ಭಾರತದ ವಾಯು ಪ್ರದೇಶಗಳಲ್ಲಿ ಪಾಕ್ ವಿಮಾನಗಳ ಹಾರಾಟ ಬಂದ್, ಗಾಳಿಯಲ್ಲಿ ಗಡಿಯನ್ನು ಹೇಗೆ ನಿರ್ಧರಿಸಲಾಗುತ್ತೆ?

ನವದೆಹಲಿ, ಮೇ 01: ಜಮ್ಮು ಮತ್ತು ಕಾಶ್ಮೀರದ ಅನಂತ್​ನಾಗ್​ ಜಿಲ್ಲೆಯಲ್ಲಿರುವ ಪಹಲ್ಗಾಮ್(Pahalgam)​ನಲ್ಲಿ ಉಗ್ರರು ದಾಳಿ ನಡೆಸಿ 26 ಮಂದಿಯನ್ನು ಹತ್ಯೆ ಮಾಡಿದ್ದರು. ಇದಾಗ ಬಳಿಕ ಭಾರತವು ಪಾಕಿಸ್ತಾನದ ವಿರುದ್ಧ ಕ್ರಮ ಕೈಗೊಳ್ಳುತ್ತಿದೆ. ಪಾಕಿಸ್ತಾನಿ ವಿಮಾನಗಳಿಗೆ ಭಾರತ ತನ್ನ ವಾಯುಪ್ರದೇಶವನ್ನು ಮುಚ್ಚಿದೆ. ಈ ನಿಷೇಧವು ಪಾಕಿಸ್ತಾನದ ಮಿಲಿಟರಿ ವಿಮಾನಗಳಿಗೂ ಅನ್ವಯಿಸುತ್ತದೆ. ಈ ಆದೇಶ ಗುರುವಾರ ರಾತ್ರಿ 12 ಗಂಟೆಯಿಂದ ಜಾರಿಗೆ ಬರಲಿದೆ. ಇದಕ್ಕೂ ಮೊದಲು, ಪಾಕಿಸ್ತಾನವು ಭಾರತೀಯ ವಿಮಾನಗಳಿಗೆ ತನ್ನ ವಾಯುಪ್ರದೇಶವನ್ನು ಮುಚ್ಚಿತ್ತು.

ಭಾರತ ಮತ್ತು ಪಾಕಿಸ್ತಾನದ ನಡುವೆ ನೇರ ವಿಮಾನ ಸಂಪರ್ಕವಿಲ್ಲ. ಪಾಕಿಸ್ತಾನಿ ವಿಮಾನಯಾನ ಸಂಸ್ಥೆಗಳು ಸಿಂಗಾಪುರ, ಮಲೇಷ್ಯಾ ಮತ್ತು ಇತರ ಪೂರ್ವ ಏಷ್ಯಾದ ದೇಶಗಳಿಗೆ ತಮ್ಮ ವಿಮಾನಗಳಿಗಾಗಿ ಭಾರತೀಯ ವಾಯುಪ್ರದೇಶವನ್ನು ಬಳಸುತ್ತವೆ.

ಆದರೆ, ಒಂದು ದೇಶದ ವಾಯುಪ್ರದೇಶದ ಮಾಲೀಕತ್ವಕ್ಕೆ ಸಂಬಂಧಿಸಿದ ನಿಯಮಗಳು ಮತ್ತು ನಿಬಂಧನೆಗಳು ಯಾವುವು?. ಒಂದು ದೇಶವು ಎಷ್ಟು ವಾಯುಪ್ರದೇಶವನ್ನು ಹೊಂದಬಹುದು ಎಂಬುದನ್ನು ಹೇಗೆ ನಿರ್ಧರಿಸಲಾಗುತ್ತದೆ? ವಾಯುಪ್ರದೇಶವನ್ನು ಮುಚ್ಚುವುದರಿಂದ ದೇಶಗಳಿಗೆ ಏನಾದರೂ ಹಾನಿಯಾಗುತ್ತದೆಯೇ?

ಮತ್ತಷ್ಟು ಓದಿ: ಭಯದಿಂದ ಕಂಪಿಸುತ್ತಿದೆ ಪಾಕ್, ಭಾರತ ಔಷಧಗಳ ಪೂರೈಕೆ ನಿಲ್ಲಿಸಿದ್ರೆ ಪಾಕ್​ ಪರಿಸ್ಥಿತಿ ಏನಾಗುತ್ತೆ?

ನಿಯಮ ಏನು ಹೇಳುತ್ತದೆ?
ವಾಯುಪ್ರದೇಶವನ್ನು ಭೂಮಿ ಮತ್ತು ಸಮುದ್ರ ಎರಡನ್ನೂ ಆವರಿಸುವ ವಾತಾವರಣದ ಭಾಗವೆಂದು ವ್ಯಾಖ್ಯಾನಿಸಲಾಗಿದೆ. ವಾಯುಪ್ರದೇಶವನ್ನು ಹಲವಾರು ಭಾಗಗಳಾಗಿ ವಿಂಗಡಿಸಲಾಗಿದೆ. ಅಂತಾರಾಷ್ಟ್ರೀಯ ನಾಗರಿಕ ವಿಮಾನಯಾನ ಸಮಾವೇಶದ 1 ನೇ ವಿಧಿಯಲ್ಲಿ ವಾಯುಪ್ರದೇಶದ ಸಾರ್ವಭೌಮತ್ವವನ್ನು ಹೇಳಲಾಗಿದೆ.

ಪ್ರತಿಯೊಂದು ದೇಶವು ತನ್ನ ಭೂಪ್ರದೇಶದ ಮೇಲಿರುವ ವಾಯುಪ್ರದೇಶದ ಮೇಲೆ ಸಂಪೂರ್ಣ ಮತ್ತು ವಿಶೇಷ ಸಾರ್ವಭೌಮತ್ವವನ್ನು ಹೊಂದಿದೆ ಎಂದು ಅದು ಹೇಳುತ್ತದೆ. ಯಾವುದೇ ದೇಶದ ಪ್ರಾದೇಶಿಕ ಗಡಿಯೊಳಗೆ ಇಲ್ಲದ ವಾಯುಪ್ರದೇಶವನ್ನು ಅಂತಾರಾಷ್ಟ್ರೀಯ ವಾಯುಪ್ರದೇಶವೆಂದು ಪರಿಗಣಿಸಲಾಗುತ್ತದೆ.

ವಿಶ್ವಸಂಸ್ಥೆಯ ಸಮುದ್ರ ಕಾನೂನಿನ ಸಮಾವೇಶ (UNCLOS) ಮತ್ತು ಅಂತಾರಾಷ್ಟ್ರೀಯ ನಾಗರಿಕ ವಿಮಾನಯಾನ ಸಮಾವೇಶ (ಚಿಕಾಗೋ ಸಮಾವೇಶ) ವಾಯುಪ್ರದೇಶಕ್ಕೆ ಸಂಬಂಧಿಸಿದ ನಿಬಂಧನೆಗಳನ್ನು ವ್ಯಾಖ್ಯಾನಿಸುತ್ತವೆ. ಅಂತಾರಾಷ್ಟ್ರೀಯ ವಾಯುಪ್ರದೇಶದ ಒಂದು ಭಾಗವನ್ನು ನಿಯಂತ್ರಿಸಲು ದೇಶಗಳು ಒಪ್ಪಂದಗಳನ್ನು ಮಾಡಿಕೊಳ್ಳಬಹುದು ಎಂದು ಅದು ಹೇಳುತ್ತದೆ.

ವಿಮಾನ ಪರವಾನಗಿ ಕೂಡ ಅಗತ್ಯವಿದೆ
ವಿಮಾನ ಪರವಾನಗಿ ಎಂದರೆ ಒಂದು ನಿರ್ದಿಷ್ಟ ದೇಶದ ವಾಯುಪ್ರದೇಶದಲ್ಲಿ ವಿಮಾನವು ಟೇಕ್ ಆಫ್ ಮಾಡಲು, ಇಳಿಯಲು ಅಥವಾ ನಿಲ್ಲಲು ಅಗತ್ಯವಿರುವ ಅನುಮತಿ. ಈ ಬಗ್ಗೆ ಎಲ್ಲಾ ದೇಶಗಳು ತಮ್ಮದೇ ಆದ ನಿಯಮಗಳನ್ನು ಹೊಂದಿವೆ. ಸಾಮಾನ್ಯವಾಗಿ, ಈ ವಿಮಾನಗಳನ್ನು ನಿರ್ವಹಿಸುವ ಕಂಪನಿಗಳು ಸೇವೆಗಳನ್ನು ಬಳಸಲು ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.

ಭಾರತದಲ್ಲಿ, ಭಾರತೀಯ ವಾಯುಪ್ರದೇಶವನ್ನು ಬಳಸುವುದಕ್ಕಾಗಿ ಅಂತಾರಾಷ್ಟ್ರೀಯ ವಿಮಾನಗಳಿಗೆ ವಿಧಿಸಲಾಗುವ ಶುಲ್ಕವನ್ನು DGCA ನಿರ್ಧರಿಸುತ್ತದೆ. ವಾಯುಪ್ರದೇಶವನ್ನು ಮುಚ್ಚುವುದರಿಂದ ಎರಡೂ ಕಡೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಭಾರತ ಮತ್ತು ಪಾಕಿಸ್ತಾನ ವಾಯುಪ್ರದೇಶವನ್ನು ಮುಚ್ಚಿರುವುದರಿಂದ, ವಿಮಾನಗಳು ಈಗ ದೀರ್ಘಕಾಲದವರೆಗೆ ಪರ್ಯಾಯ ಆಯ್ಕೆಗಳನ್ನು ಹುಡುಕಬೇಕಾಗುತ್ತದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ