ಕೊರೊನಾ ಲಸಿಕೆ ಬರ್ತಿದ್ದಂಗೆ ಕಾಲರ್​ ಟ್ಯೂನ್​ ಬದಲಾಯ್ತು!

ದೇಶದಲ್ಲಿ ಕೊರೊನಾ ಬಂದಮೇಲೆ ಏನೇನೆಲ್ಲಾ ಬದಲಾಯ್ತು.. ಮುಖಕ್ಕೆ ಮಾಸ್ಕ್​ ಬಂತು, ಕೈಗೆ ಪದೇ ಪದೇ ಸ್ಯಾನಿಟೈಸರ್​ ಹಚ್ಚಿಕೊಳ್ಳೋದು ಶುರುವಾಯ್ತು, ಪಕ್ಕದಲ್ಲಿದ್ದವರು ಕೆಮ್ಮಿದ್ರೂ, ಸೀನಿದ್ರೂ ಅನುಮಾನಪಡುವಂತಾಯ್ತು.. ಹೀಗೆ ನಿತ್ಯ ಜೀವನದಲ್ಲಿ ಲೆಕ್ಕವಿಲ್ಲದಷ್ಟು ಬದಲಾವಣೆಗಳಿಗೆ ನಾವು ಒಗ್ಗಿಕೊಂಡುಬಿಟ್ಟೆವು. ಆದರೆ, ಈ ಎಲ್ಲಾ ಬದಲಾವಣೆಗಳಿಗಿಂತಲೂ ಜನರನ್ನು ಅತಿ ಹೆಚ್ಚು ಕಾಡಿದ್ದು, ತಾಳ್ಮೆ ಪರಿಶೀಲಿಸಿದ್ದು ಕೊರೊನಾ ಕಾಲರ್​ ಟ್ಯೂನ್!

ಕೊರೊನಾ ವೈರಸ್​ ಬಗ್ಗೆ ಎಚ್ಚರಿಕೆ ಮೂಡಿಸುವ ಸಲುವಾಗಿ ಆರಂಭವಾದ ಕಾಲರ್​ ಟ್ಯೂನ್​ ಒಂದೆರೆಡು ತಿಂಗಳು ಕಳೆಯುವಷ್ಟರಲ್ಲೇ ಜನರ ಕೆಂಗಣ್ಣಿಗೆ ಗುರಿಯಾಗಿತ್ತು. ಅದು ಮುಗಿಯುವ ತನಕ ಕಾಲ್​ ಕನೆಕ್ಟ್​ ಆಗೋದೂ ಇಲ್ಲ, ಏನಾದರೂ ತುರ್ತು ಕೆಲಸ ಇದ್ದಾಗಲೇ ಬಂದು ಕಾಡುತ್ತೆ ಎಂದು ಬೈದುಕೊಂಡವರಿಗೆ ಲೆಕ್ಕವಿಲ್ಲ. ಇನ್ನೂ ಒಂದು ಹೆಜ್ಜೆ ಮುಂದೆಹೋಗಿ ಕೊರೊನಾ ಕಾಲರ್​ ಟ್ಯೂನ್​ ತೆಗೆಸುವಂತೆ ನ್ಯಾಯಾಲಯಕ್ಕೆ ಮನವಿ ಮಾಡಿದವರೂ ಇದ್ದಾರೆ.

ಕೊರೊನಾ ಲಸಿಕೆ ಶೀಘ್ರದಲ್ಲೇ ಲಭ್ಯವಾಗಲಿದೆ ಎಂಬ ಮಾಹಿತಿ ಹೊರಬಿದ್ದಾಗ ಲಸಿಕೆ ಸಿಗುತ್ತದೆ ಎಂದು ಖುಷಿಪಟ್ಟವರಂತೆಯೇ, ಲಸಿಕೆ ಬಂದ ಮೇಲಾದರೂ ಕಾಲರ್​ ಟ್ಯೂನ್​ನಿಂದ ಮುಕ್ತಿ ಸಿಗಬಹುದು ಎಂದು ಭಾವಿಸಿದವರಿದ್ದಾರೆ. ಆದರೆ ಅವರೆಲ್ಲರ ಊಹೆ ಸುಳ್ಳಾಗಿದ್ದು, ಈಗ ಲಸಿಕೆಯ ಜೊತೆಗೆ ಹೊಸ ಕಾಲರ್​ ಟ್ಯೂನ್​ ಬಂದುಬಿಟ್ಟಿದೆ!

ಕೊರೊನಾ ವೈರಸ್​ ಅಂದರೆ ಕೊವಿಡ್​ 19 ವಿರುದ್ಧ ಇಡೀ ದೇಶವೇ ಹೋರಾಡುತ್ತಿದೆ.. ಎಂಬ ಎಚ್ಚರಿಕೆ ಸಂದೇಶ ನೀಡುತ್ತಿದ್ದ ಕಾಲರ್​ ಟ್ಯೂನ್​ ಇದೀಗ ಕೊರೊನಾ ಲಸಿಕೆಯನ್ನು ಯಾವುದೇ ಹಿಂಜರಿಕೆಯಿಲ್ಲದೇ ತೆಗೆದುಕೊಳ್ಳಿ, ಲಸಿಕೆಯ ಮೇಲೆ ವಿಶ್ವಾಸವಿಡಿ ಎಂಬ ಮನವಿಯಾಗಿ ಬದಲಾಗಿದೆ.

ಕೆಮ್ಮಿನೊಂದಿಗೆ ಆರಂಭವಾಗುತ್ತಿದ್ದ ಮತ್ತು ಹಿರಿಯ ಬಾಲಿವುಡ್​ ನಟ ಅಮಿತಾಭ್​ ಬಚ್ಚನ್​ ಧ್ವನಿಯಲ್ಲಿ ಮೂಡಿಬರುತ್ತಿದ್ದ ಕಾಲರ್​ ಟ್ಯೂನ್​ ಸಹ ಸ್ಥಗಿತವಾಗಿದ್ದು, ಹೊಸಾ ಕಾಲರ್​ ಟ್ಯೂನ್​ನಲ್ಲಿ ಲಸಿಕೆಯ ಬಗ್ಗೆ ಜಾಗೃತಿ ಮತ್ತು ಹೆಚ್ಚಿನ ಮಾಹಿತಿಯನ್ನು ಎಲ್ಲಿ ಪಡೆಯಬೇಕು ಎಂಬೆಲ್ಲಾ ವಿವರಗಳನ್ನು ನೀಡಲಾಗುತ್ತಿದೆ.

ಭಾರತದಲ್ಲಿ ತಯಾರಾದ ಲಸಿಕೆಗಳ ಮೇಲೆ ವಿಶ್ವಾಸವಿಡಿ. ಅವು ಪರಿಣಾಮಕಾರಿಯಾಗಿದ್ದು, ನಿಮ್ಮನ್ನು ರೋಗದಿಂದ ರಕ್ಷಿಸಲಿವೆ ಎಂದು ಮಾಹಿತಿ ನೀಡಲಾಗುತ್ತಿದೆ. ಅದರೊಂದಿಗೆ ಮಾಸ್ಕ್​, ಸ್ಯಾನಿಟೈಸರ್​ ಬಳಕೆ ಹಾಗೂ ಸಾಮಾಜಿಕ ಅಂತರ ಪಾಲಿಸುವ ಕುರಿತೂ ಸಂದೇಶ ಸಾರಲಾಗುತ್ತಿರುವ ಕಾಲರ್​ ಟ್ಯೂನ್ ಬಹುತೇಕ ಎಲ್ಲಾ ಪ್ರಾದೇಶಿಕ ಭಾಷೆಗಳಲ್ಲಿಯೂ ಆರಂಭವಾಗಿದೆ.