Joe Root: ಜೋ ರೂಟ್ ಸಚಿನ್ರ ಸರ್ವಶ್ರೇಷ್ಠ ದಾಖಲೆಯನ್ನು ಮುರಿಯುವುದು ಕಷ್ಟಸಾಧ್ಯ..!
Joe Root: ಶ್ರೀಲಂಕಾ ವಿರುದ್ಧದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಜೋ ರೂಟ್ ಸತತ ಎರಡು ಶತಕಗಳನ್ನು ಬಾರಿಸಿದ್ದಾರೆ. ಈ ಶತಕಗಳೊಂದಿಗೆ ರೂಟ್ ಅವರ ಟೆಸ್ಟ್ ರನ್ 12377 ಕ್ಕೇರಿದೆ. ಅಲ್ಲದೆ ಟೆಸ್ಟ್ ರನ್ ಸರದಾರರ ಪಟ್ಟಿಯಲ್ಲಿ ಇಂಗ್ಲೆಂಡ್ ದಾಂಡಿಗ ಇದೀಗ ಏಳನೇ ಸ್ಥಾನಕ್ಕೇರಿದ್ದಾರೆ. ಅಲ್ಲದೆ ಇದೀಗ ಸಚಿನ್ ತೆಂಡೂಲ್ಕರ್ ಅವರ ದಾಖಲೆ ಮುರಿಯಲು ರೂಟ್ಗೆ ಬೇಕಿರುವುದು 3544 ರನ್ಗಳು ಮಾತ್ರ.
ಇಂಗ್ಲೆಂಡ್ ತಂಡದ ಟೆಸ್ಟ್ ಸ್ಪೆಷಲಿಸ್ಟ್ ಜೋ ರೂಟ್ ಕ್ರಿಕೆಟ್ ಕಾಶಿ ಲಾರ್ಡ್ಸ್ ಮೈದಾನದಲ್ಲಿ ಬ್ಯಾಕ್ ಟು ಬ್ಯಾಕ್ ಸೆಂಚುರಿ ಸಿಡಿಸಿ ಸಂಚಲನ ಸೃಷ್ಟಿಸಿದ್ದಾರೆ. ಈ ಶತಕಗಳೊಂದಿಗೆ ರೂಟ್ ಇಂಗ್ಲೆಂಡ್ ಪರ ಅತ್ಯಧಿಕ ಟೆಸ್ಟ್ ಸೆಂಚುರಿ ಸಿಡಿಸಿದ ಬ್ಯಾಟರ್ ಎನಿಸಿಕೊಂಡಿದ್ದಾರೆ. ಹಾಗೆಯೇ ಇದೀಗ ಟೆಸ್ಟ್ ರನ್ ಸರದಾರರ ಪಟ್ಟಿಯಲ್ಲೂ 7ನೇ ಸ್ಥಾನಕ್ಕೇರಿದ್ದಾರೆ.
ಇನ್ನು ಅಗ್ರಸ್ಥಾನಕ್ಕೇರಲು ಜೋ ರೂಟ್ಗೆ ಬೇಕಿರುವುದು 3544 ರನ್ಗಳು. ಸದ್ಯ 33 ವರ್ಷದ ರೂಟ್ ಇದೇ ಫಾರ್ಮ್ ಮುಂದುವರೆಸಿದರೆ ಸಚಿನ್ ತೆಂಡೂಲ್ಕರ್ ಹೆಸರಿನಲ್ಲಿರುವ 15921 ರನ್ಗಳ ದಾಖಲೆಯನ್ನು ಮುರಿಯಲಿದ್ದಾರೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಆದರೆ ಇದು ಅಂದುಕೊಂಡಷ್ಟು ಸುಲಭವಲ್ಲ. ಏಕೆಂದರೆ ಜೋ ರೂಟ್ ಇನ್ನೂ ಮೂರು ವರ್ಷಗಳ ಕಾಲ ಆಡಿದರೂ, ಇದೇ ಫಾರ್ಮ್ನಲ್ಲಿ ಬ್ಯಾಟಿಂಗ್ ಮಾಡಬೇಕಾಗುತ್ತದೆ. ಅಂದರೆ 50 ರ ಸರಾಸರಿಯಲ್ಲಿ ರನ್ಗಳಿಸಲೇಬೇಕು. ಅಂತಹದೊಂದು ಫಾರ್ಮ್ ಪ್ರದರ್ಶಿಸಿದರೆ ಟೆಸ್ಟ್ ರನ್ ಸರದಾರರ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಬಹುದು.
ಇಲ್ಲಿ ಗಮನಿಸಬೇಕಾದ ಮುಖ್ಯ ಅಂಶ ಎಂದರೆ 265 ಇನಿಂಗ್ಸ್ಗಳ ಬಳಿಕ ಸಚಿನ್ ಹಾಗೂ ಜೋ ರೂಟ್ ಕಲೆಹಾಕಿರುವ ಒಟ್ಟು ರನ್ಗಳು. ಇದೀಗ 265 ಇನಿಂಗ್ಸ್ಗಳನ್ನು ಆಡಿರುವ ಜೋ ರೂಟ್ಗಿಂತ ಸಚಿನ್ ತೆಂಡೂಲ್ಕರ್ ರನ್ಗಳಿಕೆಯಲ್ಲಿ ಮುಂದಿದ್ದರು ಎಂಬುದು ವಿಶೇಷ.
ಸಚಿನ್ ತೆಂಡೂಲ್ಕರ್ 265 ಇನಿಂಗ್ಸ್ಗಳ ಮುಕ್ತಾಯದ ವೇಳೆಗೆ ಒಟ್ಟು 12970 ರನ್ಗಳನ್ನು ಕಲೆಹಾಕಿದ್ದರು. ಅಂದರೆ 54.72ರ ಸರಾಸರಿಯಲ್ಲಿ ರನ್ಗಳಿಸಿದ್ದರು. ಈ ವೇಳೆ 43 ಶತಕ ಹಾಗೂ 54 ಅರ್ಧಶತಕಗಳನ್ನು ಸಹ ಸಿಡಿಸಿದ್ದರು.
ಜೋ ರೂಟ್ 265 ಇನಿಂಗ್ಸ್ಗಳಲ್ಲಿ ಕಲೆಹಾಕಿರುವುದು 12377 ರನ್ಗಳು. ಅಂದರೆ ಈವರೆಗೆ 50.93ರ ಸರಾಸರಿಯಲ್ಲಷ್ಟೇ ರನ್ಗಳಿಸಿದ್ದಾರೆ. ಇನ್ನು ಇದೇ ವೇಳೆ 34 ಶತಕಗಳನ್ನು ಮಾತ್ರ ಬಾರಿಸಿದ್ದಾರೆ. ಇದಾಗ್ಯೂ 64 ಅರ್ಧಶತಕಗಳನ್ನು ಸಿಡಿಸಿದ್ದಾರೆ. ಇಲ್ಲಿ ಸಚಿನ್ಗಿಂತ ರೂಟ್ ಅರ್ಧಶತಕಗಳ ಸಂಖ್ಯೆಯಲ್ಲಿ ಮಾತ್ರ ಮುಂದಿದ್ದಾರೆ.
ಇನ್ನು 265 ಇನಿಂಗ್ಸ್ಗಳ ಮುಕ್ತಾಯದ ಬಳಿಕ ಉಭಯರು ಕಲೆಹಾಕಿದ ರನ್ಗಳಿಕೆಯಲ್ಲಿ ಜೋ ರೂಟ್ಗಿಂತ (12377) ಸಚಿನ್ ತೆಂಡೂಲ್ಕರ್ (12970) 593 ರನ್ಗಳಿಂದ ಮುಂದಿದ್ದರು. ಹೀಗಾಗಿಯೇ ಪ್ರಸ್ತುತ ಫಾರ್ಮ್ ಮುಂದುವರೆಸಿದರೆ ಜೋ ರೂಟ್ಗೆ ಸಚಿನ್ ತೆಂಡೂಲ್ಕರ್ ಅವರ ಸಾರ್ವಕಾಲಿಕ ದಾಖಲೆ ಮುರಿಯುವುದು ಕಷ್ಟಸಾಧ್ಯ ಎನ್ನಬಹುದು. ಇದಾಗ್ಯೂ 33 ವರ್ಷದ ರೂಟ್ ಮುಂದಿನ ನಾಲ್ಕೈದು ವರ್ಷ ಟೆಸ್ಟ್ ತಂಡದಲ್ಲಿ ಮುಂದುವರೆದರೆ ಸಚಿನ್ ತೆಂಡೂಲ್ಕರ್ ಅವರ ಸಾರ್ವಕಾಲಿಕ ದಾಖಲೆಯನ್ನು ತಮ್ಮದಾಗಿಸಿಕೊಳ್ಳಬಹುದು.