Ashes 2023: ಆಶಸ್ನಲ್ಲಿ ಹೊಸ ಇತಿಹಾಸ ಬರೆಯಲಿದೆ ಜೇಮ್ಸ್ ಆಂಡರ್ಸನ್- ಸ್ಟುವರ್ಟ್ ಬ್ರಾಡ್ ಜೋಡಿ..!
Ashes 2023: ಆಂಡರ್ಸನ್ ತಮ್ಮ ಟೆಸ್ಟ್ ವೃತ್ತಿಜೀವನದಲ್ಲಿ 700 ವಿಕೆಟ್‌ಗಳನ್ನು ಪೂರೈಸುವ ಹಾದಿಯಲ್ಲಿದ್ದಾರೆ. ಹಾಗೂ ಮತ್ತೊಬ್ಬ ವೇಗಿ ಬ್ರಾಡ್ ಕೂಡ 600 ವಿಕೆಟ್‌ಗಳನ್ನು ಪೂರೈಸುವ ಸನಿಹದಲ್ಲಿದ್ದಾರೆ.
ಈ ಬಾರಿಯ ಆಶಸ್ ಸರಣಿಯ ಮೊದಲ ಪಂದ್ಯ ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾ ನಡುವೆ ಬರ್ಮಿಂಗ್ ಹ್ಯಾಮ್ನಲ್ಲಿ ನಡೆಯುತ್ತಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಇಂಗ್ಲೆಂಡ್ ಮೊದಲು ಬ್ಯಾಟಿಂಗ್ ಮಾಡಿ 393 ರನ್ಗಳಿಗೆ ಮೊದಲ ಇನ್ನಿಂಗ್ಸ್ ಮುಗಿಸಿದೆ. ತಂಡದ ಪರ ರೂಟ್ ದಾಖಲೆಯ ಶತಕ ಸಿಡಿಸಿ ಮಿಂಚಿದರೆ, ಕ್ರೌಲಿ ಹಾಗೂ ಬೈರ್ಸ್ಟೋವ್ ತಲಾ ಅರ್ಧಶತಕ ಬಾರಿಸಿದರು.
ಈಗ ಮೊದಲ ಇನ್ನಿಂಗ್ಸ್ ಆರಂಭಿಸಿರುವ ಆಸ್ಟ್ರೇಲಿಯಾ ದಿನದಾಟದಂತ್ಯಕ್ಕೆ ಯಾವುದೇ ವಿಕೆಟ್ ನಷ್ಟವಿಲ್ಲದೆ 14ರನ್ ಬಾರಿಸಿದೆ. ಇದೀಗ ಎರಡನೇ ದಿನದಾಟ ಕುತೂಹಲ ಕೆರಳಿಸಿದ್ದು, ಇಂಗ್ಲೆಂಡ್ ವೇಗಿಗಳು ಆಸೀಸ್ ಬ್ಯಾಟರ್ಗಳನ್ನು ಯಾವ ರೀತಿ ತಮ್ಮ ಬಲೆಗೆ ಬೀಳಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ.
ಇನ್ನು ಆಶಸ್ ಸರಣಿಯಲ್ಲಿ ಇಂಗ್ಲೆಂಡ್ ತಂಡದ ಹಿರಿಯ ವೇಗಿಗಳಾದ ಜೇಮ್ಸ್ ಆಂಡರ್ಸನ್ ಹಾಗೂ ಸ್ಟುವರ್ಟ್ ಬ್ರಾಡ್ ವಿಶೇಷ ದಾಖಲೆ ನಿರ್ಮಿಸುವ ಅವಕಾಶವಿದ್ದು, ಆಂಡರ್ಸನ್ ತಮ್ಮ ಟೆಸ್ಟ್ ವೃತ್ತಿಜೀವನದಲ್ಲಿ 700 ವಿಕೆಟ್‌ಗಳನ್ನು ಪೂರೈಸುವ ಹಾದಿಯಲ್ಲಿದ್ದಾರೆ. ಹಾಗೂ ಮತ್ತೊಬ್ಬ ವೇಗಿ ಬ್ರಾಡ್ ಕೂಡ 600 ವಿಕೆಟ್‌ಗಳನ್ನು ಪೂರೈಸುವ ಸನಿಹದಲ್ಲಿದ್ದಾರೆ
ಇಂಗ್ಲೆಂಡ್ ತಂಡದ ಪರವಾಗಿ ಟೆಸ್ಟ್ ಮಾದರಿಯಲ್ಲಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಎನಿಸಿಕೊಂಡಿರುವ ಆಂಡರ್ಸನ್, ಇದುವರೆಗೆ ಆಡಿದ 333 ಇನ್ನಿಂಗ್ಸ್‌ಗಳಲ್ಲಿ 685 ವಿಕೆಟ್‌ಗಳನ್ನು ಪಡೆದಿದ್ದಾರೆ. 700 ವಿಕೆಟ್‌ಗಳನ್ನು ಪೂರೈಸಲು ಆಂಡರ್ಸನ್‌ಗೆ 15 ವಿಕೆಟ್‌ಗಳ ಅಗತ್ಯವಿದೆ. ಈ ಬಾರಿ ಆಶಸ್ ಸರಣಿಯಲ್ಲಿ ಆಂಡರ್ಸನ್ ಈ ಮೈಲಿಗಲ್ಲನ್ನು ಪೂರ್ಣಗೊಳಿಸುವ ಸಾಧ್ಯತೆಗಳಿವೆ.
ಹಾಗೆಯೇ ಆಂಡರ್ಸನ್ ತಮ್ಮ ವೃತ್ತಿಜೀವನದಲ್ಲಿ 32 ಬಾರಿ ಐದು ಅಥವಾ ಅದಕ್ಕಿಂತ ಹೆಚ್ಚು ವಿಕೆಟ್ ಪಡೆದಿದ್ದು, 3 ಬಾರಿ 10 ವಿಕೆಟ್ (ಎರಡೂ ಇನ್ನಿಂಗ್ಸ್ಗಳನ್ನು ಸೇರಿ) ಪಡೆದ ದಾಖಲೆ ಬರೆದಿದ್ದಾರೆ.
ಇಂಗ್ಲೆಂಡ್ ಪರ ಅತಿ ಹೆಚ್ಚು ವಿಕೆಟ್ ಪಡೆದವರ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದರುವ ಸ್ಟುವರ್ಟ್ ಬ್ರಾಡ್, 299 ಇನ್ನಿಂಗ್ಸ್‌ಗಳಲ್ಲಿ 582 ವಿಕೆಟ್‌ಗಳನ್ನು ಪಡೆದಿದ್ದಾರೆ. 600 ವಿಕೆಟ್‌ಗಳನ್ನು ಪೂರೈಸಲು ಬ್ರಾಡ್‌ಗೆ 18 ವಿಕೆಟ್‌ಗಳ ಅಗತ್ಯವಿದೆ.
ಈ ಮಾದರಿಯಲ್ಲಿ 15 ರನ್ಗಳಿಗೆ 8 ವಿಕೆಟ್ ಪಡೆದಿರುವುದು ಸ್ಟುವರ್ಟ್ ಬ್ರಾಡ್ ಅವರ ಅತ್ಯುತ್ತಮ ಪ್ರದರ್ಶನವಾಗಿದೆ. ಬ್ರಾಡ್ ಈ ಮಾದರಿಯಲ್ಲಿ 20 ಬಾರಿ ಐದು ಅಥವಾ ಅದಕ್ಕಿಂತ ಹೆಚ್ಚು ವಿಕೆಟ್ ಪಡೆದಿದ್ದರೆ, ಮೂರು ಬಾರಿ 10 ವಿಕೆಟ್ ಪಡೆದಿದ್ದಾರೆ.