ಕಿರಿಯ ಅಧಿಕಾರಿಯನ್ನು ನಿಂದಿಸಿದ ವಿಡಿಯೊ ವೈರಲ್; ಬಿಹಾರದ ಐಎಎಸ್ ಅಧಿಕಾರಿ ಅಮಾನತಿಗೆ ಒತ್ತಾಯ

ಪಾಟ್ನಾ: ಬಿಹಾರದ (Bihar) ಹಿರಿಯ ಅಧಿಕಾರಿಯೊಬ್ಬರು ತಮ್ಮ ಇಲಾಖೆಯಲ್ಲಿ ನಡೆದ ಪರಿಶೀಲನಾ ಸಭೆಯ ವೇಳೆ ಕಿರಿಯ ಅಧಿಕಾರಿಯನ್ನು ಅವಾಚ್ಯವಾಗಿ ನಿಂದಿಸಿರುವುದು ಕ್ಯಾಮರಾದಲ್ಲಿ ಸೆರೆಯಾಗಿದೆ. ಐಎಎಸ್ (IAS) ಅಧಿಕಾರಿ ಕೆಕೆ ಪಾಠಕ್ ಎಂಬವರು ಕಿರಿಯ ಅಧಿಕಾರಿಯನ್ನು ಬೈಯುತ್ತಿರುವ ವಿಡಿಯೊ ವೈರಲ್ ಆಗಿದ್ದು, ಬಿಹಾರದ ಆಡಳಿತ ಸೇವಾ ಇಲಾಖೆ ಅಧಿಕಾರಿಯನ್ನು ವಜಾಗೊಳಿಸುವಂತೆ ಒತ್ತಾಯಿಸಿದೆ.
“ಇಲ್ಲಿನ ಜನರಿಗೆ ಬುದ್ಧಿಯಿಲ್ಲ. ಚೆನ್ನೈನಲ್ಲಿ ಜನರು ನಿಯಮಗಳನ್ನು ಅನುಸರಿಸುತ್ತಾರೆ. ಇಲ್ಲಿ ಯಾರಾದರೂ ಟ್ರಾಫಿಕ್ ನಿಯಮಗಳನ್ನು ಅನುಸರಿಸುವುದನ್ನು ನೀವು ನೋಡಿದ್ದೀರಾ? ಅವರು ಕೆಂಪು ದೀಪದಲ್ಲಿಯೂ ಸಹ ಹಾರ್ನ್ ಮಾಡುತ್ತಲೇ ಇರುತ್ತಾರೆ” ಎಂದು ಬಿಹಾರ ಸರ್ಕಾರದ ಪ್ರೊಹಿಬಿಷನ್ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಪಾಠಕ್ ಅಧಿಕಾರಿಗಳ ಸಭೆಯಲ್ಲಿ ಹೇಳುತ್ತಿರುವುದು ವಿಡಿಯೊದಲ್ಲಿದೆ.

ಆಗ ಡೆಪ್ಯುಟಿ ಕಲೆಕ್ಟರ್, ಅವರಲ್ಲಿ ಕ್ಷಮೆಯಾಚಿಸಲು ಪ್ರಯತ್ನಿಸುತ್ತಿರುವುದನ್ನು ಕಾಣಬಹುದು. ತಮ್ಮ ವಿರುದ್ಧ ದೂರು ನೀಡಿದ್ದಕ್ಕಾಗಿ ಬಿಹಾರ ಅಧಿಕಾರಿಗಳ ಸಂಘಟನೆ ವಿರುದ್ಧ ಗುಡುಗಿದ ಪಾಠಕ್, ಈಗ ನಾನು ಅವರಿಗೆ ತೋರಿಸುತ್ತೇನೆ … ನಾನು 32 ವರ್ಷಗಳಿಂದ ಇಲ್ಲಿದ್ದೇನೆ” ಎಂದಿದ್ದಾರೆ.

ವರದಿಗಳ ಪ್ರಕಾರ, ತರಬೇತಿಯ ಸಮಯದಲ್ಲಿ ಡೆಪ್ಯೂಟಿ ಕಲೆಕ್ಟರ್‌ ಜತೆಗೆ ಕೆಟ್ಟದಾಗಿ ನಡೆದುಕೊಂಡಿದ್ದಕ್ಕಾಗಿ ಪಾಠಕ್ ಅವರ ವಿರುದ್ಧ ದಾಖಲಾಗಿರುವ ದೂರಿನ ಬಗ್ಗೆ ಅಸಮಾಧಾನಗೊಂಡಿದ್ದಾರೆ. ನವೆಂಬರ್‌ನಲ್ಲಿ ಗಯಾದಲ್ಲಿ ಬಿಹಾರ ಸರ್ಕಾರ ದೂರು ದಾಖಲಿಸಿತ್ತು.
ಕೆಕೆ ಪಾಠಕ್ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳಲಾಗುವುದು ಎಂದು ಬಿಹಾರ ಸರ್ಕಾರದ ಪ್ರೊಹಿಬಿಷನ್, ಅಬಕಾರಿ ಮತ್ತು ನೋಂದಣಿ ಸಚಿವ ಸುನಿಲ್ ಕುಮಾರ್ ಹೇಳಿದ್ದಾರೆ.

ಇದನ್ನೂ ಓದಿ:ಈರೋಡ್ ಪೂರ್ವ ವಿಧಾನಸಭಾ ಕ್ಷೇತ್ರ ಉಪಚುನಾವಣೆ: ಎಐಎಡಿಎಂಕೆ ಪೋಸ್ಟರ್​​ನಲ್ಲಿಲ್ಲ ಮೋದಿ ಸೇರಿದಂತೆ ಬಿಜೆಪಿ ನಾಯಕರ ಚಿತ್ರ

ಸರಕಾರ ಆದಷ್ಟು ಬೇಗ ಕೆ.ಕೆ.ಪಾಠಕ್ ಅವರನ್ನು ವಜಾಗೊಳಿಸಬೇಕು. ಅವನು ಒಳ್ಳೆಯ ಮನಸ್ಥಿತಿಯಲ್ಲಿಲ್ಲ. ಪ್ರೊಹಿಬಿಷನ್ ಇಲಾಖೆಯ ಕಾರ್ಯದರ್ಶಿಯಾಗಿರುವುದರ ಜೊತೆಗೆ, ಅವರು BIPARD ನ ಉಸ್ತುವಾರಿಯನ್ನೂ ಹೊಂದಿದ್ದಾರೆ.ತರಬೇತಿ ಸಮಯದಲ್ಲಿ ಅವರು ಬಿಹಾರದ ಅಧಿಕಾರಿಗಳಿಗೆ ಕಿರುಕುಳ ನೀಡುತ್ತಾರೆ. ಏತನ್ಮಧ್ಯೆ, ಒಬ್ಬ ಅಧಿಕಾರಿ ಕೂಡ ಸಾರ್ವಜನಿಕವಾಗಿ ಅವಮಾನಕ್ಕೊಳಗಾದ ನಂತರ ಸಾವನ್ನಪ್ಪಿದ್ದಾರೆ. ಈ ವಿಡಿಯೋ ಬಗ್ಗೆ ನಮ್ಮ ಎಲ್ಲಾ ಅಧಿಕಾರಿಗಳು ಕೋಪಗೊಂಡಿದ್ದಾರೆ. ಆದಷ್ಟು ಬೇಗ ಕ್ರಮ ಕೈಗೊಳ್ಳಲಿದ್ದೇವೆ. ಸದ್ಯ ಅವರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಮತ್ತು ಮುಖ್ಯ ಕಾರ್ಯದರ್ಶಿಗಳಿಗೆ ಮನವಿ ಮಾಡಲಾಗಿದೆ ಎಂದು ಅಧಿಕಾರಿಗಳ ಮಂಡಳಿಯ ಮುಖ್ಯಸ್ಥ ಸುನಿಲ್ ತಿವಾರಿ ಹೇಳಿದ್ದಾರೆ.

1990-ಬ್ಯಾಚ್ ಅಧಿಕಾರಿಯಾಗಿರುವ ಪಾಠಕ್ ಅವರು ಕೇಂದ್ರ ನಿಯೋಜನೆಯಿಂದ ಹಿಂದಿರುಗಿದ ನಂತರ 2020 ರಲ್ಲಿ ಪ್ರೊಹಿಬಿಷನ್ ಮತ್ತು ಅಬಕಾರಿ ಇಲಾಖೆಯಲ್ಲಿ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ (ACS) ಆಗಿ ನೇಮಕಗೊಂಡಿದ್ದರು.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ