ಮಾವನ ಮನೆಯಲ್ಲಿ ಚಿನ್ನ ಕದ್ದು ಥಾರ್ ಕಾರು ಖರೀದಿಸಿದ ಅಳಿಯ: ಮಾವನ ಕೈಯಲ್ಲೇ ಪೂಜೆ ಮಾಡಿಸಿ ಸಿಕ್ಕಿಬಿದ್ದ

ಕೊಲ್ಹಾಪುರ, ಅ.26: ಮಹಾರಾಷ್ಟ್ರದ ಕೊಲ್ಹಾಪುರ ಜಿಲ್ಲೆಯಲ್ಲಿ ಅತ್ಯಂತ ವಿಚಿತ್ರ ಹಾಗೂ ಆಘಾತಕಾರಿ ಕಳವು ಪ್ರಕರಣವೊಂದು ಬೆಳಕಿಗೆ ಬಂದಿದೆ. 19 ವರ್ಷದ ಯುವಕನೊಬ್ಬ ತನ್ನ ಸ್ವಂತ ಮಾವನ ಮನೆಯಲ್ಲೇ ಚಿನ್ನಾಭರಣ ಕದ್ದು, ಅದನ್ನು ಮಾರಿ ಮಹೀಂದ್ರಾ ಥಾರ್ ಎಸ್‌ಯುವಿ ಕಾರು ಖರೀದಿ ಮಾಡಿದ್ದಾನೆ. ವಿಪರ್ಯಾಸವೆಂದರೆ, ಕದ್ದ ಹಣದಲ್ಲಿ ತಂದ ಕಾರಿನ ಪೂಜೆ ಮಾಡಲು ಅದೇ ಮಾವನನ್ನು ಅತ್ಯಂತ ವಿಜೃಂಭಣೆಯಿಂದ ಆಹ್ವಾನಿಸಿ, ಕೊನೆಗೆ ಪೊಲೀಸರ ಅತಿಥಿಯಾಗಿದ್ದಾನೆ.

ಆರೋಪಿ ಸಮರ್ ಚವಾಣ್ (19) ಎಂಬ ಯುವಕ, ತನ್ನ ಮಾವ ಉಮೇಶ್ ಮಾರುತಿ ಚವಾಣ್ ಅವರ ಮನೆಯಲ್ಲಿದ್ದ ಸುಮಾರು 150 ಗ್ರಾಂ ಚಿನ್ನಾಭರಣಗಳನ್ನು ಕದ್ದಿದ್ದ. ನಂತರ ಆ ಆಭರಣಗಳನ್ನು ಸ್ಥಳೀಯ ಅಕ್ಕಸಾಲಿಗನಿಗೆ ಮಾರಿ 10 ಲಕ್ಷ ರೂ. ನಗದು ಪಡೆದಿದ್ದ. ಸಿಕ್ಕ ಹಣದಿಂದ ತಕ್ಷಣವೇ ಶೋಕಿಗಾಗಿ ಮಹೀಂದ್ರಾ ಥಾರ್ ಎಸ್‌ಯುವಿ ಕಾರನ್ನು ಖರೀದಿಸಿದ್ದ ಸಮರ್, ಕಾರಿನ ಪೂಜೆಗಾಗಿ ಮನೆಯವರ ಜೊತೆಗೆ ಮಾವ ಉಮೇಶ್ ಚವಾಣ್ ಅವರನ್ನೂ ಕರೆದಿದ್ದ.

ಅಳಿಯ ಹೊಸ ಕಾರು ತಂದ ಖುಷಿಯಲ್ಲಿ ಪೂಜೆಗೆ ಹೊರಡಲು ಸಿದ್ಧರಾಗುತ್ತಿದ್ದ ಮಾವ ಉಮೇಶ್, ಹೆಂಡತಿಯ ಆಭರಣ ಧರಿಸಲು ಸೇಫ್ ಲಾಕರ್ ಪರಿಶೀಲಿಸಿದಾಗ ಕಳವು ಬೆಳಕಿಗೆ ಬಂದಿದೆ. ಮನೆಯಲ್ಲಿ ಯಾವುದೇ ಬಲವಂತದ ಬಾಗಿಲು ಮುರಿದ ಕುರುಹುಗಳಿಲ್ಲದ ಕಾರಣ, ಒಳಗಿನವರೇ ಕದ್ದಿರಬಹುದು ಎಂದು ಶಂಕಿಸಿ ಪೊಲೀಸರಿಗೆ ದೂರು ನೀಡಿದ್ದರು.

ಇದನ್ನೂ ಓದಿ: ಒಂದೇ ಹೆಸರು.. ಸಾವಿರಾರು ಬಂಧಗಳು: ಶ್ರೀನಿವಾಸುಲ ಸೇವಾ ಸಂಸ್ಥೆ 3ನೇ ವರ್ಷಾಚರಣೆಯಲ್ಲಿ ಶ್ರೀನಿವಾಸ್‌ ಹೆಸರಿನ 5 ಸಾವಿರ ವ್ಯಕ್ತಿಗಳು ಭಾಗಿ

ಡಿಎಸ್ಪಿ ಶ್ರೀಕಾಂತ್ ಠಿಕಾಣೆ ನೇತೃತ್ವದ ಪೊಲೀಸ್ ತಂಡ ಪ್ರಕರಣದ ತನಿಖೆ ಕೈಗೆತ್ತಿಕೊಂಡಾಗ, 19 ವರ್ಷದ ಸಮರ್ ಯಾವುದೇ ಉದ್ಯೋಗವಿಲ್ಲದೆ ಏಕಾಏಕಿ ಕೋಟ್ಯಂತರ ಮೌಲ್ಯದ ಐಷಾರಾಮಿ ಥಾರ್ ಕಾರನ್ನು ಹೇಗೆ ಖರೀದಿಸಿದ ಎಂಬ ಅನುಮಾನ ಮೂಡಿದೆ. ಸಮರ್‌ನನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದಾಗ, ತಾನೇ ಮಾವನ ಮನೆಯಲ್ಲಿ ಚಿನ್ನ ಕದ್ದು ಕಾರು ಖರೀದಿಸಿದ್ದಾಗಿ ಒಪ್ಪಿಕೊಂಡಿದ್ದಾನೆ. ಪೊಲೀಸರು ಸಮರ್ ಚವಾಣ್‌ನನ್ನು ಬಂಧಿಸಿದ್ದು, ಕದ್ದ ಚಿನ್ನವನ್ನು ಖರೀದಿಸಿದ ಅಕ್ಕಸಾಲಿಗನನ್ನೂ ಬಂಧಿಸಿದ್ದಾರೆ. ಕದ್ದ ಹಣದಲ್ಲೇ ಕಾರು ತಂದು, ಪೂಜೆಗೆ ತಮ್ಮನ್ನೇ ಕರೆದ ಅಳಿಯನ ವಿಕೃತ ಬುದ್ಧಿಗೆ ಕುಟುಂಬಸ್ಥರು ತೀವ್ರ ದಿಗ್ಭ್ರಮೆಗೊಂಡಿದ್ದಾರೆ.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ