Video: 15 ಸಾವಿರ ಅಡಿ ಎತ್ತರದಲ್ಲಿ, ಹಿಮಾಚ್ಛಾದಿತ ಪ್ರದೇಶದಲ್ಲಿ ಧ್ವಜಾರೋಹಣ ಮಾಡಿ, ಸಂಭ್ರಮಿಸಿದ ಐಟಿಬಿಪಿ ಹಿಮವೀರರು !

ಭಾರತ ಇಂದು 73ನೇ ಗಣರಾಜ್ಯೋತ್ಸವ ಆಚರಿಸುತ್ತಿದೆ. ಎಲ್ಲೆಡೆ ಧ್ವಜಾರೋಹಣ ನಡೆಸಲಾಗುತ್ತಿದೆ. ಅದರಲ್ಲಿ ತುಂಬ ಗಮನ ಸೆಳೆದಿದ್ದು, ಇಂಡೋ-ಟಿಬೆಟಿಯನ್​ ಬಾರ್ಡರ್ ಪೊಲೀಸ್​ (ITBP) ಪಡೆಯ ಸಿಬ್ಬಂದಿಯ ಧ್ವಜಾರೋಹಣ. ಇವರು ಲಡಾಖ್​ ಗಡಿಯಲ್ಲಿರುವ ಸುಮಾರು 15 ಸಾವಿರ ಅಡಿ ಎತ್ತರದ ಪ್ರದೇಶದಲ್ಲಿ, ಮೈನಸ್​ 35 ಡಿಗ್ರಿ ಸೆಲ್ಸಿಯಸ್​ ತಾಪಮಾನದಲ್ಲಿ  ಧ್ವಜಾರೋಹಣ ಮಾಡಿ, ಗಣರಾಜ್ಯೋತ್ಸವ ಆಚರಣೆ ಮಾಡಿದ್ದಾರೆ. ಹಿಮಾಚ್ಛಾದಿತ ಪ್ರದೇಶದಲ್ಲಿ, ಅಷ್ಟೇ ಬಿಳಿ ಬಣ್ಣದ ಸಮವಸ್ತ್ರ ಧರಿಸಿದ ಯೋಧರು, ಕೈಯಲ್ಲಿ ರಾಷ್ಟ್ರ ಧ್ವಜ ಹಿಡಿದು, ಭಾರತ್​ ಮಾತಾ ಕೀ ಜೈ ಎನ್ನುತ್ತ ಸಾಗಿದ್ದಾರೆ. ಈ ವಿಡಿಯೋವನ್ನು ಐಟಿಬಿಪಿ ಟ್ವಿಟರ್​ ಅಕೌಂಟ್​​ನಿಂದ ಶೇರ್​ ಮಾಡಲಾಗಿದೆ. ಅಂದಹಾಗೇ, ಯೋಧರು ಕೇವಲ ಲಡಾಖ್​​ನಲ್ಲಷ್ಟೇ ಅಲ್ಲ, ಹೀಗೆ ಭಾರತದ ಅತ್ಯಂತ ಎತ್ತರದ ಪ್ರದೇಶಗಳಲ್ಲಿ, ಹಿಮಾಚ್ಛಾದಿತ ಸ್ಥಳಗಳಲ್ಲಿ ಚಳಿಯ ಮಧ್ಯೆ ಗಣರಾಜ್ಯೋತ್ಸವ ಆಚರಣೆ ಮಾಡಿದ್ದಾರೆ. ಅಂದಹಾಗೇ, ಈ ಪ್ರದೇಶಗಳಲ್ಲಿ ದೇಶ ಕಾಯುವವರನ್ನು ಹಿಮವೀರರು ಎಂದೇ ಕರೆಯಲಾಗುತ್ತದೆ.

ಹಾಗೇ, ಉತ್ತರಾಖಂಡ್​ನ ಔಲಿ ಎಂಬಲ್ಲಿ ಕೂಡ ಮೈನಸ್​ 20 ಡಿಗ್ರಿ ಸೆಲ್ಸಿಯಸ್​ ತಾಪಮಾನದಲ್ಲಿ, 11 ಸಾವಿರ ಅಡಿ ಎತ್ತರದಲ್ಲಿ ಐಟಿಬಿಪಿ ಸೈನಿಕರು ಧ್ವಜಾರೋಹಣ ನಡೆಸಿದ್ದಾರೆ. ಇವರು ತ್ರಿವರ್ಣ ಧ್ವಜ ಎತ್ತಿ ಹಿಡಿದು ಅಲ್ಲೇ ಪಥ ಸಂಚಲನ ಮಾಡಿದ ವಿಡಿಯೋ ಕೂಡ ವೈರಲ್ ಆಗಿದೆ.

ಅಂದಹಾಗೆ, ಇವತ್ತು ಐಟಿಬಿಪಿಯ ಡೇರ್​ ಡೆವಿಲ್​ ಬೈಕರ್​ಗಳು ರಾಜಪಥ್​​ನಲ್ಲಿ ನಡೆಯಲಿರುವ ಪರೇಡ್​ನಲ್ಲಿ 10 ವಿವಿಧ ರೀತಿಯ ರಚನೆಗಳನ್ನು ಪ್ರದರ್ಶನ ಮಾಡಲಿದ್ದಾರೆ. ಇಷ್ಟು ವಿಧದ ಸಾಹಸ ರಚನೆಗಳನ್ನು ಐಟಿಬಿಪಿ ಸಿಬ್ಬಂದಿ ಪ್ರದರ್ಶಿಸುತ್ತಿರುವುದು ಇದೇ ಮೊದಲ ಬಾರಿ ಎನ್ನಲಾಗಿದೆ. 1962ರಲ್ಲಿ ಐಟಿಬಿಪಿ ರಚನೆಯಾಗಿದೆ.

ಇದನ್ನೂ ಓದಿ: Republic Day 2022: ಕರ್ನಾಟಕದ ಜನತೆಯನ್ನು ಉದ್ದೇಶಿಸಿ ರಾಜ್ಯಪಾಲ ಥಾವರ್​ ಚಂದ್ ಗೆಹ್ಲೋಟ್ ಭಾಷಣ