎರಡು ವರ್ಷಗಳಿಂದ ಪಾಲು ಆಧಾರದ (ಅರ್ಧ ಭಾಗ ಉಳುಮೆ ಮಾಡಿದವರಿಗೆ) ಮೇಲೆ ಅವರು ಕೃಷಿ ಮಾಡಿಕೊಂಡು ಬರುತ್ತಿದ್ದರು.

ಕಳೆದ ಬಾರಿ ಈರುಳ್ಳಿ ಬೆಳೆದು ಪಾಲು ಮಾಡಿಕೊಂಡಿದ್ದ ಸಾಲವಾಡಗಿ ಕುಟುಂಬ, ಈ ಬಾರಿ ಅದೇ ಜಮೀನಿನಲ್ಲಿ ನಾಟಿ ಮಾಡಿದ್ದ ಕಬ್ಬು ಕಟಾವಿಗೆ ಮುಂದಾಗಿತ್ತು. ಕಾರ್ಮಿಕರನ್ನು ಕರೆಸಿ ಪೂಜೆ ಮಾಡಿ ಕಟಾವು ಮಾಡಲು ಹೋದಾಗ, ಜಮೀನು ಮಾಲೀಕ ಹನುಮವ್ವ ಮೇಟಿ ಅವರ ದಾಯಾದಿಗಳಾದ (ಅಣ್ಣ -ತಮ್ಮಂದಿರು) ಗಿರಿಯಪ್ಪ ಮೇಟಿ, ರಾಮಪ್ಪ ಮೇಟಿ, ಹನುಮಂತ ಮೇಟಿ, ನಾಗಪ್ಪ ಮೇಟಿ ಹಾಗೂ ಇತರರು ಸ್ಥಳಕ್ಕೆ ಆಗಮಿಸಿ, “ಇದು ವ್ಯಾಜ್ಯವಿರುವ ಜಮೀನು, ಕಬ್ಬು ಕಟಾವು ಮಾಡಲು ಬಿಡುವುದಿಲ್ಲ, ನಮ್ಮದೂ ಪಾಲಿದೆ” ಎಂದು ತಗಾದೆ ತೆಗೆದಿದ್ದಾರೆ.

ಜಮೀನು ವ್ಯಾಜ್ಯವಿದ್ದರೆ ಬಗೆಹರಿಸಿಕೊಳ್ಳಿ, ನಾವು ಸಾಲ ಮಾಡಿ ಕಬ್ಬು ಬೆಳೆದಿದ್ದೇವೆ, ಕಟಾವು ಮಾಡಲು ಬಿಡಿ ಎಂದು ಹನುಮಂತ ಸಾಲವಾಡಗಿ ಪರಿಪರಿಯಾಗಿ ಬೇಡಿಕೊಂಡರೂ ಆರೋಪಿಗಳು ಕೇಳಲಿಲ್ಲ. ಮಾತಿಗೆ ಮಾತು ಬೆಳೆದು ವಾಗ್ವಾದ ಉಂಟಾಗಿ, ಎರಡು ಗುಂಪುಗಳ ನಡುವೆ ಘರ್ಷಣೆ ನಡೆಯಿತು. ಈ ವೇಳೆ ಆಕ್ರೋಶಗೊಂಡ ಮೇಟಿ ಕುಟುಂಬದವರು ದೊಣ್ಣೆ ಮತ್ತು ಕಲ್ಲುಗಳಿಂದ ಮಾರಣಾಂತಿಕ ಹಲ್ಲೆ ನಡೆಸಿದ್ದು, ಹನುಮಂತ ಸಾಲವಾಡಗಿ ಹಾಗೂ ಅವರ ಪುತ್ರ ಮಂಜುನಾಥ ಸ್ಥಳದಲ್ಲೇ ಅಸುನೀಗಿದ್ದಾರೆ. ಘಟನೆಯಲ್ಲಿ ಮಹಾದೇವಪ್ಪ ಹಾಗೂ ಮಲ್ಲಪ್ಪ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಜಮೀನಿನ ಹಿನ್ನೆಲೆ ಹಾಗೂ ಸಂತ್ರಸ್ತರ ಆಕ್ರೋಶ:

ಮೇಟಿ ಕುಟುಂಬಕ್ಕೆ ಹತ್ತಾರು ಎಕರೆ ಜಮೀನಿದ್ದರೂ, ದಾಯಾದಿಗಳ ಜಗಳದ ಕಾರಣ ಸದರಿ 8 ಎಕರೆ ಜಮೀನು ಕಳೆದ 4-6 ವರ್ಷಗಳಿಂದ ಪಾಳು ಬಿದ್ದಿತ್ತು. ಕುಟುಂಬ ನಿರ್ವಹಣೆಗೆ ಕಷ್ಟವಾದಾಗ ಗ್ರಾಮದ ಹಿರಿಯರ ಸಮ್ಮುಖದಲ್ಲಿ ಪಂಚಾಯತ್ ಮಾಡಿ, ವಯಸ್ಸಾಗಿರುವ ಹನುಮವ್ವ ಮೇಟಿ ಅವರು ಸಾಲವಾಡಗಿ ಕುಟುಂಬಕ್ಕೆ ಜಮೀನನ್ನು ಉಳುಮೆಗೆ ನೀಡಿದ್ದರು. ಜಮೀನಿನ ವಿಚಾರವಾಗಿ ದಾಯಾದಿಗಳು ನಮ್ಮೊಂದಿಗೆ ಜಗಳವಾಡುತ್ತಿದ್ದಾರೆ. ಆದರೆ ಯಾವುದೇ ಸಂಬಂಧವೇ ಇಲ್ಲದ, ನಮಗೆ ಸಹಾಯ ಮಾಡಲು ಬಂದ ಸಾಲವಾಡಗಿ ಕುಟುಂಬದ ತಂದೆ-ಮಗನ ಪ್ರಾಣ ತೆಗೆದುಬಿಟ್ಟರಲ್ಲ ಎಂದು ಜಮೀನು ಮಾಲೀಕ ಹನುಮವ್ವ ಮೇಟಿ ಹಾಗೂ ಮೃತರ ಪತ್ನಿ ಶಿವಬಾಯಿ ಕಣ್ಣೀರುಹಾಕಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಆರ್ಥಿಕ ಅಪರಾಧ ಹಾಗೂ ವಂಚನೆ ಪ್ರಕರಣಗಳ ತನಿಖೆಗೆ ಹೊಸ ಮಾರ್ಗಸೂಚಿ ಪ್ರಕಟಿಸಿದ ಡಿಜಿಪಿ ಡಾ. ಎಂ.ಎ. ಸಲೀಂ

ಪೊಲೀಸರ ತನಿಖೆ ಮತ್ತು ಆರೋಪಿಗಳ ಬಂಧನ:

ಘಟನೆಯ ಗಂಭೀರತೆ ಅರಿತ ವಿಜಯಪುರ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ (SP) ಲಕ್ಷ್ಮಣ ನಿಂಬರಗಿ, ಎಎಸ್ಪಿ ಕಟ್ಟಿಮನಿ ಹಾಗೂ ಡಿವೈಎಸ್ಪಿ ಚಂದ್ರಕಾಂತ ನಂದರೆಡ್ಡಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಬೆರಳಚ್ಚು ತಂಡ ಹಾಗೂ ಸೊಕೋ (SOCO) ತಂಡ ಸ್ಥಳದಲ್ಲಿ ಸಾಕ್ಷ್ಯ ಕಲೆಹಾಕಿದೆ. ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿರುವ ಕೊಲ್ಹಾರ ಪೊಲೀಸರು, ಜೋಡಿ ಕೊಲೆ ಪ್ರಕರಣದ ಪ್ರಮುಖ ಆರೋಪಿಗಳಾದ ಗಿರಿಯಪ್ಪ ಮೇಟಿ, ರಾಮಪ್ಪ ಮೇಟಿ, ಹನುಮಂತ ಮೇಟಿ, ನಾಗಪ್ಪ ಮೇಟಿ ಸೇರಿದಂತೆ ಪ್ರಮುಖರನ್ನು ಬಂಧಿಸಿದ್ದು, ತಲೆಮರೆಸಿಕೊಂಡಿರುವ ಇತರರಿಗಾಗಿ ಶೋಧ ಮುಂದುವರಿಸಿದ್ದಾರೆ.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ