‘ಆಡಳಿತ ಬದಲಾವಣೆ’ ಕೂಗಿದವರಿಗೆ ಸರ್ಕಾರಿ ಉದ್ಯೋಗ ಸಿಗಲ್ವಾ? ಉತ್ತರ ಪ್ರದೇಶ ಸರ್ಕಾರದ ಹೊಸ ನಿಯಮಗಳಲ್ಲೇನಿದೆ?

ಲಕ್ನೋ, ಅಕ್ಟೋಬರ್ 29: ಸರ್ಕಾರಿ ಉದ್ಯೋಗ ಪಡೆಯಲು ಅರ್ಹತೆ ಮತ್ತು ವಿದ್ಯಾರ್ಹತೆ ಮಾತ್ರವಲ್ಲ, ಅಭ್ಯರ್ಥಿಯ ನಡವಳಿಕೆಯ ಪರಿಶೀಲನೆಯೂ ಮುಖ್ಯ. ಈ ಹಿನ್ನೆಲೆಯಲ್ಲಿ ಉತ್ತರ ಪ್ರದೇಶದ ಯೋಗಿ ಆದಿತ್ಯನಾಥ್ ನೇತೃತ್ವದ ಸರ್ಕಾರವು ಸರ್ಕಾರಿ ಉದ್ಯೋಗಗಳ ನೇರ ನೇಮಕಾತಿಗೆ ಸಂಬಂಧಿಸಿದ ವ್ಯಕ್ತಿತ್ವ ಮತ್ತು ನಡವಳಿಕೆ ಪರಿಶೀಲನಾ ನಿಯಮಗಳನ್ನು ಬಿಗಿಗೊಳಿಸಿದೆ.

ಸಾತ್ಮಕ ಮಾರ್ಗದ ಮೂಲಕ ಅಸ್ತಿತ್ವದಲ್ಲಿರುವ ಸಾಮಾಜಿಕ ವ್ಯವಸ್ಥೆಯನ್ನು ಬದಲಾಯಿಸಲು ಪ್ರಯತ್ನಿಸುವ ಸಂಘಟನೆಗಳ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿದವರನ್ನು ಸರ್ಕಾರಿ ಸೇವೆಗೆ ಅನರ್ಹರೆಂದು ಪರಿಗಣಿಸುವ ಅವಕಾಶವನ್ನು ಹೊಸ ಮಾರ್ಗಸೂಚಿ ವಿವರಿಸುತ್ತದೆ. ಆದರೆ ಕೇವಲ ರಾಜಕೀಯ ಅಭಿಪ್ರಾಯ ಹೊಂದಿರುವುದರಿಂದ ಅಥವಾ ಅಭ್ಯರ್ಥಿಯ ವಿರುದ್ಧ ಎಫ್‌ಐಆರ್ ದಾಖಲಾಗಿರುವುದರಿಂದಲೇ ಅವರನ್ನು ಸರ್ಕಾರಿ ಉದ್ಯೋಗಕ್ಕೆ ಅನರ್ಹಗೊಳಿಸುವಂತಿಲ್ಲ ಎಂದು ಆದೇಶ ಸ್ಪಷ್ಟಪಡಿಸಿದೆ.

ಈ ಕ್ರಮವು ಇತ್ತೀಚಿನ ಪ್ರತಿಭಟನೆಗಳಲ್ಲಿ ಕೇಳಿಬಂದಿದ್ದ ‘ಆಡಳಿತ ಬದಲಾವಣೆ’ ಘೋಷಣೆಗಳ ಹಿನ್ನೆಲೆಯಲ್ಲಿ ರಾಜಕೀಯ ಚರ್ಚೆಗೆ ಕಾರಣವಾಗಿದೆ. ಸಮಾಜವಾದಿ ಪಕ್ಷ ಮತ್ತು ಕಾಂಗ್ರೆಸ್ ಸೇರಿದಂತೆ ವಿರೋಧ ಪಕ್ಷಗಳು ಸರ್ಕಾರದ ಕ್ರಮವನ್ನು ಟೀಕಿಸಿವೆ.

ರಾಜಕೀಯ ಸಿದ್ಧಾಂತದ ಆಧಾರದಲ್ಲಿ ಅನರ್ಹತೆ ಇಲ್ಲ

ಸರ್ಕಾರದ ಆದೇಶದ ಪ್ರಕಾರ, ಅಭ್ಯರ್ಥಿ ಯಾವ ರಾಜಕೀಯ ಪಕ್ಷವನ್ನು ಬೆಂಬಲಿಸುತ್ತಾರೆ ಅಥವಾ ಯಾವ ರಾಜಕೀಯ ಅಭಿಪ್ರಾಯ ಹೊಂದಿದ್ದಾರೆ ಎಂಬ ಕಾರಣಕ್ಕೆ ಮಾತ್ರ ಅವರನ್ನು ಕೆಲಸಕ್ಕೆ ಅನರ್ಹಗೊಳಿಸುವಂತಿಲ್ಲ. ಆದರೆ ಹಿಂಸಾತ್ಮಕ ಮಾರ್ಗದ ಮೂಲಕ ಅಸ್ತಿತ್ವದಲ್ಲಿರುವ ವ್ಯವಸ್ಥೆಯನ್ನು ಬದಲಿಸಲು ಉದ್ದೇಶಿಸಿರುವ ಸಂಘಟನೆಗಳ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿರುವುದು ದೃಢಪಟ್ಟರೆ, ನೇಮಕಾತಿ ನಿರಾಕರಿಸುವ ಸಾಧ್ಯತೆ ಇದೆ. ಅಭ್ಯರ್ಥಿ 21 ವರ್ಷ ತುಂಬಿದ ಬಳಿಕ ಇಂತಹ ಚಟುವಟಿಕೆಗಳಲ್ಲಿ ಭಾಗವಹಿಸಿದ್ದಾರೆಯೇ ಮತ್ತು ಪರಿಶೀಲನೆಗೆ ಮುಂಚಿನ ಮೂರು ವರ್ಷಗಳಲ್ಲಿ ಅವರ ನಡವಳಿಕೆ ಹೇಗಿತ್ತು ಎಂಬುದನ್ನೂ ಪರಿಗಣಿಸಬಹುದು.

ಇದನ್ನೂ ಓದಿ: Video: ಕೆಲಸ ಕಳೆದುಕೊಂಡದ್ದು ನಷ್ಟಕ್ಕಿಂತ ಲಾಭವೇ ಹೆಚ್ಚು; ಭಾರತೀಯ ಯುವತಿ ಹೀಗೆನ್ನಲು ನೀಡಿದ ಕಾರಣ ಇಲ್ಲಿದೆ

ಎಫ್‌ಐಆರ್ ಇದ್ದರೆ ಸರ್ಕಾರಿ ಕೆಲಸ ಸಿಗುವುದಿಲ್ಲವೇ?

ಇಲ್ಲ. ಅಭ್ಯರ್ಥಿಯ ವಿರುದ್ಧ ಎಫ್‌ಐಆರ್ ದಾಖಲಾಗಿದೆ ಅಥವಾ ತನಿಖೆ ನಡೆಯುತ್ತಿದೆ ಎಂಬ ಒಂದೇ ಕಾರಣಕ್ಕೆ ಅವರನ್ನು ಸ್ವಯಂಚಾಲಿತವಾಗಿ ಅನರ್ಹಗೊಳಿಸುವಂತಿಲ್ಲ. ಅಭ್ಯರ್ಥಿಯ ವಿರುದ್ಧದ ಆರೋಪಗಳ ಸ್ವರೂಪ, ಪ್ರಕರಣದ ಕಾನೂನು ಸ್ಥಿತಿ ಮತ್ತು ಪರಿಶೀಲನೆಯಲ್ಲಿ ದೊರೆತ ಮಾಹಿತಿಯನ್ನು ಪರಿಗಣಿಸಬೇಕು. ಪರಿಶೀಲನಾ ವರದಿ ಪ್ರತಿಕೂಲವಾಗಿದ್ದರೆ, ಅಭ್ಯರ್ಥಿಗೆ ತಮ್ಮ ವಾದವನ್ನು ಮಂಡಿಸಲು ಅವಕಾಶ ನೀಡುವ ವ್ಯವಸ್ಥೆಯೂ ಇದೆ.

ಪೊಲೀಸ್ ಪರಿಶೀಲನೆಗೆ 30 ದಿನಗಳ ಗಡುವು

ಹೊಸ ಮಾರ್ಗಸೂಚಿಯ ಪ್ರಕಾರ, ಜಿಲ್ಲಾ ಪೊಲೀಸರು ಮತ್ತು ಸ್ಥಳೀಯ ಗುಪ್ತಚರ ಘಟಕ (LIU) ಪರಿಶೀಲನಾ ಮನವಿ ಸ್ವೀಕರಿಸಿದ ಬಳಿಕ 30 ದಿನಗಳೊಳಗೆ ವರದಿ ಸಲ್ಲಿಸಬೇಕು. ಪರಿಶೀಲನೆಗಾಗಿ ಅಭ್ಯರ್ಥಿ ಖುದ್ದಾಗಿ ಹಾಜರಾಗುವುದು ಅಥವಾ ಪೊಲೀಸರು ಮನೆಗೆ ಭೇಟಿ ನೀಡುವುದು ಕಡ್ಡಾಯವಲ್ಲ ಎಂದು ವರದಿಗಳು ತಿಳಿಸಿವೆ. ಪರಿಶೀಲನಾ ವರದಿ ಬಾಕಿಯಿದೆ ಎಂಬ ಕಾರಣಕ್ಕೆ ಮಾತ್ರ ನೇಮಕಾತಿ ಪತ್ರವನ್ನು ತಡೆಹಿಡಿಯಬೇಕಾಗಿಲ್ಲ; ಅಗತ್ಯ ದಾಖಲೆಗಳು ಮತ್ತು ಸ್ವಯಂ ಘೋಷಣೆಯ ಆಧಾರದಲ್ಲಿ ತಾತ್ಕಾಲಿಕ ನೇಮಕಾತಿ ನೀಡುವ ಅವಕಾಶವೂ ಇರಬಹುದು. ಆದರೆ ಅಭ್ಯರ್ಥಿ ತಪ್ಪು ಮಾಹಿತಿ ನೀಡಿರುವುದು ಅಥವಾ ಅನರ್ಹತೆ ದೃಢಪಟ್ಟರೆ ನೇಮಕಾತಿ ರದ್ದಾಗಬಹುದು.

ಈಗಾಗಲೇ ಸರ್ಕಾರಿ ಕೆಲಸದಲ್ಲಿರುವವರಿಗೆ ಏನು ನಿಯಮ?

ಈಗಾಗಲೇ ಸರ್ಕಾರಿ ಸೇವೆಯಲ್ಲಿರುವ ನೌಕರರಿಗೆ ಇದೇ ಪ್ರಕ್ರಿಯೆಯಡಿ ಮತ್ತೆ ಹೊಸದಾಗಿ ವ್ಯಕ್ತಿತ್ವ ಪರಿಶೀಲನೆ ನಡೆಸಬೇಕಾಗಿಲ್ಲ. ಆದರೂ ಅಗತ್ಯವಿದ್ದರೆ ಅವರ ಹಿಂದಿನ ಇಲಾಖೆಯಿಂದ ಸೇವಾ ದಾಖಲೆ ಮತ್ತು ನಡವಳಿಕೆಯ ಕುರಿತು ಮಾಹಿತಿ ಪಡೆಯಬಹುದು.

ವಿರೋಧ ಪಕ್ಷಗಳ ಆಕ್ಷೇಪವೇನು?

ಈ ಹೊಸ ನಿಯಮವು ಪ್ರತಿಭಟನೆ ಮತ್ತು ರಾಜಕೀಯ ಭಿನ್ನಾಭಿಪ್ರಾಯದ ಸ್ವಾತಂತ್ರ್ಯದ ಮೇಲೆ ಪರಿಣಾಮ ಬೀರಬಹುದೆಂಬ ಆತಂಕವನ್ನು ವಿರೋಧ ಪಕ್ಷಗಳು ವ್ಯಕ್ತಪಡಿಸಿವೆ. ಪ್ರಜಾಪ್ರಭುತ್ವದಲ್ಲಿ ಸರ್ಕಾರವನ್ನು ಟೀಕಿಸುವುದು ಅಥವಾ ಆಡಳಿತ ಬದಲಾವಣೆಗೆ ಆಗ್ರಹಿಸುವುದು ಮತ್ತು ಹಿಂಸಾತ್ಮಕವಾಗಿ ವ್ಯವಸ್ಥೆಯನ್ನು ಉರುಳಿಸಲು ಪ್ರಯತ್ನಿಸುವುದು ಎರಡೂ ಬೇರೆ ಬೇರೆ ಎಂಬುದು ಈ ಚರ್ಚೆಯ ಪ್ರಮುಖ ಅಂಶವಾಗಿದೆ.

ಉತ್ತರ ಪ್ರದೇಶ ಸರ್ಕಾರದ ಹೊಸ ಮಾರ್ಗಸೂಚಿಯು ಸರ್ಕಾರಿ ಉದ್ಯೋಗಕ್ಕೆ ಆಯ್ಕೆಯಾದವರ ಹಿನ್ನೆಲೆ ಪರಿಶೀಲನೆಯನ್ನು ಹೆಚ್ಚು ಸ್ಪಷ್ಟ ಮತ್ತು ಸಮಯಬದ್ಧಗೊಳಿಸುವ ಉದ್ದೇಶ ಹೊಂದಿದೆ. ರಾಜಕೀಯ ಅಭಿಪ್ರಾಯ ಅಥವಾ ಎಫ್‌ಐಆರ್ ಒಂದೇ ಕಾರಣಕ್ಕೆ ಉದ್ಯೋಗ ನಿರಾಕರಿಸುವಂತಿಲ್ಲ. ಆದರೆ ಹಿಂಸಾತ್ಮಕ ಚಟುವಟಿಕೆಗಳಲ್ಲಿ ಸಕ್ರಿಯ ಪಾಲ್ಗೊಳ್ಳುವಿಕೆ ದೃಢಪಟ್ಟರೆ ನೇಮಕಾತಿಗೆ ಅಡ್ಡಿಯಾಗಬಹುದು.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ