Android Smart Phones: ಆಂಡ್ರಾಯಿಡ್ ಸ್ಮಾರ್ಟ್​ಫೋನ್ ಬಳಕೆದಾರರು ತಪ್ಪಿಸಬೇಕಾದ 15 ತಪ್ಪುಗಳಿವು

ಆಂಡ್ರಾಯಿಡ್ ಆಪರೇಟಿಂಗ್ ಸಿಸ್ಟಮ್ ಬಳಕೆಯಲ್ಲಿ ಇರುವ ಮೊಬೈಲ್ ಫೋನ್​ಗಳು ವಿಶ್ವದಾದ್ಯಂತ ಹೆಚ್ಚು ಬಳಕೆಯಲ್ಲಿವೆ. ಇದೇ ಕಾರಣಕ್ಕೋ ಏನೋ ಹ್ಯಾಕರ್​ಗಳು, ವಂಚಕರು ಹಾಗೂ ಜಾಹೀರಾತುದಾರರಿಗೂ ಈ ಆಪರೇಟಿಂಗ್ ಸಿಸ್ಟಮ್ ಇರುವ ಮೊಬೈಲ್ ಫೋನ್​ಗಳು ಬಲು ಅಚ್ಚುಮೆಚ್ಚು. ಒಂದು ಕಡೆ ಮಾಲ್​ವೇರ್ ಆಯಿತು. ಇದನ್ನು ಹೊರತುಪಡಿಸಿದಂತೆ ನಿರಂತರವಾಗಿ ಜಾಹೀರಾತುಗಳನ್ನು ತೋರಿಸುತ್ತಾ ಹಲವು ಅಪ್ಲಿಕೇಷನ್​ಗಳು ಹಣ ಮಾಡುತ್ತಿವೆ. ಇದರಿಂದ ಆಂಡ್ರಾಯಿಡ್ ಫೋನ್​ಗಳ ಕಾರ್ಯ ನಿರ್ವಹಣೆ ನಿಧಾನ ಆಗುತ್ತದೆ. ಒಂದು ವೇಳೆ ನೀವು ಅಂಡ್ರಾಯಿಡ್ ಮೊಬೈಲ್ ಫೋನ್ ಬಳಸುವವರಾಗಿದ್ದರೆ ಬಳಕೆ ಬಗ್ಗೆ ಮೈಯೆಲ್ಲಾ ಕಣ್ಣಾಗಿರಬೇಕು.

ಇನ್ನು ಇದರ ಜತೆಗೆ ನಿಮ್ಮ ಮೊಬೈಲ್​ಪೋನ್​ನಲ್ಲಿ ಸ್ಪೈ ಅಪ್ಲಿಕೇಷನ್​ಗಳು ಅಡಗಿ ಕುಳಿತು, ಎಲ್ಲೆಲ್ಲಿ ಹೋಗ್ತೀರಿ ಅನ್ನೋದನ್ನೆಲ್ಲ ಟ್ರ್ಯಾಕ್ ಮಾಡುತ್ತವೆ. ಸಾಮಾನ್ಯವಾಗಿ ಆಂಡ್ರಾಯಿಡ್ ಮೊಬೈಲ್ ಫೋನ್ ಬಳಕೆದಾರರು ಎಸಗುವ 15 ಪ್ರಮಾದಗಳ ಪಟ್ಟಿಯನ್ನು ಇಲ್ಲಿ ನೀಡಲಾಗಿದೆ. ನೀವು ಇವುಗಳನ್ನು ಮಾಡಬೇಡಿ.

ಫೋನ್ ಲಾಕ್ ಮಾಡಲು ಬಲವಾದ ಪಾಸ್​ವರ್ಡ್ ಬಳಕೆ ಮಾಡದಿರುವುದು
ಕೈ ಬೆರಳು (ಫಿಂಗರ್ ಪ್ರಿಂಟ್) ಮತ್ತು ಫೇಸ್ ಅನ್​ಲಾಕ್ ಮಾಡುವುದು ಅನುಕೂಲಕರವಾದ ಮಾರ್ಗ. ನಾಲ್ಕು ಅಂಕಿಯ ಪಾಸ್​​ಕೋಡ್ ಬಳಸುವ ಬದಲಿಗೆ ಪಾಸ್​ವರ್ಡ್ ಬಳಸಿ. ಫೇಸ್ ಅನ್​ಲಾಕ್, ಬೆರಳಚ್ಚು, ಪ್ಯಾಟರ್ನ್ ಹಾಗೂ ಕೋಡ್ ಅನ್ನು ಕೂಡ ಭೇದಿಸಬಹುದು. ಆದರೆ ವಿಶಿಷ್ಟ ಹಾಗೂ ಪ್ರಬಲ ಪಾಸ್​ವರ್ಡ್ ಮೂಲಕ ನಿಮ್ಮ ಮೊಬೈಲ್ ಫೋನ್ ಅನ್ನು ಸುರಕ್ಷಿತವಾಗಿ ಇರಿಸಿಕೊಳ್ಳಬಹುದು.

ಆಂಡ್ರಾಯಿಡ್ ಫೋನ್​ನಲ್ಲಿ ಆ್ಯಂಟಿ ವೈರಸ್ ಬಳಕೆ ಮಾಡದಿರುವುದು
ಮಾಲ್​ವೇರ್, ಆ್ಯಡ್​ವೇರ್, ಸ್ಪೈ ವೇರ್ ಮತ್ತು ಇತರ ಅಪಾಯಕಾರಿ ಅಪ್ಲಿಕೇಷನ್​ಗಳು ಫೋನ್ ಮೇಲೆ ದಾಳಿ ಮಾಡಲು ಕಾಯುತ್ತಿದ್ದರೂ ಕೆಲವೇ ಕೆಲವು ಆಂಡ್ರಾಯಿಡ್ ಫೋನ್ ಬಳಕೆದಾರರು ಹಣ ಪಾವತಿ ಮಾಡಿದ ಆ್ಯಂಟಿವೈರಸ್ ಅಥವಾ ಮಾಲ್​ವೇರ್ ಸುರಕ್ಷೆ ಅಪ್ಲಿಕೇಷನ್ ಬಳಸುತ್ತಾರೆ. ಆ ಮೂಲಕ ನಿಮ್ಮ ಮೊಬೈಲ್​ಪೋನ್​ನಲ್ಲಿಯೇ ಇರುವ ಮಾಲ್​ವೇರ್ ಕೂಡ ಪತ್ತೆ ಮಾಡಲು ಸಾಧ್ಯವಾಗದ ಹೊಸ ರೀತಿಯ ಮಾಲ್​ವೇರ್​ಗಳಿಂದ ಅಥವಾ ಇತರ ಅಪಾಯಗಳಿಂದ ಆ್ಯಂಟಿ ವೈರಸ್ ಆಪ್​ಗಳು ಎಚ್ಚರಿಸುತ್ತವೆ ಹಾಗೂ ರಕ್ಷಿಸುತ್ತವೆ.

ಗೊತ್ತಿಲ್ಲದ ಮೂಲಗಳಿಂದ ಥರ್ಡ್ ಪಾರ್ಟಿ ಅಪ್ಲಿಕೇಷನ್​ಗಳ ಇನ್​ಸ್ಟಾಲ್​ಗೆ ಅವಕಾಶ ಮಾಡಿಕೊಡುವುದು
ಅಪರಿಚಿತ ಮೂಲಗಳಿಂದ ಅಪ್ಲಿಕೇಷನ್ ಇನ್​ಸ್ಟಾಲ್ ಆಗುವುದನ್ನೇ ನಿಮ್ಮ ಸೆಟ್ಟಿಂಗ್ ಮೆನುವಿನಲ್ಲಿ ಟರ್ನ್ ಆಫ್ ಮಾಡುವುದು ಕ್ಷೇಮ. ಈ ಮೂಲಕವಾಗಿ ಅಪ್ಲಿಕೇಷನ್​ಗಳು ನಿಮ್ಮ ಮೊಬೈಲ್​ಫೋನ್​ನಲ್ಲಿ ರಹಸ್ಯವಾಗಿ ಇನ್​ಸ್ಟಾಲ್ ಆಗುವುದು ಹಾಗೂ ಗೂಗಲ್ ಪ್ಲೇ ಹೊರತಾಗಿ ಬೇರೆ ಮೂಲಗಳಿಂದ ಇನ್​ಸ್ಟಾಲ್ ಆಗುವುದು ತಪ್ಪಿಸಬಹುದು.

ನಿಮ್ಮ ಮೊಬೈಲ್​ಫೋನ್​ನಲ್ಲಿ ಆಂಡ್ರಾಯಿಡ್​ನ ಹೊಸ ವರ್ಷನ್ ಅಪ್​ಡೇಟ್ ಮಾಡದಿರುವುದು
ಒಂದು ವೇಳೆ ನಿಮ್ಮ ಫೋನ್​ಗೆ ಸೆಕ್ಯೂರಿಟಿ ಅಪ್​ಡೇಟ್​ಗಳು ಅಥವಾ ಆಂಡ್ರಾಯಿಡ್ ವರ್ಷನ್ ಅಪ್​ಡೇಟ್​ಗಳು ಬರುತ್ತಿದ್ದಲ್ಲಿ ಅವುಗಳನ್ನು ನಿರ್ಲಕ್ಷ್ಯ ಮಾಡಬೇಡಿ. ಅವುಗಳ ಇನ್​ಸ್ಟಾಲ್ ಮತ್ತು ಅಪ್​ಡೇಟ್​ಗೆ ಸ್ವಲ್ಪ ಸಮಯ ತೆಗೆದುಕೊಳ್ಳಬಹುದು. ಆದರೆ ಅದು ಖಂಡಿತಾ ಮಾಡಬೇಕು. ಏಕೆಂದರೆ ತಮಗೆ ಈಗಾಗಲೇ ಗೊತ್ತಿರುವ ದೌರ್ಬಲ್ಯಗಳನ್ನು ಅನುಕೂಲಕ್ಕೆ ಬಳಸಿಕೊಳ್ಳುವಲ್ಲಿ ಹ್ಯಾಕರ್​ಗಳು ಚತುರರಾಗಿರುತ್ತಾರೆ.

ಅಪ್ಲಿಕೇಷನ್​ಗಳನ್ನು ಇನ್​ಸ್ಟಾಲ್ ಮಾಡುವುದಕ್ಕೆ ಎಪಿಕೆ ಫೈಲ್​ಗಳನ್ನು ಬಳಸುವುದು
ಎಪಿಕೆ ಫೈಲ್​ಗಳು ಹೇಗೆ ಕಾರ್ಯ ನಿರ್ವಹಿಸುತ್ತವೆ ಎಂಬುದು ನಿಮಗೆ ಅರ್ಥವಾಗದಿದ್ದಲ್ಲಿ ಗೂಗಲ್ ಪ್ಲೇ ಸ್ಟೋರ್ಸ್​​ನಿಂದ ಮಾತ್ರ ಅಪ್ಲಿಕೇಷನ್​ಗಳ ಡೌನ್​ಲೋಡ್ ಮಾಡಿಕೊಳ್ಳಿ. ಹಲವು ಅಪ್ಲಿಕೇಷನ್​ಗಳು ಗೂಗಲ್ ಪ್ಲೇನಲ್ಲಿ ಸಿಗುವುದಿಲ್ಲ. ಎಪಿಕೆ ಫೈಲ್ ಡೌನ್​ಲೋಡ್ ಮಾಡುವುದರೊಂದಿಗೆ ಇನ್​ಸ್ಟಾಲ್ ಮಾಡಬೇಕಾಗುತ್ತದೆ. ಆದರೆ ಇದರಲ್ಲಿ ಕೆಲವು ಅಪಾಯಗಳಿವೆ. ಇವುಗಳನ್ನು ಗೂಗಲ್ ಅನುಮತಿಸಿರುವುದಿಲ್ಲ.

ಅಪ್ಲಿಕೇಷನ್​​ಗಳನ್ನು ಡೌನ್​ಲೋಡ್ ಮಾಡುವ ಮುನ್ನ ನಿಯಮ, ನಿಬಂಧನೆ ಮತ್ತು ಅನುಮತಿಗಳನ್ನು ಓದದಿರುವುದು
ಯಾವುದೇ ಅಪ್ಲಿಕೇಷನ್ ಡೌನ್​ಲೋಡ್ ಮುಂಚೆ ಅಗತ್ಯ ಇರುವ ಅನುಮತಿ ಮತ್ತು ನಿಬಂಧನೆಗಳನ್ನು ಓದುವ ಹವ್ಯಾಸ ರೂಢಿಸಿಕೊಳ್ಳಿ. ಯಾವಾಗ ಅಪ್ಲಿಕಷನ್​ಗಳು ಹೆಚ್ಚಾಗಿ ಅನುಮತಿ ಕೇಳುತ್ತದೋ ಆಗ ಆ ಅಪ್ಲಿಕೇಷನ್ ವ್ಯಾಪ್ತಿಯನ್ನು ಪ್ರಶ್ನಿಸಿಕೊಳ್ಳಬೇಕು. ಉದಾಹರಣೆಗೆ, ವಾಲ್​ಪೇಪರ್​ಗೆ ನಿಮ್ಮ ಕಾಂಟ್ಯಾಕ್ಟ್ ಬುಕ್ ಅಥವಾ ಮೈಕ್ ಸಂಪರ್ಕದ ಅಗತ್ಯ ಇಲ್ಲ. ಆದರೆ ಅದಕ್ಕೆ ನಿಮ್ಮ ಗ್ಯಾಲರಿಯ ಸಂಪರ್ಕ ಬೇಕಾಗಬಹುದು.

ಕಳುವಿನಿಂದ ರಕ್ಷಿಸಿಕೊಳ್ಳುವಷ್ಟು ಸುರಕ್ಷಿತ ಅಲ್ಲದಿರುವುದು
ನೀವು ಆಂಡ್ರಾಯಿಡ್ ಫೋನ್ ಖರೀದಿ ಮಾಡಿದ ಮೇಲೆ ಅದರಲ್ಲಿ ಗೂಗಲ್ ಫೈಂಡ್ (ಹುಡುಕು) ಸೇವೆಯನ್ನು ಎನೇಬಲ್ (ಚಾಲನೆ) ಮಾಡಿ. ಹೀಗೆ ಮಾಡುವುದರಿಂದ, ಒಂದು ವೇಳೆ ನಿಮ್ಮ ಫೋನ್ ಕಳೆದುಹೋದರೂ ಅಥವಾ ಕಳ್ಳತನವಾದರೂ ಹುಡುಕುವುದು ಕಷ್ಟವಲ್ಲ. ಜತೆಗೆ ಲಾಕ್​ಸ್ಕ್ರೀನ್ ರಕ್ಷಣೆಗೂ ಆದ್ಯತೆ ನೀಡಿ. ಆ ಮೂಲಕ ಪಾಸ್​ವರ್ಡ್ ಸಹಾಯ ಇಲ್ಲದೆ ಮೊಬೈಲ್ ಡೇಟಾವನ್ನಾಗಲೀ ಅಥವಾ ಮೊಬೈಲ್ ಫೋನ್​ನೇ ಆಗಲಿ ಆಫ್ ಮಾಡಲು ಸಾಧ್ಯವಾಗಲ್ಲ.

ಫೋನ್ ಚಾರ್ಜ್ ಮಾಡುವುದಕ್ಕೆ ಯಾವುಯಾವುದೋ ಅಡಾಪ್ಟರ್ ಬಳಸುವುದು
ಯಾವಾಗಲೂ ಉತ್ತಮ ಗುಣಮಟ್ಟದ ಅಡಾಪ್ಟರ್​ಗಳನ್ನೇ ಬಳಸಿ ಅಥವಾ ನಿಮ್ಮ ಫೋನ್ ಚಾರ್ಜರ್ ಅನ್ನು ಬೇರೆಯವರಿಗೆ ನೀಡದಿರಿ. 5000mAh ಬ್ಯಾಟರಿ ಸಾಮಾನ್ಯ ಎಂಬಂತಾಗಿದೆ. ಇಂಥ ದೊಡ್ಡ ಬ್ಯಾಟರಿ ಫೋನ್​ಗಳಿಗೆ ಯಾವುದೆಂದರೆ ಆ ಚಾರ್ಜರ್ ಬಳಸುವುದು ಅಪಾಯಕಾರಿ.

ವೈಯಕ್ತಿಕ ಮಾಹಿತಿ ಬ್ಯಾಕ್​ಅಪ್ ಇಟ್ಟುಕೊಳ್ಳದಿರುವುದು
ನಿಮ್ಮ ಫೋನ್ ಕಳೆದುಹೋಗಬಹುದು, ಕಳುವಾಗಬಹುದು ಅಥವಾ ಮುರಿದುಹೋಗಬಹುದು. ಅದರೊಳಗಿದ್ದ ಮಾಹಿತಿಯನ್ನು ಮೊದಲೇ ಸಂಗ್ರಹಿಸಿ, ಒಂದು ಕಡೆ ಇಡದಿದ್ದಲ್ಲಿ ಅಂಥ ಸಮಯದಲ್ಲಿ ಸಿಗುವುದಿಲ್ಲ. ವೈಯಕ್ತಿಕ ಮಾಹಿತಿಯನ್ನು ಬ್ಯಾಕ್​ಅಪ್ ತೆಗೆದಿಡುವುದು ಆದ್ಯತೆಯಾಗಿರಲಿ.

ಡೌನ್​ಲೋಡ್ ಆದ ಅಪ್ಲಿಕೇಷನ್​ಗಳು ಯಾವುವು ಎಂದು ಸೆಟ್ಟಿಂಗ್ಸ್​​ನಲ್ಲಿ ಪರೀಕ್ಷಿಸದಿರುವುದು
ಡೌನ್​ಲೋಡ್ ಆಗರುವಂಥ ಅಪ್ಲಿಕೇಷನ್​ಗಳನ್ನು ಸೆಟ್ಟಿಂಗ್ಸ್​ನಲ್ಲಿ ಪರೀಕ್ಷಿಸುವ ಪರಿಪಾಠ ಬೆಳೆಸಿಕೊಳ್ಳಿ. ಹಲವು ಮಾಲ್​ವೇರ್ ಅಥವಾ ಸ್ಪೈವೇರ್​ಗಳು ಐಕಾನ್ ಸೃಷ್ಟಿಸುವುದಿಲ್ಲ, ಬದಲಿಗೆ ನಿಮ್ಮ ಫೋನ್​ನೊಳಗೆ ಅವಿತುಕೊಂಡಿರುತ್ತವೆ. ಒಟ್ಟಾರೆಯಾಗಿ ಡೌನ್​ಲೋಡ್ ಆದ ಅಪ್ಲಿಕೇಷನ್​​ಗಳ ಪಟ್ಟಿಯನ್ನು ಪರಿಶೀಲಿಸುವುದರಿಂದ ಅಪರಿಚಿತ ಆಪ್​ಗಳನ್ನು ಪತ್ತೆ ಹಚ್ಚಲು ಸಹಾಯ ಆಗುತ್ತದೆ.

ಹಳೆಯ ಅಥವಾ ಬಳಕೆ ಮಾಡದ ಅಪ್ಲಿಕೇಷನ್​ಗಳನ್ನು ಡಿಲೀಟ್ ಮಾಡದಿರುವುದು
ಬಹಳ ಸಮಯದಿಂದ ನಿಮ್ಮ ಮೊಬೈಲ್​ನಲ್ಲಿ ಬಳಕೆಯಾಗದ ಅಪ್ಲಿಕೇಷನ್ ಇದ್ದಲ್ಲಿ ಅದನ್ನು ಡಿಲೀಟ್ ಮಾಡಿ. ಜತೆಗೆ ನಿರುಪಯುಕ್ತ ಅಪ್ಲಿಕೇಷನ್​ಗಳು ಇದ್ದರೂ ಅವುಗಳನ್ನು ಸಹ ಡಿಲೀಟ್ ಮಾಡಿ. ಹಳೆಯ ಅಥವಾ ನಿರುಪಯುಕ್ತ ಅಪ್ಲಿಕೇಷನ್​ಗಳನ್ನು ಇರಿಸಿಕೊಂಡರೆ ಫೋನ್​ನ ಮೆಮೊರಿಯನ್ನು ಕಬಳಿಸುತ್ತದೆ. ಇದರಿಂದ ಮಾಲ್​ವೇರ್​ಗಳ ದಾಳಿ ಕೂಡ ಆಗುವ ಸಾಧ್ಯತೆ ಇದೆ.

ಗೂಗಲ್ ಖಾತೆ ಪಾಸ್​ವರ್ಡ್ ಅಪ್​ಡೇಟ್ ಮಾಡದಿರುವುದು
ನಿಮ್ಮ ಗೂಗಲ್ ಖಾತೆಯ ಪಾಸ್​ವರ್ಡ್ ಅನ್ನು ನಿಯಮಿತವಾಗಿ ಬದಲಾವಣೆ ಮಾಡುತ್ತಿರಿ. ಖಾಸಗಿತನದ ಮಾಹಿತಿಗೆ ಕನ್ನ ಹಾಕುವ ಸಾಧ್ಯತೆಯಿಂದ ತಪ್ಪಿಸಿಕೊಳ್ಳುವುದಕ್ಕೆ ಇದು ಉತ್ತಮ ದಾರಿ.

ಆಗಾಗ ಬಳಸುವ ಆ್ಯಪ್​​ಗಳ ಕ್ಯಾಚೆ ಸ್ವಚ್ಛಗೊಳಿಸದಿರುವುದು
ನೀವು ಆಗಾಗ ಬಳಸುವ ಅಪ್ಲಿಕೇಷನ್​ಗಳ ಕ್ಯಾಚೆಯನ್ನು ಸ್ವಚ್ಛಗೊಳಿಸುತ್ತಿದ್ದಲ್ಲಿ ಫೋನ್ ವೇಗವಾಗಲು ಸಹಾಯ ಆಗುತ್ತದೆ.

ಹೊಸ ಆಂಡ್ರಾಯಿಡ್ ಫೋನ್ ಜತೆಗೆ ಬರುವ ಬ್ಲೋಟ್​ವೇರ್ ಅನ್ ಇನ್​​ಸ್ಟಾಲ್ ಮಾಡದಿರುವುದು
ಬ್ಲೋಟ್​ವೇರ್​ಗಳು ಅನಗತ್ಯವಾಗಿ ಸ್ಥಳಾವಕಾಶ ಕಬಳಿಸುತ್ತವೆ. ಇದರ ಜತೆಗೆ ಸ್ಥಿರತೆ ಸಮಸ್ಯೆಗಳು ಎದುರಾಗುತ್ತವೆ. ಅವುಗಳನ್ನು ಅನ್​ಇನ್​ಸ್ಟಾಲ್ ಮಾಡಿ. ಹೊಸ ಫೋನ್ ಖರೀದಿ ಮಾಡಿದ ತಕ್ಷಣ ಇದನ್ನು ಮಾಡಬೇಕು.

ಫೋನ್ ಸ್ವಿಚ್ಛ್ ಆಫ್ ಮಾಡದಿರುವುದು
ಆಗಾಗ ನಿಮ್ಮ ಫೋನ್ ರೀಸ್ಟಾರ್ಟ್ ಮಾಡದಿದ್ದಲ್ಲಿ ಫೋನ್ ವೇಗ ಕಡಿಮೆ ಆಗುತ್ತದೆ ಅಥವಾ ಕೆಲವು ಸಲ ಒಟಿಪಿ ಅಥವಾ ಸಂದೇಶಗಳು ಬರುವುದು ತಡವಾಗುತ್ತದೆ. ಆದ್ದರಿಂದ ದಿನಕ್ಕೊಮ್ಮೆ ಫೋನ್ ರೀಸ್ಟಾರ್ಟ್ ಮಾಡುವುದು ಉತ್ತಮ ಅಭ್ಯಾಸ.

ಇದನ್ನೂ ಓದಿ:Redmi Note 10 ಸೀರಿಸ್​ ಮೊಬೈಲ್​ಗೆ 103 MP ಕ್ಯಾಮೆರಾ! ಕೈಗೆಟುಕುವ ದರ