ಭಾರತಕ್ಕೆ ಕಾಲಿಡೋಕೆ ಸಿದ್ಧವಾಯ್ತು ಟೆಸ್ಲಾ ಕಾರು: ಇದರ ಬೆಲೆ ಎಷ್ಟು ಗೊತ್ತಾ?

ನಮ್ಮ ದೇಶದಲ್ಲಿ ಇತ್ತೀಚೆಗೆ ಎಲೆಕ್ಟ್ರಿಕ್​ ವಾಹನಗಳು ಹೆಚ್ಚುತ್ತಿವೆ. ಇದೇ ಸಂದರ್ಭದಲ್ಲಿ ಎಲೆಕ್ಟ್ರಿಕ್ ಕಾರು ನಿರ್ಮಾಣ ಸಂಸ್ಥೆ ಟೆಸ್ಲಾ ಭಾರತಕ್ಕೆ ಕಾಲಿಡಲು ಸಿದ್ಧವಾಗಿದೆ. ಮುಂದಿನ ವರ್ಷದ ಆರಂಭದಿಂದ ಟೆಸ್ಲಾ ಬುಕಿಂಗ್​​ ಭಾರತದಲ್ಲಿ ಆರಂಭವಾಗಲಿದೆ. ಈ ಮೂಲಕ ಈ ಸಂಸ್ಥೆಯ ಕಾರು ಭಾರತದ ಮಾರುಕಟ್ಟೆಯಲ್ಲಿ ಯಾವಾಗ ಲಾಂಚ್​ ಆಗಲಿದೆ ಎನ್ನುವ ಕುತೂಹಲಕ್ಕೆ ತೆರೆಬಿದ್ದಿದೆ.

ನಮ್ಮಲ್ಲಿ ಸಿಗುವ ಮಾಡೆಲ್​ಗಳಾವವು?
ಟೆಸ್ಲಾ ಸಂಸ್ಥೆ ಈ ಮೊದಲಿನಿಂದಲೂ ಭಾರತದ ಮಾರುಕಟ್ಟೆಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಲೇ ಬಂದಿದೆ. 2016ರರಲ್ಲೇ ಸಂಸ್ಥೆ ಪ್ರೀ ಬುಕಿಂಗ್​ ಆರಂಭಿಸಿತ್ತು. ಈ ವೇಳೆ ಪೇಟಿಎಂ ಸ್ಥಾಪಕ ವಿಜಯ್​ ಶೇಖರ್​ ಶರ್ಮಾ, ವೂನಿಕ್​ ಮುಖ್ಯಸ್ಥ ಸುಜಯತ್​ ಅಲಿ, ಪಿನ್​ಸ್ಟಾರ್ಮ್​ ಮುಖ್ಯಸ್ಥ ಮಹೇಶ್​ ಮೂರ್ತಿ ಟೆಸ್ಕಾ ಎಲೆಕ್ಟ್ರಿಕ್​ ಕಾರನ್ನು ಬುಕ್​ ಮಾಡಿದ್ದರು.

ಈಗ ದೊಡ್ಡ ಪ್ರಮಾಣದಲ್ಲಿ ಬುಕಿಂಗ್​ ಆರಂಭಗೊಂಡಿದೆ. ಭಾರತದ ಮಾರುಕಟ್ಟೆಗೆ ಟೆಸ್ಲಾ ಮಾಡೆಲ್​​ 3 ಲಭ್ಯವಾಗುತ್ತಿದೆ. ಜನವರಿಯಲ್ಲಿ ಬುಕಿಂಗ್​ ಆರಂಭಗೊಳ್ಳಲಿದ್ದು, ನಂತರದ ಮೂರು ತಿಂಗಳ ಒಳಗಾಗಿ ಕಾರು ಡೆಲಿವರಿ ಸಿಗುವ ಸಾಧ್ಯತೆ ಇದೆ.

ಭಾರತದಲ್ಲಿ ಟೆಸ್ಲಾ ಘಟಕ?
ಭಾರತದ ಕಾರು ಮಾರುಕಟ್ಟೆ ದಿನೇ ದಿನೇ ದೊಡ್ಡದಾಗಿ ಬೆಳೆಯುತ್ತಿದೆ. ಜನರು ಎಲೆಕ್ಟ್ರಿಕ್​ ಕಾರಿನತ್ತ ಒಲವು ತೋರುತ್ತಿದ್ದಾರೆ. ಈ ಕಾರಣಕ್ಕೆ ಟೆಸ್ಲಾ ಭಾರತದಲ್ಲಿ ಕಾರು ನಿರ್ಮಾಣ ಘಟಕ ಸ್ಥಾಪಿಸುವ ಆಲೋಚನೆ ಇಟ್ಟುಕೊಂಡಿದೆ. ಇದಕ್ಕೆ ಈಗಾಗಲೇ ನೀಲನಕ್ಷೆ ಸಿದ್ಧಗೊಂಡಿದ್ದು, ಮುಂದಿನ ವರ್ಷಗಳಲ್ಲಿ ಇದು ಅನುಷ್ಠಾನಕ್ಕೆ ಬರುವ ಸಾಧ್ಯತೆ ಇದೆ.

ಮಾಡೆಲ್​ 3 ವಿಶೇಷತೆ ಏನು?
ಮಾಡೆಲ್​ 3 ಟೆಸ್ಲಾದ ಪ್ರಾಥಮಿಕ ಮಾದರಿಯಾಗಿದೆ. ಈ ಕಾರಿನ ಬ್ಯಾಟರಿ ಗಾತ್ರ 50 kWh ನಿಂದ 75 kWh ಇದೆ. ಈ ಕಾರು ಸದ್ಯ ಸ್ಟ್ಯಾಂಡರ್ಡ್​ ರೇಂಜ್​ (RWD), ಸ್ಟ್ಯಾಂಡರ್ಡ್​ ರೇಂಜ್​ ಪ್ಲಸ್​ (RWD), ಲಾಂಗ್​ ರೇಂಜ್​ (AWD) ಮತ್ತು ಲಾಂಗ್​ ರೇಂಜ್​ ಪರ್ಫಾರ್ಮೆನ್ಸ್ ​ (AWD) ವಿಧದಲ್ಲಿ ಲಭ್ಯವಿದೆ. ಒಮ್ಮೆ ಬ್ಯಾಟರಿ ಪೂರ್ತಿಯಾಗಿ ಚಾರ್ಜ್​ ಆದರೆ, 381-580 ಕಿ.ಮೀವರೆಗೆ ಚಲಿಸಬಹುದಾಗಿದೆ. ಈ ಲಕ್ಸುರಿ ಕಾರಿನ ಬೆಲೆ ಭಾರತದ ಮಾರುಕಟ್ಟೆಯಲ್ಲಿ 55 ಲಕ್ಷ ರೂಪಾಯಿ.